Tan-awa! Ang Harianon nga Kasundalohan
Pagkamalipayon sa tanang naghupot sa Melchizedek Priesthood nga makabaton sa panalangin sa pagtudlo, pagkat-on, ug pagkuyugay nga moserbisyo.
Akong minahal nga mga kaigsoonan sa priesthood, giubanan og dakong pagpaubos ang akong pagbarug sa inyong atubangan niining makasaysayan nga okasyon, ubos sa sugo sa atong pinalanggang propeta ug Presidente, si Russell M. Nelson. Dako kaayo ang akong gugma ug pagpaluyo niining talagsaong tawo sa Dios ug sa bag-o natong Unang Kapangulohan. Akong idugang ang akong pagsaksi kang Elder D. Todd Christofferson ug sa uban nakong Kaigsoonan sa Korum sa Napulog Duha ka mga Apostoles nga ang gipahibalong mga kausaban niining gabhiona kabubut-on sa Ginoo.
Sigun sa gisulti ni Presidente Nelson, butang kini nga mainampuong gihisgutan ug gihunahuna sa senior nga Kaigsoonan sa Simbahan sulod sa dugayng panahon. Ang tinguha mao ang pagpangita sa kabubut-on sa Ginoo ug paglig-on sa mga korum sa Melchizedek Priesthood. Nadawat ang inspirasyon, ug niining gabhiona gipahibalo sa atong propeta ang kabubut-on sa Ginoo. “Sa pagkamatuod ang Ginoong Dios dili magbuhat sa bisan unsa, gawas kon ang iyang tinago ipadayag niya sa iyang mga alagad ang mga manalagna”!1 Pagkabulahan nato nga aduna kitay buhing propeta karon!
Sa tibuok namong kinabuhi, si Sister Rasband ug ako nakabiyahe sa kalibutan alang sa lain-lain nga buluhatong propesyunal ug sa Simbahan. Akong nakita ang hapit tanang han-ay sa matag unit sa Simbahan: usa ka gamayng branch sa Russia diin ang gidaghanon sa naghupot sa Melchizedek Priesthood maihap ra sa tudlo, ang bag-o ug nagtubo nga ward sa Africa diin ang duha ka high priest ug mga elder nag-abut nga usa ra ka pundok kay diyutay ra ang naghupot sa Melchizedek Priesthood, ug ang estabilisado nang mga ward diin ang gidaghanon sa mga elder kinahanglan nga bahin-bahinon ngadto sa duha ka korum!
Bisan asa kami moadto, nasaksihan namo ang kamot sa Ginoo atubangan sa Iyang mga sulugoon, nag-andam sa katawhan ug sa agianan aron mapanalanginan ang Iyang mga anak sigun sa ilang matag panginahanglan. Dili ba misaad man Siya nga Siya “molakaw diha sa [atong] atubangan” ug “maanaa sa [atong] tuo nga kamot ug sa [atong] wala” ug ang Iyang “Espiritu mahimo nga anaa sa [atong] mga kasingkasing, ug ang [Iyang] mga anghel anaa libut [kanato]”?2
Sa paghunahuna kaninyong tanan, nahinumdom ko sa himno nga “Tan-awa! Ang Harianon nga Kasundalohan.”
Tan-awa’ng! Harianon,
Nga kasundaluhan,
Nagmartsa sa pagbuntog
Ngadto’s panggubatan.
Lig-o’ng nagkahiusa,
Ang kasundalohan,
Sa Pangulo motuman
Nag-awit ang tanan.3
Gitubag ni Elder Christofferson ang pipila ka mga pangutana nga siguradong motumaw gikan sa pahibalo nga ang grupo sa mga high priest ug mga korum sa elder, sa ward nga lebel, itipon na sa usa ka hinugpong, lig-ong kasundalohan sa kaigsoonan sa Melchizedek Priesthood.
Kini nga mga kausaban makatabang sa korum sa mga elder ug sa mga Relief Society nga magkahiusa sa ilang buhat. Mapasayon usab nila ang koordinasyon sa korum kauban sa bishopric ug sa ward council. Ug magtugot kini nga madelegar sa bishop ang mas daghang responsibilidad sa korum sa mga elder ug mga presidente sa Relief Society aron ang bishop ug ang iyang mga magtatambag makatutok sa nag-una nilang mga katungdanan—ilabi na sa pagpangulo sa young women, ug sa young men nga naghupot sa Aaronic Priesthood.
