Ako Ba Anak sa Dios?
Sa unsang paagi ang matag usa kanato makasinati sa gahum sa panabut sa balaan natong pagkatawo? Magsugod kini sa tinguha sa pag-ila sa Dios, nga atong Amahan.
Bag-o lang mikuyog ko sa pinangga nakong mama sa among karaang chapel nga hinimo sa bato. Nahimuot ko sa gagmayng mga tingog gikan sa samang lawak sa Primary nga akong gitambungan daghang dekada ang milabay, nilakaw ko sa likod ug nakabantay sa mga maamumahong mga lider nga mitudlo sa tema karong tuiga: “Ako Anak sa Dios.”1 Nakapahiyom ko sa paghinumdom sa mapailubon ug mapinanggaong mga magtutudlo, kinsa atol sa among singing time kaniadto, kanunayng motan-aw nako—daw moingon nga kanang sipat nga bata sa tumoy sa bangko, “Siya anak ba gyud kaha sa Dios? Ug kinsa kaha ang mipadala niya dinhi?”2
Akong dapiton kitang tanan sa pag-abli sa atong kasingkasing ngadto sa Espiritu Santo, kinsa “magapanghimatuod uban sa atong espiritu nga kita mga anak sa Dios.”3
Ang mga pulong ni Presidente Boyd K. Packer yano ug bililhon: “Ikaw anak sa Dios. Siya ang amahan sa imong espiritu. Sa espirituhanong paagi ikaw gipakatawo nga madungganon, anak sa Hari sa Langit. Ibutang kana nga kamatuoran sa imong hunahuna ug hupot niini. Bisan unsa ka daghan ang mga henerasyon sa imong mortal nga mga kagikanan, walay igsapayan kon unsa nga kaliwat o katawhan ang imong gi-representar, ang talaan sa kaliwatan sa imong espiritu mahimong isulat sa usa lamang ka linya. Ikaw anak sa Dios!”4
“Kon ikaw … makakita sa atong Amahan,” mihulagway si Brigham Young, “makita nimo ang usa ka binuhat nga dugay na nimong gikaila, ug ikaw Iyang dawaton sa Iyang mga bukton, ug ikaw andam nga mopauraray sa iyang paggakos ug Kaniya mohalok.”5
Ang Dakong Gubat batok sa Balaang Pagkatawo
Nakat-unan ni Moises ang balaan niyang panulundon pinaagi sa atubang nga pagpakig-istorya sa Ginoo. Human niana nga kasinatian, “miabut si Satanas nga nanintal,” uban sa igmat, apan sa binagis nga tuyo sa pagtuis sa pagkatawo ni Moises, “nag-ingon: Moises, anak sa tawo, simba kanako. Ug … si Moises mitan-aw diha kang Satanas ug miingon: Kinsa ikaw? Tan-awa, Ako mao ang usa ka anak sa Dios.”6
Kining dako nga gubat batok sa balaang pagkatawo pintas nga miulbo isip nagkamaayong paagi ni Satanas sa pagguba sa atong gituohan ug kahibalo sa atong relasyon sa Dios. Maayo na lang, kay napanalanginan kita og tin-awng panabut sa atong tinuod nga pagkatawo gikan sa sinugdanan: “Ug miingon ang Dios, Buhaton nato ang tawo sumala sa atong dagway,”7 ug ang Iyang buhi nga mga propeta mipahayag, “Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios.”8
Ang pagkahibalo niini nga mga kamatuoran “uban sa kasiguroan”9 makatabang nga atong mabuntog ang mga pagsulay, mga kasamok, ug mga kasakit sa tanang matang.10 Dihang gipangutana, “Unsaon nato sa pagtabang kadtong nanglimbasug sa [personal nga hagit]?” usa ka Apostol sa Ginoo mitudlo, “Tudloi sila bahin sa ilang pagkatawo ug sa ilang katuyoan.”11
“Ang Pinakagamhanang Kahibalo nga Akong Nabatunan”
Kini nga gamhanang mga kamatuoran nakausab sa kinabuhi sa akong higala nga si Jen,12 kinsa sa pagkatin-edyer maoy hinungdan sa grabing aksidente sa sakyanan. Bisan grabe ang iyang pisikal nga pag-antus, sakit kaayo ang iyang gibati kay namatay man ang laing driver. “Adunay nawad-an og mama, ug kadto akong sayop,” miingon siya. Si Jen, kinsa mga adlaw lang ang milabay mibarug ug mi-recite, “Kita mga anak nga babaye sa atong Langitnong Amahan, kinsa nahigugma kanato,”13 karon nangutana,“Unsaon akoNiya sa paghigugma?”
