Mga Basahon ug mga Leksiyon
Kapitulo 10: Mga Kasulatan

Kapitulo 10

Mga Kasulatan

Imahe
A Chinese woman sitting at a table with scriptures open in front of her. She is using a highlighter to mark them.

Ang Mga Kasulatan Anaa na Alang Kanato Karon

  • Unsa ang pipila sa mga panalangin nga atong natagamtam karon tungod kay anaa na ang mga kasulatan?

Kon ang mga sulugoon sa Ginoo mamulong o mosulat ubos sa impluwensya sa Espiritu Santo, ang ilang mga pulong mahimo nga kasulatan (tan-awa sa D&P 68:4). Sukad sa sinugdanan, ang Ginoo misugo sa Iyang mga propeta sa pagtipig og talaan sa Iyang mga pinadayag ug sa Iyang pagpakigsabut sa Iyang mga anak. Siya miingon: “Ako nagsugo sa tanan nga mga tawo, sa silangan ug sa kasadpan, ug sa amihanan, ug sa habagatan, ug sa mga pulo sa dagat, nga sila mosulat sa mga pulong diin Ako mamulong ngadto kanila; kay gikan sa mga basahon nga ipasulat Ako mohukom sa kalibutan, matag tawo sumala sa ilang mga buhat, sumala niana nga nahisulat.” (2 Nephi 29:11).

Ang Simbahan ni Jesukristo sa mga Santos sa Ulahing mga Adlaw midawat sa upat ka mga basahon isip kasulatan: ang Biblia, ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon. Kini nga mga basahon gitawag og mga sumbanan nga kasulatan sa Simbahan. Ang mga dinasig nga mga pulong sa atong buhi nga mga propeta gidawat usab isip kasulatan.

Ang Biblia

Ang Biblia usa ka koleksyon sa sagradong mga sinulat nga naglangkob sa mga pinadayag sa Dios ngadto sa tawo. Kini nga mga sinulat naglangkob sa daghang mga siglo, gikan sa panahon ni Adan hangtud sa panahon sa pagpuyo sa mga Apostoles ni Jesukristo. Gisulat kini sa daghang mga propeta nga nabuhi sa nagkalainlaing kapanahunan sa kasaysayan sa kalibutan.

Ang Biblia gibahin sa duha ka seksyon: ang Daang Tugon ug ang Bag-ong Tugon Daghang mga panagna diha sa Daang Tugon nanagna sa pag-anhi sa usa ka Manluluwas ug Manunubos. Ang Bag-ong Tugon nagsulti kanato sa kinabuhi sa Manluluwas ug Manunubos, nga mao si Jesukristo. Nagsulti usab kini sa pagtukod sa Iyang Simbahan niana nga panahon. “Kami nagtuo sa Biblia nga pulong sa Dios kon kini tukma nga pagkahubad; kami nagtuo usab sa Basahon ni Mormon nga pulong sa Dios.” (Mga Artikulo sa Hugot nga Pagtuo 1:8).

Pinaagi kang Propeta Joseph Smith, ang Ginoo mipalapad sa atong panabut sa pipila ka mga pagtulun-an diha sa Biblia. Ang Ginoo midasig ni Propeta Joseph sa pagpahiuli sa mga kamatuoran sa mga pulong sa Biblia nga nangawala o giusab sukad nasulat ang orihinal nga mga pulong niini. Kining dinasig nga mga koreksyon gitawag nga Hubad ni Joseph Smith sa Biblia. Sa mga Santos sa Ulahing mga adlaw nga edisyon sa King James nga Bersyon sa Biblia, ang mga pinili nga pagtulun-an gikan sa Hubad ni Joseph Smith sa Biblia makita sa mga pahina 265–289 ug sa daghang mga footnotes.

Ang Basahon Ni Mormon

Ang Basahon ni Mormon usa ka sagrado nga talaan sa pipila ka mga tawo nga namuyo sa mga kontinente sa Amerika sa mga tuig 2000 B.C. ug sa A.D. 400. Naglangkob kini sa kinatibuk-an sa ebanghelyo ni Jesukristo (tan-awa sa D&P 20:9; 42:12; 135:3). Ang Basahon ni Mormon naghisgut sa pagbisita ni Jesukristo didto sa katawhan sa Amerika pagkahuman gayud sa Iyang Pakabanhaw.

