Mga Basahon ug mga Leksiyon
Kapitulo 29: Ang Balaod sa Ginoo kabahin sa Panglawas

Kapitulo 29

Ang Balaod sa Ginoo kabahin sa Panglawas

Imahe
A young girl eating an apple.

Ang Atong mga Lawas Mao ang mga Templo sa Dios

Usa sa dako nga mga panalangin nga atong nadawat sa dihang mianhi kita sa yuta mao ang pisikal nga lawas. Nagkinahanglan kita og usa ka pisikal nga lawas aron mahimo kitang sama sa atong Langitnong Amahan. Ang atong mga lawas hilabihan kaayo ka importante nga ang Ginoo mitawag niini og mga templo sa Dios (tan-awa sa 1 Mga Taga-Corinto 3:16–17; 6:19–20). Ang atong mga lawas balaan.

Tungod kay ang atong mga lawas importante, ang atong Amahan sa Langit buot nga kita moatiman og maayo. Nasayud Siya nga kita mahimong mas malipayon, mas maayo nga mga tawo kon kita mga himsog. Ang Espiritu Santo makauban kanato kon ang atong mga lawas ug mga hunahuna limpyo. Ang atong Amahan nasayud nga kita nag-atubang og mga tintasyon sa pagtagad sa atong mga lawas sa dili maalamong paagi o sa pagsulod og makadaot nga mga butang ngadto niini. Tungod niini nga katarungan Siya misulti kanato kon unsa nga mga butang ang makaayo alang sa atong panglawas ug unsa nga mga butang ang makadaut. Daghan sa impormasyon nga gihatag sa Dios kanato kalabut sa maayong panglawas makita sa Doktrina ug mga Pakigsaad 89. Kini nga pagpadayag gitawag og ang Pulong sa Kaalam.

Kinahanglan gayud kita nga mosunod sa Pulong sa Kaalam aron mahimong takus sa pagsulod sa templo. Kon kita dili mosunod sa Pulong sa Kaalam, ang Espiritu sa Ginoo mobiya kanato. Kon atong hugaw-hugawan ang “templo sa Dios,” nga mao ang atong lawas, atong gipasakitan ang atong mga kaugalingon sa pisikal ug sa espirituhanon nga paagi.

Kita Gimandoan Sa Dili Pagsulod og Piho nga mga Butang ngadto sa Atong mga Lawas

  • Unsa ang gimando kanato sa Ginoo nga dili isulod sa atong mga lawas?

Ang Ginoo nagmando kanato sa dili paggamit og bino ug maisug nga mga ilimnon, nagpasabut og mga ilimnon nga adunay alkohol. Ang Unang Kapangulohan nagtudlo nga ang maisug nga ilimnon sa kasagaran nagdala og kawalay kalooy, kakabus, sakit, kasamok ngadto sa panimalay. Kini sa kasagaran mao ang hinungdan sa pagkadili matinuoron, pagkawala sa kaputli, ug pagkawala sa maayong paghukom. Kini usa ka tunglo ngadto sa tanan kinsa moinom niini. (Tan-awa sa “Message of the First Presidency,” Improvement Era, Nob. 1942, 686.) Ang mabdos nga mga inahan kinsa moinom makahimo og pisikal ug mental nga kadaot sa ilang mga anak. Daghang mga disgrasya sa sakyanan nahimo matag tuig sa mga tawo kinsa moinom og bino.

Ang Ginoo usab nagsulti kanato nga ang “tabako dili alang sa atong lawas” (D&P 89:8). Kini makadaot sa atong mga lawas ug sa atong mga espiritu. Kinahanglan dili kita manigarilyo o manabako o mousap og tabako. Ang mga batid sa siyensya nakapakita nga ang tabako makahimo og daghang mga sakit ug makadaot sa wala pa matawo nga mga bata.

Ang Ginoo usab nagtambag kanato batok sa paggamit og “mainit nga mga ilimnon” (D&P 89:9). Ang mga lider sa Simbahan nag-ingon nga kini nagpasabut sa kape ug tsa, nga adunay makadaot nga mga sagol. Kinahanglan nga kita maglikay sa tanang ilimnon nga adunay makadaot nga mga sagol.

Kinahanglan nga dili kita mogamit og mga drugas gawas kon kini mga gikinahanglan isip medisina. Pipila sa mga drugas gani mas makadaot pa kay sa alkohol ug tabako (nga mga drugas usab). Kadtong kinsa migamit og mga drugas sa sayop nga paagi nagkinahanglan nga mangita og tabang, mag-ampo alang sa kalig-on, ug magpakitambag uban sa ilang mga bishop aron sila makahinulsol sa hingpit ug mamahimo nga limpyo.