“Ang pisikal nga pag-antus milabay na,” miingon siya, “ambut lang kon maulian ba ko gikan sa mga emosyunal ug espiritwal nga mga samad.”
Aron makasugakod, giluom ra ni Jen ang iyang mga pagbati, nagpalayo, ug mibaliwala. Human sa usa ka tuig, dihang nakasulti na gyud siya bahin sa aksidente, usa ka dinasig nga tigtambag midapit kaniya nga isulat ang mga pulong “Ako Anak sa Dios” ug isulti kini 10 ka higayon kada adlaw.
“Sayon ra ang pagsulat sa mga pulong,” nahinumdom siya, “apan dili ko kini malitok. … Lisud gayud kaayo kadto, ug wala gyud ko motuo nga ang Dios ganahan nga ako Iyang anak. Motiku-ku ra ko ug mohilak.”
Paglabay sa pipila ka bulan, nakompleto ra gyud ni Jen ang tahas matag adlaw. “Akong gibu-bu ang tibuok nakong kalag,” miingon siya, “nangamuyo sa Dios. … Dayon nagsugod ko nga motuo sa mga pulong.” Kini nga pagtuo nagtugot nga ang Manluluwas nagsugod sa pag-ayo sa samaran nakong kalag. Ang Basahon ni Mormon nagdala og kahupayan ug kaisug.sa Iyang Pag-ula.14
“Gibati ni Kristo ang akong mga kasakit, akong mga kasubo, akong mga sala,” mitapos si Jen. “Akong gibati ang tiunay nga gugma sa Dios ug wala na koy kasinatian nga ingon adto ka gamhanan! Ang kahibalo nga ako anak sa Dios maoy pinakagamhanang kahibalo nga akong nabatunan!”
Pagtinguha nga Makaila sa Dios, nga Atong Amahan
Mga kaigsoonan, sa unsang paagi ang matag usa kanato makasinati sa gahum sa panabut sa balaan natong pagkatawo? Magsugod kini sa tinguha sa pag-ila sa Dios, nga atong Amahan.15 Si Presidente Russell M. Nelson mipamatuod, “Adunay gamhanan kaayong mahitabo kon ang usa ka anak sa Dios magtinguha og dugang nga kahibalo bahin Kaniya ug sa Iyang Hinigugmang Anak.”16
Ang pagkat-on ug pagsunod sa Manluluwas makatabang aron makaila kita sa Amahan. “Ingon nga … tukma nga hulad sa iyang [Amahan],”17 mitudlo si Jesus, “Walay bisan unsa nga arang mabuhat sa Anak sa iyang kaugalingong kabubut-on, gawas lamang sa iyang makita nga ginabuhat sa Amahan.”18 Ang matag pulong ug buhat ni Kristo—nagbutyag sa tinuod nga kinaiyahan sa Dios ug sa atong relasyon Kaniya.19 Gitudlo ni Elder Jeffrey R. Holland nga, “Pinaagi sa dugo nga milugwa gikan sa matag lungag sa panit ug sa naghingutas nga litok sa pagtuaw, Siya ang gipangita ni Kristo kinsa mao kanunay ang Iyang gipangita—ang Iyang Amahan. ‘Abba,’ mituaw Siya, ‘Papa.’”20
Sama sa matinguhaong pagpangita ni Jesus sa Iyang Amahan didto sa Getsemani, mao usab ang batan-ong si Joseph Smith, niadtong 1820, mainampuong nangita sa Dios didto sa Sagradong Kakahoyan. Human mabasa ang “Kon aduna man kaninyoy nakulangan og kaalam, papangayoa siya sa Dios,”21 miadto si Joseph sa pag-ampo.
