Mga Basahon ug mga Leksiyon
Kapitulo 27: Trabaho ug Personal nga Responsibilidad

Kapitulo 27

Trabaho ug Personal nga Responsibilidad

Imahe
A man working indoors on a lathe.

Ang Trabaho Usa ka Mahangturong Baruganan

  • Unsa nga mga kasinatian nga imong nasinati kaniadto nga nakapakita kanimo sa kamahinungdanon sa trabaho?

Ang atong Langitnong Amahan ug si Jesukristo nakapakita kanato pinaagi sa Ilang mga ehemplo ug mga pagtulun-an nga ang trabaho importante sa langit ug dinhi sa yuta. Ang Dios mitrabaho sa paglalang sa mga langit ug sa yuta. Gihimo niya nga ang mga dagat magpundok ngadto sa usa ka dapit ug ang uga nga yuta makita. Gihimo niya nga ang mga sagbut, mga hilba, ug mga kahoy motubo sa yuta. Gilalang Niya ang adlaw, ang buwan, ug ang mga kabitoonan. Gilalang niya ang matag buhi nga butang diha sa dagat o diha sa yuta. Dayon gibutang Niya si Adan ug si Eva diha sa yuta aron sa pag-amuma niini ug sa pagbaton og pagmando ibabaw sa tanang buhi nga mga butang. (Tan-awa sa Genesis 1:1–28.)

Si Jesus miingon, “Ang akong Amahan nagpadayon sa pagtrabaho bisan pa hangtud karon, ug Ako nagabuhat sa ingon” (Juan 5:17). Misulti usab siya, “Ako kinahanglan nga magabuhat sa mga buluhaton niya nga mao ang nagpadala kanako.” (Juan 9:4).

Kita Gimandoan sa Pagtrabaho

Ang trabaho mao na ang paagi sa kinabuhi dinhi sa yuta sukad si Adan ug si Eva mibiya sa Tanaman sa Eden. Ang Ginoo misulti ngadto kang Adan, “Sa singot sa imong nawong makakaon ikaw sa tinapay” (Genesis 3:19). Si Adan ug si Eva mitrabaho sa mga umahan aron sila makasangkap sa ilang kaugalingon nga mga panginahanglan ug sa mga panginahanglan sa ilang mga anak (tan-awa sa Moises 5:1).

Ang Ginoo misulti ngadto sa mga katawhan sa Israel, “Sa unom ka adlaw magbuhat kamo ug buhaton ninyo ang tanan ninyong buluhaton” (Exodo 20:9).

Sa unang mga panahon sa gipahiuli nga Simbahan, ang Ginoo misulti sa mga Santos sa Ulahing mga Adlaw, “Karon, Ako, ang Ginoo, wala mahimuot sa mga lumulupyo sa Zion, kay adunay mga tapulan diha kanila” (D&P 68:31).

Usa ka propeta sa Dios nag-ingon, “Ang pagtrabaho kinahanglan nga ipahimutang pag-usab isip ang madumalaong baruganan sa mga kinabuhi sa atong mga sakop sa Simbahan” (Heber J. Grant, Mga Pagtulun-an sa mga Presidente sa Simbahan: Heber J. Grant [2002], 137).

Responsibilidad sa Pamilya

  • Unsa man ang pipila ka mga responsibilidad nga ang mga amahan, mga inahan, ug mga anak aduna sa pag-amuma og usa ka panimalay? Unsa ang mabuhat sa mga sakop sa pamilya sa pagpakigbahin sa trabaho?

Ang mga ginikanan magtinabangay aron sa pagsangkap alang sa pisikal, espirituhanon, ug emosyonal nga kaayohan sa ilang pamilya. Kinahanglan dili gayud sila magpaabut og usa ka tawo nga mohimo niini nga responsibilidad alang kanila. Si Apostol Pablo misulat, “Ug kon adunay tawo nga wala magtagana alang sa mga iya, ilabina alang sa mga sakop sa iyang kaugalingong banay, kini siya nagalimud sa iyang pagtuo” (1 Timoteo 5:8).

Ang mga magtiayon kinahanglan mangayo og inspirasyon gikan sa Ginoo ug magsunod sa tambag sa mga propeta kon maghan-ay og tagsa-tagsa ka mga responsibilidad. Ang pagtukod og usa ka panimalay diin ang mga baruganan sa ebanghelyo gitudlo adlaw-adlaw ug diin ang gugma ug kahapsay buhong ingon ka importante sama sa pagsangkap sa unang mga panginahanglan sa pagkaon ug panaput.

