Mga Basahon ug mga Leksiyon
Kapitulo 6 Ang Pagkapukan ni Adan ug ni Eva

Kapitulo 6

Ang Pagkapukan ni Adan ug ni Eva

Imahe
Adam and Eve walking together after leaving the Garden of Eden. There are storm clouds in the sky, and plant growth along the path they are walking. There is a waterfall in the background.

Si Adan ug si Eva ang Unang Nakaanhi sa Yuta

  • Unsa nga kamatuoran ang nakatabang kanato nga masayud nga si Adan ug si Eva maisug nga mga espiritu?

Ang Dios miandam niini nga yuta isip usa ka panimalay alang sa Iyang mga anak. Si Adan ug si Eva ang napili nga mao ang una nga mga tawo nga mopuyo sa yuta (tan-awa sa Moises 1:34; 4:26). Ang ilang bahin sa plano sa Amahan mao ang pagdala sa pagka-mortal ngadto sa kalibutan. Sila mao ang mahimong una nga mga ginikanan. (Tan-awa sa D&P 107:54–56.)

Si Adan ug si Eva usa sa pinakahalangdon nga mga anak sa atong Amahan. Didto sa kalibutan sa espiritu si Adan gitawag og Miguel ang arkanghel (tan-awa sa D&P 27:11; Judas 1:9). Gipili siya sa atong Langitnong Amahan sa pagpangulo sa mga matarung diha sa gubat batok ni Satanas (tan-awa sa Pinadayag 12:7–9). Si Adan ug si Eva giordinahan nang daan nga mamahimo natong unang mga ginikanan. Ang Ginoo misaad kang Adan og talagsaong mga panalangin: “Ako mitakda kanimo nga mahimo nga pangulo; sa usa ka daghan nga mga nasud nga magagikan kanimo, ug ikaw mao ang prinsipe ibabaw kanila sa kahangturan” (D&P 107:55).

Si Eva ang inahan sa tanan nga mga buhi (tan-awa sa Moises 4:26). Ang Dios midala kang Adan ug Eva sa kaminyoon tungod kay “dili maayo nga kinahanglan ang tawo mag-inusara” (Moises 3:18; tan-awa usab sa 1 Mga Taga-Corinto 11:11). Miambit siya sa responsibilidad ni Adan ug moambit usab sa iyang walay katapusang mga panalangin.

  • Unsa man ang atong makat-unan gikan sa mga ehemplo ni Adan ug ni Eva?

Ang Tanaman sa Eden

  • Sa unsang mga kahimtang sila si Adan ug si Eva nagpuyo sa Tanaman sa Eden?

Dihang si Adan ug si Eva gibutang sa Tanaman sa Eden, dili pa sila mortal. Niini nga kahimtang, “sila dili unta makabaton og mga anak” (2 Nephi 2:23). Walay kamatayon. Sila adunay pisikal nga kinabuhi tungod kay ang ilang mga espiritu gisulod sa pisikal nga mga lawas nga hinimo gikan sa abug sa yuta (tan-awa sa Moises 6:59; Abraham 5:7). Sila adunay espirituhanong kinabuhi tungod kay sila anaa sa presensya sa Dios. Wala pa silay gihimo nga pagpili tali sa maayo ug sa dautan.

Ang Dios misugo kanila sa pagbaton og mga anak. Siya miingon, “Pagmabungahon, ug pagsanay, ug pun-a ang yuta, ug pagbaton og gahum niini, ug pagmando ibabaw … sa matag buhi nga butang nga naglihok diha sa yuta” (Moises 2:28). Ang Dios miingon kanila nga gawasnon silang mokaon sa matag bunga sa kahoy diha sa tanaman gawas sa usa, ang kahoy sa kahibalo sa maayo ug sa dautan. Mahitungod niana nga kahoy ang Dios miingon, “Sa adlaw nga ikaw mokaon niana ikaw sa pagkatinuod mamatay” (Moises 3:17).

