Mga Basahon ug mga Leksiyon
Kapitulo 8 Pag-ampo ngadto sa Atong Langitnon nga Amahan

Kapitulo 8

Pag-ampo ngadto sa Atong Langitnon nga Amahan

Imahe
A woman sitting at a desk with the scriptures open in front of her. She has her hands clasped and eyes closed in prayer.

Unsa ang Pag-ampo?

Si Jesus nagtudlo, “Kamo kinahanglan gayud nga mag-ampo sa kanunay ngadto sa Amahan sa akong ngalan”(3 Nephi 18:19).

Ang pag-ampo mao ang usa sa mga pinakamahinungdanong panalangin nga anaa kanato samtang ania kita ibabaw sa yuta. Pinaagi sa pag-ampo kita mahimong makigsulti sa Langitnong Amahan ug magtinguha sa Iyang giya matag adlaw.

Ang pag-ampo usa ka sinsero, kinasingkasing nga pakigsulti uban sa atong Langitnong Amahan. Kita kinahanglang mag-ampo ngadto sa Dios ug wala nay lain pa. Dili kita mag-ampo ngadto sa laing binuhat o ngadto sa bisan unsa nga butang nga hinimo sa tawo o sa Dios (tan-awa sa Exodo 20:3–5).

Nganong Mag-ampo man Kita?

Ang pag-ampo usa na ka importante nga bahin sa ebanghelyo gikan pa sa sinugdanan sa kalibutan. Ang anghel sa Ginoo misugo ni Adan ug ni Eva sa paghinulsol ug motawag sa Dios sa pangalan sa Anak (tan-awa sa Moises 5:8). Kini nga sugo wala gayud tangtanga. Ang pag-ampo makatabang kanato nga mas maduol sa Dios. Tanan natong panghunahuna, mga pulong, ug atong mga lihok naimpluwensya sa atong mga pag-ampo.

Kita kinahanglan nga mag-ampo alang sa kalig-on sa pagbatok sa mga tintasyon ni Satanas ug sa iyang mga sumusunod (tan-awa sa 3 Nephi 18:15; D&P 10:5). Kita kinahanglan nga mag-ampo aron masulti ang atong mga sala ngadto sa Dios ug mohangyo Kaniya sa pagpasaylo kanato (tan-awa sa Alma 38:14).

Kita kinahanglan nga mag-ampo alang sa giya ug tabang sa Ginoo diha sa atong inadlaw-adlaw nga panginabuhi. Kita kinahanglan nga mag-ampo alang sa atong mga pamilya ug sa atong mga higala, sa atong mga silingan, sa atong mga tanom, ug mga hayop, ug sa inadlaw-adlaw natong trabaho, ug sa atong uban pa nga mga kalihokan. Kita kinahanglan nga mag-ampo alang sa proteksyon gikan sa atong mga kaaway. (Tan-awa sa Alma 34:17–27.)

Kita kinahanglan nga mag-ampo aron sa pagpahayag sa atong gugma ngadto sa atong Langitnong Amahan ug mobati nga mas duol Kaniya. Kita kinahanglan nga mag-ampo sa atong Amahan aron sa pagpasalamat Kaniya sa atong mga kaayohan ug kahupayan ug sa tanang mga butang nga Iyang gihatag kanato sa matag adlaw (tan-awa sa 1 Mga Taga-Tesalonica 5:18). Kita kinahanglan nga mag-ampo aron mangayo ngadto sa atong Langitnong Amahan og kalig-on sa pagsunod sa ebanghelyo.

Kita kinahanglan nga mag-ampo aron kita magpabilin sa higpit ug pig-ot nga dalan nga nagpadulong ngadto sa kinabuhing dayon. Kita kinahanglan nga mag-ampo sa Dios, ang tigpasiugda sa tanang pagkamatarung, aron kita magmatarung sa atong mga hunahuna, mga pulong ug mga buhat.

  • Sa unsang paagi nga ang pag-ampo nakatabang kanimo nga mas maduol ngadto sa Langitnong Amahan?

Kanus-a man Kita Kinahanglan nga Mag-ampo?

Mahimo kitang mag-ampo bisan kanus-a nga atong gibati nga kita kinahanglang makigsulti sa atong Langitnong Amahan, sa hilum man o sa kusog nga pakigsulti. Usahay kinahanglan kitang mag-inusara diin atong mabu-bu ang atong mga kalag ngadto Kaniya (tan-awa sa Mateo 6:6). Agi og dugang, mahimo kitang mag-ampo panahon sa inadlaw-adlaw natong mga kalihokan. Kita mahimo nga mag-ampo samtang anaa kita sa usa ka miting sa Simbahan, sa balay, samtang naglakaw sa dalan, sa trabaho, sa pag-andam og pagkaon, o bisan asa man kita ug bisan unsa man ang atong gibuhat. Kita mahimo nga mag-ampo bisan unsa nga oras sa adlaw o gabii. Kita mahimo nga mag-ampo sa panahon nga kita mag-inusara o sa panahon nga anaa kita uban sa laing mga tawo. Kita makapadayon sa pag-ampo sa atong Langitnong Amahan diha sa atong mga hunahuna sa tanang panahon (tan-awa sa Alma 34:27). Kita mahimo nga “mag-ampo kanunay” (D&P 10:5).

