Lesona 4 Anomea mo le Sauniuniga o le Vasega: Mauaina o le Faamoemoe ma le Olioli i Foafoaga a le Alii
“Lesona 4 Anomea mo le Sauniuniga o le Vasega: Mauaina o le Faamoemoega ma le Olioli i Foafoaga a le Alii,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 4 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Ata
ata matagofie o le natura
Lesona 4 Anomea mo Sauniuniga o le Vasega
Mauaina o le Faamoemoe ma le Olioli i Foafoaga a le Alii
Na saunoa mai Peresitene M. Russell Ballard o le Korama a Aposetolo e Toasefululua, “Mafaufau i le mea e ono tupu pe afai tatou te faaaluina uma se taimi e vaavaai totoa ai i mea ofoofogia o le natura o loo siomia ai i tatou ma tuuto atu i tatou lava e aoao atili e uiga i lenei lalolagi na foafoaina e le Atua mo i tatou!” (“God’s Love for His Children,” Ensign, Me 1988, 57). A o e tomanatu i le vavega o le foafoaga, mafaufau po o le a se mea e mafai ona e aoaoina e uiga i le Foafoa ma Ona faamoemoega mo i tatou.
Vaega 1
E mafai faapefea e le malamalama i le faamoemoega o le Foafoaga ona aumaia se uiga faaopoopo i lo‘u olaga?
O a ni ou manatu ma ni lagona ina ua e vaai atu i fetu i le lagi i le po—atonu o le ofo, maofa, migao, po o se lagona o le le taua?
O le saienisi o le vateatea tatou te maua ai se vaaiga maofa i le telē o le atulaulau. I lo tatou aniva o fetu lava ia e i ai “i le va o le 200 ma le 400 piliona fetu. Ae ua na o le tasi le piliona o aniva. … I le tuufaatasiga, o aniva uma i le atulaulau o loo i ai se 30 piliona tiliona o fetu. Ae o lena fuainumera atonu o se vaega itiiti o mea uma o loo i ai” (R. Val Johnson, “Worlds without Number,” Ensign, Aug. 2013, 45).
I se faaaliga ofoofogia o le Foafoaga, na vaai ai Mose i lo tatou lalolagi ma e o nonofo ai, ona ia aoao ai lea e uiga i le lautele tele o le atulaulau. Sa ia aoaoina foi e faapea, i lalo o le taitaiga a le Tama Faalelagi, na foafoaina ai e Iesu Keriso mea uma (tagai Mose 2:1; tagai foi Mosaea 3:8; Ioane 1:1–3). I le molimauina ai o galuega aao a le Atua, “sa ofo ma maofa” Mose (Mose 1:8) ma fesili atu, “Ou te ole atu ia te oe, sei ta‘u mai ia te au, pe aisea ua faapea ona i ai o ia mea, ma o a mea na e faia ai i latou?” (Mose 1:30; tagai foi i fuaiupu 27-37).
Ata
aikona, suesue
Suesue e Sauniuni ai mo le Vasega
Faitau le Mose 1:33, 38–39, ma vaavaai mo mea na aoaoina e Mose e uiga i le mafuaaga na foafoaina ai e le Atua lenei atulaulau tele ma le ola uma o iai.
Na saunoa peresitene Dieter F. Uchtdorf, a o avea i lena taimi ma se tasi o le Au Peresitene Sili, e uiga i le faamoemoega o le Atua mo le Foafoaga:
Ata
Peresitene Dieter F. Uchtdorf
Na fetalai le Atua lava Ia, o i tatou o le pogai lea sa Ia foafoaina ai le lalolagi! O Lana galuega ma Lona mamalu—o le faamoemoega mo lenei lalolagi matagofie—ia laveai ma faaeaina le tagata. … Sa foafoaina e lo tatou Tama Faalelagi le lalolagi ina ia mafai ona ausia ai o tatou tulaga gafatia i le avea ai o ni Ona atalii ma afafine.
O se faamatalaga feteenai lenei a le tagata: a faatusa atu i le Atua, o le tagata o le mea noa; peitai o i tatou o mea uma ia i le Atua. (“E Taua Oe ia te Ia,” Liahona, Nov. 2011, 20)
Ata
aikona, mafaufau loloto
Mafaufau Loloto e Sauniuni ai mo le Vasega
O le a sou lagona i le iloaina o i tatou o le pogai na foafoaina ai e le Tama Faalelagi ma Iesu Keriso le atulaulau?
