Mga Tabang sa Kasulatan

Isaias 40–49

Ang mensahe ni Isaias sa Israel nagsaag og paglaom ug pasalig nga tubson sa Dios ang Iyang katawhan sa pakigsaad. Siya nanagna nga ang Mesiyas mahimong kahayag sa mga Hentil ug buhian ang katawhan sa Dios gikan sa pagkabihag ug sa sala. Pinaagi ni Isaias gipasidan-an sa Ginoo ang Israel batok sa pagsimba og bakak nga mga dios ug gipahinumdoman sila nga Siya ang ilang Tiglalang ug Manunubos. Nanagna si Isaias sa pagkapukan sa Babilonia ug mipahayag nga ang Ginoo magdala og hustisya ug kaluwasan sa kalibotan.

Mga Kapanguhaan

Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Background ug Konteksto

Isaias 40:3–5

Unsa ang kusog nga tingog sa kamingawan sa “pag-andam og dalan alang sa Ginoo”?

Kini nga mga bersikulo naay daghang katumanan. Gigamit ni Juan Bautista kini nga tudling alang sa iyang kaugalingon. Iyang giawhag ang Israel nga mangandam sa pagtubos pinaagi ni Jesukristo pinaagi sa paghimo sa pakigsaad sa bunyag. Dugang pa, gipadala ang mga Santos niini nga dispensasyon isip nga mensahero ngadto sa tanang anak sa Langitnong Amahan, nga nagpahayag, “Paghinulsol, paghinulsol, ug andama ninyo ang agianan sa Ginoo, ug buhata ang iyang mga agianan nga matul-id.”

Juan Bautista nagsangyaw sa kamingawan — John the Baptist Preaching in the Wilderness [Juan Bautista Nagsangyaw diha sa Kamingawan], ni Robert T. Barrett

Isaias 42:1

Kinsa ang sulugoon nga gihisgotan ni Isaias?

Itandi ang Isaias 49:1–6; 50:4–9; 52:13–15; 53:1–12

Ang ulahing bahin sa basahon ni Isaias naglangkob og pipila ka tudling nga sagad gitawag sa mga iskolar og “mga awit sa sulugoon” o “mga salmo sa sulugoon.” Kining balaknong mga seksiyon naghulagway sa usa ka sulugoon nga nagtuman sa kabubut-on sa Dios. Ang sulugoon nga gihisgotan niini nga mga awit naa tingali daghang girepresentahan. Pananglitan, si Isaias mismo, Hari Ciro sa Persia, ug ang balay sa Israel tanan mituman og piho nga mga bahin niining mga panagna. Pero, ang mga awit sa sulugoon sa kataposan nagpunting kang Jesukristo, nga hingpit nga nagtuman sa misyon ug mga kinaiya sa sulugoon nga gihulagway ni Isaias.

Isaias 42:6–7

Sa unsang mga paagi natuman ang mga panagna ni Isaias bahin sa sulugoon?

Ang mga panagna ni Isaias bahin sa sulugoon niini nga mga bersikulo direktang natuman ni Jesukristo. Pananglitan, miingon si Isaias nga ihatag ang sulugoon para sa “kasabotan uban sa tanang katawhan.” Si Presidente Jeffrey R. Holland mitudlo nga kini nga hugpong sa mga pulong nagtumong sa tahas sa Manluluwas isip ang “kinadak-an ug pangunang karakter sa paghimog … mga pakigsaad ug mga ordinansa nga epektibo karon ug sa kahangtoran. Siya ang halad nga gibasehan sa pakigsaad, kansang dugo nagpamatuod niini, ug Siya usab ang Tigpataliwala sa Pakigsaad.”

Dugang pa, ang panagna ni Isaias diin ang mga buta makakita na ug ang mga binihag mapagawas na natuman panahon sa mortal nga pagpangalagad ni Kristo ug pinaagi sa Iyang matubsanong buluhaton diha sa kalibotan sa espiritu.