“Ako miluhod,” misulat siya, “ug “misugod sa pagtugyan sa mga tinguha sa akong kasingkasing ngadto sa Dios. …
“… Ako nakakita og usa ka dako nga gilis sa kahayag ibabaw gayud sa akong ulo. …
“… Ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—[Joseph,] Kini mao ang Akong Hinigugmang Anak. Paminaw Kaniya!”22
Kon sundon nato ang mga ehemplo sa Manluluwas ug ni Propeta Joseph nga matinguhaong nangita sa Dios, masabtan nato sa tukma gayud nga paagi, sama sa gibuhat ni Jen, nga ang atong Amahan nakaila kanato ug kita Iyang mga anak.
Alang sa bag-ong mga inahan, kinsa sa kasagaran nabug-atan ug gisanapan samtang naningkamot sa pagpadako og “henerasyon nga makabatok sa sala,”23 ayaw gayud ipakaubos ang inyong mahinungdanon nga tahas sa plano sa Dios. Sa makaluya nga mga gutlo—tingali samtang naggukod mo sa mga bata ug ang nanimahong sunog ninyong linung-ag nagpasabut nga ang mapinanggaon ninyong giandam nga pagkaon karon sinunog na nga halad—hibaloi ibalaan sa Dios ang pinakalisud ninyong mga adlaw.24 “Ayaw kahadlok; kay ania ako uban kanimo,”25 malinawon Siyang misaad. Kami mopasidungog kaninyo sa inyong pagtuman sa gipangandoy ni Sister Joy D. Jones, sa pag-ingon, “Gikinahanglan nga masabtan sa atong mga anak ang ilang balaan nga pagkatawo.”26
Akong dapiton ang matag usa kanato sa pagpangita sa Dios ug sa Iyang Hinigugmang Anak. “Walay laing dapit,” miingon si Presidente Nelson, “diin kana nga mga kamatuoran mas klaro ug gamhanan ang pagkatudlo kay sa diha sa Basahon ni Mormon.”27 Ablihi ang mga pahina niini ug kat-uni nga ang Dios mibuhat sa “tanan nga butang alang sa [atong] kaayohan ug kalipay”;28 nga Siya “manggiloy-on ug mabination, dili daling masuko, mainantuson ug puno sa kamaayo”;29 ug ang “tanan managsama ngadto [Kaniya].”30 Kon gibati ninyong nasakitan, nawala, nahadlok, nasagmuyo, nasubo, gigutom, o nawad-an sa paglaum tungod sa kalisud sa kinabuhi31—ablihi ang Basahon ni Mormon, ug inyong mahibaloan nga “Dili gayud kita biyaan sa [Dios]. Wala gayud Siya mibuhat niini, ug dili gayud Niya buhaton. Dili Siya makahimo niini. Dili Iyang kinaiya [ang pagbuhat sa ingon].”32
Ang atong pagkaila sa Amahan makausab sa tanan, ilabi na sa atong kasingkasing, samtang ang Iyang maaghup nga Espiritu momatuod sa atong tinuod nga pagkatawo ug talagsaong bili sa Iyang panan-aw.33 Ang Dios magauban kanato sa pagsubay sa dalan sa pakigsaad kon pangitaon nato Siya pinaagi sa maninampuong pagpangamuyo, pagsiksik sa kasulatan ug masulundong pagpaningkamot.
Ang Kahalangdon sa Kinaiya sa Dios—Akong Saksi
Akong gipangga ang Dios sa akong mga ginikanan,34 “Makagagahum nga Ginoong Dios,”35 si kinsa mobakho uban kanato sa atong mga kasubo, mapailubong mopanton sa atong pagkadili matarung, ug magmaya kon kita magtinguha nga “mobiya sa tanan [natong] mga sala aron makaila [Kaniya].”36 Simbahon ko Siya, kinsa mao ang “amahan sa mga ilo,”37 ug kauban sa walay mga kauban. Uban sa pasalamat, mopamatuod ko nga nakaila ako sa Dios, akong Amahan, ug mosaksi sa pagkahingpit, mga hiyas, ug “kahalangdon sa Iyang kinaiya.”38
Aron ang matag usa kanato hingpit nga makasabut ug moalima sa atong “dungganon nga katungod sa pagkatawo”39 isip anak sa Dios pinaagi sa pagkaila Kaniya, “ang bugtong tinuod nga Dios, ug kang Jesukristo nga [Iyang] pinadala”40 maoy bug-os nakong pag-ampo sa pangalan ni Jesukristo, amen.