Mga Basahon ug mga Leksiyon
Kapitulo 40: Buhat sa Templo ug Family History

Kapitulo 40

Buhat sa Templo ug Family History

Imahe
The east spires of the Salt Lake Temple with the Angel Moroni and clouds in the sky.

Ang Langitnong Amahan Buot nga ang Iyang mga Anak Mobalik ngadto Kaniya

Ang Pag-ula ni Jesukristo nagsiguro sa matag usa kanato nga kita mabanhaw ug mabuhi sa kahangturan. Apan kon kita magpakabuhi sa kahangturan uban sa atong mga pamilya sa presensya sa Langitnong Amahan, kinahanglan gayud nga atong buhaton ang tanan nga gimando sa Manluluwas nga atong buhaton. Kini naglakip sa pagpabunyag ug pagpakumpirma ug sa pagdawat sa mga ordinansa sa templo.

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, matag usa kanato nabunyagan ug nakumpirmahan pinaagi sa usa ka tawo nga naghupot sa tukma nga awtoridad sa priesthood. Ang matag usa kanato mahimo usab nga moadto sa templo aron sa pagdawat sa makaluwas nga mga ordinansa sa priesthood nga gipahigayon didto. Apan daghan sa mga anak sa Dios wala makabaton og sama niini nga mga oportunidad. Nagpuyo sila sa usa ka panahon o dapit nga ang ebanghelyo wala diha kanila.

Ang Langitnong Amahan buot nga ang tanan Niyang mga anak mobalik ug mopuyo uban Kaniya. Alang niadtong kinsa namatay nga walay bunyag o mga ordinansa sa templo, Siya naghatag og usa ka paagi alang niini nga mahitabo. Nagsugo Siya kanato sa pagpahigayon og mga ordinansa alang sa atong mga katigulangan didto sa mga templo.

Mga Templo sa Ginoo

  • Ngano nga ang mga templo importante man sa atong mga kinabuhi?

Ang mga templo sa Ang Simbahan ni Jesukristo sa mga Santos sa Ulahing mga Adlaw espesyal nga mga bilding nga gihalad ngadto sa Ginoo. Ang takus nga mga miyembro sa Simbahan mahimo nga moadto didto aron sa pagdawat og sagrado nga mga ordinansa ug sa paghimo og mga pakigsaad uban sa Dios. Sama sa bunyag, kini nga mga ordinansa ug mga pakigsaad gikinahanglan alang sa atong kaluwasan. Kini kinahanglan nga ipahigayon didto sa mga templo sa Ginoo.

Moadto usab kita sa templo aron sa pagkat-on pa og dugang mahitungod sa Langitnong Amahan ug sa Iyang Anak, nga si Jesukristo. Makabaton kita og mas maayo nga pagsabut sa atong katuyoan sa kinabuhi ug sa atong relasyon ngadto sa Langitnong Amahan ug ni Jesukristo. Gitudloan kita mahitungod sa atong kinabuhi sa wala pa dinhi sa yuta, sa kahulugan sa kinabuhi sa yuta, ug sa kinabuhi human sa kamatayon.

Mga Ordinansa sa Templo Mobugkos sa mga Pamilya aron Magkauban sa Kahangturan

  • Unsa ang gipasabut nga mabugkos?

Ang tanan nga mga ordinansa sa templo gipahigayon pinaagi sa gahum sa priesthood. Pinaagi niini nga gahum, ang mga ordinansa nga gipahigayon dinhi sa yuta gisilyo, o gibugkos sa langit. Ang Manluluwas mitudlo sa Iyang mga Apostoles, “Bisan unsay imong pagabugkoson dinhi sa yuta didto sa langit pagailhon kini nga binugkos” (Mateo 16:19; tan-awa usab sa D&P 132:7).

Diha lamang sa templo nga kita mahimo nga mabugkos aron magkauban sa kahangturan. Ang kaminyoon diha sa templo nagbugkos sa usa ka lalaki ug babaye isip bana ug asawa sa kahangturan kon sila motahud sa ilang mga pakigsaad. Ang bunyag ug ang tanang uban pa nga mga ordinansa nag-andam kanato alang niini nga sagrado nga kalihokan.

Kon ang usa ka lalaki ug babaye naminyo sa templo, ang ilang mga anak kinsa matawo human niana mahimo usab nga kabahin sa ilang mahangturon nga pamilya. Ang mga magtiayon kinsa naminyo sa sibil nga paagi makadawat niini nga mga panalangin pinaagi sa pagpangandam sa ilang mga kaugalingon ug sa ilang mga anak sa pag-adto sa templo ug magpabugkos sa usag usa. Ang mga ginikanan kinsa sa legal nga paagi nagsagop og mga bata mahimo nga ipabugkos kadto nga mga bata nganha kanila.

  • Unsa man ang kinahanglan gayud nga buhaton sa usa ka magtiayon aron paghimo sa gahum sa pagbugkos nga epektibo diha sa ilang kaminyoon?

