Mga Basahon ug mga Leksiyon
Kapitulo 42: Ang Pagpundok sa Balay ni Israel

Kapitulo 42

Ang Pagpundok sa Balay ni Israel

Imahe
The Old Testament prophet Israel (Jacob) with his sons gathered around him. One of the sons (Joseph) is kneeling before his father. Israel has his hand on the son's head as he prepares to give him a priesthood blessing.

Ang Balay ni Israel Mga Tawo sa Pakigsaad sa Dios

  • Unsa ang mga responsibilidad sa mga tawo sa pakigsaad sa Dios ngadto sa mga nasud sa kalibutan?

Si Jacob usa ka gamhanan nga propeta kinsa nagpuyo og gatusan ka mga tuig sa wala pa ang panahon ni Kristo. Tungod kay si Jacob matinud-anon, ang Ginoo mihatag kaniya og espesyal nga pangalan nga Israel, nga nagpasabut “usa kinsa nagpatigbabaw uban sa Dios” o “himoa nga magpatigbabaw ang Dios (Ang Giya ngadto sa mga Kasulatan, “Israel,” 92–94). Si Jacob adunay napulog duha ka anak nga mga lalaki. Kini nga anak nga mga lalaki ug ang ilang mga pamilya nahimong nailhan isip napulog duha ka mga tribo sa Israel, o mga Israelite (tan-awa sa Genesis 49:28).

Si Jacob apo nga lalaki ni Abraham. Ang Ginoo mihimo og usa ka mahangturon nga pakigsaad uban kang Abraham nga gibag-o uban ni Isaac ug uban ni Jacob ug sa iyang mga anak (tan-awa sa kapitulo 15 dinhi niini nga basahon; tan-awa usab ang biswal dinhi niini nga kapitulo, nagpakita ni Jacob nga nagpanalangin sa iyang anak nga mga lalaki). Ang Dios misaad nga ang mga Israelite mamahimong Iyang mga tawo sa pakigsaad kutob nga sila mosunod sa Iyang mga kasugoan (tan-awa sa Deuteronomio 28:9–10). Sila mahimo nga usa ka panalangin ngadto sa tanan nga mga kanasuran sa kalibutan pinaagi sa pagdala sa ebanghelyo ug sa priesthood ngadto kanila (tan-awa sa Abraham 2:9–11). Sa ingon, sila magtuman sa ilang pakigsaad ngadto sa Ginoo ug Siya magtuman sa Iyang pakigsaad ngadto kanila.

Ang Balay ni Israel Nagkatibulaag

Ang mga propeta sa Ginoo nagbalik-balik sa pagpahimangno sa balay ni Israel kon unsa ang mahitabo kon sila mga dautan. Nanagna si Moises, “Ug ang Ginoo magapatibulaag kanimo sa taliwala sa tanang katawhan, gikan sa usa ka tumoy sa yuta ngadto sa usa usab ka tumoy sa yuta” (Deuteronomio 28:64).

Bisan pa niini nga pahimangno, ang mga Israelite kanunay nga milapas sa mga kasugoan sa Dios. Nag-away sila sa ilang mga kaugalingon ug nabahin ngadto sa duha ka mga gingharian: ang Amihanan nga Gingharian, nga gitawag og gingharian ni Israel, ug ang Habagatan nga Gingharian, nga gitawag og ang gingharian ni Juda. Napulo sa napulog duha ka mga tribo sa Israel mipuyo sa Amihanan nga Gingharian. Panahon sa usa ka gubat sila nabuntog sa ilang mga kaaway ug gidala ngadto sa pagkabihag. Pipila kanila sa kadugayan milayas ngadto sa mga kayutaan sa amihanan ug nahimong nangawala ngadto sa tibuok kalibutan.

Mga 100 ka tuig human sa pagkabihag sa Amihanan nga Gingharian, ang Habagatan nga Gingharian nabuntog. Ang ulohang siyudad sa Jerusalem gilumpag niadtong 586 B.C., ug daghan nga mga miyembro sa nahibilin nga duha ka mga tribo sa Israel nabihag. Sa kadugayan, pipila sa mga sakop niini nga mga tribo mibalik ug mitukod pag-usab sa Jerusalem. Sa dayon nang kalumpag sa Israel, si Lehi ug ang iyang pamilya, kinsa mga miyembro sa balay ni Israel, mibiya sa siyudad ug mipuyo sa Amerika.