Gihubad ni Joseph Smith ang Basahon ni Mormon ngadto sa Iningles pinaagi sa gasa ug gahum sa Dios. Miingon siya nga kini mao ang “labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon” (pasiuna sa Basahon ni Mormon).

Si Presidente Ezra Taft Benson mitabang kanato nga masabtan kon sa unsang paagi nga ang Basahon ni Mormon nahimong sukaranan sa atong tinuohan. Siya miingon:

“Adunay tulo ka mga pamaagi diin ang Basahon ni Mormon nahimong sukarang bato sa atong relihiyon. Kini mao ang sukarang bato sa atong pagsaksi kang Kristo. Kini mao ang sukarang bato sa atong doktrina. Kini mao ang sukarang bato sa atong pagpamatuod.

“Ang Basahon ni Mormon mao ang sukarang bato sa atong pagsaksi kang Jesukristo, kinsa mao ang bato sa pamag-ang sa tanan nato nga buhaton. Kini nagsaksi sa Iyang pagkatinuod uban sa gahum ug katin-aw. …

“[Kini] nagpatubo sa atong panabut sa mga doktrina sa kaluwasan. … Ang Basahon ni Mormon … gisulat alang sa atong panahon. …Dinhi [niini] atong makit-an ang sumbanan alang sa pagpangandam sa Ikaduhang Pag-anhi. …

“… Ang Basahon ni Mormon nagtudlo kanato sa kamatuoran [ug] nagpamatuod kang Kristo. … Apan adunay butang nga mas labaw pa. Adunay gahum niana nga basahon nga magsugod sa pagdagayday sa inyong mga kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dako nga gahum sa pagpakigbatok sa pagsulay. Makaplagan ninyo ang gahum sa paglikay sa panglingla. Makaplagan ninyo ang gahum nga magpabilin sa higpit og pig-ot nga dalan. Ang mga kasulatan mao ang gitawag og “mga pulong sa kinabuhi,” ug walay laing mas matuod pa kay sa Basahon ni Mormon. … ‘Ang matag Santos sa Ulahing mga Adlaw kinahanglang mohimo sa pagtuon niini nga basahon nga usa ka tinguha sa kinabuhi’” (sa Conference Report, Okt. 1986, 4–7; o Ensign, Nob. 1986, 5–7; nga nagkutlo kang Marion G. Romney, sa Conference Report, Abr. 1980, 90; o Ensign, Mayo 1980, 67).

Ang Doktrina ug mga Pakigsaad

Ang Dokrtina ug mga Pakigsaad usa ka kinolekta sa modernong mga pinadayag. Sa seksyon 1 sa Doktrina ug mga Pakigsaad, ang Ginoo mipadayag nga ang basahon gimantala alang sa mga lumulupyo sa yuta sa pag-andam kanila alang sa Iyang pag-anhi:

“Busa ang tingog sa Ginoo modangat ngadto sa mga lumulupyo sa yuta, nga ang tanan nga maminaw makadungog:

“Pangandam kamo, pangandam kamo alang niana nga moabut, kay ang Ginoo hapit na moabut” (D&P 1:11–12).

Kini nga basahon naglangkob sa mga pinadayag mahitungod sa Simbahan ni Jesukristo ingon nga kini gipahiuli niining ulahing mga adlaw. Daghang mga seksyon sa basahon mipasabut sa organisasyon sa Simbahan ug mihatag og kahulugan sa mga katungdanan sa priesthood ug sa ilang mga buluhaton. Ang ubang mga seksyon, sama sa seksyon 76 ug 88, naglangkob sa mga mahimayaong kamatuoran nga nawala sa kalibutan sulod sa gatusan ka mga katuigan. Ingon man ang uban, sama sa mga seksyon 29 ug 93, naghatag og katin-awan sa mga pagtulun-an sa Biblia. Agi og dugang, ang pipila sa mga seksyon, sama sa seksyon 133, naglangkob sa mga panagna sa mga panghitabo nga moabut. Ang Dios nagmado kanato sa pagtuon sa Iyang mga pinadayag dinhi niini nga basahon: “Siksika kini nga mga sugo, kay sila mga tinuod ug matinud-anon, ug ang mga panagna ug mga saad nga anaa kanila ang tanan matuman” (D&P 1:37).

