Mga Tabang sa Kasulatan

2 Mga Hari 2–7

Si Elias gidala sa langit nga wala makasinati og kamatayon, ug dayon nadawat ni Eliseo ang kupo sa pagpangulo ni Elias sa pagpanagna. Nakadawat si Eliseo og duha ka bahin sa espiritu nga naa ni Elias, ug mihimo siyag daghang milagro panahon sa iyang pagpangalagad. Ang mga hari sa Israel ug Juda nakadaog sa gubat dihang ilang gisunod ang tambag ni Eliseo. Gipanalanginan sa Ginoo ang biyuda nga nagpakitabang ni Eliseo. Naayo ang sanla ni Naaman nga taga-Siria dihang iyang gisunod ang tambag ni Eliseo. Gitabangan ni Eliseo ang Israel nga depensahan ang ilang kaugalingon batok sa kasundalohan sa Siria pinaagi sa pagpadayag sa ilang mga plano sa gubat. Ang hari sa Siria nagpadala og kasundalohan aron sa pagpatay ni Eliseo, pero giprotektahan sa Ginoo ang Eliseo. Ang ulipon ni Eliseo gipanalanginan sa Ginoo pinaagi sa pagkakita sa mga kabayo ug mga karwahi sa langitnong kasundalohan nga nagprotektar nila.

Mga Kapanguhaan

Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.

Background ug Konteksto

Unsa ang basahon sa 2 Mga Hari?

Ang mga basahon sa 1 ug 2 Mga Hari sa sinugdanan usa lang ka basahon, nga nailhan isip ang basahon sa mga Hari. Gibulag kini ngadto sa duha ka basahon sugod sa Griyego nga paghubad sa Biblia. Ang basahon sa 2 Mga Hari nagpadayon sa makasaysayanong mga asoy sa Amihanan nga Gingharian sa Israel ug sa Habagatan nga Gingharian sa Juda. Gilatid usab niini ang mga hinungdan sa pagkatibulaag sa Israel.

Tungod sa pagkadaotan sa katawhan sa Amihanang Gingharian sa Israel, napildi sila sa Asiria sa mga 722 BC. Sa Habagatang Gingharian sa Juda, ang pipila sa mga hari nga gihisgotan sa 2 Mga Hari mga matinud-anon ug masinugtanon, pero daghan nila ang daotan. Usa niining daotan nga mga hari mao si Hari Manases, diin ang pagkamasinupakon maoy hinungdan nga ang Juda nawad-an sa balaanong proteksiyon niini. Gipildi sa Babilonia ang Habagatan nga Gingharian ug gibihag ang katawhan niini niadtong 586 BC, nga nagtuman sa panagna ni Lehi nga malaglag ang Jerusalem.

Gihulagway sa basahon sa 2 Mga Hari ang panghitabo nga nahitabo panahon sa mga pagpangalagad sa pipila ka iladong mga propeta. Apil sa mga propeta sa Amihanan nga Gingharian si Elias, Eliseo, Oseas, Amos, ug Jonas. Sa Habagatan nga Gingharian, apil sa mga propeta si Isaias, Jeremias, Abdias, Miqueas, Nahum, Habacuc, Sofonias, ug Lehi.

Ang basahon sa 2 Mga Hari pwedeng bahinon sa mosunod nga mga seksiyon:

Kapitulo 1–9: Ang pagpangalagad ni Eliseo sa Amihanan nga Gingharian sa Israel human misaka sa langit si Elias.
Kapitulo 10–17: Ang pagmando sa daghang daotan nga mga hari sa Israel ug sa Juda. Niining panahona, ang Amihanan nga Gingharian gipildi sa mga taga-Asiria, ug gibihag ang katawhan niini.
Kapitulo 18–25: Ang pagmando sa matarong nga mga hari nga si Ezequias ug Josias ug ang pagpangalagad ni propeta Isaias sa Juda. Sa kadugayan, gisakop sa Babilonia ang Juda ug gibihag ang daghang tawo.

2 Mga Hari 2:9–10

Unsa kahay ipasabot nga gusto ni Eliseo og dobleng bahin sa espiritu ni Elias?

