Mga Basahon ug mga Leksiyon
Kapitulo 4 Kagawasan sa Pagpili

Kapitulo 4

Kagawasan sa Pagpili

Imahe
Man standing at crossroads

Ang Kabubut-on Usa ka Mahangturon nga Baruganan

  • Kon adunay mangutana kanimo kon nganong importante man nga adunay kabubut-on, unsa man ang imong isulti?

“Ikaw mahimo nga makapili alang sa imong kaugalingon, kay kini gihatag nganha kanimo” (Moises 3:17).

Ang Dios misulti kanato pinaagi sa Iyang mga propeta nga kita gawasnon sa pagpili tali sa maayo ug sa dautan. Kita mahimong mopili sa kalingkawasan ug kinabuhing dayon pinaagi sa pagsunod kang Jesukristo. Kita gawasnon usab nga mopili sa pagkaulipon ug kamatayon pinaagi sa pagsunod kang Satanas. (Tan-awa sa 2 Nephi 2:27.) Ang katungod sa pagpili tali sa maayo ug sa dautan ug ang paglihok alang sa atong kaugalingon gitawag og kabubut-on.

Sa atong kinabuhi sa wala pa dinhi sa yuta kita adunay moral nga kabubut-on. Usa sa katuyoan sa yutan-ong kinabuhi mao ang pagpakita kon unsa nga mga pagpili ang atong pagabuhaton (tan-awa sa 2 Nephi 2:15–16). Kon kita gipugos pa sa pagpili sa matarung, dili unta kita makapakita unsa ang atong pilion alang sa atong kaugalingon. Ingon man, mas malipay kitang mobuhat sa mga butang kon kita ang mihimo sa kaugalingon natong mga pagpili.

Ang kabubut-on usa sa mga mahinungdanong butang nga mitumaw didto sa Konseho sa Langit sa wala pa dinhi sa yuta. Mao kadto ang usa sa mga nag-unang hinungdan sa kasungian tali sa mga sumusunod ni Kristo ug sa mga sumusunod ni Satanas. Si Satanas miingon, “Tan-awa, ania ako, ipadala ako, ako mahimo nga imong anak, ug ako motubos sa tanan nga mga katawhan, nga walay usa ka kalag nga mawala, ug sa pagkatinuod ako mobuhat niini; busa ihatag kanako ang imong dungog” (Moises 4:1). Sa iyang pagsulti niini, siya “misukol batok [sa Dios] ug nagtinguha sa paglaglag sa kabubut-on sa tawo” (Moises 4:3). Ang iyang tanyag wala dawata, ug siya gisalikway gikan sa langit uban sa iyang mga sumusunod (tan-awa sa D&P 29:36–37).

Ang Kabubut-on Usa ka Mahinungdanon nga Bahin sa Plano sa Kaluwasan

Ang kabubut-on naghimo sa atong kinabuhi sa yuta nga usa ka panahon sa pagsulay. Sa dihang giplano ang mortal nga paglalang sa Iyang mga anak, ang Dios miingon, “Kita mosulay [motino] kanila dinhi, aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila” (Abraham 3:25). Kon wala ang gasa sa kabubut-on, kita unta dili makahimo sa pagpakita sa atong Langitnong Amahan kon kita motuman ba sa tanan Niyang gisugo kanato. Tungod kay kita makahimo man sa pagpili, kita ang manubag sa mga kaugalingon natong mga binuhatan (tan-awa sa Helaman 14:30–31).

Kon kita mopili sa pagpuyo sumala sa plano sa Dios alang kanato, ang atong kabubut-on malig-on. Ang mga matarung nga mga pagpili makadugang sa atong gahum sa paghimo og mas daghan pang matarung nga mga pagpili.

Samtang kita mosunod sa mga sugo sa atong Amahan, motubo kita diha sa kaalam ug kalig-on sa kinaiya. Ang atong hugot nga pagtuo magkadugang. Mas sayon alang kanato ang paghimo og matarung nga mga pagpili.

Kita nagsugod sa paghimo og mga pagpili sa dihang kita mga espiritu pa nga mga anak didto sa presensya sa atong Langitnong Amahan. Ang atong mga pagpili didto naghimo natong takus nga moanhi sa yuta. Ang atong Langitnong Amahan gusto nga motubo kita diha sa hugot nga pagtuo, gahum, kahibalo, kaalam, ug sa tanang maayo nga mga butang. Kon kita mohupot sa Iyang mga sugo ug mohimo og matarung nga mga pagpili, kita makakat-on ug makasabut. Kita mamahimo nga sama Kaniya. (Tan-awa sa D&P 93:28.)

  • Sa unsang paagi nga ang paghimo og matarung nga mga pagpili makatabang kanato nga mohimo og dugang pa nga matarung nga mga pagpili?

