Mga Basahon ug mga Leksiyon
Kapitulo 25: Pagpuasa

Kapitulo 25

Pagpuasa

Imahe
A Fijian man in an outdoor setting. He is holding a copy of the scriptures and has his eyes closed in prayer.

Unsaon Pagpuasa sa Husto nga Paagi

  • Unsa ang atong buhaton sa paghimo sa puasa nga usa ka malipayong kasinatian?

Sukad sa panahon ni Adan, ang mga katawhan sa Dios nagpuasa aron sa pagtabang kanila nga mas maduol ngadto Kaniya ug sa pagsimba Kaniya. Si Jesus mipakita sa kamahinungdanon sa pagpuasa pinaagi sa Iyang kaugalingong ehemplo (tan-awa sa Lucas 4:1–4). Pinaagi sa ulahing mga adlaw nga pagpadayag kita nakahibalo nga ang Ginoo nagpaabut gihapon sa Iyang mga katawhan sa pagpuasa ug pag-ampo sa kanunay (tan-awa sa D&P 88:76).

Ang pagpuasa nagpasabut nga dili mokaon ug moinom. Ang panagsa nga pagpuasa makaayo sa atong mga lawas ug magtabang sa atong mga hunahuna nga mas maabtik.

Ang Manluluwas nagtudlo kanato nga ang pagpuasa may katuyoan labaw pa kay sa dili mokaon ug moinom. Kinahanglan nga kita usab maghunahuna kabahin sa espirituhanon nga mga butang.

Kita Kinahanglan nga Mag-ampo Kon Kita Magpuasa

Ang pag-ampo usa ka gikinahanglan nga bahin sa pagpuasa. Sa tibuok nga mga kasulatan, ang pag-ampo ug pagpuasa gihisgutan og dungan. Ang atong pagpuasa kinahanglan nga pagaubanan sa kinasingkasing nga pag-ampo, ug kita kinahanglan nga mosugod ug motapos sa atong pagpuasa uban sa pag-ampo.

Kita Kinahanglan nga Magpuasa uban sa usa ka Katuyoan

Ang pagpuasa mahimong adunay daghan nga mga katuyoan. Makabuntog kita sa atong mga kahuyang o mga problema pinaagi sa pagpuasa ug pag-ampo. Usahay kita buot nga magpuasa ug mag-ampo alang sa panabang o giya alang sa uban, sama sa usa ka sakop sa pamilya kinsa masakiton ug nanginahanglan og usa ka panalangin (tan-awa sa Mosiah 27:22–23). Pinaagi sa pagpuasa atong masayran ang kamatuoran sa mga butang sama gayud sa gibuhat ni propeta Alma diha sa Basahon ni Mormon. Siya miingon: “Ako nagpuasa ug nag-ampo sa daghang mga adlaw nga ako unta masayud niini nga mga butang sa akong kaugalingon. Ug karon ako nasayud sa akong kaugalingon nga kini mga tinuod; kay ang Ginoong Dios mihimo niini nga makita ngari kanako pinaagi sa iyang Balaang Espiritu” (Alma 5:46).

Makapuasa kita aron sa pagtabang sa uban nga modawat sa kamatuoran. Ang pagpuasa makatabang sa paghupay kanato sa mga panahon sa kagul-anan ug kasub-anan (tan-awa sa Alma 28:4–6). Ang pagpuasa makatabang kanato nga mahimong mapainubsanon ug mobati nga mas duol sa atong Langitnong Amahan (tan-awa sa Helaman 3:35).

Ang atong katuyoan sa pagpuasa kinahanglan dili aron daygon sa uban. Ang Ginoo mitambag:

“Ug sa magpuasa kamo, ayaw kamo pagpadayag nga masulub-on, ingon sa mga maut: kay sila magapadautdaut sa ilang mga nawong, aron lamang makita sa mga tawo nga sila nagpuasa.

“Sa pagkatinuod magaingon Ako kaninyo, nga sila makadawat na sa ilang balus.

“Apan ikaw, sa magapuasa ka, kinahanglan nga manghiso ka hinoon sa imong ulo, ug manghilam-os sa imong nawong; aron ang imong pagpuasa dili makita sa mga tawo” (Mateo 6:16–18).

Kinahanglan kita nga magmalipayon kon kita magpuasa ug dili ipahibalo ang atong pagpuasa ngadto sa uban.

  • Sa unsa nga paagi nga ang atong kinaiya nag-impluwensya sa atong kasinatian kon kita nagpuasa?

Ang Adlaw sa Puasa

Usa ka Dominggo matag bulan ang mga Santos sa Ulahing mga Adlaw nagtuman og usa ka adlaw sa puasa. Niining adlawa kita dili mokaon ni moinom sulod sa duha ka nagsunod-sunod nga mga tingkaon. Kon kita mokaon sa atong panihapon sa Sabado, niana kita dili mokaon o moinom hangtud sa panihapon sa Dominggo.

Ang tanan nga mga miyembro kinsa sa pisikal makasarang kinahanglan nga magpuasa. Kinahanglan nga atong awhagon ang atong mga anak sa pagpuasa human sila mabunyagi, apan kinahanglan nga dili gayud kita mopugos kanila. Ang adlaw sa puasa usa ka linain nga adlaw alang kanato sa pagpaubos sa atong mga kaugalingon sa atubangan sa Ginoo diha sa pagpuasa ug pag-ampo. Kini usa ka adlaw sa pag-ampo alang sa kapasayloan gikan sa atong mga sala ug alang sa gahum sa pagbuntog sa atong mga kasaypanan ug sa pagpasaylo sa uban.