Dili lang basta magtutudlo ang panglantaw ni Eliseo kang Elias apan usab isip usa ka amahan. Sa tradisyon sa Israel, ang anak nga naay katungod sa pagkamagulang hatagan og dobleng bahin sa panulondon sa iyang amahan. Pinaagi sa paghangyo og dobleng bahin sa espiritu ni Elias, gitumong tingali ni Eliseo kini nga mga kustombre sa katungod sa pagkamagulang aron ipahayag ang iyang kaandam nga mahimong espirituwal nga manununod ni Elias. Nangayo usab tingali si Eliseo og dugang Espiritu Santo aron matabangan siya sa iyang propetikanhon nga tahas.

2 Mga Hari 2:11

Unsay ipasabot nga miadto si “Elias ngadto sa langit pinaagi sa usa ka alimpulos”?

Gidala ngadto sa langit si Elias nga wala miagi og kamatayon, nga nagpasabot nga sya nabalhin ngadto sa pagkahimaya. Ang nabalhin sa pagkahimaya nga mga binuhat mao ang mga tawo kinsa “giusab aron dili sila makasinati og sakit o kamatayon hangtod sa ilang pagkabanhaw ngadto sa pagka-imortal.” Sa ulahi, si Elias mipakita isip nabalhin sa pagkahimaya nga binuhat didto sa Bungtod sa Transpigurasyon aron motabang sa paghatag sa mga yawe sa pagkapari ngadto ni Pedro, Santiago, ug Juan. Sa ulahi, mipakita usab si Elias isip nabanhaw nga binuhat ngadto ni Joseph Smith ug Oliver Cowdery didto sa Kirtland Temple aron itugyan ang mga yawe sa gahom sa pagselyo.

ang pagbalhin sa pagkahimaya ni propeta Elias — Elijah Ascending into Heaven [Si Elias Mikayab ngadto sa Langit], ni William Henry Margetson

2 Mga Hari 2:12–13

Unsay importansiya sa pagbalhin sa kupo ni Elias ngadto ni Eliseo?

Ang kupo ni Elias nagsimbolo sa iyang awtoridad. Kini nga kupo unang gihisgotan diha sa 1 Mga Hari 19, dihang gibutang kini ni Elias kang Eliseo aron itudlo siya isip manununod ni Elias. Ang kupo nga gitugyan ngadto ni Eliseo samtang mikayab si Elias ngadto sa langit nagsimbolo sa propetikanhong tawag ug awtoridad nga opisyal nang napasa ngadto ni Eliseo. Giila sa “pundok sa mga propeta” ang awtoridad ni Eliseo isip propeta human niya gitunga ang Suba sa Jordan sama sa gihimo ni Elias. Sila mipahayag, “Ang gahom ni Elias anaa na ni Eliseo.”

Kalabot sa pagpasa sa kupo sa pagkapropeta sa atong panahon, si Presidente Spencer W. Kimball mitudlo:

“Ang buluhaton magpadayon—ug ang usa ka propeta manunod sa laing propeta. … Gitugyan kang Eliseo ang kupo ni Elias. Ug sa susamang paagi, ang kupo ni Joseph Smith gitugyan kang Brigham Young dihang morag nausab ang iyang panagway atubangan sa mga tawo ug morag nadungog nila ang tingog ni Joseph ug nakita ang panagway ni Joseph. Kining talagsaong milagro napamatud-an sa daghan kaayong tawo. Ang kupo ni Joseph nga gitugyan gikan ni Brigham ngadto ni John Taylor, kang Wilford Woodruff, kang Lorenzo Snow, kang Joseph F. Smith, kang Heber J. Grant, kang George Albert Smith, ug sa atong Propeta karon.”

2 Mga Hari 2:23–24

Unsay atong nahibaloan bahin sa pagtunglo ni Eliseo sa mga kabatan-onan?

