“Genesis 3–4; Moises 4–5,” Mga Tabang sa Kasulatan: Daang Tugon (2025)
Mga Tabang sa Kasulatan
Genesis 3–4; Moises 4–5
Sa kinabuhi sa wala pa dinhi sa yuta, gituman ni Jesukristo ang kabubut-on sa Langitnong Amahan ug napili ingon nga atong Manluluwas. Gitinguha ni Satanas nga gub-on ang kabubut-on sa tanang tawo. Iyang gitental si Adan ug si Eva sa Tanaman sa Eden, nga misangpot sa Pagkapukan. Human kaona ni Adan ug Eva ang gidili nga bunga, nakaamgo sila nga sila hubo ug misulay sa pagtago gikan sa Dios. Gitudloan sa Ginoo si Adan ug Eva sa mga sangputanan sa Pagkapukan. Iya usab silang gisininaan ug gihatagan sa balaod sa pagsakripisyo, nga nagsimbolo sa maulaong sakripisyo ni Jesukristo. Naglipay si Adan ug Eva diha kang Kristo ug gisugdan ang tawhanong pamilya. Gipatay ni Cain si Abel ug gitunglo siya. Nagkabahinbahin ang kaliwat ni Adan ug Eva tungod kay gidawat sa pipila ang ebanghelyo apan ang uban wala.
Mga Kapanguhaan
Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.
Background ug Konteksto
Sa unsang paagi mirebelde si Satanas sa Konseho sa Langit?
Sa premortal nga Konseho sa Langit, gipresentar sa Langitnong Amahan ang Iyang plano sa kaluwasan. Si Elder Neal A. Maxwell miingon nga kini nga konseho “dili mao ang usa ka panagtigom nga walay basihan, ni usa kadto ka panaghisgutanay tali sa mga plano, ni usa ka makapamugna og ideya nga sesyon, kon unsaon paghimo sa plano alang sa kaluwasan ug sa pagtuman niini. Ang plano sa atong Amahan nahibaloan, ug ang aktwal nga pangutana mao ang kon kinsa ang ipadala sa Amahan aron mopatuman sa plano.”
Si Jesukristo, ang “Hinigugma ug Pinili sukad sa sinugdanan,” mipaluyo sa plano sa Langitnong Amahan. Siya miingon, “Amahan, ang imong pagbuot mao ang matuman, ug ang himaya imo sa kahangturan.” Ingon nga pagrebelde, si Satanas misugyot og alternatibo sa gihimong plano sa Amahan. Siya “nagtinguha sa paglaglag sa kabubut-on sa tawo” ug kuhaon ang trono sa Dios.
The Grand Council [Ang Dakong Konseho], ni Robert T. Barrett
Genesis 3:1–5; Moises 4:5–11
Naghatag ba ang Dios og managsumpaki nga mga sugo kang Adan ug Eva diha sa Tanaman sa Eden?
(Itandi ang Genesis 1:28; 2:16–17; Moises 2:28; 3:16–17; Abraham 4:28; 5:12–13.)
Gipakita sa asoy ni Adan ug Eva ang morag managsumpaki nga mga sugo gikan sa Dios. Gisugo Niya sila nga manganak, pero gidid-an usab Niya sila nga mokaon sa bunga sa kahoy sa kahibalo sa maayo ug daotan. Ang pagkaon sa gidiling bunga makapahimo nila ni Adan ug Eva nga mortal ug makabaton og mga anak.
Si Presidente Joseph Fielding Smith mipatin-aw, “Karon mao ni ang akong pagsabot sa [Moises 3:16–17]: Giingnan sa Ginoo si Adan, mao kini ang kahoy sa kahibalo sa maayo ug daotan. Kon gusto nimong magpabilin dinhi, nan dili nimo pwedeng kaonon ang bunga. Kon gusto nimong magpabilin dinhi, did-an ka Nako sa pagkaon niini. Apan pwede kang molihok sa imong kaugalingon, ug pwede nimong kaonon kon gusto nimo. Ug kon mokaon ka, mamatay ka.”
Ang Pagkapukan ni Adan ug Eva maoy kinahanglanong bahin sa plano sa kaluwasan sa Langitnong Amahan, apan mipaila lang kini sa kalibotan pinaagi sa paggamit sa kabubut-on. Si Presidente Boyd K. Packer miingon, “Dihay daghang mga isyu sa pagpahibalo sa tawo ngadto sa pagkamortal pinaagi sa kusog. Kana nakasupak sa balaod nga importante sa plano.”