Adunay mga higayon nga dili kita ganahang mag-ampo. Tingali anaa kita sa kasuko o kasagmuyo o kahiubos. Niini nga mga panahon kinahanglan kitang mohimo og espesyal nga paningkamot nga mag-ampo (tan-awa sa 2 Nephi 32:8–9).

Kita sa matag usa kinahanglan nga mag-ampo nga ikaw ra labing minus matag gabii ug matag buntag. Ang mga kasulatan naghisgut og pag-ampo sa buntag, sa udto ug sa gabii (tan-awa sa Alma 34:21).

Kita gimandoan nga adunay pamilya nga mga pag-ampo aron ang atong pamilya unta mapanalanginan (tan-awa sa 3 Nephi 18:21). Ang atong mga lider sa Simbahan mitambag kanato nga mag-ampo isip mga pamilya matag buntag ug gabii.

Kita usab adunay kahigayunan nga mag-ampo aron magpasalamat ug mangayo og panalangin sa pagkaon sa dili pa ang matag tingkaon.

Atong sugdan ug tapuson ang tanan natong mga miting sa Simbahan pinaagi sa pag-ampo. Magpasalamat kita sa Ginoo sa Iyang mga panalangin ug mangayo sa Iyang panabang aron kita unta magasimba sa paagi nga ikahimuot Niya.

Sa Unsang Paagi Kita Mag-ampo?

Bisan asa man kita, kon kita nagbarug man o nagluhod, kon kita nag-ampo man sa kusog o sa hilum nga tingog, kon nag-inusara man o nag-ampo alang sa pundok, kita kinahanglan nga mag-ampo diha sa hugot nga pagtuo, “sa kinasingkasing, uban sa tinuod nga katuyoan” (Moroni 10:4).

Samtang mag-ampo kita ngadto sa atong Langitnong Amahan, kinahanglan kita nga mopahayag Kaniya kon unsa gayud ang atong gibati diha sa sulod sa atong mga kasingkasing, motug-an Kaniya, mangayo Kaniya og pasaylo, mangamuyo Kaniya, magpasalamat Kaniya, mopahayag sa atong gugma alang Kaniya. Kinahanglang dili nato balik-balikon ang walay kahulugan nga mga pulong ug hugpong sa mga pulong (tan-awa sa Mateo 6:7–8). Kita kinahanglan nga mohangyo kanunay nga ang Iyang pagbuot mao ang matuman, hinumduman nga kon unsa man ang atong gitinguha mahimo nga dili ang pinakamaayo alang kanato (tan-awa sa 3 Nephi 18:20). Sa katapusan sa atong pag-ampo, kita motapos diha sa pangalan ni Jesukristo (tan-awa sa 3 Nephi 18:19).

Sa Unsang Paagi nga ang mga Pag-ampo Matubag?

  • Sa imong hunahuna ngano man nga ang mga tubag sa mga pag-ampo dili sa kanunay makita dayon? Sa imong hunahuna ngano man nga ang mga tubag sa pag-ampo dili kanunay moabut kon atong gusto o sa paagi nga atong gusto?

Ang sinsero natong mga pag-ampo kanunay nga tubagon. Usahay ang tubag mahimong dili, tungod kay ang atong gipangayo tingali dili labing maayo alang kanato. Usahay ang tubag oo, ug kita adunay kainit, komportable nga pagbati mahitungod sa unsay angay natong buhaton (tan-awa sa D&P 9:8–9). Usahay ang tubag “paghulat lang og kadiyut.” Ang atong mga pag-ampo kanunay nga matubag sa usa ka panahon ug sa usa ka paagi nga nasayran sa Ginoo nga kini labing makatabang kanato.

Usahay ang Ginoo motubag sa atong mga pag-ampo pinaagi sa uban nga mga tawo. Ang usa ka maayo nga higala, usa ka bana o asawa, usa ka ginikanan o laing sakop sa pamilya, usa ka lider sa Simbahan, usa ka misyonaryo—bisan kinsa nining mga tawhana mahimong dasigon sa paghimo og mga buhat nga motubag sa atong mga pag-ampo. Usa ka sanglitanan niini mao ang kasinatian sa usa ka batan-ong inahan kansang gamay pa nga anak nasamdan sa usa ka aksidente sa balay. Siya walay makita nga paagi nga madala ang gamayng bata ngadto sa usa ka doktor. Bag-o lamang siya sa dapit ug wala makaila sa iyang mga silingan. Ang batan-ong inahan nag-ampo alang sa panabang. Pipila lamang ka minuto, usa ka silingan miabut sa pultahan, nag-ingon, “Gibati nako nga ako kinahanglan gyud nga moanhi ug tan-awon kon nagkinahanglan ba ikaw og tabang.” Ang silingan mitabang sa batan-ong inahan nga madala ang gamayng bata ngadto sa doktor.

Kasagaran ang Dios mohatag kanato sa gahum aron matubag ang atong kaugalingon nga mga pag-ampo. Samtang mag-ampo kita alang sa panabang, kita kinahanglan nga mobuhat sa tanan kutob sa atong mahimo aron matuman ang mga butang nga atong gitinguha.

Samtang kita magsunod sa ebanghelyo ni Jesukristo ug mag-ampo kanunay, kita makabaton og kamaya ug kalipay. “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (D&P 112:10).

  • Sa unsang mga paagi nga ang Langitnong Amahan mitubag sa imong mga pag-ampo?

Dugang nga mga Kasulatan ug Ubang mga Kapanguhaan