Mga Basahon ug mga Leksiyon
Kapitulo 18 Hugot nga Pagtuo diha kang Jesukristo

Kapitulo 18

Hugot nga Pagtuo diha kang Jesukristo

Imahe
Full length profile portrait of Jesus Christ. He is depicted wearing a white robe with a blue belt. He has one hand extended. His other hand is touching His chest.

Unsa ang Hugot nga Pagtuo

Ang hugot nga pagtuo kang Ginoong Jesukristo mao ang unang baruganan sa ebanghelyo. Usa kini ka espirituhanon nga gasa, ug kinahanglanon kini sa atong kaluwasan. Si Haring Benjamin namahayag, “Ang kaluwasan dili modangat kaniya … gawas kon kini pinaagi sa paghinulsol ug hugot nga pagtuo diha sa Ginoong Jesukristo” (Mosiah 3:12).

Ang hugot nga pagtuo usa ka “paglaum sa mga butang diin dili makita, diin mga tinuod” (Alma 32:21; tan-awa usab sa Mga Hebreohanon 11:1). Ang hugot nga pagtuo usa ka baruganan sa paglihok ug gahum nga modasig sa atong mga inadlaw-adlaw nga mga kalihokan.

Motuon ba kaha kita ug mokat-on kon wala kita motuo nga kita makabaton og kaalam ug kahibalo? Motrabaho kaha kita kada adlaw kon wala pa kita maglaum nga sa pagbuhat sa ingon aduna kitay mahuman nga usa ka butang? Ang mga mag-uuma mananom kaha kon siya wala pa magpaabut nga moani? Matag adlaw kita nagbuhat sa mga butang nga atong gilauman nga wala pa nato makita kon unsa ang resulta niini. Mao kini ang hugot nga pagtuo. (Tan-awa sa Mga Hebreohanon 11:3.)

Daghang mga sugilanon nga anaa sa kasulatan nagsulti kon sa unsang paagi nga ang dagkong mga butang nahimo pinaagi sa hugot nga pagtuo.

Pinaagi sa hugot nga pagtuo si Noe nakahimo og arka ug miluwas sa iyang pamilya gikan sa baha (tan-awa sa Mga Hebreohanon 11:7). Si Moises mibahin sa mga tubig sa Dagat nga Mapula (tan-awa sa Mga Hebreohanon 11:29). Si Elias mihangyo og kalayo gikan sa langit (tan-awa sa 1 Mga Hari 18:17–40). Si Nephi nagtawag og kagutom (tan-awa sa Helaman 11:3–5). Nangayo usab siya sa Ginoo sa pagtapos sa kagutom (tan-awa sa Helaman 11:9–17). Ang kadagatan napalinaw, mga panan-awon naablihan, ug mga pag-ampo natubag, ang tanan tungod sa gahum sa hugot nga pagtuo.

Samtang kita mainampingon nga magtuon sa mga kasulatan, atong masayran nga ang hugot nga pagtuo usa ka lig-on nga pagtuo sa kamatuoran sulod sa atong mga kalag nga modasig kanato sa paghimo og maayo. Kini ang nagtukmod kanato sa pagpangutana: Kang kinsa man kita kinahanglan adunay hugot nga pagtuo?

  • Hunahunaa ang imong inadlaw nga mga kalihokan. Unsa ang mga butang nga imong gibuhat matag adlaw nga dili nimo makita unsa ang lintunganay niini? Sa unsang paagi nga ang hugot nga pagtuo makapalihok kanimo ngadto sa pagbuhat?

Nganong Kinahanglan man nga Kita Adunay Hugot nga Pagtuo kang Jesukristo?

Kinahanglan natong isentro ang atong hugot nga pagtuo sa Ginoo nga si Jesukristo.

Ang pagbaton og hugot nga pagtuo kang Jesukristo nagpasabut sa pagbaton og ingon nga pagsalig Kaniya nga kita motuman bisan unsa ang Iyang isugo. Kon atong ibutang ang atong hugot nga pagtuo diha kang Jesukristo, mamahimong masulundong mga disipulo, ang Langitnong Amahan mopasaylo sa atong mga sala ug moandam kanato nga makabalik ngadto Kaniya.

Si Apostol Pedro nagsangyaw nga “walay lain nga ngalan sa silong sa langit nga gikahatag ngadto sa tawo, nga pinaagi niini maluwas kita” (Mga Buhat 4:12; tan-awa usab sa Mosiah 3:17). Si Jacob nagtudlo nga ang tawo kinahanglan nga adunay “hugot nga pagtuo diha sa Usa nga Balaan sa Israel [si Jesukristo], o sila dili maluwas sa gingharian sa Dios” (2 Nephi 9:23). Pinaagi sa hugot nga pagtuo ngadto sa Manluluwas ug pinaagi sa paghinulsol, gihimo nato ang Iyang pag-ula nga sa tanang paagi epektibo sa atong kinabuhi. Pinaagi sa hugot nga pagtuo kita makadawat usab og kalig-on sa pagbuntog sa mga tintasyon (tan-awa sa Alma 37:33).

