Young Women nga anaa sa Buhat
Matag batan-ong babaye sa Simbahan kinahanglan nga mobati og bili, makaangkon og mga oportunidad sa pagserbisyo, ug mobati nga siya adunay mapuslanon nga natampo niining buhat.
Usa ka tuig ang milabay, sa komperensya sa kinatibuk-ang sesyon sa priesthood, si Bishop Gérald Caussé namulong ngadto sa kalalakin-an sa Simbahan nga naghulagway kon sa unsang paagi ang mga tighupot sa Aaronic ug Melchizedek Priesthood dili magkabulag diha sa paghimo sa buhat sa kaluwasan.1 Kana nga mensahe nahimong usa ka dakong panalangin sa pagtabang sa batan-ong mga lalaki kinsa naghupot sa Aaronic Priesthood nga makita ang bahin sa ilang tahas sa pagtukod sa gingharian sa Dios dinhi sa yuta. Ang ilang hiniusang pagserbisyo nagpalig-on sa Simbahan ug nagdala og mas lawom nga pagkakabig ug pasalig diha sa mga kasingkasing sa atong batan-ong mga lalaki samtang ilang nakita ang bili sa ilang kontribusyon ug kon unsa katalagsaon niini nga buhat.
Karon ganahan ko nga idugang ang akong pakigpulong niana nga mensahe samtang mag-istorya ko kon sa unsang paagi ang kababayen-an sa Simbahan kinsa managsamang gikinahanglan usab ug importante sa pagtuman sa buhat sa Ginoo diha sa ilang mga pamilya ug sa Iyang Simbahan.
Sama ni Bishop Caussé, nagpuyo ko sa usa ka gamayng branch sa Simbahan sa tin-edyer pa ako, ug sa kanunay gihangyo ko sa pagtuman sa akong mga assignment ug mga calling nga unta buhaton sa mga hamtong. Pananglitan, kami nga naa sa programa sa kabatan-onan kanunayng maoy manguna sa pagtabang sa pag-organisar ug paghimo sa among mga kalihokan ug sa espesyal nga mga kahimoan. Magsulat kami og mga drama-drama, naghimo og usa ka singing group nga molingaw sa mga kalihokan sa branch, ug hingpit nga mga partisipante sa kada miting. Natawag ko nga mahimong lider sa musika sa branch ug mangulo sa pagkanta sa mga miting sa sakrament matag semana. Nindot kadto nga kasinatian para sa usa ka 16 anyos nga mobarug sa atubangan sa tanan diha sa branch kada Dominggo ug mangulo kanila sa pag-awit sa mga himno. Akong gibati nga gikinahanglan ug nasayud nga ako adunay ikatampo. Ang mga tawo misalig kanako nga maanaa didto, ug ganahan ko nga mobati nga mapuslanon. Kana nga kasinatian nakatabang nga makaugmad sa akong pagpamatuod ni Jesukristo, ug sama sa nahimo niini alang ni Bishop Caussé, nakahatag kini og pundasyon sa akong kinabuhi sa ebanghelyo sa pagserbisyo.
Ang matag miyembro kinahanglan nga masayud kon unsa sila ka kinahanglanon. Ang matag tawo adunay importanting butang nga ikatampo ug adunay talagsaong mga talento ug abilidad nga makatabang sa pagpadayon niining importante nga buhat. Ang atong batan-ong kalalakin-an adunay katungdanan sa Aaronic Priesthood nga gihulagway sa Doktrina ug mga Pakigsaad nga kanunayng makita. Mahimong dili kaayo kini maklaro sa batan-ong mga babaye sa Simbahan, sa ilang mga ginikanan, ug sa ilang mga lider nga, gikan sa panahon nga sila nabunyagan, ang batan-ong mga babaye adunay pakigsaad nga mga responsibilidad sa “pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan, ug mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga [sila] mahimo nga maanaa, bisan hangtud sa kamatayon.”2 Ang batan-ong mga babaye adunay oportunidad sa pagtuman niini nga mga responsibilidad sa ilang mga ward ug mga branch ug kon sila nagserbisyo sa kapangulohan sa klase, sa mga konseho sa kabatan-onan, ug sa ubang mga calling. Matag batan-ong babaye sa Simbahan kinahanglan nga mobati og bili, makaangkon og mga oportunidad sa pagserbisyo, ug mobati nga siya adunay mapuslanon nga natampo niining buhat.
Sa Handbook 2, atong mahibaloan nga ang buhat sa kaluwasan sulod sa atong ward naglakip sa “misyonaryong buhat sa mga miyembro, retensyon sa kinabig, pagpaaktibo sa dili kaayo aktibo nga mga miyembro, buhat sa templo ug family history, ug pagtudlo sa ebanghelyo.”3 Kini nga buhat gidumala sa atong matinud-anong mga bishop, kinsa naghupot sa yawe sa priesthood sa ilang ward. Sulod sa daghang katuigan karon, ang atong kapangulohan nangutana, “Hain man niining mga dapit nga nahisgutan nga wala kinahanglana nga maapil ang atong batan-ong kababayen-an?” Ang tubag mao nga sila adunay butang nga ikatampo sa tanang aspeto niini nga buhat.