Sa Dominggo nga puasa, ang mga miyembro sa Simbahan maghiusa sa pagpundok ug mag-ambit sa sakrament. Naglig-on sila sa ilang mga kaugalingon ug sa usag usa pinaagi sa paghatag og pagpamatuod diha sa miting sa puasa ug pagpamatuod.

  • Sa unsa nga paagi nga ikaw nahatagan og kaayohan gikan sa pagpakigbahin sa imong pagpamatuod diha sa miting sa puasa ug pagpamatuod? Sa unsa nga paagi nga ikaw nahatagan og kaayohan gikan sa pagpamati sa uban nga nakigbahin sa ilang mga pagpamatuod?

Mga Halad sa Puasa

  • Nganong mohatag man kita og mga halad sa puasa?

Kon kita mopuasa matag bulan, ang Ginoo naghangyo kanato sa pagtabang niadtong nanginahanglan. Usa ka paagi nga kita naghimo niini mao ang paghatag pinaagi sa tukma nga awtoridad sa priesthood sa kwarta nga ato untang gastohon sa pagkaon alang sa duha ka kan-anan. Kinahanglan kita nga mohatag og dako-dako kutob sa atong maabut. Pinaagi sa atong mga halad sa puasa kita nahimong mga kaabag sa Ginoo sa pagpangalagad ngadto sa mga panginahanglan sa atong kabus nga mga kaigsoonan nga mga lalaki ug mga babaye.

Kita Mapanalanginan Kon Kita Magpuasa

  • Unsa nga mga panalangin ang atong madawat kon kita magpuasa sa husto nga paagi?

Si Isaias, usa ka propeta sa Daang Tugon, misulat sa buhong nga mga saad sa Ginoo ngadto niadtong kinsa nagpuasa ug nagtabang sa mga kabus. Gisaaran kita og kalinaw, maayo nga panglawas, ug espirituhanong paggiya. Si Isaias nagsulti kanato kabahin sa mga panalangin nga moabut kon kita magpuasa: “Unya ang imong kahayag mosidlak nga maingon sa kabuntagon, ug ang imong pagkaayo motungha sa madali: ug ang imong pagkamatarung mouna kanimo; ang himaya sa Ginoo magapalikod kanimo. Ug unya ikaw motawag, ug ang Ginoo motubag; ikaw motuaw,ug siya maga-ingon, Ania man ako” (Isaias 58:8–9).

Ang pagpuasa nagpaayo sa atong mga kinabuhi ug naghatag kanato og dugang nga kalig-on. Kini nagtabang kanato sa pagsunod sa uban nga mga baruganan sa ebanghelyo tungod kay kini nagdala kanato nga mas maduol ngadto sa Ginoo.

Pagpuasa Nagtudlo og Pagpugong sa Kaugalingon

Ang pagpuasa nagtabang kanato sa pag-angkon og kalig-on sa kinaiya. Kon kita magpuasa sa husto nga paagi, kita makakat-on sa pagpugong sa atong mga gana, ug sa atong init nga mga pagbati. Kita mas malig-on og gamay pinaagi sa pagmatuod ngari sa atong mga kaugalingon nga kita adunay pagpugong sa kaugalingon. Kon kita magtudlo sa atong mga anak sa pagpuasa, sila makapalambo og espirituhanong kalig-on sa pagbuntog og mas dako nga mga tintasyon sa umaabut diha sa ilang mga kinabuhi.

Pagpuasa Naghatag Kanato og Espirituhanong Gahum

Kon kita magpuasa sa maalamon ug mainampoon nga paagi, atong mapalambo ang atong hugot nga pagtuo. Uban niana nga hugot nga pagtuo makabaton kita og mas dako nga espirituhanong gahum. Sama pananglit, si Alma (usa ka propeta sa Basahon ni Mormon) nag-asoy sa istorya kabahin sa pakigkita og usab sa mga anak nga lalaki ni Mosiah human sa daghang mga tuig sa ilang milagrosong pagkakabig. Gibati niya ang dakong kalipay sa dihang iyang nahibaloan nga sila nakapalig-on sa ilang hugot nga pagtuo ug nakapalambo og dako nga espirituhanong gahum. Naangkon nila kining gahum tungod kay “sila naghatag ngadto sa ilang mga kaugalingon ngadto sa tuman nga pag-ampo, ug pagpuasa; busa sila adunay espiritu sa pagpanagna, ug espiritu sa pagpadayag” (Alma 17:3).

Ang mga anak nga lalaki ni Mosiah nanagsangyaw sulod sa 14 ka tuig ngadto sa mga Lamanite. Tungod kay ang mga anak nga lalaki ni Mosiah nagpuasa ug nag-ampo, ang Espiritu sa Ginoo nagdugang sa gahum sa ilang mga pulong. Kini naghatag kanila og dako nga kalampusan sa ilang misyonaryo nga buhat. (Tan-awa sa Alma 17:4.)

Ang Manluluwas nag-ingon ngadto niadto kinsa nagpuasa sa husto nga paagi, “Ang imong Amahan, kinsa nagtan-aw sa tago, magabalus kanimo sa dayag” (Mateo 6:18).

  • Sa unsa nga paagi nga ang pagpuasa makadugang sa atong espirituhanong gahum sa pagpakigbatok sa mga tintasyon? sa pagdawat og pagpadayag? sa paghimo og matarung nga mga lihok?

Dugang nga mga Kasulatan