Mga Basahon ug mga Leksiyon
Kapitulo 45: Ang Milenyum

Kapitulo 45

Ang Milenyum

Imahe
A male lion and lamb lying peacefully next to each other in a grassy field. Rolling hills are in the background. There are clouds in the sky. The image portrays the peace among animal life that will exist during the Millennium.

Mga Katawhan sa Yuta panahon sa Milenyum

  • Kinsa ang ania sa yuta sa panahon sa Milenyum?

Usa ka libo ka tuig sa kalinaw, gugma, ug kalipay mosugod sa yuta sa Ikaduhang Pag-anhi ni Jesukristo. Kining liboan ka tuig nga panahon gitawag og ang Milenyum. Ang mga kasulatan ug ang mga propeta nagtabang kanato nga masabtan kon sama sa unsa ang pagpuyo sa yuta sa panahon sa Milenyum.

Tungod sa paglaglag sa mga dautan sa ikaduhang Pag-anhi sa Manluluwas, ang matarung lamang nga mga katawhan ang mopuyo sa yuta sa sinugdnanan sa Milenyum. Sila mao kadto kinsa mipuyo og mahiyason ug matinuoron nga mga kinabuhi. Kini nga mga katawhan makapanunod bisan hain sa terrestrial o celestial nga gingharian.

Sa panahon sa Milenyum, ang mga mortal mopuyo pa gihapon sa yuta, ug sila mopadayon sa pagbaton og mga anak sama sa atong gibuhat karon (tan-wa sa D&P 45:58). Miingon si Joseph Smith nga ang imortal nga mga tawo mobisita kanunay sa yuta. Kini nga binanhaw nga mga tawo motabang sa pangagamhanan ug uban nga buhat. (Tan-awa sa Mga Pagtulun-an ni Propeta Joseph Smith, sel. Joseph Fielding Smith [1976], 268.)

Ang mga katawhan aduna pa gihapon sa ilang kabubut-on, ug sa mubo nga panahon daghan ang mamahimong gawasnon sa pagpadayon sa ilang mga relihiyon ug mga ideya. Sa katapusan ang tanan mokumpisal nga si Jesukristo mao ang Manluluwas.

Sa panahon sa Milenyum, si Jesus “mohari dinhi sa yuta” (Mga Artikulo sa Hugot nga Pagtuo 1:10). Si Joseph Smith mipasabut nga si Jesus “maghari sa mga Santos ug mokunsad ug motudlo” (Mga Pagtulun-an sa mga Presidente sa Simbahan: Joseph Smith [2007], 310).

Ang Buhat sa Simbahan sa panahon sa Milenyum

  • Unsa ang duha ka mahinungdanon nga mga buhat nga pagahimoon sa panahon sa Milenyum?

Adunay duha ka mahinungdanon nga mga buhat alang sa mga miyembro sa Simbahan sa panahon sa Milenyum: buhat sa templo ug misyonaryo nga buhat. Ang buhat sa templo naglakip sa mga ordinansa nga gikinahanglan alang sa kahimayaan. Kini naglakip sa bunyag, sa pagpandong sa mga kamot alang sa gasa sa Espiritu Santo, ug sa mga ordinansa sa templo—ang endowment, kaminyoon sa templo, ug ang paghiusa og bugkos sa mga yunit sa pamilya.

Daghan sa mga katawhan namatay nga wala makadawat niini nga mga ordinansa. Ang mga katawhan sa yuta kinahanglan gayud nga mopahigayon niini nga mga ordinansa alang kanila. Kini nga buhat gihimo na karon sa mga templo sa Ginoo. Adunay daghan pa kaayo nga buhat nga kinahanglang humanon sa dili pa ang Milenyum magsugod, aron kini mahuman sulod niana nga panahon. Ang mga binanhaw nga mga tawo motabang kanato sa pagtarung sa mga sayop nga atong nahimo sa pagbuhat sa pagsiksik kalabut sa atong nangamatay nga mga katigulangan. Motabang usab sila kanato sa pagpangita sa impormasyon nga atong gikinahanglan sa paghuman sa atong mga rekord. (Tan-awa sa Joseph Fielding Smith, Doctrines of Salvation, comp. Bruce R. McConkie, 3 vols. [1954–56], 2:167, 251–52.)

Ang lain nga mahinungdanon nga buhat sa panahon sa Milenyum mao ang misyonaryo nga buhat. Ang ebanghelyo itudlo uban sa dakong gahum ngadto sa tanan nga mga katawhan. Sa katapusan wala na kinahanglana ang pagtudlo sa uban sa unang mga baruganan sa ebanghelyo tungod kay “silang tanan managpakaila kanako, gikan sa labing diyutay kanila ngadto sa labing dako kanila, miingon ang Ginoo” (Jeremias 31:34).

  • Sa unsa nga paagi nga kita makaandam karon alang sa buhat sa Milenyum?

Mga Kahimtang panahon sa Milenyum

  • Sa unsa nga paagi nga ang kinabuhi sa panahon sa Milenyum lahi gikan sa kinabuhi sa yuta karon?

Si Propeta Joseph Smith nagtudlo nga sa panahon sa Milenyum, “ang yuta pagabag-ohon ug makadawat sa iyang paraisohanon nga himaya” (Mga Artikulo sa Hugot nga Pagtuo 1:10).