Ang kausaban sa mga organisasyon ug mga function sa Simbahan komon ra. Niadtong 1883, gisultihan sa Ginoo si Presidente John Taylor: “[Kabahin] sa pagdumala ug sa organisasyon sa akong Simbahan ug sa Priesthood … akong ipadayag kaninyo, sa matag karon ug unya, gamit ang pamaagi nga akong gipili, sa tanan nga gikinahanglan alang sa umaabut nga kalamboan ug pagkahingpit sa akong Simbahan, alang sa pag-usab ug pagpadayon sa akong gingharian.”4
Karon, pipila ka pulong alang kaninyo mga kaigsoonan nga mga high priest—hibaloi nga kamo among gihigugma! Ang atong Amahan sa Langit nahigugma kaninyo! Kamo ang dako nga bahin sa harianong kasundalohan sa priesthood, ug dili kita makapadayon niini nga buhat nga wala ang inyong kamaayo, serbisyo, kasinatian, ug pagkamatarung. Mitudlo si Alma nga ang kalalakin-an tawagon nga mga high priest tungod sa hugot nilang pagtuo ug maayo nga mga buhat sa pagtudlo ug pagpangalagad sa uban.5 Kana nga kasinatian mas gikinahanglan karon kay sa kaniadto.
Diha sa daghang ward, posibling duna kitay mga high priest kinsa may oportunidad na karon nga mapangulohan sa usa ka elder isip ilang presidente sa korum. May sumbanan na kita nga ang mga elder mangulo sa mga high priest sa pagkakaron dunay mga elder nga nagserbisyo isip mga branch president sa ubang mga rehiyon sa kalibutan diin ang mga high priest nagpuyo sa branch, ug dunay mga branch diin ang korum sa mga elder ra ang naorganisar ug anaay mga high priest.
Pagkamalipayon sa tanang Melchizedek Priesthood nga makabaton sa panalangin sa pagtudlo, pagkat-on, ug pakigtambayayong sa tanang miyembro sa ilang ward. Bisan asa kamo ug unsay inyong mga kahimtang, dapiton ko kamo sa mainampuon, matinud-anon, ug malipayong paagi sa pagdawat sa bag-ong mga oportunidad nga mangulo o mapangulohan ug maghugpong sa pagserbisyo isip hut-ong sa mga kaigsoonan sa priesthood.
Akong hisgutan karon ang uban pang mga butang nga nagkinahanglan og katin-awan, samtang padayon natong iimplementar ang kabubut-on sa Ginoo kabahin sa organisasyon sa Iyang mga korum sa balaang priesthood.
Unsa ang mga kausaban sa mga korum sa high priest sa stake? Ang mga korum sa high priest sa stake magpadayon sa pag-function. Ang mga kapangulohan sa stake padayong magserbisyo isip kapangulohan sa korum sa mga high priest sa stake. Hinoon, sigun sa gipahinumdom ni Elder Christofferson, ang mga sakop sa korum sa mga high priest sa stake karon maglangkob na sa mga high priest nga kasamtangang nagserbisyo sa stake presidency, isip mga sakop sa bishopric sa ward, isip mga sakop sa stake high council, ug sa functioning nga patriarch. Ang mga klerk sa ward ug stake ug ang mga executive secretary dili mga sakop sa korum sa mga high priest sa stake. Kon ang tawo nga aktibong nagserbisyo isip high priest, patriarch, Seventy, o Apostol mobisita sa ward ug gustong motambong og miting, makigtagbo siya sa korum sa mga elder.
Kon ang mga kaigsoonan nga ania niini nga mga calling ma-release sa dagan sa panahon, mobalik sila sa ilang unit isip mga sakop sa korum sa mga elder.
Unsa ang tahas sa korum sa mga high priest sa stake? Ang stake presidency makigtagbo sa mga sakop sa korum sa mga high priest aron sa pagpakigtambag, sa pagpamatuod, ug paghatag og training. Ang mga miting sa stake nga gi-outline sa atong mga handbook magpadayon uban sa duha ka kausaban:
Una, ang mga ward ug stake dili na maghimo og mga priesthood executive committee miting. Kon may espesyal nga problemang motumaw sa ward sama sa seryusong isyu sa pamilya o dili kasarangan nga hagit sa panginahanglan, pwede ra kining mahisgutan sa dugang nga miting sa bishopric. Ang uban nga dili kaayo sensitibong mga hilisgutan pwede rang hisgutan sa ward council. Ang nailhan kaniadto nga stake priesthood executive committee meeting karon tawagon na og “high council meeting.”
Ikaduha, ang tinuig nga miting sa tanang na-orden nga high priest sa stake dili na ipahigayon. Hinoon, ang kapangulohan sa stake magpadayon sa paghimo og tinuig nga miting sa mga korum sa high priest sa stake nga gipahibalo karon.