Dihang mibiya si Eliseo padulong ngadto sa Betel, gibugalbugalan siya sa usa ka grupo nga gihulagway isip “mga batang lalaki” diha sa Maayong Balita nga bersiyon sa Biblia. Ang Hebreohanong teksto nagpakita nga dili kini gagmayng bata kondili mga batan-ong lalaki. Wala mahibaloi kon nganong ilang gihilabtan si Eliseo o kon unsay ipasabot sa ilang mga panginsulto. Pero ang tunglo ni Eliseo ngadto nila ug ang kalit nga pag-atake sa mga oso nagpakita nga ang ilang mga aksiyon seryoso ug makainsulto kaayo. Kini nga hitabo posibleng pasidaan usab sa Israel nga ang paghukom sa Dios moabot kanila kon padayon nilang isalikway ang Iyang mga propeta.

2 Mga Hari 3:11–15

Nganong naglagot si Eliseo?

Dihang mirebelde ang mga taga-Moab batok sa Amihanan nga Gingharian sa Israel, nangayo og tabang si Hari Joram kang Josafat, ang hari sa Juda. Uban sa hari sa Edom, ang tulo naghiusa aron pugngan ang rebelyon sa mga taga-Moab. Human mibiyahe og pito ka adlaw ang tulo ka hari ug ang ilang kasundalohan, ilang nakaplagan nga nahutdan og tubig ang ilang mga sundalo ug mga hayop.

Si Josafat, nga sumusunod ni Jehova, gidala ang ubang mga hari uban kaniya ngadto kang Eliseo aron mangayo og giya. Naglagot si Eliseo sa presensiya ni Joram, nga gituohan niya nga nagsimba kini og mga dios-dios. Giyagayagaan ni Eliseo si Joram pinaagi sa pagtambag niini nga mangayog tambag sa bakak nga mga propeta sa iyang amahan, nga si Ahab. Dayon, gipatawag ang usa ka magtutugtog og alpa aron pakalmahon si Eliseo, ug sa ngadto-ngadto, misugot ra siyang pangayoon ang direksiyon sa Ginoo para sa mga hari. Gisunod sa mga Israelinhon ang dinasig nga mga instruksiyon ni Eliseo ug gipildi sa gubat ang mga taga-Moab.

2 Mga Hari 4:1

Nganong ang mga anak nga lalaki sa babaye ibaligya isip mga ulipon?

Kaniadto, kon ang usa ka tawo dili makabayad sa utang, ang trabaho sa mga anak sa nangutang maoy bugti nga bayad para sa utang. Kini tingali ang rason kon nganong ibaligya ang mga anak nga lalaki sa babaye isip mga ulipon. Ang balaod ni Moises kinahanglan nga ang naulipon nga mga Israelinhon trataron sama sa gipatrabaho nga mga trabahante ug buhian kada pito ka tuig. Pero sagad abusohan ang pagkaulipon tungod sa utang. Ang kustombre sa pagbayad og utang pinaagi sa pagpaulipon morag gihimo pa sa panahon ni Jesus, kay gigamit kini Niya sa usa sa iyang mga sambingay.

Aron makakat-on og dugang, tan-awa ang “Deuteronomio 15:12–18. Unsay atong nahibaloan mahitungod sa pagkaulipon sa mga panahon sa Daang Tugon?”

2 Mga Hari 5:1

Kinsa ang mga taga-Siria?

Gigamit sa Maayong Balita Biblia nga bersiyon sa Biblia ang Gregong pulong nga Siria nga nagtumong sa mga Aramaiko, o ang mga tawo sa Aram. Kini ang mga kaliwat sa anak ni Sem nga si Aram. Gihulagway sa Daang Tugon ang daghang interaksiyon ug mga dili pagsinabtanay tali sa mga Israelinhon ug mga taga-Siria, sugod pa sa panahon ni Abraham. Ang dakong bahin sa karaang nasod sa Siria nahimutang kasagaran sa amihanan sa Israel. Kini napildi ni Hari David ug nagpabilin ubos sa pagmando sa Israel hangtod namatay si Hari Solomon. Ang pinulongan sa mga taga-Siria, ang Aramaiko, sa ngadtongadto nahimong pangunang pinulongan sa Balaang Yuta ug mao ang pinulongan nga gigamit ni Jesukristo. Sa ulahi, ang Siria gipildi sa mga taga-Asiria ug mga taga-Roma.