Atong mga Katigulangan Nagkinahanglan sa Atong Tabang

  • Unsay atong mga responsibilidad ngadto sa atong mga katigulangan kinsa nangamatay nga wala makadawat sa mga ordinansa sa priesthood?

Si Mario Cannamela naminyo ni Maria Vitta pagka 1882. Nagpuyo sila sa Tripani Italy, diin nagpatubo sila og usa ka pamilya ug nag-inambitay og daghang nindot nga mga tuig sa panag-uban. Wala makadungog si Mario ug si Maria sa ebanghelyo mahitungod sa gipahiuli nga ebanghelyo ni Jesukristo sulod sa panahon sa ilang mga kinabuhi. Wala sila mabunyagi. Sila walay sa oportunidad nga makaadto sa templo ug mahiusa sa pagpabugkos isip usa ka mahangturon nga pamilya. Diha sa kamatayon, ang ilang kaminyoon natapos.

Sobra sa usa ka siglo ang milabay usa ka dako nga panagkita pag-usab nahitabo. Ang mga kaliwat ni Mario ug Maria miadto sa Templo sa Los Angeles, diin ang usa ka apo sa tuhod ug ang iyang asawa miluhod sa altar ug mihimo isip mga puli alang sa pagbugkos ni Mario ug Maria. Mga luha mipuno sa ilang mga mata samtang sila nakigbahin sa kalipay ni Mario ug Maria.

Daghan sa atong mga katigulangan apil niadtong kinsa nangamatay nga wala makadungog mahitungod sa ebanghelyo samtang dinhi pa sa yuta. Nagpuyo sila karon sa kalibutan sa espiritu (tan-awa sa kapitulo 41 dinhi niini nga basahon). Didto gitudloan sila sa ebanghelyo ni Jesukristo. Kadto kinsa midawat sa ebanghelyo nagpaabut alang sa mga ordinansa sa templo nga ipahigayon alang kanila. Samtang kita nagpahigayon niini nga mga ordinansa diha sa templo alang sa atong mga katigulangan, makaambit kita sa ilang kalipay.

  • Sa unsa nga paagi nga ang doktrina sa kaluwasan alang sa patay nagpakita sa kaangayan, kapuangod, ug kalooy sa Dios?

  • Unsa nga mga kasinatian nga imong nasinati sa paghimo og buhat alang sa imong mga katigulangan?

Family History—Unsaon Nato Pagsugod Pagtabang ang atong mga Katigulangan

  • Unsa ang nag-unang mga lakang sa paghimo og family history nga buhat?

Ang mga Santos sa Ulahing mga Adlaw giawhag sa pag-apil sa mga kalihokan sa family history. Pinaagi niini nga mga kalihokan kita makakat-on mahitungod sa atong mga katigulangan aron kita makapahigayon og mga ordinansa alang kanila. Ang family history naglakip og tulo ka nag-unang mga lakang:

  1. Pag-ila sa atong mga katigulangan.

  2. Pagsusi kinsa sa mga katigulangan ang nanginahanglan og mga ordinansa sa templo nga ipahigayon

  3. Pagsiguro nga ang mga ordinansa napahigayon alang kanila.

Kadaghanan sa mga ward ug mga branch adunay mga consultant sa family history kinsa makatubag sa mga pangutana ug makatudlo kanato ngadto sa mga kapanguhaan nga atong gikinahanglan. Kon ang usa ka ward o branch walay consultant sa family history, ang bishop o branch president makahatag sa pagtudlo.

Pag-ila sa Atong mga Katigulangan

Sa pagpahigayon og mga ordinansa sa templo alang sa atong mga katigulangan, kinahanglan kita nga makaila sa ilang mga pangalan. Daghang nindot nga mga kapanguhaan ang anaa karon aron sa pagtabang kanato sa pag-ila sa mga pangalan sa atong mga katigulangan.

Ang usa ka maayo nga paagi sa pagsugod og pundok sa impormasyon mahitungod sa atong mga katigulangan mao ang pagtan-aw kon unsa ang anaa sa atong kaugalingong mga panimalay. Mahimo nga kita adunay mga sertipiko sa pagkatawo, pagkaminyo, o sa pagkamatay. Mahimo nga kita makakaplag usab og mga Biblia sa pamilya, talaan sa mga patay, mga kasaysayan sa pamilya, o mga diary ug mga journal. Agi og dugang, kita makapangayo sa mga kabanay og impormasyon nga sila aduna. Human sa pagtigum og impormasyon diha sa atong mga panimalay ug gikan sa atong mga katigulangan, kita makasiksik sa uban nga mga kapanguhaan sama sa FamilySearch.org. Mahimo usab kita nga mobisita sa usa sa mga lokal nga sentro sa family history sa Simbahan.

Unsa ka daghan ang atong mahibaloan mag-agad sa unsa nga impormasyon ang anaa ngari kanato. Mahimo nga kita adunay gamay lamang nga impormasyon sa pamilya ug mahimong dili na makabuhat og dugang pa kay sa pag-ila sa atong mga ginikanan ug mga apohan. Kon kita aduna nay daghan nga koleksyon sa mga rekord sa pamilya, kita makahimo sa pag-ila sa mga katigulangan gikan sa mga henerasyon sa dugay nang nanglabay nga panahon.