Vaega 2
E mafai faapefea ona ou maua le olioli sili atu i foafoaga a le Alii?
Ina ua uma ona foafoaina le lagi ma le lalolagi, sa malolo le Atua i le aso lona fitu mai Ana galuega uma ma fetalai mai, “o mea uma sa Ou faia ua mae‘a, ma o A’u, o le Atua, sa Ou vaai atu ua lelei i latou” (Mose 3:2). Ona Ia faamanuiaina lea o le aso lona fitu. O le a se mea ua e aoaoina e uiga i le Foafoa mai Lona tuueseina o se taimi e vaai ai i le matagofie o le Foafoaga? I le vaiaso ua tuanai, e faafia ona e faaaluina se taimi e faifai malie ai ma olioli i foafoaga a le Alii?
I se faaaliga i le Perofeta o Iosefa Samita, sa faailoa mai ai e le Faaola faamanuiaga faaletino ma faaleagaga ia e oo mai ia i latou o e tausia le paia o le aso Sapati (tagai Mataupu Faavae ma Feagaiga 59:9–19). O nei faamanuiaga e aofia ai se olioli i le “atoatoa o le lalolagi” (Mataupu Faavae ma Feagaiga 59:16).
Mai mea ofoofogia uma i luga o le fogaeleele, o i tatou o foafoaga silisili a le Atua. O le Tama Faalelagi ma Iesu Keriso “na afifio ifo i lalo e faatulaga le tagata i lo latou lava faatusa … tane ma le fafine” (Aperaamo 4:26–27). Na molimau mai Peresitene Gordon B. Hinckley:
Ata
Peresitene Gordon B. Hinckley
E paia o tatou tino. Na foafoaina i latou i le faatusa o le Atua. E ofoofogia i latou, o le palealii o foafoaga a le Atua. (“Be Ye Clean,” Ensign, Me. 1996, 48)
O le mauaina o se tino e totonugalemu i lo tatou alualu i luma e faavavau (tagai Mataupu Faavae ma Feagaiga 93:33–34). Na aoao mai Elder David A. Bednar o le Korama a Aposetolo e Toasefululua e faapea:
Ata
Elder David A. Bednar
O o tatou tino faaletino ua mafai ai ona tatou maua se poto masani lautele, loloto, ma le maoae lea e le mafai ona maua i lo tatou i ai i le muai olaga. (“Matou te Talitonu i le Nofomama,” Liahona, Me 2013, 41)
I se faatusatusaga i le Faaola, ua faasese ai e Satani le faamoemoega paia o o tatou tino ma faatosina i tatou e faaaoga sese. Na aoao mai Peresitene Susan W. Tanner, o lē sa avea ma Peresitene Aoao o Tamaitai Talavou:
Ata
Peresitene Susan W. Tanner
Ua faaosoosoina e [Satani] le toatele ina ia faaleaga i lenei meaalofa maoae o le tino, e ala i le ola le mama, amioga e le tausaafia, faaloloto, ma mea e faananau i ai. Na te faatosinaina nisi e inoino i o latou tino; na te faaosoina isi ia atua i o latou tino. I soo se tulaga lava, na te faaosoosoina le lalolagi ina ia mafaufau i le tino ua na o se mea faitino. …
O o tatou tino o o tatou malumalu ia. E le faaitiitia ae e sili atu ona tatou pei o le Tama Faalelagi ona ua i ai o tatou tino. … Tau ina ia tatou faaaloalo i le paia o le tino i le olaga nei, ina ia mafai ona faapaiaina ma faaeaina e le Alii mo le faavavau. (“O Le Paia o le Tino,” Liahona, Nov. 2005, 13 15)
Ata
aikona, faatino
Faatino
Faaalu ni nai minute i le asō e olioli ai i le meaalofa o lou tino ma le matagofie o le foafoaga. Alu mo se savaliga, faalogologo i timuga, manava le manogi o ni fugalaau fou, tausami i ni fualaau aina felesi, matamata i ao, saofafai i tafatafa o se vaitafe, tilotilo i fetu, faalogologo i le pepese o manulele, pe sii se pepe faatoa fanau mai. Mafaufau e tusi faamaumau pe faapefea e le meaalofa o lou tino ma le foafoaga o lenei lalolagi ona aumaia ia te oe le olioli. Ia saunia e faasoa atu lau aafiaga i le taimi o le vasega.