Dili kita makabaton og hugot nga pagtuo kang Jesukristo kon walay pagbaton usab og hugot nga pagtuo sa atong Langitnong Amahan. Kon kita adunay hugot nga pagtuo Kanila, makabaton usab kita og hugot nga pagtuo nianang sa Espiritu Santo, kinsa Ilang gipadala, nga motudlo kanato sa tanang kamatuoran ug mohupay kanato.

  • Sa unsang paagi nga ang hugot nga pagtuo diha kang Jesukristo makaimpluwensya kanato diha sa atong mga calling sa Simbahan? sa atong mga relasyon sa pamilya? sa atong mga trabaho? Sa unsang paagi nga ang hugot nga pagtuo diha kang Jesukristo makaimpluwensya sa atong paglaum alang sa kinabuhing dayon?

Sa Unsang Paagi Kita Makapalambo sa Atong Pagtuo diha kang Jesukristo?

Nasayud sa daghang mga panalangin nga moabut pinaagi sa paggamit sa hugot nga pagtuo diha kang Jesukristo, kinahanglan kitang maningkamot sa pagpalambo sa atong hugot nga pagtuo Kaniya. Ang Manluluwas nag-ingon, “Kon may pagtuo kamo nga ingon og liso sa mustasa, … walay magmakuli alang kaninyo” (Mateo 17:20). Ang usa ka liso sa mustasa gamay kaayo, apan motubo kini ngadto sa usa ka dako nga kahoy.

Sa unsang paagi nga atong mapalambo ang atong hugot nga pagtuo? Sa samang paagi sa atong pagpatubo o pagpalambo sa bisan unsa nga kahanas. Sa unsang paagi mapalambo nato ang kahanas sa pagkulit og kahoy, paglala, pagpintal, pagluto, paghimo og kolon, o pagtugtog og usa ka instrumento nga musikal? Kita magtuon ug magpraktis ug mobuhat niini. Sa pagbuhat sa ingon, kita molambo. Mao usab kana sa hugot nga pagtuo. Kon gusto kitang motubo ang atong pagtuo kang Jesukristo, kita kinahanglan nga mobuhat niini. Si propeta Alma mitandi sa pulong sa Dios ngadto sa usa ka binhi nga kinahanglang maatiman pinaagi sa hugot nga pagtuo:

“Apan tan-awa, kon kamo mopukaw ug modasig sa inyong mga galamhan, bisan ngadto sa pagsulay sa akong mga pulong, ug pagbansay sa usa ka tipik sa hugot nga pagtuo, oo, bisan kamo kutob ra sa pagtinguha sa pagtuo, tugoti kini nga tinguha nga molihok diha kaninyo, gani hangtud kamo motuo sa paagi nga kamo makahatag og luna alang sa usa ka bahin sa akong mga pulong.

“Karon, kita motandi sa pulong ngadto sa usa ka binhi. Karon, kon kamo mohatag og luna, nga ang usa ka binhi mahimo nga matanom diha sa inyong kasingkasing, tan-awa, kon kini usa ka tinuod nga binhi, o usa ka maayo nga binhi, kon kamo dili molabay niini pinaagi sa inyong pagkawalay pagtuo, nga kamo mobatok sa Espiritu sa Ginoo, tan-awa, kini mosugod sa pagtubo diha sulod sa inyong mga dughan; ug kon kamo makamatikod niining nagtubo nga mga tinguha, kamo magsugod pag-ingon diha sa inyong kaugalingon—Kini kinahanglan nga usa ka maayo nga binhi, o nga ang pulong maayo, kay kini misugod pagpadako sa akong kalag: oo, kini misugod sa pagdan-ag sa akong salabutan. …

“Karon tan-awa, dili ba kini makadugang sa inyong hugot nga pagtuo?” (Alma 32:27–29).

Busa kita makapatubo sa atong hugot nga pagtuo sa Dios pinaagi sa pagpalihok sa atong tinguha nga makabaton og hugot nga pagtuo Kaniya.

Mapatubo usab nato ang atong hugot nga pagtuo pinaagi sa pag-ampo ngadto sa Langitnong Amahan mahitungod sa atong mga paglaum, mga tinguha, ug mga panginahanglan (tan-awa sa Alma 34:17–26). Apan kinahanglan nga dili kita maghunahuna nga ang tanan natong buhaton mao lamang ang pagpangayo. Gisultihan kita diha sa mga kasulatan nga “ang pagtuo patay kon walay binuhatan” (Santiago 2:17). Ang mosunod nga sugilanon naghisgut sa usa ka tawo kansang hugot nga pagtuo gipakita pinaagi sa iyang mga buhat.