Ang mga panagna ni Isaias natuman usab pinaagi sa balay ni Israel. Isip kabahin sa pakigsaad ni Abraham, ang katawhan sa Ginoo dunay sagradong responsibilidad nga dad-on ang mga panalangin sa ebanghelyo ngadto sa tanang kanasoran. Samtang ilang tumanon kini nga misyon, nakatabang sila sa paghatag og kagawasan, panan-awon, ug sa paghatag sa kahayag sa Manluluawas ngadto sa kalibotan.

Si Jesus nag-ayo sa buta — Jesus Healing the Blind [Si Jesus Nag-ayo sa Buta], ni Carl Heinrich Bloch

Isaias 42:10–17

Unsa ang “bag-ong awit”?

Ang mga Israelinhon sagad mokanta og awit aron daygon ang Ginoo isip pasalamat sa mga palangin ug pagluwas nga ilang nadawat gikan Kaniya. Ang hugpong sa mga pulong nga “bag-ong awit” sagad gamiton sa Daang Tugon aron magtumong sa bag-o o gibag-o nga mga pagdayeg sa Dios agig tubag sa Iyang pagluwas o pagtubos. Sa Isaias 42:10–12, gisugo ang tanansa yuta nga daygon ang Ginoo pinaagi sa usa ka bag-o nga awit agig pag-ila sa talagsaong mga buhat nga gihimo Niya ug sa Iyang mga sulugoon. Ang “kapuloan” kasagaran nagrepresentar sa labing layo nga mga dapit sa sibilisasyon.

Ang katawhan sa Kedar maoy mga kaliwat ni Ismael nga nagpuyo sa kamingawan taliwala sa mga bato ug nagrepresentar sa mga rehiyon diin gamay ra kaayong tawo ang namuyo. Ang mensahe ni Isaias mao nga moabot ang panahon dihang ang tanang katawhan, bisan asa pa sila, magkahiusa sa pag-awit og mga pagdayeg ngadto sa Dios. Ang pagpadayag sa modernong panahon naghisgot usab og usa ka bag-ong awit nga kantahon panahon sa Milenyum, dihang ang tanang katawhan “mapuno sa kahibalo mahitungod sa Ginoo, ug makakita.”

Isaias 42:18–22

Nganong gihulagway nga buta ug bungol ang sulugoon sa Ginoo?

Ang pagkabuta ug pagkabungol sa sulugoon mahinungdanon kon ang sulugoon gikonsiderar nga nagrepresentar sa balay sa Israel. Daghang higayon dihang ang mga Israelinhon makita nga buta ug bungol sa espirituhanong paagi samtang naglisod sila sa pagsalig sa Ginoo.

Giusab sa Hubad ni Joseph Smith kini nga mga bersikulo nga nag-ingon nga dili ang sulugoon ang buta ug bungol, kondili tabangan sa sulugoon kadtong buta ug bungol. Importante kini nga kalainan dihang ikonsiderar nga ang Manluluwas mao ang kataposang katumanan sa sulugoon nga gihulagway ni Isaias.

Isaias 43:10–11

Unsay ipasabot nga walay Dios nga naporma sa wala pa si Jehova, ug wala nay mosunod human Kaniya?

Itandi ang Isaias 44:6, 8; 45:5–6, 21–22; 46:9–10

Ang makanunayong tema nga makita sa ikaduhang katunga sa Isaias mao ang pagkalabaw sa Dios sa tanang butang. Ang pagsimba sa dios-dios padayong usa ka hagit sa karaang Israel, lakip ang panahon ni Isaias. Gipalibotan ang Israel sa mga nasod nga nagsimba og mga dios-dios, ug ang mga Israelinhon kanunayng naimpluwensiyahan sa mga tinuohan sa ilang mga silingan. Pinaagi ni Isaias, balikbalik nga gipahayag sa Ginoo nga ang mga dios-dios walay mahimo para sa katawhan—ang Dios lang ang makaluwas nila.