Si Satanas Gapuson

Panahon sa Milenyum, si Satanas pagagapuson. Kini nagpasabut nga siya walay gahum sa pagtintal niadto kinsa mga buhi niana nga panahon (tan-awa sa D&P 101:28). Ang “mga anak magtubo nga walay sala ngadto sa kaluwasan” (D&P 45:58). “Tungod sa pagkamatarung sa katawhan [sa Ginoo], si Satanas walay gahum; busa, siya dili mabadbaran sulod sa daghan nga mga katuigan; kay siya walay gahum sa ibabaw sa mga kasingkasing sa mga katawhan, kay sila nagpuyo diha sa pagkamatarung, ug ang Usa nga Balaan sa Israel magahari” (1 Nephi 22:26).

Kalinaw sa Yuta

Sa panahon sa Milenyum, walay gubat. Ang mga katawhan magpuyo sa kalinaw ug panag-uyon. Ang mga butang nga gigamit alang sa gubat himoon ngadto sa mapuslanon nga mga katuyoan. “Ilang espada ilang himoon nga mga punta sa daro, ug ang ilang mga bangkaw himoon nga mga galab: usa ka nasud dili mobakyaw sa ilang espada batok sa usa ka nasud, ug dili gayud makakat-on sila mahitungod sa gubat” (Isaias 2:4; tan-awa usab sa Isaias 11:6–7; D&P 101:26).

Matarung nga Panggamhanan

Si Presidente John Taylor mitudlo: “Ang Ginoo mamahimong hari sa tibuok yuta, ug ang tanang katawhan sa literal ubos sa iyang kaharian, ug matag nasud ubos sa kalangitan kinahanglan nga moila sa iyang awtoridad, ug moyukbo ngadto sa iyang pagkahari. Kadto kinsa mialagad kaniya diha sa pagkamatarung adunay komunikasyon uban sa Dios, ug uban ni Jesus; makaangkon sa pagpangalagad sa mga anghel, ug makahibalo sa nanglabay, karon, ug sa umaabot; ug ang ubang mga tawo, kinsa dili mosunod sa hingpit sa iyang mga balaod, ni hingpit nga matudloan sa iyang mga pakigsaad, mahimo nga bisan pa niana, mosunod sa hingpit sa iyang gobyerno. Kay kini mao ang paghari sa Dios dinhi sa yuta, ug siya mopatuman sa iyang mga balaod, ug misugo niana nga pagkamasulundon gikan sa mga nasud sa kalibutan nga mao gayud ang iyang katungod” (Mga Pagtulun-an sa mga Presidente sa Simbahan: John Taylor [2001], 277).

Walay Kamatayon

Sa panahon sa Milenyum, walay kamatayon ingon sa atong nahibaloan niini. Kon ang mga katawhan nabuhi ngadto sa tigulang nga edad, dili sila mamatay ug ilubong. Hinoon, sila pagabalhinon gikan sa ilang mortal nga kahimtang ngadto sa imortal nga kahimtang sa “usa ka pagpamilok sa mata.” (Tan-awa sa D&P 63:51; 101:29–31.)

Tanan nga mga Butang Ipadayag

Pipila ka mga kamatuoran wala pa ikapadayag ngari kanato. Ang tanan nga mga butang ipadayag sa panahon sa Milenyum. Ang Ginoo miingon nga Siya “mopadayag sa tanan nga mga butang—mga butang nga milabay, ug ang tinago nga mga butang nga walay tawo nga nasayud, mga butang sa yuta, nga diin kini gibuhat, ug ang katuyoan ug ang katapusan niini—mga butang nga labing bililhon, mga butang sa kahitas-an, ug mga butang nga ania sa ubos, mga butang diha sa yuta, ug sa langit” (D&P 101:32–34).

Uban nga mga Kalihokan sa Milenyum

Sa daghan nga mga paagi, ang kinabuhi ingon gayud kaayo sama niini karon, gawas nga ang tanan pagabuhaton diha sa pagkamatarung. Ang mga katawhan mokaon ug moinom ug mosul-ob og sinina. (Tan-awa sa Mga Pagtulun-an sa mga Presidente sa Simbahan: Brigham Young [1997], 382–83.) Ang mga katawhan mopadayon sa pagtanom ug pag-ani sa mga bunga ug motukod og mga balay (tan-awa sa Isaias 65:21).

  • Unsa ang imong mga hunahuna ug mga pagbati mahitungod sa mga kahimtang nga anaa sa panahon sa Milenyum?

Usa ka Katapusan nga Pakigbisog human sa Milenyum

  • Unsa ang katapusan nga padulngan sa yuta?

Sa katapusan sa 1,000 ka tuig, si Satanas pagabuhian sulod sa mubo nga panahon. Pipila sa mga katawhan motalikod gikan sa Langitnong Amahan. Mopundok si Satanas sa iyang mga kasundalohan, ug si Miguel (Adan) mopundok sa mga panon sa langit. Dinhi niini nga dakong pakigbisog, si Satanas ug ang iyang mga sumusunod isalikway sa kahangturan. Ang yuta mausab ngadto sa usa ka celestial nga gingharian. (Tan-awa sa D&P 29:22–29; 88:17–20, 110–15.)

Dugang nga mga Kasulatan