Ang mga anak kinahanglan mobuhat sa ilang bahin diha sa trabaho sa pamilya. Kini kinahanglan alang sa mga anak nga adunay mga buluhaton nga haum sa ilang mga abilidad. Kinahanglan sila nga daygon alang sa ilang mga kalampusan. Ang maayo nga mga kinaiya sa pagtrabaho, mga naandan, ug mga kahanas makat-unan pinaagi sa malampuson nga mga kasinatian diha sa panimalay.

Usahay ang mga tawo makasugat og mga kalisud sa panahon nga naningkamot sa pagsangkap alang sa ilang mga pamilya. Dugay na nga sakit, ang pagkamatay sa kapikas, o ang pagtipon sa usa ka tigulang nga ginikanan makadugang sa mga responsibilidad sa usa ka panimalay. Ang atong Langitnong Amahan naghinumdom sa mga pamilya niini nga mga sitwasyon ug naghatag kanila sa kalig-on sa pagpas-an sa ilang mga katungdanan. Kanunay Siya nga mopanalangin kanila kon sila mangayo Kaniya diha sa hugot nga pagtuo.

Kita Mahimo nga Malingaw sa Atong Trabaho

  • Sa unsa nga paagi nga ang atong kinaiya maka-apekto sa atong trabaho?

Ngadto sa pipila ka mga tawo ang trabaho laay. Ngadto sa uban kini usa ka kulba-hinam nga bahin sa kinabuhi. Usa ka paagi nga matagamtaman ang labing hingpit nga mga kaayohan sa kinabuhi mao ang pagkat-on sa paghigugma sa trabaho.

Dili tanan kanato makapili sa matang sa trabaho nga atong buhaton. Pipila kanato nagtrabaho sulod sa taas nga mga oras alang sa nag-unang mga panginahanglan. Kini lisud nga malingaw sa ingon nga trabaho. Apan ang labing malipayon nga mga tawo nakakat-on nga malingaw diha sa ilang trabaho, bisan unsa pa man kini.

Makatabang kita sa usag usa diha sa atong trabaho. Ang labing bug-at nga palas-anon mogaan kon ang usa ka tawo makigbahin niini.

Ang atong kinaiya ngadto sa trabaho importante kaayo. Ang mosunod nga istorya nagpakita kon giunsa sa usa ka tawo pagtan-aw lapas sa iyang inadlaw nga trabaho. Usa ka tigbiyahe milabay sa usa ka kubkubanan og bato ug nakakita og tulo ka tawo nga nagtrabaho. Gipangutana niya ang matag usa unsay iyang gibuhat. Ang tubag sa matag tawo nagpaila og lain-lain nga kinaiya ngadto sa sama nga trabaho. “Nagsapsap ako og bato,” ang unang tawo mitubag. Ang ikaduha mitubag, “Gisweldohan ako og tulo ka pirasong bulawan matag adlaw.” Ang ikatulo nga tawo mipahiyom ug miingon, “Nagtabang ako pagtukod og usa ka balay sa Dios.”

Sa bisan unsang matinuoron nga trabaho kita makaserbisyo sa Dios. Si Hari Benjamin, usa ka Nephite nga propeta, miingon, “Kon kamo anaa sa pag-alagad sa inyong isigkatawo kamo anaa lamang sa pag-alagad sa inyong Dios” (Mosiah 2:17). Kon ang atong trabaho naghatag lamang og igo alang sa mga panginahanglan alang sa atong mga kaugalingon o sa atong mga pamilya, kita sa gihapon nagtabang og pipila sa mga anak sa Dios.

  • Sa unsa nga paagi kita makapauswag sa atong kinaiya kabahin sa trabaho?

Gipanghimaraut sa Dios ang Pagkatapulan

Ang Ginoo wala mahimuot niadtong kinsa mga tapulan o dili motrabaho. Siya miingon, “Ang tapulan walay dapit sa simbahan, gawas nga siya maghinulsol ug mag-usab sa iyang mga paagi” (D&P 75:29). Siya usab nagmando, “Dili kamo magtinapulan; kay siya nga tapulan dili makakaon sa pan ni makasul-ob sa mga saput sa mga mamumuo” (D&P 42:42).