Ang mga pagtulun-an sa Ginoo diha sa Isaias 43:10–11 dili angay nga sabton nga ang matinud-anon nga mga indibidwal dili mahisama sa Dios pag-abot sa panahon. Gipamatud-an sa pagpadayag sa modernong panahon nga pinaagi sa grasya ni Jesukristo, ang mga anak sa Langitnong Amahan naay balaanong potensiyal nga mahimong kauban nga mga manununod ni Jesukristo ug makapanunod sa tanan nga anaa sa Amahan. Pero ang atong kahigayonan para sa mahangtoron nga paglambo wala magpakunhod sa pagkalabaw sa Dios. “Ang mga Santos sa Ulahing mga Adlaw nagtuo nga ang mga anak sa Dios kanunay nga magsimba Kaniya. Ang atong pag-uswag dili gayod makapausab sa Iyang pagka-Siya isip atong Amahan ug atong Dios.”

Isaias 45:1–5

Sa unsang paagi nga si Ciro ang “gipili” sa Ginoo?

Nanagna si Isaias nga luwason sa Ginoo ang mga Judeo gikan sa pagkabihag pinaagi sa hari sa Persia nga si Ciro II. Ang pulong “gipili” (mesiyas sa Hebreohanon) nagpakita nga si Ciro naglihok isip gipili nga instrumento sa Ginoo aron tugotan ang mga Judeo nga mamauli gikan sa Babilonia ngadto sa ilang yutang natawhan ug tukoron pag-usab ang templo nga gilaglag sa mga taga-Babilonia.

Tan-awa usab sa “Esdras 1:1. Kinsa si Ciro?”

Isaias 45:7

Gihimo ba sa Dios ang daotan?

Sa konteksto sa Isaias 45, ang pulong nga gihubad og “daotan” diha sa Maayong Balita Biblia wala magtumong sa pagkadaotan o sala. Hinoon, posibleng nagtumong kini sa “lisod,” “makadaot,” o “makalilisang” nga mga butang. Usahay tugotan sa Ginoo ang maong mga kalisdanan aron magpaubos ang Iyang katawhan ug tabangan silang maghinulsol. Ang Basahon ni Mormon klarong nagtudlo nga “bisan unsa nga maayo nagagikan sa Dios, ug bisan unsa nga daotan nagagikan sa yawa,” ug si Satanas “ang tigpasiugda sa tanan nga sala.”

Isaias 45:23

Unsay ipasabot sa “mangluhod kanako ang tanang tuhod ug manumpa ang tanang dila”?

Nanagna si Isaias nga ang kalamposan sa kasundalohan ni Ciro motuman sa katuyoan sa Dios nga luwason ang Israel. Ang Ginoo mipahayag nga Iyang gipabarog si Ciro ug gigiyahan ang iyang mga aksiyon—bisan pag si Ciro “wala makaila” Kaniya. Bisan og kadaghanan sa mga nasod ang wala mahibalo sa gahom ni Jehova sa panahon ni Ciro, nanagna si Isaias sa umaabot nga adlaw dihang ang tanang nasod moila sa pagkalabaw sa Ginoo ug mopamatuod Kaniya. Gipakita sa propeta sa Basahon ni Mormon nga si Abinadi nga kining malukpanong pag-ila mahitabo atol sa Ikaduhang Pag-anhi sa Manluluwas.

Sa Iyang pagbalik, ang mga propeta ug apostoles sa modernong panahon mipahayag: “Kami mopamatuod nga Siya sa umaabot nga adlaw mobalik nganhi sa yuta. ‘Ug ang himaya sa Ginoo igapadayag, ug ang tanan nga unod sa tingub makakita niini’ [Isaias 40:5]. Siya momando isip Hari sa mga Hari ug mohari isip Ginoo sa mga Ginoo, ug ang tanang tuhod magaluhod, ug ang tanang dila magdayeg sa pagsimba diha sa Iyang atubangan.”

Isaias 49:14–16

Unsay ipasabot sa Ginoo dihang Siya miingon, “gikulit ko ang imong ngalan diha sa akong mga palad”?

Ang Isaias 48–49 gikutlo sa Basahon ni Mormon. Gipasabot ni Nephi nga gilakip niya ang mga pulong ni Isaias aron kombinsihon ang iyang mga igsoon “sa pagtuo diha sa Ginoo nga ilang Manunubos.” Ang Isaias 48 naglangkob sa pagbadlong sa Ginoo sa pagkagahig ulo ug pagkahipokrito sa Israel ug naghatag og mga rason sa ilang pagkatibulaag ug pagkabihag.