Human sa panahon ni Kristo, ang Jerusalem gilumpag na usab, niining higayona pinaagi sa mga sundalo nga taga Roma. Ang mga Judeo nagkatibulaag sa daghang dapit sa kalibutan. Karon ang mga Israelite makaplagan sa tanan nga mga nasud sa kalibutan. Daghan niini nga mga katawhan wala makahibalo nga sila mga kaliwat gikan sa karaan nga balay ni Israel.

  • Unsa nga mga kaayohan ang miabut ngadto sa mga anak sa Dios tungod kay ang Iyang mga tawo sa pakigsaad nagkatibulaag sa tibuok kalibutan?

Ang Balay ni Israel Kinahanglan nga Pagapundukon

  • Ngano nga ang Ginoo buot man nga ang iyang mga katawhan pagapundukon?

  • Sa unsa nga paagi nga ang balay ni Israel pagapundukon?

Ang Ginoo misaad nga ang Iyang mga katawhan sa pakigsaad usa ka adlaw niana magkapundok: “Tigumon ko ang salin sa akong panon gikan sa tanan nga mga yuta diin didto giabug ko sila” (Jeremias 23:3).

Gipundok sa Dios ang Iyang mga anak pinaagi sa misyonaryo nga buhat. Kon ang mga tawo mahibalo kabahin ni Jesukristo, modawat sa makaluwas nga mga ordinansa ug motuman sa giuban nga mga pakigsaad, mahimo sila nga “ang mga anak sa pakigsaad” (3 Nephi 20:26). Siya adunay importante nga mga katarungan sa pagpundok sa Iyang mga anak. Siya mopundok kanila aron makakat-on sila sa mga pagtulun-an sa ebanghelyo ug makaandam sa ilang mga kaugalingon sa pagsugat sa Manluluwas kon Siya moanhi pag-usab. Siya mopundok kanila aron sila motukod og mga templo ug mopahigayon og sagrado nga mga ordinansa alang sa mga katigulangan kinsa nangamatay nga wala makabaton niini nga oportunidad. Siya mopundok kanila aron sila makalig-on sa usag usa ug magkahiusa diha sa ebanghelyo, makakaplag og panalipod gikan sa dili matarung nga mga impluwensya sa kalibutan. Siya usab mopundok kanila aron sila makaandam sa ilang mga kaugalingon sa pagpakigbahin sa ebanghelyo ngadto sa uban.

Ang gahum og awtoridad sa paggiya sa buhat sa pagpundok sa balay ni Israel gihatag ngadto kang Joseph Smith pinaagi ni propeta Moises, kinsa mipakita pagka 1836 didto sa Templo sa Kirtland (tan-awa sa D&P 110:11). Sukad niana nga panahon, ang matag propeta naghupot sa yawe alang sa pagpundok sa balay ni Israel, ug kini nga pagpundok nahimo nga importante nga bahin sa buhat sa Simbahan. Ang mga tawo sa pakigsaad karon gipundok samtang ilang gidawat ang gipahiuli nga ebanghelyo ug gialagaran ang Dios ni Abraham, Isaac, ug Jacob (tan-awa sa Deuteronomio 30:1–5).

Pagapundokon ang mga Israelite una sa espirituhanon nga paagi ug dayon sa pisikal nga paagi. Gipundok sila sa espirituhanon nga paagi samtang mipasakop sila sa Ang Simbahan ni Jesukristo sa mga Santos sa Ulahing mga Adlaw ug mihimo ug mituman og sagrado nga mga pakigsaad. Kining espirituhanon nga pagpundok nagsugod sa panahon ni Propeta Joseph Smith ug nagpadayon karon sa tibuok kalibutan. Ang mga kinabig sa Simbahan mga Israelite pinaagi sa dugo o sa pagsagop. Sakop sila ngadto sa pamilya ni Abraham ug Jacob (tan-awa sa Abraham 2:9–11; Mga Taga-Galacia 3:26–29).

