1 Ma ona fetalai mai lea o le Alii: Sei tatou o i lalō. Ma sa latou o ifo i lalo i le ^aamataga, ma o i latou, o lona uiga o Atua, sa ^efaatulagaina ma foafoaina le lagi ma le lalolagi.

2 Ma o le lalolagi, ina ua uma ona foafoaina, sa gaogao ma tuufua, ona sa latou lei foafoaina se mea ae na’o le lalolagi; ma sa ufitia e le pouliuli luga o le moana, ma sa ^afaamalumalu le Agaga o Atua i luga o vai.

3 Ma sa latou (o Atua) fetalai: Ia i ai le malamalama; ma sa i ai le malamalama.

4 Ma sa latou (o Atua) silafia le malamalama, ona sa pupula; ma sa latou vavae le malamalama, pe faia ia vavaeeseina, mai le pouliuli.

5 Ma sa ta’ua e Atua le malamalama o le Ao, ma o le pouliuli sa latou ta’ua o le Po. Ma sa oo mai le afiafi seia oo i le taeao sa latou ta’ua o le po; ma mai le taeao seia oo i le afiafi sa latou ta’ua, o le ao; ma o le muamua lea, po o le amataga, o le mea lena ua latou ta’ua o le ao ma le po.

6 Ma sa fetalai foi Atua: Ia i ai se ^avanimonimo i le lotolotoi o vai, ma ia vavae ai vai mai vai.

7 Ma sa faatonu e Atua le vanimonimo, ina ia vavaeina vai sa i lalo o le vanimonimo, mai vai sa i luga o le vanimonimo; ma sa faapea lava, e pei ona sa faatonu ai i latou.

8 Ma sa ta’ua e Atua le vanimonimo, o le ^aLagi. Ma sa oo mai le afiafi seia oo i le taeao sa latou ta’ua o le po; ma sa oo mai le taeao seia oo i le afiafi sa latou ta’ua o le ao; ma o le ^etaimi lona lua lea sa latou ta’ua o le po ma le ao.

9 Ma sa faatonu e Atua, ma fetalai atu: Ia tuu atu i ^avai o i lalo o le lagi ia faapotopoto faatasi i le mea e ^etasi, ma ia tuu atu i le eleele ia mānu a’e o se eleele matutu; ma sa faapea lava e pei ona sa latou faatonuina;

10 Ma sa ta’ua e Atua le eleele matutu, o le Eleele; ma o le faapotopotoga faatasi o vai, sa latou ta’ua, o Vai ^aTetele; ma sa silasila atu Atua ua usiusitaia i latou.

11 Ma sa fetalai atu Atua: Sei tatou saunia le eleele ia tupu mai ai le ^amutia; le laau afu e fua i fatu; le laau aina e fua mai ai fua, e tusa ma lona lava ituaiga, o lona fatu ia te ia lava e fua mai i ona lava foliga i luga o le lalolagi; ma sa faapea lava, e pei ona sa latou faatonuina.

12 Ma sa faatulaga e Atua le eleele ia tutupu mai ai le mutia mai i ona lava fatu, ma le laau afu ia tupu mai ai le laau afu mai i ona lava fatu, e fua mai ai fatu o lona lava ituaiga; ma le eleele ia tupu mai ai le laau mai i ona lava fatu, e fua mai i fua, o ona fatu e nao ona lava fua e mafai ona tutupu mai ia te ia lava, e tusa ma lona ituaiga; ma sa silasila atu Atua, ua usiusitaia i latou.

13 Ma sa oo ina latou faitauina aso; mai le afiafi seia oo i le taeao sa latou ta’ua o le po; ma sa oo mai i le taeao seia oo i le afiafi sa latou ta’ua o le ao; ma o le taimi lona tolu lea.

14 Ma sa faatulaga e Atua ^amalamalama i le vanimonimo o le lagi, ma faia i latou e vavae ai le ao mai le po; ma faatulaga i latou e avea ma faailoga ma mo tau, ma mo aso ma mo tausaga;

15 Ma faatulaga i latou e avea ma malamalama i le vanimonimo o le lagi e susulu mai ai le malamalama i luga o le lalolagi; ma sa faapea lava.

16 Ma sa faatulaga e Atua malamalama tetele e lua, o le malamalama ^atele e pulea le ao, ma le malamalama itiiti e pulea le po; sa latou tuu foi fetu faatasi ma le malamalama itiiti;

17 Ma sa tuu i latou e Atua i le vanimonimo o le lagi, e susulu mai ai le malamalama i le lalolagi, ma pule ai i le ao ma le po, ma faia ia vavae ese ai le malamalama mai le pouliuli.