Ang usa ka ward posible bang dunay sobra sa usa ka korum sa mga elder? Ang tubag oo. Sa pagsunod sa sanglitanan diha sa Doktrina ug mga Pakigsaad seksyon 107, bersikulo 89, kon ang ward may dili kasarangan nga gidaghanon sa aktibong mga Melchizedek Priesthood, mahimo rang mag-organisar ang mga lider og sobra sa usa ka korum sa mga elder. Sa ingon niini nga sitwasyon, ang matag korum adunay makatarungan nga balanse base sa pangidaron, kasinatian, ug katungdanan [office] sa priesthood ug kalig-on.
Mopamatuod ko nga samtang magpadayon kita niining dinasig nga paghan-ay sa atong mga ward ug stake, atong makita ang daghang panalangin. Akong isulti ang pipila lang ka mga ehemplo.
Ubos sa direksyon sa bishop, mas daghang kapanguhaan sa priesthood ang makaabag sa buhat sa kaluwasan. Maglakip kini sa pagpundok sa Israel pinaagi sa templo ug buhat sa family history, pakigtambayayong sa mga pamilya ug mga indibidwal nga nanginahanglan, ug pagtabang aron makadala og mga kalag ang mga misyonaryo ngadto kang Jesukristo.
Samtang ang kanhi nangulo nga mga lider mobalik sa pagpaambit sa ilang kasinatian diha sa korum sa mga elder, moresulta ang mas lig-on nga kasakopan sa korum.
Anaa ang mas dagkong panaglahi sa mga gasa ug kapasidad sulod sa korum.
Anaa ang mas dako nga pagka-mailin-ilinon ug pagkaadunay panahon sa pag-atubang sa dinaliang panginahanglan sa ward ug korum ug pagtuman sa managlahing buluhaton sa pagpangalagad.
Anaa ang malamboon nga paggiya ug panaghiusa samtang ang bag-ong elder ug sinati na nga high priest mag-inambitay sa mga kasinatian, magtambayayong, diha sa mga miting sa korum ug mga buluhaton.
Ang mga bishop ug mga presidente sa branch gawasnon na sa pag-atiman sa ilang mga calling sa pagbantay sa ilang mga karnero ug pagpangalagad sa nanginahanglan.
Nakasabut kami nga ang matag ward sa stake magkalahi. Samtang gisabut kini nga panaglahi, malaumon kami nga sundon ninyo kini nga mga kausaban diha-diha dayon human niini nga komperensya. Gihatagan kita og direksyon sa usa ka propeta sa Dios! Pagkadakong panalangin ug responsibilidad. Tumanon nato kini sa tanang pagkamatarung ug kakugi!
Akong ipahinumdom kaninyo: nga ang awtoridad sa priesthood moabut pinaagi sa pag-set apart ug pag-orden, apan ang tinuod nga gahum sa priesthood, ang gahum sa paglihok sa ngalan ni Ginoong Jesukristo, moabut lamang pinaagi sa matarung nga pagpakabuhi.
Mipahayag ang Ginoo kang Propeta Joseph Smith, propeta sa Pagpahiuli:
“Tan-awa, ug sud-onga, Ako moalima sa inyong mga panon, ug mopasanay og mga anciano [elder] ug ipadala ngadto kanila.
“Tan-awa, Ako modali sa akong buluhaton diha sa iyang angay nga panahon.”6
Sa pagkatinuod, kini ang panahon nga nagpadali ang Ginoo sa Iyang buhat.
Gamiton nato kini nga oportunidad sa pagpamalandong ug pagpalambo sa atong kinabuhi aron mas masubay kini sa Iyang kabubut-on aron maangayan kita sa daghang panalangin nga Iyang gisaad alang sa matinuoron ug matinud-anon.
Kaigsoonan, salamat sa tanan ninyong gibuhat nga mahimong kabahin niining talagsaong buhat. Hinaot nga magpadayon kita niining dako ug dungganong kawsa.
Kon gubat mahuman na,
Kasamok wala na,
Kon tanan maghiusa
Ngad-to’s panggubatan,
Sa Haring mahangturon,
Ang gamhanang panon
Moday’g sa Iyang ngalan,
Kini ang awiton:
Modaug, modaug,
Tungod sa Ginoo!
Modaug, modaug,
Pinaagi’ng Kristo!
Modaug, modaug, modaug,
Pinaagi’ng Kristo!7
Karon kitang tanan mobarug nga mga saksi sa Ginoo nga nagpadayag sa Iyang kabubut-on pinaagi sa Iyang propeta, si Presidente Russell M. Nelson. Mopamatuod ko nga propeta siya sa Dios dinhi sa yuta. Mohatag ko sa akong pagsaksi bahin ni Ginoong Jesukristo, kinsa mao ang atong talagsaong Manunubos ug Manluluwas. Iya kini nga buhat, ug Iya kini nga kabubut-on, diin ako mohatag sa ligdong nga pagpamatuod sa ngalan ni Jesukristo, amen.