Sukad sa unang mga adlaw sa Simbahan, ang mga propeta nagtudlo sa mga Santos sa Ulahing mga Adlaw sa pagkinaugalingon ug pagbuhi sa kaugalingon ug sa paglikay sa pagtinapulan. Ang tinuod nga Santos sa Ulahing mga Adlaw dili gayud buot nga kuhaon gikan sa ilang mga kaugalingon ang palas-anon sa pagsuporta sa ilang kaugalingon. Kutob nga sila makahimo pa, sila mosangkap sa ilang mga kaugalingon ug sa ilang mga pamilya sa mga kinahanglanon sa kinabuhi.

Kutob sa ilang mahimo, ang tanan nga mga miyembro sa Simbahan kinahanglang modawat sa responsibilidad sa pag-amuma sa ilang mga kabanay kinsa dili makahimo sa pagsangkap sa ilang mga kaugalingon.

  • Sa unsa nga paagi nga ang pagkatapulan maka-apekto sa usa ka tawo? sa usa ka pamilya? sa usa ka komunidad?

Trabaho, Kalingawan, ug Pahulay

  • Ngano nga importante man ang paghupot og balanse sa kinabuhi tali sa trabaho, kalingawan, ug pahulay

Kinahanglan nga ang matag usa kanato mangita sa husto nga balanse tali sa trabaho, kalingawan ug pahulay. Adunay usa ka karaan nga panultihon: “Ang walay buhaton mao ang labing lisud sa tanan nga trabaho, tungod kay ang usa ka tawo dili gayud mahimong mohunong aron mopahulay.” Kon walay trabaho, ang pahulay ug kalingawan walay kahulugan.

Dili lamang kini maayo ug kinahanglan nga mopahulay, apan kita gimandoan sa pagpahulay sa adlaw nga Igpapahulay (tan-awa sa Exodo 20:10; D&P 59:9–12). Kini nga adlaw sa pagpahulay human sa matag unom ka adlaw sa pagtrabaho nagdala og kahayahay alang sa mga adlaw nga mosunod. Ang Ginoo usab nagsaad sa “kabuhong sa yuta” alang niadto kinsa nagtuman sa adlaw nga Igpapahulay (tan-awa sa D&P 59:16–20; tan-awa usab sa kapitulo 24 dinhi niini nga basahon)

Sa uban nga mga adlaw sa semana, agi og dugang ngadto sa pagtrabaho, kita mahimo nga mogahin og panahon sa pagpalambo sa atong mga talento ug maglingawlingaw sa atong mga nagustuhang buhat, kalingawan, o uban nga mga kalihokan nga makapalagsik kanato.

  • Unsa ang atong mabuhat sa paghupot og maayo nga balanse tali sa trabaho, kalingawan, ug pahulay? Sa unsa nga paagi nga ang mga ginikanan makatabang sa ilang mga anak sa pagpadayon niini nga balanse?

Ang mga Panalangin sa Trabaho

  • Unsa ang pipila ka mga panalangin nga moabut gikan sa matinuoron nga trabaho?

Ang Dios mipadayag ngadto ni Adan, “Sa singot sa imong nawong magakaon ikaw sa tinapay” (Genesis 3:19). Agi og dugang ngadto sa temporal nga balaod, kini usa ka balaod alang sa kaluwasan sa kalag ni Adan. Walay tinuod nga pagkabahin tali sa espirituhanon, mental, ug pisikal nga trabaho. Ang trabaho kinahanglanon sa matag usa kanato alang sa pagtubo, pagpalambo sa kinaiya, ug sa daghang mga katagbawan nga dili gayud mahibaloan sa tapulan.

Si Presidente David O. McKay miingon, “Atong ilhon nga ang pribilehiyo sa pagtrabaho usa ka gasa, nga ang gahum sa pagtrabaho usa ka panalangin, nga ang gugma sa pagtrabaho usa ka kalampusan” (Pathways to Happiness [1957], 381).

“Ang mga tawo naingon, nga unta sila makabaton og hingpit nga kalipay” (2 Nephi 2:25). Ang trabaho mao ang yawe ngadto sa hingpit nga kalipay diha sa plano sa Dios. Kon kita matarung, kita makabalik og puyo uban sa atong Langitnong Amahan, ug kita adunay trabaho nga pagabuhaton. Samtang kita mahimo nga sama Kaniya, ang atong trabaho mahimo nga sama sa Iyang trabaho. Ang iyang trabaho mao “ang pagpahinabo sa pagka-imortal ug sa kinabuhing dayon sa tawo” (Moises 1:39).

Dugang nga mga Kasulatan