Mga Basahon ug mga Leksiyon
Kapitulo 43: Mga Timailhan sa Ikaduhang Pag-anhi

Kapitulo 43

Mga Timailhan sa Ikaduhang Pag-anhi

Imahe
The resurrected Jesus Christ (wearing white robes with a magenta sash) standing above a large gathering of clouds. Christ has His arms partially extended. The wounds in the hands of Christ are visible. Numerous angels (each blowing a trumpet) are gathered on both sides of Christ. A desert landscape is visible below the clouds. The painting depicts the Second coming of Christ. (Acts 1:11)

Si Jesukristo Mobalik sa Yuta

  • Unsa ang pipila ka mga timailhan sa Ikaduhang Pag-anhi?

Ang Manluluwas misulti ni Joseph Smith, “Ako mopadayag sa akong kaugalingon gikan sa langit uban sa gahum ug dako nga himaya, uban sa tanan nga panon niini, ug mopuyo diha sa pagkamatarung uban sa mga tawo diha sa yuta sa kaliboan ka mga tuig, ug ang mga dautan dili makabarug” (D&P 29:11; tan-awa usab ang mga kapitulo 44 ug 45 dinhi niini nga basahon). Misulti si Jesus kanato nga ang piho nga mga timailhan ug mga panghitabo mopasidaan kanato kon ang panahon sa Iyang Ikaduhang Pag-anhi duol na.

Sulod sa liboan ka mga tuig, ang mga sumusunod ni Jesukristo nagpaabut sa Ikaduhang Pag-anhi isip usa ka panahon sa kalinaw ug hingpit nga kalipay. Apan sa dili pa moanhi ang Manluluwas, ang mga katawhan sa yuta mosinati og dagko nga mga pagsulay ug mga kalamidad. Buot ang atong Langitnong Amahan nga kita maandam alang niini nga mga kasamok. Nagpaabut usab siya kanato nga mag-andam sa espirituhanong paagi kon ang Manluluwas moabut diha sa Iyang himaya. Busa, Siya naghatag kanato og mga timailhan, mga hitabo nga mosulti kanato kon ang Ikaduhang Pag-anhi duol na. Sa tanan nga mga panahon, ang Dios mipadayag niini nga mga timailhan ngadto sa Iyang mga propeta. Miingon Siya nga ang tanan nga matinud-anon nga mga sumusunod ni Kristo makahibalo unsa ang mga timailhan ug magbantay alang niini (tan-awa sa D&P 45:39). Kon kita masulundon ug matinud-anon, motuon kita sa mga kasulatan ug mahibalo sa mga timailhan.

Ang pipila sa mga timailhan nga nagtagna sa Ikaduhang Pag-anhi ni Jesukristo natuman na o sa karon nangatuman. Ang uban matuman pa sa umaabut.

Kadautan,Gubat, ug Kasamok

Daghan sa mga timailhan makuyaw ug makalilisang. Nagpahimangno ang mga propeta nga ang yuta makasinati og dagko nga kasamok, kadautan, gubat ug pag-antus. Si propeta Daniel miingon nga ang panahon sa dili pa ang Ikaduhang Pag-anhi mahimong usa ka panahon sa kasamok ingon nga wala pa gayud mahitabo sa yuta (tan-awa sa Daniel 12:1). Ang Ginoo miingon, “Ang gugma sa tawo magkabugnaw, ug ang kadautan modagsang” (D&P 45:27). “Ug ang tanan nga mga butang magkaguliyang; ug … ang kahadlok moabut diha sa tanan nga mga katawhan” (D&P 88:91). Magpaabut kita og mga linog, sakit, mga kagutom, dagkong mga unos, mga kilat, ug dugdog (tan-awa sa Mateo 24:7; D&P 88:90). Mga unos sa dagkong yelo molaglag sa mga tanom sa yuta (tan-awa sa D&P 29:16).