Kinahanglan kita nga molikay sa bisan unsa nga atong nahibaloan nga makadaot sa atong mga lawas. Kinahanglan nga dili kita mogamit og bisan unsa nga butang nga makapaanad. Kinahanglan usab kita nga molikay sa pagpalabi og kaon. Ang Pulong sa Kaalam wala magsulti kanato sa tanan nga likayan o gamiton, apan kini naghatag kanato og mga giya. Kini usa ka mapuslanong temporal nga balaod. Usa usab kini ka mahinungdanon nga espirituhanong balaod. Pinaagi sa pagsunod sa Pulong sa Kaalam, kita mamahimo nga mas malig-on sa espirituhanon nga paagi. Gilimpyohan nato ang atong mga lawas aron ang Espiritu sa Ginoo makapuyo uban kanato.

  • Unsa ang pipila ka mga butang nga wala hisguti sa piho nga paagi diha sa Pulong sa Kaalam nga kinahanglan natong likayan?

Kita Gitudloan Nga ang Piho Nga Mga Butang Maayo Alang Sa Atong Mga Lawas

  • Sumala sa Pulong sa Kaalam, unsa ang pipila ka mga butang nga gisulti sa Ginoo nga maayo alang kanato?

Mga prutas, mga utanon, ug lunsay nga mga hilba maayo alang kanato. Kinahanglan atong gamiton kini uban sa kaalam ug pagpasalamat.

Ang unod sa mga langgam ug mga hayop gihatag usab alang sa atong pagkaon. Bisan pa niana, kinahanglan kita nga mokaon og karne sa dinaginot (tan-awa sa D&P 49:18; 89:12). Ang isda maayo usab nga atong kan-on.

Ang mga lugas maayo alang kanato. Ang trigo labing maayo alang kanato.

  • Sa unsa nga paagi nga ang paggamit niini nga mga butang nakapanalangin kanimo?

Trabaho, Pahulay, ug Ehersisyo Mga Importante

  • Unsa ang kalabutan sa trabaho, pahulay ug ehersisyo ngadto sa balaod sa Ginoo kabahin sa panglawas?

Agi og dugang ngadto sa Doktrina ug mga Pakigsaad 89, ang uban nga mga kasulatan nagsulti kanato kon sa unsa nga paagi nga mahimong himsog. Sila nagsulti kanato nga kinahanglan kita “mohunong sa pagkatapulan, mohunong sa pagkahugawan; … mohunong sa pagkatulog og labaw pa kay sa gikinahanglan; mopahulay sa higdaanan og sayo, nga kamo dili kapuyon; mobangon og sayo, nga ang inyong mga lawas ug ang inyong mga hunahuna mahimo nga malagsik” (D&P 88:124). Gisultihan usab kita, “Unom ka adlaw magbuhat ka ug buhaton mo ang tanan nga imong buluhaton” (Exodo 20:9). Ang Ginoo nagtambag kanato sa dili pagtrabaho og labaw kay sa kita adunay kusog (tan-awa sa D&P 10:4).

Usa ka propeta sa ulahing mga adlaw nagsulti kanato nga kinahanglan nga ang atong mga lawas magpabiling himsog. Mitambag siya: “Masustansya nga mga pagkaon, kanunay nga pag-ehersisyo ug husto nga pagkatulog mao ang gikinahanglan alang sa usa ka lig-on nga lawas, ingon nga ang kanunay nga pagtuon sa kasulatan ug pag-ampo naglig-on sa hunahuna ug sa espiritu” (Thomas S. Monson, sa Conference Report, Okt. 1990, 60; o Ensign, Nob. 1990, 46).

Gisaad nga mga Panalangin sa Pagsunod sa Balaod sa Ginoo kabahin sa Panglawas

  • Unsa nga mga panalangin ang moabut kanato samtang kita nagsunod sa Pulong sa Kaalam?

Ang atong Langitnong Amahan naghatag kanato og mga balaod sa panglawas aron sa pagtudlo kanato kon unsaon sa pag-atiman ang atong mga lawas. Ang mga kasulatan nagsulti kanato mahitungod sa mga balaod sa Dios: “Walay temporal nga sugo nga Ako mihatag … , kay ang akong mga sugo mga espirituhanon” (D&P 29:35). Kini nagpasabut nga ang Iyang mga sugo kalabut sa atong pisikal nga kahimtang alang sa atong espirituhanong kaayohan.

Kon kita magtuman sa balaod sa Ginoo sa panglawas ug magsunod sa Iyang uban nga mga sugo, ang Ginoo nagsaad sa pagpanalangin kanato sa pisikal ug espirituhanon nga paagi.

Sa pisikal nga paagi kita gisaaran og maayong panglawas. Agi og resulta niining maayong panglawas kita “modagan ug dili maluya, ug molakaw ug dili makuyapan” (D&P 89:20). Kini usa ka dako nga panalangin, apan ang espirituhanong mga panalangin nga Iyang gisaad kanato mas dako pa kay sa pisikal nga mga panalangin.

Ang Ginoo nagsaad kanato nga kita “makakita og kaalam ug dako nga mga bahandi sa kahibalo, gani ang mga tinago nga mga bahandi” (D&P 89:19). