Kapitulo 26
Sakripisyo
Ang Kahulugan sa Sakripisyo
Ang sakripisyo nagpasabut og paghatag ngadto sa Ginoo og bisan unsay Iyang gikinahanglan sa atong panahon, sa atong kalibutanong mga kabtangan, ug sa atong mga kusog aron sa pagpalambo sa Iyang buhat. Ang Ginoo misugo, “Unaha ninyo pagpangita ang gingharian ug ang pagkamatarung gikan sa Dios” (Mateo 6:33). Ang atong pagkaandam nga mosakripisyo maoy usa ka timailhan sa atong debosyon ngadto sa Dios. Ang mga katawhan kanunay nga gisulayan aron sa pagsuta kon sila mohimo ba sa mga butang sa Ginoo og una diha sa ilang mga kinabuhi.
-
Ngano nga importante man ang pagsakripisyo ingon sa gisugo sa Ginoo nga dili magpaabut og bisan unsa nga balos?
Ang Balaod sa Sakripisyo Gihimo sa Karaan nga Panahon
-
Unsa ang kahulugan sa mga sakripisyo nga gihimo pinaagi sa mga katawhan sa pakigsaad sa Ginoo sa karaang panahon?
Gikan sa panahon ni Adan ug ni Eva hangtud sa panahon ni Jesukristo, ang katawhan sa Ginoo nagsunod sa balaod sa sakripisyo. Gimandoan sila isip mga sakripisyo sa paghalad sa unang natawo sa ilang mga kahayopan. Kini nga mga hayop kinahanglan nga hingpit, walay lama. Ang ordinansa gihatag aron sa pagpahinumdom sa katawhan nga si Jesukristo, ang Unang Natawo sa Amahan, moanhi sa kalibutan. Siya hingpit sa tanang paagi, ug Siya mohalad sa Iyang Kaugalingon isip usa ka sakripisyo alang sa atong mga sala. (Tan-awa sa Moises 5:5–8.)
Si Jesus mianhi ug mihalad sa Iyang Kaugalingon isip usa ka sakripisyo, ingon sa gitudlo ngadto sa katawhan nga Iyang pagahimoon. Tungod sa Iyang sakripisyo, ang tanan maluwas gikan sa pisikal nga kamatayon pinaagi sa Pagkabanhaw ug ang tanan mahimong maluwas gikan sa ilang mga sala pinaagi sa hugot nga pagtuo diha ni Jesukristo (tan-awa sa kapitulo 12, dinhi niini nga basahon).
Ang maulaong sakripisyo ni Kristo nagtimaan sa katapusan sa mga sakripisyo pinaagi sa pagpaagas og dugo. Ang ingon nga makita nga sakripisyo gipulihan pinaagi sa ordinansa sa sakrament. Ang ordinansa sa sakrament gihatag aron sa pagpahinumdom kanato kabahin sa dakong sakripisyo sa Manluluwas. Kinahanglan kita nga moambit sa sakrament kanunay. Ang mga simbolo sa pan ug tubig nagpahinumdom kanato sa lawas sa Manluluwas ug sa Iyang dugo, nga Iyang gipaagas alang kanato (tan-awa sa kapitulo 23, dinhi niini nga basahon”).
-
Ngano nga ang Pag-ula gikonsiderar man nga mahinungdanon ug katapusang sakripisyo?
Kita Kinahanglan Gihapon nga Magsakripisyo
-
Unsaon nato pagtuman ang balaod sa sakripisyo karon?
Bisan tuod og ang sakripisyo pinaagi sa pagpaagas og dugo natapos, ang Ginoo sa gihapon nagsugo kanato sa pagsakripisyo. Apan sa karon Siya nagkinahanglan og usa ka lahi nga matang sa halad. Siya miingon: “Kamo dili na mohalad ngari kanako nga magpaagas og dugo, … ug ang inyong sinunog nga mga halad pagahunungon. … Ug kamo mohalad og usa ka sakripisyo ngari kanako nga usa ka masulub-on nga kasingkasing ug usa ka mahinulsulon nga espiritu” (3 Nephi 9:19–). Ang usa ka “masulub-on nga kasingkasing ug usa ka mahinulsulon nga espiritu” nagpasabut nga kita mohalad og tumang kasubo alang sa atong mga sala samtang kita nagpaubos sa atong mga kaugalingon ug naghinulsol niini.
Kita Kinahanglan nga Andam Mosakripisyo sa Tanang Butang nga Anaa Kanato ngadto sa Ginoo
-
Ngano nga ang katawhan andam man sa paghimo og mga sakripisyo
Si Apostol Pablo misulat nga kita kinahanglan nga mahimong buhi nga mga sakripisyo, balaan ug madawat ngadto sa Dios (tan-awa sa Mga Taga-Roma 12:1).
Kon kita pagahimoon nga usa ka buhi nga sakripisyo, kinahanglan gayud nga kita andam sa paghatag sa tanang butang nga anaa kanato alang sa Ang Simbahan ni Jesukristo sa mga Santos sa Ulahing mga Adlaw— aron sa pagtukod sa gingharian sa Dios dinhi sa yuta ug sa pagpaninguha sa pagpatunhay sa Zion (tan-awa sa 1 Nephi 13:37).
Usa ka adunahan nga batan-ong magmamando nangutana sa Manluluwas, “Unsa bay buhaton ko aron makapanunod sa kinabuhi nga dayon?” Si Jesus mitubag kaniya, “Ikaw nahibalo sa mga sugo, Ayaw pagpanapaw, Ayaw pagbuno, Ayaw pagpangawat, Ayaw pagbakak sa imong pagsaksi, Tumahod ka sa imong amahan ug sa imong inahan.” Ug ang adunahan nga lalaki miingon, “Kanang tanan ako nang ginabantayan sukad pa sa akong pagkabatan-on.” Ug sa pagkadungog niini ni Jesus, Siya miingon, “Usa pa ka butang ang imong kulang: ibaligya ang tanan mong kabtangan, ug ang halin ipanghatag mo sa mga kabus, ug makabaton kag bahandi didto sa langit: ug unya umanhi ka ug sumunod kanako.” Sa dihang ang batan-ong lalaki nakadungog niini, siya nasubo sa hilabihan. Siya adunahan kaayo ug ang iyang kasingkasing napahiluna diha sa iyang mga katigayunan. (Tan-awa sa Lucas 18:18–23; tan-awa usab ang hulagway dinhi niini nga kapitulo.)
Ang batan-on nga magmamando usa ka maayo nga tawo. Apan sa diha nga siya gisulayan, dili siya andam nga mosakripisyo sa iyang kalibutanong mga kabtangan. Sa laing bahin, ang mga disipulo sa Ginoo nga sila si Pedro ug Andres andam nga mosakripisyo sa tanan alang sa gingharian sa Dios. Sa diha nga si Jesus miingon ngadto kanila, “Sumunod kamo kanako, … diha-diha gibiyaan nila ang ilang mga laya, ug mikuyog kaniya” (Mateo 4:19–20).
Sama sa mga disipulo, kita makahalad sa atong inadlaw nga mga kalihokan isip usa ka sakripisyo ngadto sa Ginoo. Kita makasulti, “Ang imong pagbuot maoy matuman.” Si Abraham mihimo niini. Nagpuyo siya sa yuta sa wala pa si Kristo, sa mga adlaw nga ang mga sakripisyo ug mga sinunog nga mga halad mao ang gikinahanglan. Isip usa ka pagsulay sa hugot nga pagtuo ni Abraham, ang Ginoo mimando kaniya sa paghalad sa iyang anak nga lalaki nga si Isaac isip usa ka sakripisyo. Si Isaac mao ang bugtong anak nga lalaki ni Abraham ug ni Sara. Ang mando sa paghalad kaniya isip usa ka sakripisyo hilabihan gayud ka sakit alang ni Abraham.
Bisan pa niana, siya ug si Isaac mihimo sa layo nga panaw ngadto sa Bukid sa Moria, diin ang sakripisyo pagahimoon. Mibiyahe sila sulod sa tulo ka adlaw. Hunahunaa ang mga hunahuna ni Abraham ug ang iyang kaguol. Ang iyang anak nga lalaki ipasakripisyo ngadto sa Ginoo. Sa dihang miabut sila sa Bukid sa Moria, si Isaac mipas-an sa mga kahoy ug si Abraham midala sa kalayo ug sa kutsilyo ngadto sa dapit diin ilang pagahimoon ang altar. Si Isaac miingon, “Amahan ko … ania karon ang kalayo ug ang sugnod: apan hain man ang nating karnero nga igahalad nga sinunog?” Mitubag si Abraham, “Akong anak, ang Dios sa iyang kaugalingon magatagana sa nating karnero.” Dayon si Abraham mibuhat og usa ka altar ug gipahimutang ang kahoy diha niini. Gigapos niya si Isaac ug gipahigda diha ibabaw sa kahoy. Gikuha dayon niya ang kutsilyo aron pagpatay ni Isaac. Niana nga higayon usa ka anghel sa Ginoo misanta kaniya, nag-ingon, “Abraham …dili mo pagabakyawon ang imong kamot batok sa bata, dili ka magbuhat kaniya bisan unsa: ug karon naila ko nga ikaw nahadlok sa Dios, kay wala ka magdumili sa imong bugtong anak kanako.” (Tan-awa sa Genesis 22:1–14.)
Si Abraham tingali nasanapan gayud uban sa tumang kalipay sa dihang siya wala na kinahanglana nga isakripisyo ang iyang anak nga lalaki. Apan siya nahigugma gayud sa Ginoo nga siya andam sa pagbuhat og bisan unsa nga isugo sa Ginoo.
-
Unsa nga mga ehemplo sa sakripisyo ang imong nakita sa mga kinabuhi sa mga tawo nga inyong kaila? Unsa nga mga ehemplo sa sakripisyo ang imong nakita diha sa mga kinabuhi sa imong mga katigulangan? sa mga kinabuhi sa unang mga miyembro sa Simbahan? sa mga kinabuhi sa mga tawo diha sa mga kasulatan? Unsa ang imong nakat-unan gikan niini nga mga ehemplo?
Ang Sakripisyo Nagtabang Kanato Pag-andam sa Pagpuyo sa Presensya sa Dios
Pinaagi lamang sa sakripisyo nga kita mamahimo nga takus sa pagpuyo sa presensya sa Dios. Pinaagi lamang sa sakripisyo nga kita makatagamtam sa kinabuhi nga dayon. Daghan kinsa nagpuyo sa wala pa kita ang nakasakripisyo sa tanan nga anaa kanila. Kita kinahanglan gayud nga andam sa pagbuhat sa sama kon kita modawat sa matahum nga ganti nga ilang natagamtaman.
Mahimo nga kita dili sugoon sa pagsakripisyo sa tanang mga butang. Apan sama ni Abraham, kita kinahanglan nga andam sa pagsakripisyo sa tanang butang aron mahimo nga takus sa pagpuyo sa presensya sa Ginoo.
Ang katawhan sa Ginoo kanunay nga nagsakripisyo sa hilabihan ug sa daghan nga nagkalain-laing mga paagi. Ang pipila nag-antus og kalisud ug pagbiay-biay tungod sa ebanghelyo. Ang pipila sa bag-ong mga kinabig sa Simbahan gipapahawa gikan sa ilang mga pamilya. Dugay na nga mga higala mibiya. Ang pipila sa mga miyembro nawad-an sa ilang mga trabaho; ang pipila nawad-an sa ilang mga kinabuhi. Apan ang Ginoo nakakita sa atong mga sakripisyo; Siya nagsaad, “Ang matag usa nga nagbiyag mga balay, o mga igsoong lalaki, o mga igsoong babaye, o amahan, o inahan, o asawa, o mga anak, o kayutaan, tungod sa akong ngalan, makadawat og usa ka gatus ka pilo, ug magapanunod sa kinabuhing dayon.” (Mateo 19:29).