2 Mga Hari 5:1–14

Unsa ang pipila sa importanteng mga detalye sa pagkaayo ni Naaman?

Si Naaman usa ka lider sa kasundalohan nga nataptan og sanla. Ang terminong sanla pwedeng magtumong sa lainlaing klase sa grabeng sakit sa panit. Wala mahibaloi kon unsa ang pihong kondisyon ni Naaman ug kon unsa kini ka grabe.

Kini nga asoy nagpasiugda sa hugot nga pagtuo ug pagkamapaubsanon nga kinahanglang ipakita ni Naaman, “usa ka tawo nga bantogan,” aron maayo. Pananglitan, ang mga ulipon nga ubos ang kahimtang sa katilingban mitabang aron giyahan si Naaman ngadto ni Eliseo ug midasig niya nga sundon ang tambag sa propeta. Dugang pa, nagdahom si Naaman nga direkta ug dali ra siyang ayohon ni Eliseo kay sa magpadala og mensahero aron ingnon siya nga maligo og kapito ka higayon sa lapokon nga Suba sa Jordan.

Bisan pa sa iyang pagsupak sa sinugdanan, nagpakita si Naaman og pagkamapaubsanon ug hugot nga pagtuo kang Jehova pinaagi sa pagsunod sa mga instruksiyon ni Eliseo. Dihang naayo na siya, si Naaman mipahayag, “Karon nasayod na ako nga walay laing Dios sa tibuok kalibotan gawas sa Dios sa Israel.” Sa ulahi, gigamit sa Manluluwas ang ehemplo ni Naaman aron badlongon ang kaugalingon Niyang katawhan tungod sa ilang kawalay pagtuo Kaniya.

tawo nga nagwisik og tubig sa iyang nawong — “Thou Shalt Be Clean [Mamaayo Ka],” ni Eva Timothy

2 Mga Hari 5:17–19

Nganong gusto ni Naaman nga magdala og yuta gikan sa Israel paingon sa Siria?

Daghang karaang kultura ang sagad nagtuo nga masimba lang ang usa ka dios sa hustong paagi diha sa kaugalingon niyang yuta. Gusto ni Naaman nga magdala og yuta gikan sa Israel ngadto sa iyang yutang natawhan aron mobati nga nasimba niya si Jehova sa hustong paagi didto. Giingnan ni Eliseo si Naaman nga molakaw nga malinawon, nga klarong nagpakita gidawat ni Eliseo ang sinseridad sa iyang pagkakabig.

2 Mga Hari 6:15–17

Unsay atong makat-onan bahin sa langitnong tabang nga gikan sa kasinatian ni Eliseo uban sa iyang sulugoon?

Kon bahin kang Eliseo ug ang iyang sulugoon nga gilibotan sa kasundalohan sa Siria, si Presidente Jeffrey R. Holland mitudlo:

“Kon nangita og maayong panahon si Eliseo aron maguol, mao na kini. … Kini usa ka propeta ug usa ka batan-ong lalaki batok sa kalibotan. Ug nahadlok pag-ayo ang batan-ong lalaki. Nakita niya ang kaaway bisan asa—kalisod ug kawalay paglaom ug mga problema bisan asa. … Uban ang nagkahuyang nga pagtuo, ang batan-on miingon, ‘Unsa may atong buhaton?’ [2 Mga Hari 6:15].

“Ug ang tubag ni Eliseo?

“‘Ayaw kahadlok kay ang ania uban kanato mas daghan kay niadtong uban kanila’ [2 Mga Hari 6:16]. …

“Sa ebanghelyo ni Jesukristo naay motabang nimo gikan sa duha ka habig sa tabil ug dili gayod nimo kana kalimtan. Dihang moabot ang kapakyasan ug kawalay paglaom—ug moabot gyod kini—hinumdomi ug ayaw gyod kalimti nga kon mabuksan ang atong mga mata makita nato ang mga kabayo ug mga karwahe bisag asa ta molingi nga paspas kaayong nagsingabot aron protektahan ta. Naa sila kanunay, kining langitnong kasundalohan, aron depensahan ang binhi ni Abraham.”