Ang Kabubut-on Nagkinahanglan Nga Adunay usa ka Pagpili

  • Ngano nga ang katugbang gikinahanglan man?

Dili kita makapili sa pagkamatarung gawas lamang kon ang katugbang sa maayo ug dautan anaa sa atong atubangan. Si Lehi, usa ka propeta sa Basahon ni Mormon, miingon sa iyang anak nga si Jacob nga aron sa pagpahinabo sa walay katapusan nga mga katuyoan sa Dios, kinahanglan nga adunay “katugbang sa tanang mga butang. Kay kon wala, … ang pagkamatarung dili gayud mapahinabo, ni ang pagkadautan, ni ang pagkabalaan ni ang pagkauyamot ni ang pagkamaayo ni ang pagkangil-ad” (2 Nephi 2:11).

Ang Dios mitugot ni Satanas nga mosupak sa maayo. Ang Dios miingon mahitungod ni Satanas:

“Ako nagsugo nga siya isalikway;

“Ug siya nahimo nga Satanas, oo gani ang yawa, ang amahan sa tanan nga mga bakak, sa pag-ilad ug sa pagbuta sa mga tawo, ug pagdala kanila nga ulipon sa iyang pagbuot, gani kutob sa dili maminaw ngadto sa akong tingog” (Moises 4:3–4).

Si Satanas mohimo sa tanan niyang mahimo sa paglaglag sa buhat sa Dios. Siya nagtinguha “sa kauyamot sa tanan nga mga katawhan. … Kay siya nagtinguha nga ang tanan nga mga tawo unta mahimo nga mauyamot sama ngadto kaniya” (2 Nephi 2:18, 27). Siya wala mahigugma kanato. Siya dili gusto og bisan unsang maayo nga butang alang kanato (tan-awa sa Moroni 7:17). Siya dili gusto nga kita magmalipayon. Siya gusto nga kita mahimo niyang mga ulipon. Siya migamit og daghang mga pagtakuban aron sa paghimo kanato nga ulipon.

Kon mosunod kita sa mga pagtintal ni Satanas, atong gilimitahan ang atong mga pagpili. Ang mga mosunod nga ehemplo nagsugyot kon sa unsang paagi kini mahimo. Hunahunaa nga nakakita ka og usa ka pahibalo diha sa baybayon nga nag-ingon: “Peligro—lilo. Gidili ang pagkaligo dinhi.” Tingali nagtuo kita nga kana usa ka pagdili. Apan mao ba kini? Sa gihapon kita adunay daghan nga mga kapilian. Gawasnon kitang molangoy bisan asa. Gawasnon kitang molakaw subay sa baybayon ug mamunit og mga kinhason. Gawasnon kitang motan-aw sa pagsalop sa adlaw. Gawasnon kitang mopauli. Gawasnon usab kita sa pagbaliwala sa pahibalo ug molangoy sa peligro nga dapit. Apan sa higayon nga ang lilo mosuyop na kanato ug lamyon kita sa ilawom, gamay na lang kaayo ang atong kapilian. Makapaningkamot kitang makalingkawas, o makasinggit og tabang, apan mahimo nga kita malumos.

Bisan tuod og kita gawasnon sa papili sa atong pagahimoon, dili kita gawasnon sa pagpili sa mga sangputanan sa atong mga gihimo. Ang mga sangputanan, maayo man o mangil-ad, nagsunod isip natural nga resulta sa bisan unsang pagpili nga atong gihimo (tan-awa sa Mga Taga-Galacia 6:7; Pinadayag 22:12).

Ang Langitnong Amahan misulti kanato kon unsaon sa paglingkawas sa pagkabihag ni Satanas. Kita kinahanglang magbantay ug mag-ampo kanunay, mohangyo sa Dios nga kita tabangan nga makabuntog sa mga tintasyon ni Satanas (tan-awa sa 3 Nephi 18:15). Ang atong Langitnong Amahan dili motugot kanato nga matintal labaw sa atong gahum nga makalahutay (tan-awa sa 1 Mga Taga-Corinto 10:13; Alma 13:28).

Ang mga sugo sa Dios nagdala kanato palayo sa peligro ug padulong ngadto sa kinabuhing dayon. Pinaagi sa maalamon nga pagpili, kita makaangkon sa kahimayaan, mouswag sa walay katapusan, ug makatagamtam sa hingpit nga kalipay (tan-awa sa 2 Nephi 2:27–28).

  • Unsa man ang pipila ka mga sanglitanan sa mga lihok nga molimit sa atong mga pagpili? Unsa man ang pipila ka mga sanglitanan sa mga lihok nga makahatag kanato og dugang nga kagawasan?

Dugang nga mga Kasulatan