Samtang ang atong mga pagpamatuod sa ebanghelyo nagtubo, kita makahimo sa pagbuhat og mas dagko nga mga sakripisyo ngadto sa Ginoo. Timan-i ang mga sakripisyo nga gihimo niining tinuod nga mga ehemplo:
Usa ka miyembro sa Simbahan sa Germany mitigum sa iyang ikapulo sulod sa mga katuigan hangtud usa ka tawo nga adunay awtoridad sa priesthood makaanha ug modawat niini.
Usa ka Relief Society visiting teacher miserbisyo sulod sa 30 ka tuig nga walay gisal-angan nga buluhaton.
Usa ka grupo sa mga Santos sa Habagatang Afrika nagsakay sulod sa tulo ka adlaw, nagtindog, aron makapamati ug makakita sa propeta sa Ginoo.
Diha sa usa ka komperensya sa area sa Mexico, ang mga miyembro sa Simbahan natulog sa yuta ug nagpuasa atol sa mga adlaw sa komperensya. Nagamit nila ang tanan nilang kwarta, aron lamang makaadto sa komperensya ug walay nahibilin alang sa pagkaon ug kapuy-an.
Ang usa ka pamilya mibaligya sa ilang sakyanan aron makakuha og kwarta nga ilang gustong ihatag ngadto sa usa ka pundo sa pagtukod og templo.
Lain nga pamilya mibaligya sa ilang panimalay aron makakuha og kwarta nga i-adto sa templo.
Daghang matinud-anon nga mga Santos sa Ulahing mga Adlaw nga adunay gamay kaayo nga kabuhian, apan sila nagbayad sa ilang mga ikapulo ug mga halad.
Usa ka brother misakripisyo sa iyang trabaho tungod kay siya midumili sa pagtrabaho og Dominggo.
Sa usa ka branch, ang kabatan-onan mihatag sa walay pagdumili ug sa andam nga paagi sa ilang panahon aron sa pag-amuma sa gagmay nga mga bata samtang ang ilang mga ginikanan nagtabang sa pagtukod sa meetinghouse.
Mga batan-ong lalaki ug mga babaye mibiya o mibalibad sa maayong mga oportunidad sa panarbaho, edukasyon, o mga isport aron sa pagserbisyo isip mga misyonaryo.
Daghan pa nga mga ehemplo ang mahimong ihatag kabahin niadtong kinsa nagsakripisyo alang sa Ginoo. Apan ang usa ka dapit sa gingharian sa atong Langitnong Amahan takus sa bisan unsa nga sakripisyo nga atong pagabuhaton sa atong panahon, mga talento, kusog, kwarta, ug mga kinabuhi. Pinaagi sa sakripisyo kita makaangkon og kahibalo gikan sa Ginoo nga kita madawat ngadto Kaniya, (tan-awa sa D&P 97:8).
-
Ngano sa imong hunahuna nga ang atong pagkaandam nga mosakripisyo may kalabutan man ngadto sa atong pagkaandam nga mopuyo didto sa presensya sa Dios?
Dugang nga mga Kasulatan
-
Lucas 12:16–34 (kon asa ang bahandi, atua ang kasingkasing)
-
Lucas 9:57–62 (pagsakripisyo aron mahimong angayan alang sa gingharian)
-
D&P 64:23; 97:12 (karong adlawa mao ang adlaw sa sakripisyo)
-
D&P 98:13–15 (kadtong kinsa motugyan sa kinabuhi alang sa Ginoo makakaplag niini)
-
Alma 24 (ang mga katawhan ni Ammon misakripisyo sa ilang mga kinabuhi kay sa molapas sa ilang panumpa ngadto sa Ginoo)