Pananglitan, bag-ohay lang nakong nahimamat ang pipila ka batan-ong kababayen-an sa Las Vegas area nga gitawag sa pagserbisyo isip mga ward temple ug family history consultant. Puno sila sa kadasig nga makatudlo ug makatabang sa mga miyembro sa ilang ward nga makakaplag sa ilang mga katigulangan. Sila adunay bililhong kahanas sa computer, nakakat-on unsaon sa paggamit sa FamilySearch, ug naghinam-hinam nga mopakigbahin niana nga kahibalo ngadto sa uban. Maklaro nga sila adunay mga pagpamatuod ug salabutan sa kaimportante sa pagpangita sa mga pangalan sa atong patay na nga mga katigulangan aron ang mahinungdanong makaluwas nga mga ordinansa mapahigayon alang kanila sulod sa templo.
Pipila ka bulan ang milabay, aduna koy oportunidad sa pagtesting sa usa ka ideya uban sa duha ka 14 anyos nga batan-ong mga babaye. Nakakuha ko og kopya sa duha ka aktwal nga mga agenda sa ward council ug mihatag ni Emma ug Maggie sa matag kopya. Mihangyo ko nila sa pagbasa sa mga agenda ug tan-awon kon aduna bay mga action item gikan sa mga ward council nga mahimo silang makaserbisyo. Nakita ni Emma nga adunay bag-ong pamilya nga nibalhin sa ward, ug miingon siya nga makatabang siya nila sa pagpamalhin ug mopahimutang. Nagtuo siya nga mahimo niyang mahigala ang mga anak diha sa pamilya ug ilibut sila sa bag-o nilang eskwelahan. Nakita niya nga dunay umaabut nga panihapon sa ward ug mibati nga dunay daghang lain-laing paagi nga makadalit siya sa iyang mga pagserbisyo.
Nakita ni Maggie nga dihay pipila ka tigulang nga mga tawo sa ward kinsa nagkinahanglan og mga pagbisita ug sa pag-fellowship. Miingon siya nga ganahan siya nga mobisita ug makatabang ngadto niining talagsaong tigulang nga mga miyembro. Gibati usab niya nga siya makatabang sa pagtudlo sa mga miyembro sa ward kon unsaon sa paghimo ug paggamit sa mga social media account. Sa tinuoray walay usa ka butang diha sa mga agenda nga kadtong duha ka batan-ong mga babaye dili makatabang!
Kadto bang anaa sa ward council, o naghupot sa bisan unsang calling sa ward, nagtan-aw sa batan-ong mga babaye isip bililhong kapanguhaan sa pagtubag sa daghang panginahanglan sa atong mga ward? Kasagaran adunay taas nga listahan sa mga sitwasyon nga nagkinahanglan og tawo nga makaserbisyo, ug kanunay lang kitang maghunahuna sa mga hamtong sa ward nga maoy motubag niadtong mga panginahanglan. Sama nga ang atong mga tighupot sa Aaronic Priesthood gidapit sa paghago uban sa ilang mga amahan ug sa ubang kalalakin-an sa Melchizedek Priesthood, ang atong batan-ong mga babaye mahimong tawagon aron makaserbisyo ug makaalagad sa mga panginahanglan sa mga miyembro sa ward kauban sa ilang mga inahan o sa ubang maayong mga sister. Angayan sila, matinguhaon, ug andam sa paghimo og mas daghan pa kay sa magsimba lang sa Dominggo!
Samtang magkonsiderar kita sa mga katungdanan nga atong gilauman nga huptan sa atong batan-ong mga babaye sa umaabot nga adlaw, tingali makapangutana kita sa atong kaugalingon kon unsang matang sa kasinatian ang atong ikahatag nila karon nga makatabang sa ilang pagpangandam nga mahimong mga misyonaryo, mga eskolar sa ebanghelyo, mga lider sa mga auxiliary sa Simbahan, mga worker sa templo, mga asawa, mga inahan, mga tigtudlo, mga ehemplo, ug mga higala. Makasugod gayud sila karon sa pagpuno sa daghan nga mga tahas. Ang kabatan-onan kanunayng gihangyo sa pagtabang sa pagtudlo og mga leksyon sa Dominggo sa ilang mga klase. Anaa na karon ang mga oportunidad sa atong batan-ong mga babaye sa pagserbisyo sa templo nga nakompleto na sa mga ordinance worker o mga boluntaryo kon sila motambong sa templo uban sa ilang grupo sa kabatan-onan sa pagpahigayon og bunyag alang sa mga patay. Ang atong mga batang babaye sa Primary karon gidapit na sa pagtambong sa mga miting sa Temple ug Priesthood Preparation, diin makatabang nila nga makasabut nga importante usab sila nga mga partisipante sa buhat nga gisugo sa priesthood. Makat-on sila nga ang mga lalaki, mga babaye, kabatan-onan ug mga bata mao ang tanan nga mga tigdawat sa mga panalangin sa priesthood ug ang tanan makakuha og aktibong bahin sa pag-abante sa buhat sa Ginoo.