Ang Perlas nga Labing Bililhon

Ang Perlas nga Labing Bililhon naglangkob sa basahon ni Moises, sa basahon ni Abraham, ug pipila sa mga dinasig nga mga sinulat ni Joseph Smith. Ang basahon ni Moises naglangkob sa asoy sa pipila ka mga panan-awon ug mga sinulat ni Moises, nga gipadayag ngadto kang Propeta Joseph Smith. Naghatag kini og katin-awan sa mga doktrina ug mga pagtulun-an nga nawala sa Biblia ug mihatag og dugang nga impormasyon mahitungod sa Paglalang sa yuta.

Ang basahon ni Abraham gihubad ni Propeta Joseph Smith gikan sa usa ka linukot nga papyrus nga gikuha gikan sa lubnganan sa mga Ehiptohanon. Kini nga basahon naglangkob sa bililhon nga impormasyon mahitungod sa Paglalang, sa ebanghelyo, sa kinaiya sa Dios, ug sa priesthood.

Ang mga sinulat ni Joseph Smith naglakip og bahin sa dinasig nga hubad ni Joseph Smith sa Biblia, mga pinili gikan sa iyang Kasaysayan sa Simbahan, ug sa mga Artikulo sa Hugot nga Pagtuo.

  • Unsa ang pipila ka mga sugilanon nga naggikan niini nga mga kasulatan ang nakadasig kanimo? Unsa ang pipila ka mga pagtulun-an gikan niini nga mga basahon sa kasulatan ang nakatabang kanimo?

Mga Pulong sa Atong Buhi nga mga Propeta

Agi og dugang niining upat ka mga basahon sa kasulatan, ang dinasig nga mga pulong sa atong buhi nga mga propeta nahimo nga kasulatan alang kanato. Ang ilang mga pulong moabut kanato pinaagi sa mga komperensya, sa Liahona o Ensign nga magasin, ug sa mga instruksyon alang sa lokal nga mga lider sa priesthood. “Kami nagtuo sa tanan nga gipadayag sa Dios, sa tanan nga gipadayag niya karon, ug kami nagtuo nga siya mopadayag pa og daghan nga dagko ug mahinungdanon nga mga butang kalabut sa Gingharian sa Dios.” (Mga Artikulo sa Hugot nga Pagtuo 1:9).

  • Asa man nato makita ang mga pulong sa atong buhi nga mga propeta?

Pagtuon sa mga Kasulatan

  • Unsang mga panalangin ang atong madawat kon magtuon kita sa mga kasulatan?

Kita kinahanglan nga ang matag-usa magtuon sa mga kasulatan matag adlaw. Kita kinahanglan nga mopaambit niini nga mga kamatuoran uban sa atong mga anak. Kita kinahanglan nga mobasa sa mga sumbanan nga basahon uban sa atong mga anak aron sila makakat-on sa paghigugma niini ug sa paggamit niini sa mga kamatuoran nga anaa niini.

Kon kita nagtinguha nga malikay sa mga dautan sa kalibutan, kinahanglan nga atong sudlan ang atong mga hunahuna sa kamatuoran ug pagkamatarung nga anaa sa mga kasulatan. Mas maduol kita sa Dios ug sa usag usa kon kita magbasa ug mamalandong sa mga kasulatan nga magkauban.

Kon kita mobasa, mamalandong, ug mag-ampo mahitungod sa mga kasulatan ug mangayo sa Dios og kahibalo, ang Espiritu Santo mopamatuod kanato sa kamatuoran niining mga butanga. Matag usa kanato masayud sa atong kaugalingon nga kining mga butanga matuod. Dili kita malingla (tan-awa sa Joseph Smith—Mateo 1:37). Madawat nato ang samang mga pagbati nga gipahayag ni Nephi sa dihang siya miingon, “Ang akong kalag nalipay sa mga butang sa Ginoo; ug ang akong kasingkasing nagpalandong sa kanunay diha sa mga butang diin ako nakakita ug nakadungog” (2 Nephi 4:16).

  • Unsaon man nato sa pagtuman sa pasalig nga magtuon sa mga kasulatan matag adlaw? Hunahunaa ang pagplano og usa ka panahon ug usa ka dapit alang sa pagtuon sa mga kasulatan matag adlaw.

Dugang nga mga Kasulatan