Si Presidente Joseph Fielding Smith miingon: “Adunay daghan nga mga nasud nga gibarugan diha … sa Simbahan. … Sila miduol tungod kay ang Espiritu sa Ginoo mipabilin diha kanila; … nagdawat sa espiritu sa pagpundok, gibiyaan nila ang tanan alang sa ebanghelyo” Doctrines of Salvation, comp. Bruce R. McConkie, 3 vols. [1954–56], 3:256; naka-italics sa orihinal).

Ang pisikal nga pagpundok sa Israel nagpasabut nga ang mga katawhan sa pakigsaad “matigum pagbalik ngadto sa kayutaan nga ilang panulundon ug mapahiluna sa tanan nila nga mga yuta sa saad” (2 Nephi 9:2). Ang mga tribo ni Ephraim ug Manasseh pagapundukon ngadto sa Amerika. Ang tribo ni Juda mobalik ngadto sa siyudad sa Jerusalem ug sa dapit nga naglibut niini. Ang napulo nga nawala nga mga tribo modawat gikan sa tribo ni Ephraim sa gisaad kanila nga mga panalangin (tan-awa sa D&P 133:26–34).

Sa diha nga ang Simbahan unang natukod, ang mga Santos gitudloan sa pagpundok sa Ohio, dayon sa Missouri, ug dayon sa Salt Lake Valley. Karon, hinoon, ang mga propeta karong panahona nagtudlo nga ang mga miyembro sa Simbahan pagapatukuron sa gingharian sa Dios diha sa ilang kaugalingon nga mga yuta. Si Elder Russell M. Nelson miingon: “Ang pagpili nga moduol ngadto kang Kristo dili usa ka butang nga pisikal ang nahimutangan; kini usa ka butang sa tagsa-tagsa nga pasalig. Ang mga katawhan mahimo nga ‘pagadad-on sa kasayuran sa Ginoo’ [3 Nephi 20:13] sa walay pagbiya sa ilang mga yutang natawhan. Tinuod, sa unang mga panahon sa Simbahan, ang pagkabig sa kanunay nagpasabut usab og paglalin. Apan karon ang pagpundok nahinabo sa matag nasud. … Ang dapit sa pagpundok alang sa mga Santos nga taga Brazil adto sa Brazil; ang dapit sa pagpundok alang sa mga Santos nga taga Nigeria adto sa Nigeria; ang dapit sa pagpundok alang sa mga Santos nga taga Korea adto sa Korea; ug uban pa. Ang Zion mao ‘ang putli og kasingkasing.’ [D&P 97:21.] Ang Zion bisan asa nga ang matarung anaa” (sa Conference Report, Okt. 2006, 85; o Ensign, Nob. 2006, 81).

Ang pisikal nga pagpundok sa Israel dili mahingpit hangtud sa Ikaduhang Pag-anhi sa Manluluwas ug magpadayon ngadto sa Milenyum (tan-awa sa Joseph Smith—Mateo 1:37). Dayon ang saad sa Ginoo matuman:

“Busa, ang mga adlaw ania na, nagaingon ang Ginoo, nga dili na pagaingnon nga ang Dios buhi, nga nagadala sa mga anak sa Israel gawas sa yuta sa Egipto;

“Kon dili mao kini: Ingon nga ang Ginoo buhi, nga nagdala sa mga anak sa Israel gikan sa yuta sa amihanan, ug gikan sa tanan nga mga yuta diin sila giabug niya. Ug akong dad-on sila pag-usab ngadto sa ilang mga yuta nga gihatag ko sa ilang mga amahan” (Jeremias 16:14–15).

  • Sa unsa nga mga paagi ikaw napundok sa espirituhanon nga paagi isip usa sa mga katawhan sa pakigsaad sa Ginoo?

  • Sa unsa nga mga paagi ikaw miapil diha sa pagpundok sa uban?

Dugang nga mga Kasulatan