Ang plano sa Dios nga tubson si Adan ug Eva human nila pilia nga mokaon sa gidili nga bunga naglakip sa pagpadala sa Iyang anak ingon nga Manluluwas. Tungod sa Pag-ula ni Jesukristo, sila—ug ang tanang anak sa Dios—makakat-on gikan sa ilang mga kasinatian (apil sa ilang mga sayop ug mga sala) nga dili mahimong hinukman tungod niini. Busa, pinaagi sa kaugalingon nilang pagpili, misulod si Adan ug Eva sa mortalidad, nakakat-on sa ilang kaugalingon sa kalainan sa maayo ug daotan, ug nakasinatig kalipay sa katubsanan pinaagi ni Jesukristo.
Genesis 3:1–6; Moises 4:5–12
Sa unsang paagi namatay si Adan ug Eva human mikaon sa bunga?
Ang Dios misulti ngadto ni Adan nga mamatay siya kon iyang kaonon ang bunga sa kahoy sa kahibalo sa maayo ug daotan. Human kaona ni Adan ug Eva ang gidiling bunga, nagpadayon silang buhi, pero gipugos sila sa pagbiya sa tanaman ug sa presensiya sa Ginoo, hinungdan nga nag-antos sila sa espirituhanong kamatayon. Dugang pa, dihang napukan sila, nausab ang ilang mga lawas sa mortal nga kahimtang, ug sa ngadto-ngadto nakasinatig pisikal nga kamatayon.
Genesis 3:6; Moises 4:12
Sala ba ang pagkaon ni Adan ug Eva sa gidili nga bunga?
Daghang tawo ang nagtuo nga nakabaton og seryuso nga sala si Adan ug Eva pinaagi sa pagkaon sa gidili nga bunga sa kahoy sa kahibalo sa maayo ug daotan. Ang gipahiuli nga ebanghelyo naghatag og laing panglantaw.
Si Presidente Russell M. Nelson mitudlo: “Si Eva ang atong mahimayaong Inahan—uban sa iyang impluwensyal nga panglantaw sa plano sa atong Langitnong Amahan—ang mipasiugda sa unsay atong gitawag nga ‘ang Pagkapukan.’ Ang iyang maalamon ug maisogon nga pagpili ug ang desisyon ni Adan sa pagsuporta mipauswag sa plano sa kalipay sa Dios. Sila mihimo niini nga posible alang sa matag usa kanato nga makaanhi sa kalibutan, pagdawat og lawas, ug mopamatuod nga kita mopili nga mobarog alang kang Jesukristo karon, sama sa atong gibuhat sa wala pa dinhi sa kalibutan.”
Gishisgotan ni Presidente Dallin H. Oaks ang kalainan sa sala ug sa kalapasan. Siya mitudlo: “[Ang] gisugyot nga kalahian tali sa sala ug sa kalapasan nagpahinumdom kanato sa maayong pagkahan-ay sa pulong diha sa ikaduhang artikulo sa hugot nga pagtuo: ‘Kami nagtuo nga ang mga tawo pagasilotan sa ilang kaugalingon nga mga sala, ug dili tungod sa mga kalapasan’ ni Adan (pagpasiugda gidugang). Nagpahinumdom usab kini kanato sa usa ka pamilyar nga panaglahi sa balaod. Ang ubang mga binuhatan, sama sa pagpatay, mga krimen tungod kay sayop gayud kini. Ang ubang mga binuhatan, sama sa pagnegosyo nga walay pagtugot, mga krimen lamang tungod kay kini legal nga gidili. Ubos niining mga kalahian, ang buhat nga miresulta sa Pagkapukan dili sala——sayop lang—pero usa ka kalapasan–—sayop tungod kay pormal kining gidili. Kini nga mga pulong wala gamita kanunay aron sa pag-ila sa butang nga lahi, apan kini nga kalainan mas makahuloganon kon mahitungod sa Pagkapukan.”
Genesis 3:15; Moises 4:21
Kinsa ang binhi sa babaye?
Ang binhi sa babaye nagtumong ni Jesukristo, nga kaliwat ni Eva ug Adan. Gipahayag sa Dios nga samaran ni Jesukristo ang ulo ni Satanas, samtang ang tikod lang sa Manluluwas ang mahimong samaran ni Satanas. Kini nga pahayag nagpakita sa gahom ni Jesukristo batok ni Satanas, bisag misulay si Satanas nga mosukol batok sa Manluluwas ug ang Iyang buhat.
Genesis 3:16; Moises 4:22
Unsay ipasabot sa giingon nga si Adan mao ang “magmando” ni Eva?
Sagad masaypan og sabot kini nga tudling sa kasulatan nga gitugotan sa Dios ang bana nga mahimong dominante o tigkontrol, kini dili tinuod. Si Presidente Spencer W. Kimball miingon: “Naa koy pangutana bahin sa pulong nga pagmando. Pwede ning masaypan og sabot. Mas ganahan ko nga gamiton ang pulong nga magdumala.”