Miingon si Jesus ngadto sa Iyang mga disipulo nga ang gubat mopuno sa yuta: “Makadungog kamog mga gubat ug mga dungog-dungog mahitungod sa gubat. … Kay managgubat ang nasud batok sa nasud, gingharian batok sa gingharian” (Mateo 24:6–7). Si Propeta Joseph Smith miingon: “Ayaw wad-a ang paglaum kon kami mosulti kaninyo sa malisud nga mga panahon, tungod kay moabut gayud kini, kay ang espada, kagutom, ug katalagman nagkaduol. Aduna unyay dakong mga pagkapukan sa ibabaw niini nga kayutaan, kay ikaw dili angay magdahum nga bisan unsa o matag tulbok sa mga panagna sa balaang mga propeta mapakyas, ug adunay daghan nga nagpabilin nga mangatuman pa” (Mga Pagtulun-an sa mga Presidente sa Simbahan: Joseph Smith [2007], 302).

Daghan niini nga mga timailhan nangatuman na. Ang kadautan anaa bisan asa. Ang mga kanasuran kanunay naggubat. Mga linog ug uban nga mga kalamidad nangahitabo. Nag-antus karon ang daghan nga mga katawhan gikan sa makaguba nga mga unos, huwaw, kagutom, ug mga sakit. Makasiguro kita nga kini nga mga kalamidad mahimong mas mograbe pa sa dili pa moanhi ang Ginoo.

Hinoon, dili tanan nga mga panghitabo sa dili pa ang Ikaduhang Pag-anhi mga makalilisang. Kadaghanan niini nagdala og kalipay nganhi sa kalibutan.

Ang Pagpahiuli sa Ebanghelyo

Ang Ginoo nag-ingon, “Kahayag motungha taliwala kanila nga naglingkod sa kangitngit, ug mao kini ang kahingpitan sa akong ebanghelyo” (D&P 45:28). Mga propeta sa karaan nanagna sa Pagpahiuli sa ebanghelyo. Si Apostol Juan nakakita nga ang ebanghelyo ipahiuli pinaagi sa usa ka anghel (tan-awa sa Pinadayag 14:6–7). Agi og katumanan niini nga panagna, ang anghel nga si Moroni ug uban nga mga langitnong mga bisita midala sa ebanghelyo ni Jesukristo ngadto ni Joseph Smith.

Ang Pagtungha sa Basahon ni Mormon

Ang Ginoo misulti sa mga Nephite kabahin sa lain nga timailhan: ang Basahon ni Mormon moabut ngadto sa ilang mga kaliwat (tan-awa sa 3 Nephi 21). Sa mga panahon sa Daang Tugon ang mga propeta nga sila si Isaias ug Ezequiel nakakita nang daan sa pag-abut sa Basahon ni Mormon (tan-awa sa Isaias 29:4–18; Ezequiel 37:16–20). Kini nga mga panagna sa karon nangatuman. Ang Basahon ni Mormon napatungha ug gidala ngadto sa tibuok kalibutan.

Ang Ebanghelyo Isangyaw ngadto sa Tibuok Kalibutan

Lain nga timailhan sa katapusan nga mga adlaw mao nga ang “maayong balita sa gingharian isangyaw ngadto sa tibuok kalibutan” (Mateo 24:14; tan-awa usab sa Joseph Smith—Mateo 1:31). Ang tanan nga mga katawhan makadungog sa kahingpitan sa ebanghelyo sa ilang kaugalingon nga pinulongan (tan-awa sa D&P 90:11). Sukad sa Pagpahiuli sa Simbahan, ang mga misyonaryo nagsangyaw sa ebanghelyo. Ang misyonaryo nga paningkamot nagtubo nga hangtud karon napulo ka kaliboan ka mga misyonaryo nagsangyaw sa daghang kanasuran sa kalibutan diha sa daghang pinulongan. Sa dili pa ang Ikaduhang Pag-anhi ug sa panahon sa Milenyum, ang Ginoo mohatag og mga paagi sa pagdala sa kamatuoran ngadto sa tibuok kalibutan.