Kini nga tawo gusto nga magtuon sa mga kasulatan, apan dili siya makabasa. Nag-ampo siya sa Langitnong Amahan aron matabangan siya nga makakat-on unsaon sa pagbasa. Usa ka higayon ang usa ka magtutudlo miabut sa iyang dapit, ug siya mihangyo sa magtutudlo sa pagtabang kaniya. Nakakat-on siya sa alpabeto. Gitun-an niya ang mga tingog ug nakakat-on sa pagsumpay sa mga letra aron sa paghimo og mga pulong. Wala madugay makabasa na siya og yanong mga pulong. Kon unsa siya ka daghan nga nagpraktis, mao sab ka daghan ang iyang nakat-unan. Nagpasalamat siya sa Ginoo sa pagpadala og magtutudlo ug sa pagtabang kaniya nga makakat-on og basa. Kini nga tawo mitubo diha sa iyang hugot nga pagtuo, pagpaubos, ug kahibalo ngadto sa usa ka ang-ang nga siya nakaalagad isip usa ka branch president sa Simbahan.

Si Presidente Spencer W. Kimball mipasabut, “Kinahanglan nga adunay buhat uban sa hugot nga pagtuo. Unsa ka dakong binuang ang pagpangayo sa Ginoo nga hatagan kita og kahibalo, apan unsa ka maalamon ang pagpangayo sa Ginoo og tabang nga makaangkon og kahibalo, sa pagtuon nga mabungahon, sa paghunahuna og klaro, ug sa pagpabilin sa mga butang nga atong nakat-unan” (Faith Precedes the Miracle [1972], 205; naka-italics sa orihinal).

Ang hugot nga pagtuo naglakip sa paghimo sa tanan kutob sa atong mahimo aron mapahinabo ang mga butang nga atong gilauman ug giampo. Si Presidente Kimball miingon: “Diha sa hugot nga pagtuo atong gitisok ang liso, ug dayon atong makita ang milagro sa pagpamuswak. Ang mga tawo sa kasagaran masayop sa pagsabut ug balihon ang pamaagi.” Mipadayon siya pinaagi sa pagpasabut nga daghan kanato ang gusto nga makabaton og kahimsog ug kalig-on nga walay pagsunod sa mga balaod sa maayong panglawas. Gusto kita nga magmauswagon nga walay pagbayad sa atong ikapulo. Gusto kitang maduol sa atong Ginoo apan dili kita gustong magpuasa ug mag-ampo. Gusto kita og ulan sa tukma nga panahon ug kalinaw sa yuta nga walay pagsunod sa Adlawng Igpapahulay isip usa ka balaang adlaw ug walay pagsunod sa ubang mga sugo sa Ginoo. (Tan-awa sa Mga Pagtulun-an sa mga Presidente sa Simbahan: Spencer W. Kimball [2006], 178.)

Ang usa ka importante nga paagi sa pagpalambo sa atong hugot nga pagtuo mao ang pagpaminaw ug pagtuon sa pulong sa Ginoo. Madungog nato ang pulong sa Ginoo diha sa atong mga miting sa Simbahan. Mahimo kitang magtuon sa Iyang mga pulong diha sa mga kasulatan. “Ug sa ingon sa tanan nga walay hugot nga pagtuo, pangitaa ninyo nga makugihon ug magtudlo sa usag usa sa mga pulong sa kaalam; oo, pangitaa ninyo gikan sa labing maayo nga mga basahon ang mga pulong sa kaalam; pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo.” (D&P 88:118).

  • Unsay relasyon ang imong nakita tali sa atong hugot nga pagtuo ug sa atong mga binuhatan?

Unsa Ang Pipila ka mga Panalangin nga Nagsunod sa Hugot nga Pagtuo?

Pinaagi sa gasa sa hugot nga pagtuo, mga milagro nahimo, mga anghel nagpakita, ubang mga gasa sa Espiritu gihatag, mga pag-ampo natubag, ug ang mga tawo nahimong mga anak sa Dios (tan-awa sa Moroni 7:25–26, 36–37).

“Kon ang hugot nga pagtuo moabut kini magdala og … mga apostoles, mga propeta, mga ebanghelista, mga pastor, mga magtutudlo, mga gasa, kaalam, kahibalo, mga milagro, pagpang-ayo, mga pinulongan, paghubad sa mga pinulongan, ug uban pa. Kining tanan makita kon ang hugot nga pagtuo makita dinhi sa yuta, ug mawala kon kini mawala dinhi sa yuta; kay kini mao ang mga epekto sa hugot nga pagtuo. … Ug si kinsa kadtong nakabaton niini, pinaagi niini, makaangkon sa tanang kinahanglanon nga kahibalo ug kaalam, hangtud siya makaila sa Dios, ug sa Ginoo nga si Jesukristo, kinsa iyang gipadala—kinsa nga kahibalo mao ang kinabuhing dayon” (Lectures on Faith [1985], 83).

  • Unsa ang pipila ka mga sugilanon gikan sa mga kasulatan diin ang mga katawhan nahimong mas lig-on tungod kay sila adunay hugot nga pagtuo ni Jesukristo? Sa unsang paagi nga ikaw nakakita niini nga nahitabo sa imong kaugalingong kinabuhi?

Dugang nga mga Kasulatan