Sa atong panahon, ang mga propeta nagtudlo nga kinahanglang lantawon sa bana ug asawa ang usag usa ingon nga patas nga magka-partner. Si Elder Ulisses Soares mitudlo: “Walay taas o ubos diha sa relasyon sa kaminyoon, ug walay maglakaw nga mag-una o maulahi sa usa. Sila tupad nga maglakaw, isip parehas, ang balaanong mga anak sa Dios. Sila mahimong usa sa hunahuna, tinguha, ug katuyoan uban sa atong Langitnong Amahan ug ni Jesukristo, manag-uban sa pagdumala ug paggiya sa yunit sa pamilya.”
Genesis 3:21; Moises 4:27
Unsa ang kahulogan sa pagpasul-ob sa Dios kang Adan ug Eva og mga kupo nga mga panit?
Ang mga kupo nga mga panit nga gihatag sa Dios kang Adan ug Eva naay lawom nga simbolikanhong kahulogan—simbolo nga girepresentaran sa balaang mga garment nga madawat nato pinaagi sa pagtuga sa templo. Si Sister J. Anette Dennis, Unang Magtatambag sa Kinatibuk-ang Kapangulohan sa Relief Society, mitudlo: “Sa dihang si Adan ug Eva mikaon sa prutas ug kinahanglan nga mobiya sa Tanaman sa Eden, sila gihatagan og mga sapot nga panit aron itabon nila. Adunay kalagmitan nga may hayop nga gisakripisyo aron mahimo kadtong mga sapot nga panit—nagsimbolo sa kaugalingon nga sakripisyo sa Manluluwas alang kanato. Ang Kaphar usa ka sukaranang Hebreo nga pulong alang sa pag-ula, ug usa sa mga kahulogan niini mao ‘ang pagtabon.’ Ang atong garment sa templo nagpahinumdom kanato nga ang Manluluwas ug ang mga panalangin sa Iyang Pag-ula magtabon kanato sa tibuok natong kinabuhi. Samtang atong gisul-ob ang garment sa balaan nga pagkapari matag adlaw, kanang maanindot nga simbolo mahimong kabahin nato.”
Adan ug Eva, ni Douglas M. Fryer
Ang Unang Kapangulohan mitudlo sa mosunod bahin sa balaang garment sa templo: “Ang garment sa balaan nga pagkapari nagpahinumdom kanato sa tabil diha sa templo, ug kana nga tabil nagsimbolo ni Jesukristo. Sa higayon nga imong isul-ob ang imong garment, imong gisul-ob ang usa ka sagrado nga simbolo ni Jesukristo. Ang pagsul-ob niini usa ka panggawas nga pagpahayag sa imong kinahiladman nga pasalig sa pagsunod Kaniya. Ang garment usa usab ka pahinumdom sa imong mga pakigsaad sa templo. … Samtang ikaw maghupot sa imong mga pakigsaad, lakip ang sagrado nga pribilihiyo sa pagsul-ob sa garment sigon sa gitudlo diha sa mga ordinansa sa initiatory, ikaw adunay mas dako nga akses sa kaluoy, proteksiyon, kalig-on, ug gahom sa Manluluwas.”
Genesis 3:24; Moises 4:31
Unsa ang mga kerubim?
Ang mga kerubim maoy “mga hulagway nga naglarawan sa langitnon nga mga nilalang, ang tukma nga porma ingon nga wala masayri. Ang Kerubim gitawag aron sa pagbantay sa mga dapit nga sagrado.” Ang Dios nagbutang og kerubim ug usa ka espada nga nagdilaab aron walay makaduol sa kahoy sa kinabuhi. Si propeta Alma mitudlo nga wala paduola si Adan ug Eva sa kahoy kay ang bunga niini makapahimo nilang mabuhi hangtod sa hangtod; kinahanglan hinuon silang magpabilin sa ilang mortal nga “igpapangandam” nga kahimtang aron makahinulsol sila.
Nganong naglipay si Adan ug Eva human sila papahawaa sa Tanaman sa Eden?
Ingon nga mga mortal nga gipapahawa sa tanaman, si Adan ug Eva makasinatig mga kasakit, mga kaguol, ug mga kalisdanan nga may kalabotan sa atong napukan ang kalibotan. Pero human sila matudloi sa anghel sa Ginoo ug mapuno sa Espiritu Santo, nagpasalamat sila sa mga panalangin nga resulta sa Pagkapukan.