Si Satanas, nga wala mahibalo sa hunahuna sa Dios apan nagtinguha sa pagguba sa plano sa Dios, miadto kang Eva sa Tanaman sa Eden. Siya mitintal kaniya sa pagkaon sa bunga sa kahoy sa kahibalo sa maayo ug sa dautan. Siya mipasalig kaniya nga siya ug si Adan dili gayud mamatay, apan sila mahimo “ingon nga mga dios, masayud sa maayo ug sa dautan” (Moises 4:11). Si Eva mitugyan ngadto sa tintasyon ug mikaon sa bunga. Sa dihang nasayran ni Adan kon unsa ang nahitabo, siya mipili nga mokaon usab. Ang kausaban nga miabut kang Adan ug kang Eva tungod sa ilang pagkaon sa prutas gitawag og Pagkapukan.

Ang Pagkahimulag ni Adan ug ni Eva gikan sa Dios

  • Unsa ang pisikal ug espirituhanong mga kausaban ang nahitabo ni Adan ug ni Eva isip resulta sa ilang kalapasan?

Tungod kay si Adan ug si Eva mikaon sa bunga sa kahoy sa kahibalo sa maayo ug sa dautan, ang Ginoo mipapahawa kanila gikan sa Tanaman sa Eden ngadto sa kalibutan. Ang ilang pisikal nga kahimtang nausab isip resulta sa ilang pagkaon sa gidili nga bunga. Sama sa gisaad sa Dios, sila nahimong mortal. Sila ug ang ilang mga anak makasinati og balatian, kasakit, ug pisikal nga kamatayon.

Tungod sa ilang kalapasan, si Adan ug si Eva usab makatagamtam og espirituhanong kamatayon. Kini nagpasabut nga sila ug ang ilang mga anak dili maglakaw ug dili mahimong makigsulti sa Dios nawong sa nawong. Si Adan ug si Eva ug ang ilang mga anak gipahimulag gikan sa Dios sa pisikal ug sa espirituhanong paagi.

Talagsaong mga Panalangin Miabut gikan sa Paglapas

  • Sa unsang paagi nga ang Pagkapukan naghatag og mga kahigayunan kanato nga mamahimong sama sa atong Langitnong Amahan?

Ang ubang mga tawo nagtuo nga si Adan ug si Eva nakahimo og usa ka seryuso nga sala dihang sila mikaon sa bunga sa kahoy sa kahibalo sa maayo ug sa dautan. Hinoon, ang mga kasulatan sa ulahing mga adlaw nagtabang kanato nga masabtan nga ang ilang Pagkapukan usa ka kinahanglanon nga lakang diha sa plano sa kinabuhi ug usa ka dakong panalangin alang kanatong tanan. Tungod sa Pagkapukan, kita napanalanginan og pisikal nga mga lawas, katungod sa pagpili tali sa maayo ug sa dautan, ug oportunidad nga makabaton og kinabuhing dayon. Walay bisan usa unta niini nga mga kahigayunan ang atong maangkon kon si Adan ug si Eva nagpabilin pa sa tanaman.

Human sa Pagkapukan, si Eva miingon, “Kon dili pa unta sa atong kalapasan kita dili unta makaangkon og binhi, ug dili gayud masayud sa maayo ug sa dautan, ug sa kalipay sa atong katubsanan, ug sa kinabuhi nga dayon nga gihatag sa Dios ngadto sa tanan nga masulundon.” (Moises 5:11).

Si propeta Lehi mipasabut:

“Ug karon, tan-awa, kon si Adan wala pa unta makalapas siya dili unta mapukan [gipahimulag gikan sa presensya sa Dios], apan siya magpabilin unta sa Tanaman sa Eden. Ug ang tanan nga mga butang nga nalalang magpabilin unta sa mao nga kahimtang human sila malalang.…

“Ug sila dili unta makabaton og mga anak; busa sila unta magpabilin diha sa usa ka kahimtang nga walay sala, walay hingpit nga kalipay, tungod kay sila wala makasinati sa pagkauyamot; walay gihimo nga maayo, kay sila wala makasinati og sala.

“Apan tan-awa, ang tanan nga mga butang nahimo diha sa kaalam kaniya kinsa nasayud sa tanan nga mga butang.

“Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.” (2 Nephi 2:22–25).

  • Sa imong hunahuna nganong importante man nga masayud mahitungod sa Pagkapukan ug sa unsang paagi kini nakaimpluwensya kanato?

Dugang nga mga Kasulatan