Vaega 3
E mafai faapefea ona ou faalolotoina lo‘u malamalama i foafoaga a le Alii e ala i le suesueina o tusitusiga paia ma le saienisi?
O se tasi o auala tatou te aoao ai e uiga i foafoaga a le Atua e ala lea i le saienisi. Mo se faataitaiga, e tele mea ua tatou aoaoina e uiga i galuega a le tino o le tagata e ala i suesuega faafomai, e uiga i meaola eseese e ala i le siosiomaga, e uiga i faasologa o le tau e ala i susuega o le tau, ma isi.
Atonu e i ai taimi e te aoaoina ai se mea mai le saienisi e foliga mai e feteenai ma tusitusiga paia. Pe a e fetaiai ma mea e foliga mai o se feteenaiga, o le vaaiga lenei mai ia Peresitene Russell M. Nelson e mafai ona fesoasoani:
Ata
Peresitene Russell M. Nelson
E leai se feteenaiga i le va o le saienisi ma mataupu faalelotu. “E nao feteenaiga e tulai mai i se malamalama le mae’a i le faasaienisi po o mataupu faalelotu, po o vaega uma e lua. …
… O upumoni uma o se vaega o le talalelei a Iesu Keriso. Pe o upumoni e mai se falesuesue faasaienitisi po o faaaliga mai le Alii, e fetaui lelei lava. (“Church Leaders Gather at BYU’s Life Sciences Building for Dedication,” Church News, Apr. 17, 2015, ChurchofJesusChrist.org).
E ui e mafai ona fesoasoani le saienisi ia i tatou e faamatala le ala o faagasologa faanatura, ae o le talalelei a le Alii e taulai atu i le pogai. O saienisi ma mataupu faalelotu e masani ona talanoaina ai ni vaega eseese o fesili. O perofeta i tusitusiga paia e matele lava ina faamamafaina mea e manaomia ona tatou malamalama i ai e uiga i le Foafoa ma Ona faamoemoega. (Tagai “Faasaienisi ma La Tatou Sailiga mo le Upumoni,” Liahona, Iulai 2016, 26–29.) O le taulimaina o tapulaa o le malamalama faasaienisi, na aoao mai Peresitene Dallin H. Oaks:
Ata
Peresitene Dallin H. Oaks
O metotia faasaienisi e taitai atu ai tatou i mea ua tatou ta’ua o upumoni faasaienitisi. Ae o le “upumoni faasaienitisi” e le o le olaga atoa lea. O i latou e le aoao “e ala i le suesue ma le faatuatua foi” (Mataupu Faavae ma Feagaiga 88:118) e tapulaa lo latou malamalamaaga e uiga i moni i mea e mafai ona latou faamaonia i auala faasaienitisi. …
Ua tatou maua le olioli moni ma le tumau e ala i le iloaina ma le faatinoina o upumoni e uiga ia i tatou lava, o le uiga o le olaga faaletino, ma le mea tatou te o i ai pe a tatou feoti. O na upumoni e le mafai ona aoaoina e ala i metotia faasaienitisi pe faalelalolagi. (“Upumoni ma le Fuafuaga,” Liahona, Nov. 2018, 25)
Pe a tatou tuufaatasia lo tatou aoaoina faaleagaga ma le faasaienitisi e uiga i le Foafoaga, e mafai ona faalolotoina ai lo tatou malamalama i le Atua, e tusa lava pe i ai pea ni a tatou fesili e lei taliina. A o e mafaufau i au lava fesili, manatua i le taimi o le Meleniuma o le a faaali mai ai mea uma, e aofia ai “mea o i luga, ma mea o i lalō, o mea o i totonu o le lalolagi, ma luga o le lalolagi, ma i le lagi” (Mataupu Faavae ma Feagaiga 101:34).
Ata
aikona, mafaufau loloto
Mafaufau Loloto e Sauniuni ai mo le Vasega
Matamata le ata vitio “We Lived with God” (4:00), ma mafaufau i mea ua e aoaoina mai le saienisi ma le lotu e uiga i le Foafoaga. E mafai faapefea e nei malamalamaaga ona fesoasoani e faaloloto ai lau molimau i le Foafoa? (tagai Mose 6:63; Alema 30:44).