Kita makasubay sa impormasyon nga atong gipundok diha sa mga family group record ug mga pedigree chart.

Pagsusi Kinsa sa mga Katigulangan Nagkinahanglan nga ang mga Ordinansa sa Templo Ipahigayon

Ang mga ordinansa sa templo gipahigayon na alang sa patay sukad pa sa unang mga adlaw sa Simbahan. Agi og resulta, pipila sa mga ordinansa alang sa atong mga katigulangan nahuman na sa paghimo. Aron mahibaloan kinsa nga mga katigulangan ang nanginahanglan og mga ordinansa sa templo, makatan-aw kita sa duha ka mga dapit. Ang atong kaugalingon nga rekord sa pamilya tingali adunay impormasyon mahitungod sa unsa na ang nahimo. Kon dili, ang Simbahan adunay rekord sa tanan nga mga ordinansa nga napahigayon na sa templo. Ang imong consultant sa ward o branch sa family history makatabang kanimo niini nga paningkamot.

Pagsiguro nga ang mga Ordinansa Napahigayon

Daghan sa atong mga katigulangan sa kalibutan sa espiritu tingali matinguhaong modawat sa ilang mga ordinansa sa templo. Sa diha-diha nga atong mailhan kini nga mga katigulangan, kinahanglan atong andamon nga kining trabaho pagahimoon alang kanila.

Usa sa mga panalangin sa buhat sa family history moabut gikan sa pag-adto sa templo ug sa pagpahigayon sa mga ordinansa alang sa atong mga katigulangan. Kinahanglan atong andamon ang atong mga kaugalingon sa pagdawat og rekomen sa templo aron nga, kon posible, atong mahimo kini nga trabaho. Kon ang atong mga anak mga 12 anyos o mas magulang pa, sila makaambit niini nga mga panalangin pinaagi sa pagpabunyag ug pagpakumpirma alang sa ilang mga katigulangan.

Kon kini dili posible alang kanato sa pag-adto sa templo aron sa pag-apil sa mga ordinansa, ang templo moandam sa paghimo sa mga ordinansa nga mapahigayon pinaagi sa uban nga mga miyembro sa Simbahan.

  • Sa unsa nga mga paagi ang Ginoo nagtabang kaninyo o sa mga sakop sa inyong pamilya sa pagpangita og impormasyon mahitungod sa inyong mga katigulangan?

Dugang nga mga Oportunidad sa Family History

  • Unsa man ang pipila ka yano nga mga paagi alang sa usa ka tawo nga adunay daghan nga laing mga responsibilidad nga makaapil sa buhat sa family history?

Agi og dugang sa paghatag og mga ordinansa sa templo alang sa mga katigulangan nga atong nailhan, kita makatabang niadto nga anaa sa kalibutan sa espiritu sa daghan nga laing mga paagi. Kinahanglan kita nga mangayo sa giya sa Espiritu samtang kita mainampoon nga maghunahuna kon unsa ang angay nga buhaton. Nag-agad sa atong mga kahimtang, kita makahimo sa mosunod nga mga butang:

  1. Tambong sa templo kanunay kutob sa mahimo. Human kita makaadto sa templo alang sa atong mga kaugalingon, makapahigayon kita sa makaluwas nga mga ordinansa alang sa uban nga naghulat didto sa kalibutan sa espiritu.

  2. Paghimo og pagsiksik aron sa pag-ila sa mga katigulangan kinsa mas lisud nga pangitaon. Ang mga consultant sa family history makagiya kanato ngadto sa makatabang nga mga kapanguhaan.

  3. Pagtabang sa programa sa Simbahan sa pag-index. Pinaagi niini nga programa, ang mga miyembro nag-andam og mga impormasyon sa kaliwatan alang sa paggamit diha sa mga programa sa computer sa family history sa Simbahan. Kini nga mga programa naghimo nga mas sayon alang kanato sa pag-ila sa atong mga katigulangan.

  4. Paghatag og impormasyon sa family history ngadto sa bag-ong programa sa computer sa family history sa Simbahan. Kini nga mga programa naglangkob og mga kaliwatan nga gihatag sa mga katawhan sa tibuok kalibutan. Mitugot sila sa mga katawhan sa pagpakigbahin sa ilang impormasyon sa pamilya. Ang mga consultant sa family history makahatag og daghan pa nga impormasyon mahitungod sa mga programa sa computer sa Simbahan.

  5. Pag-apil diha sa mga organisasyon sa pamilya. Makahuman kita og mas daghan alang sa atong mga katigulangan samtang kita nagdungan sa pagtrabaho kauban sa ubang mga sakop sa pamilya.

  • Paghunahuna mahitungod sa unsay imong mabuhat nga madugangan ang imong pag-apil sa buhat sa templo ug sa family history.

Dugang nga mga Kasulatan