Sa laing bahin, ang Isaias 49 naghatag og mensahe sa paglaom. Migamit ang Ginoo og gamhanan nga balaknong mga pulong aron mapamatud-an ang Iyang dili molubad nga pasalig sa Iyang katawhan sa pakigsaad. Siya mipahayag, “Tan-awa, … gikulit ko ang imong ngalan diha sa akong mga palad; ang imong mga paril kanunay kong gibantayan.” Ang Hebreohanong pulong nga gihubad og “gikulit” pwede usab nga magpasabot og “gisulat.” Kining balaknon nga paghulagway nahimong mas makahuloganon human sa Pagkabanhaw sa Manluluwas, dihang nagpabilin kaniya ang mga marka sa Paglansang sa Krus diha sa Iyang mga kamot ug mga tiil isip pahinumdom sa Iyang sakripisyo.

Si Elder Gerrit W. Gong mipamatuod: “Ang mga tawo nga mortal bangis nga gilansang sa krus ug nabanhaw sa wala madugay. Apan ang buhi nga Jesukristo lamang sa Iyang hingpit nga matang sa pagkabanhaw nagdala gihapon sa mga marka sa linansangan sa Iyang mga kamot, mga tiil, ug kilid. Siya namahayag, ‘Ako na ikaw nga gisilsil sa mga palad sa akong mga kamot’ [Isaias 49:16]. Siya lamang ang makasulti nga: ‘Ako mao siya kinsa gibayaw. Ako si Jesus nga gilansang sa krus. Ako ang Anak sa Dios’ [Doktrina ug mga Pakigsaad 45:52].”

Kamot ni Kristo nga naay mga inagian sa lansang diha sa estatuwa nga Christus

Isaias 49:22–23

Sa unsang paagi ang mga Hentil mao ang mahimong nag-atiman nga mga amahan ug inahan sa Israel?

Ang Israel napildi, giulipon, ug gipatibulaag sa Hentil nga mga nasod isip resulta sa ilang pagkamasupilon. Usa ka katumanan sa panagna ni Isaias mao nga moabot ang panahon nga ang Israel makabalik ra gikan sa pagkabihag sa Babilonia, ug ang mga magmamando sa Hentil nga mga nasod maoy motabang sa ilang pagbalik.

Gihulagway ni Nephi kon sa unsang paagi ang panagna ni Isaias matuman sa kataposang mga adlaw. Iyang gitudlo nga daghang Hentil sa ulahing mga adlaw ang makadawat sa mga panalangin sa ebanghelyo ug motabang sa pagpundok sa Israel. Siya mipamatuod nga kini nga buluhaton sa ulahing mga adlaw mopanalangin dili lang sa mga Hentil kondili sa tanang Israel, kay motabang kini nga matuman ang pakigsaad sa Dios ngadto kang Abraham nga “pinaagi sa [iyang] kaliwat panalanginan [sa Dios] ang tanang katawhan sa yuta.”

Pagkat-on pa og Dugang

Mga pako nga sama sa agila

“Wings as Eagles,” New Era, July 2015, 26–27

Pag-andam sa dalan sa Ginoo

D. Todd Christofferson, “Pagpangandam alang sa Pagbalik sa Ginoo,” Liahona, Mayo 2019, 81–84

Gikulit sa mga kamot sa Ginoo

Kristin M. Yee, “Pagkaplag og Kahupayan sa Atong Relasyon sa Pakigsaad ngadto sa Dios,” Liahona, Sept. 2024, 44–48

Ang pagpundok sa Israel

Mga Hilisgotan ug mga Pangutana, “Pagpundok sa Israel,” Librarya sa Ebanghelyo

Media

Musika

“Behold the Wounds in Jesus’ Hands,” Hymns—For Home and Church
“Unsa Kalig-on ang Tukuranan,” Mga Himno, nu. 44
“My Savior Yet,” Hymns—For Home and Church

Imahe

pagbalik sa nabihag nga Israel — Return of Captive Israel [Pagbalik sa Nabihag nga Israel], 1945, oil sa canvas, 53 1/2 x 90 pulgada. Sa maayong kabubut-on sa The Church of Jesus Christ of Latter-day Saints, Relief Society Building