“Ang Pagkapukan maoy importanteng bahin sa plano sa kaluwasan sa Langitnong Amahan. Kini adunay duha ka direksyon—paubos apan paabante. Agi og dugang sa pagpaila sa pisikal ug espiritwal nga kamatayon, naghatag kini kanato og kahigayunan nga matawo dinhi sa yuta ug sa pagkat-on ug paglambo. Pinaagi sa matarong nga pagbansay sa kabubut-on ug sinsero nga paghinulsol kon kita makasala, makaduol kita kang Kristo ug, pinaagi sa Iyang Pag-ula, makaandam sa pagdawat sa gasa sa kinabuhing dayon.”
Genesis 4:3–5; Moises 5:18–21
Nganong wala dawata sa Ginoo ang halad ni Cain?
Wala hisgoti sa asoy sa Genesis o sa asoy ni Moises kon nganong gidawat sa Ginoo ang halad ni Abel pero wala dawata ang kang Cain. Pero, ang Moises 5:18 naghatag og importanteng mga detalye nga “si Cain nahigugma ni Satanas labaw kay sa Dios” ug nga “si Satanas misugo” ni Cain sa “paghimo og usa ka halad ngadto sa Ginoo.” Gitudlo sa mga kasulatan ang kaimportante sa pagkamatinumanon ug ang pagbaton og matarong nga mga motibo dihang maghalad ngadto sa Ginoo. Gituman ni Cain ang mga instruksiyon ni Satanas ug dili putli ang iyang mga motibo. Mitudlo si Propeta Joseph Smith nga wala magpakitag hugot nga pagtuo sa pagtubos ni Jesukristo si Cain diha sa iyang halad.
Genesis 4:7–15; Moises 5:23–40
Unsay atong nahibaloan bahin sa tunglo ug marka nga gibutang kang Cain?
Gitunglo sa Dios si Cain tungod sa pagpatay niini sa iyang igsoon. Ang tunglo ni Cain mao nga walay moturok nga kalan-on sa yuta para niya, maglatagaw siya ingon nga pugante, ug mahimulag siya sa presensiya sa Ginoo. Gibutangan pod sa Dios og “timaan” si Cain, nga simbolo aron dili siya panimaslan ug patyon sa uban.
Dili klaro kon unsa ang timaan ni Cain, bisan tuod og daghang espekulasyon bahin niini. Gipakita sa bag-ohay nga mga pagtuon nga ang Hebreohanong pulong nga gigamit para sa timaan “maoy dili sagad konektado sa pisikal nga hitsura o kinaiya.” Imbes nga pisikal nga marka, ang Hebreohanon nagpunting sa mga aksiyon nga nakapahimo kang Cain ingon nga “‘markadong tawo,’ nga nagpasabot nga nakaila ang mga tawo kon kinsa siya ug nga dili nila siya hilabtan ug pasagdan ang Dios nga mosilot niya.”
Kinahanglan natong likayan nga mangagpas bahin sa gigikanan o hitsura sa timaan nga gibutang ngadto ni Cain o kon ang tunglo magamit ni bisan kina gawas niya. Gisalikway ug gikondena sa Simbahan ang mga diskriminasyon sa rasa ug kultura sa bisan unsang paagi. Si Presidente Russell M. Nelson mitudlo: “Akong isiguro kaninyo nga ang inyong kahimtang atubangan sa Dios dili tinoon pinaagi sa kolor sa inyong panit. Ang pagkanauyonan o wala mauyoni sa Dios mag-agad sa inyong debosyon ngadto sa Dios ug sa Iyang mga sugo ug dili sa kolor sa inyong panit.”
Magkat-on pa og Dugang
Ang Pagkapukan
-
Jeffrey R. Holland, “Asa ang Hustisya, Gugma, ug Kalooy Mag-abut,” Liahona, Mayo 2015, 104–6
-
Mga Hilisgotan ug mga Pangutana, “Pagkapukan ni Adan ug ni Eva,” Librarya sa Ebanghelyo
Mga garment sa templo
-
Jeffrey R. Holland, “Ang Garment sa Balaan nga Pagkapari,” Liahona, Sep. 2024, 4–9
-
J. Anette Dennis, “Himoa ang Ginoong Jesukristo nga Inyong Tigpanalipod,” Liahona, Mayo 2024, 10–13
Media
Mga Bidyo
“Sacred Temple Clothing” (4:12)
Mga Hulagway
Similitude [Pagkasusama], ni Walter Rane
Adam and Eve Teaching Their Children [Adan ug Eva Nagtudlo sa Ilang mga Anak],, ni Del Parson
Adam and Eve Offering Sacrifices [Si Adan ug Eva nga Naghalad og mga Sakripisyo], ni Keith Larson
Cain and Abel [Cain ug Abel], ni Robert T. Barrett