Ang Pag-anhi ni Elijah

Nanagna si propeta Malaquias nga sa dili pa ang Ikaduhang Pag-anhi sa Manluluwas, si propeta Elijah ipadala nganhi sa yuta. Ipahiuli ni Elijah ang gahum sa pagbugkos aron ang mga pamilya mahiusa pagbugkos. Modasig usab siya sa mga katawhan nga magpakabana mahitungod sa ilang mga katigulangan ug mga kaliwatan. (Tan-awa sa Malaquias 4:5–6; D&P 2.) Miadto si propeta Elijah ni Joseph Smith pagka Abril 1836. Sukad niana nga panahon, ang tinguha sa kasaysayan sa kaliwatan ug family history mitubo. Nakahimo usab kita sa pagpahigayon og mga ordinansa sa pagbugkos diha sa mga templo alang sa mga buhi ug sa mga patay.

Mga Kaliwat ni Lehi Mamahimong usa ka Halangdon nga mga Katawhan

Miingon ang Ginoo nga kon ang Iyang pag-anhi duol na, ang mga Lamanite mamahimo nga usa ka matarung ug tinahud nga mga katawhan. Miingon Siya, “Sa dili pa moabut ang mahinungdanon nga adlaw sa Ginoo, … ang mga Lamanite mamulak ingon sa rosas” (D&P 49:24). Daghan kaayo sa mga kaliwat ni Lehi karon ang midawat sa mga panalangin sa ebanghelyo.

Pagtukod sa Bag-ong Jerusalem

Duol sa panahon sa pag-anhi ni Jesukristo, ang matinud-anon nga mga Santos motukod og usa ka matarung nga siyudad, usa ka siyudad sa Dios, gitawag og Bag-ong Jerusalem. Si Jesukristo Mismo ang momando didto. (Tan-awa sa 3 Nephi 21:23–25; Moises 7:62–64; Mga Artikulo sa Hugot nga Pagtuo1:10.) Ang Ginoo miingon nga ang siyudad pagatukuron diha sa estado sa Missouri sa Estados Unidos (tan-awa sa D&P 84:2–3).

Kini mao lamang ang pipila sa mga timailhan nga nahatag sa Ginoo kanato. Ang mga kasulatan naghulagway og daghan pa.

  • Unsa nga mga ebidensya ang imong nakita nga ang mga timailhan nangatuman?

Ang Pagkahibalo sa mga Timailhan sa mga Panahon Makatabang Kanato

  • Sa unsa nga paagi kita makapabilin nga malinawon ug anaa sa kalinaw bisan kon ang pipila sa mga timailhan makalilisang ug makahahadlok?

Namulong kabahin sa Iyang Ikaduhang Pag-anhi, ang Ginoo miingon, “Ang adlaw ug ang takna walay tawo nga nasayud, ni ang mga anghel sa langit” (D&P 49:7). Gitudlo kini Niya pinaagi sa sambingay sa kahoy nga igira. Miingon Siya nga kon kita makakita sa kahoy nga igira nga nanalingsing, makasulti kita nga duol na ang ting-init. Ingon usab, kon makita nato ang mga timailhan nga gihulagway diha sa mga kasulatan, makahibalo kita nga ang Iyang pag-anhi duol na. (Tan-awa sa Mateo 24:32–33.)

Mihatag ang Dios niini nga mga timailhan aron sa pagtabang kanato. Makapahimutang kita sa atong kinabuhi sa maayo ug makaandam sa atong mga kaugalingon ug sa atong mga pamilya alang niadtong mga butang nga moabut pa.

Napahimangnoan kita sa mga kalamidad ug gisultihan sa pagpangandam alang niini, apan kita makahulat usab ngadto sa pag-anhi sa Manluluwas ug maglipay. Ang Ginoo miingon, “Ayaw kabalaka, kay, kon kining tanan nga mga butang mahinabo, kamo masayud nga ang mga saad nga nabuhat nganha kaninyo matuman” (D&P 45:35). Miingon Siya nga kadto kinsa mga matarung kon Siya moanhi dili malaglag “apan molahutay niana nga adlaw. Ug ang yuta ihatag ngadto kanila alang sa usa ka kabilin; … ug ang ilang mga anak magtubo nga walay sala. … Kay ang Ginoo anaa sa ilang taliwala, ug ang iyang himaya anaa diha kanila, ug siya ang ilang hari ug ilang magbabalaod” (D&P 45:57–59).

Dugang nga mga Kasulatan