18 Ma sa matau e Atua na mea na latou faatonuina seia oo lava ina ua faataunuuina i latou.

19 Ma sa oo ina faapea e mai i le afiafi seia oo i le taeao o le po lea; ma sa oo ina faapea e mai le taeao seia oo i le afiafi o le ao lea; ma o le taimi lona fa lea.

20 Ma sa fetalai Atua: Sei tatou saunia vai ia tutupu tele mai ai manu feoa’i e i ai le ola; ma manu felelei, ina ia mafai ona latou felelei i luga o le lalolagi i le vanimonimo vavaloloa o le lagi.

21 Ma sa saunia e Atua vai ina ia latou maua ai ^atafola tetele, ma mea ola taitasi uma e feoa’i, ia sa tatau ona tele ona maua i vai e tusa ma o latou ituaiga; ma manu felelei fai apaau taitasi uma e tusa ma o latou ituaiga. Ma sa silasila atu Atua o le a usiusitaia i latou, ma ua lelei la latou fuafuaga.

22 Ma sa fetalai Atua: O le a tatou faamanuia i latou, ma faia i latou ia uluola ma faateleina, ma faatumuina vai i sami po o ^avai tetele; ma faia manu felelei ia faateleina i le lalolagi.

23 Ma sa oo ina faapea e mai i le afiafi seia oo i le taeao sa latou ta’ua o le po; ma sa oo ina faapea e mai i le taeao seia oo i le afiafi sa latou ta’ua o le ao; ma o le taimi lona lima lea.

24 Ma sa saunia e ^aAtua le laueleele ia tutupu mai ai mea ola e tusa ma lona ituaiga, o lafu manu ma mea fetolofi, ma manu vaefa o le laueleele e tusa ma o latou ituaiga; ma sa faapea lava, e pei ona sa latou fetalai atu ai.

25 Ma sa faatulaga e Atua le laueleele ia tutupu mai ai manu vaefa e tusa ma o latou lava ituaiga, ma lafu manu e tusa ma o latou ituaiga, ma mea taitasi uma e fetolofi i le lalolagi e tusa ma lona ituaiga; ma sa silasila atu Atua o le a usitaia i latou.

26 Ma sa ^afono Atua ia i latou lava ma faapea ane: Tatou o i lalō ma faia le ^etagata i lo tatou ⁱfaatusa, e tusa ma o tatou foliga; ma o le a tatou tuu atu ia te i latou le pule i i’a o le sami, ma i manu felelei o le ea, ma i lafu manu, ma i le lalolagi atoa, ma i mea fetolofi taitasi uma e fetolofi i luga o le fogaeleele.

27 O lea na afifio ifo ai ^aAtua i lalo e faatulaga le tagata i lo latou lava faatusa, e fai e i latou o ia i le faatusa o Atua, e fai e i latou i la’ua o le tane ma le fafine.

28 Ma sa fetalai ane Atua: O le a tatou faamanuia i la’ua. Ma sa fetalai ane Atua: O le a tatou faia i la’ua ia fanafanau ma uluuluola, ma faatumuina ai le lalolagi, ma faato’ilalo i ai, ma ia pule i i’a o le sami, ma i manu felelei o le ea, ma i mea ola taitasi uma e fetolofi i luga o le fogaeleele.

29 Ma sa fetalai ane Atua: Faauta, o le a tatou tuu atu ia te i la’ua laau afu taitasi uma e fua mai i fatu e oo mai i luga o le lalolagi atoa, ma laau taitasi uma o le a fua mai i fua i ona luga; ioe, o fua o le laau e tupu mai ai fatu o le a tatou tuu atu ia te i la’ua; o le a avea lea mo a la’ua ^ameaai.

30 Ma i manu vaefa taitasi o le fogaeleele, ma i manu felelei taitasi o le ea, ma mea taitasi uma e fetolofi i luga o le fogaeleele, faauta, o le a tatou tuu atu i te i latou le ola, ma o le a tatou tuu atu foi ia te i latou laau afu mata uma mo meaai, ma o nei mea uma o le a faapea ona faatulagaina.

31 Ma sa fetalai ane Atua: O le a tatou faia mea uma ua tatou fai atu ai, ma faatulaga i latou; ma faauta, o le a latou usiusitai lava. Ma sa oo ina sa faapea e mai i le afiafi seia oo i le taeao sa latou ta’ua o le po; ma sa oo ina sa faapea e mai i le taeao seia oo i le afiafi, sa latou ta’ua o le ao; ma sa latou faitauina le taimi ^alona ono.