Mga bishop, nasayud kami nga ang inyong mga katungdanan kasagaran bug-at, apan sama sa usa sa inyong pinakaprayoridad mao ang pagdumala sa korum sa Aaronic Priesthood, gipasabut sa Handbook 2 nga “ang bishop ug ang iyang mga magtatambag mosangkap og priesthood nga pagpangulo alang sa organisasyon sa Young Women. Sila mobantay ug molig-on sa indibidwal nga batan-ong mga babaye, makigtambayayong sa mga ginikanan ug mga lider sa Young Women niini nga paningkamot.” Nag-ingon usab kini nga, “ang bishop ug ang iyang mga magtatambag regular nga moapil sa mga miting sa Young Women, sa pagserbisyo, ug sa mga kalihokan.”4 Mapasalamaton kami sa mga bishop nga mogahin og panahon sa pagbisita sa klase sa Young Women ug kinsa naghatag og oportunidad sa batan-ong mga babaye sa ilang ward nga mas labaw pa kay sa mga tumatan-aw sa buhat. Salamat sa pagsiguro nga ang inyong batan-ong mga babaye adunay bili nga mga partisipante sa pagtubag sa panginahanglan sa mga miyembro sa ward! Kini nga mga oportunidad sa pagserbisyo sa makahuluganong paagi mopanalangin nila og labaw pa kay sa mga kalihokan nga nagpalingaw lang kanila.
Kaninyo, batan-ong mga babaye sa Simbahan, ang inyong mga tuig sa pagka tin-edyer mahimong busy ug kasagaran lisud. Nakamatikod kami nga mas daghan kaninyo ang nanglimbasug sa problema sa bili sa kaugalingon, kabalaka, grabe nga kaluya, ug tingali bisan sa depresyon. Ang paghunahuna og una sa uban, imbis mabalaka sa inyong kaugalingong mga problema, mahimong dili makasulbad sa tanan niining mga isyu, apan ang pagserbisyo kasagaran mopagaan sa inyong palas-anon ug mohimo sa inyong mga hagit nga ingon og dili kaayo lisud. Usa sa pinakamaayong paagi sa pagpalambo sa mga pagbati sa bili sa kaugalingon mao ang pagpakita, pinaagi sa atong pagpakabana ug pagserbisyo sa uban, nga kita adunay dakong bili nga ikatampo.5 Awhagon ko kamo batan-ong nga babaye sa pagboluntaryo ug patrabahoa kanang mga kamot kon makakita kamo og mga panginahanglan sa inyong palibut. Sa inyong pagtuman sa mga responsibilidad sa pakigsaad ug pag-apil sa pagtukod sa gingharian sa Dios, ang mga panalangin moabut sa inyong kinabuhi ug inyong madiskobrehan ang lawom ug malungtarong kalipay sa pagkadisipulo.
Mga kaigsoonan, ang atong batan-ong mga babaye mga talagsaon. Sila adunay mga talento, walay kinutuban nga mga kahinam ug kusog, ug sila manggiloy-on ug mapinanggaon. Sila gustong moserbisyo. Nagkinahanglan silang masayud nga bililhon sila ug mahinungdanon sa buhat sa kaluwasan. Sama nga ang batan-ong mga lalaki giandam diha sa Aaronic Priesthood alang sa mas mahinungdanong pagserbisyo kon sila ma-advance na sa Melchizedek Priesthood, ang atong batan-ong mga babaye nag-andam nga mahimong mga sakop sa pinakadakong organisasyon sa mga babaye dinhi sa yuta—ang Relief Society. Kining mga matahum, lig-on, matinud-anon nga batan-ong mga babaye ug batan-ong mga lalaki nangandam nga mahimong mga asawa ug mga bana, ug mga inahan ug mga amahan kinsa mopasanay og mga pamilya nga takus sa celestial nga gingharian sa Dios.
Ako mopamatuod nga ang buhat sa atong Langitnong Amahan mao ang pagpahinabo sa imortalidad ug kinabuhing dayon sa Iyang mga anak.6 Ang atong bililhong batan-ong mga babaye adunay importanting papel sa pagtabang sa pagtuman niining mahinungdanong buhat. Sa ngalan ni Jesukristo, amen.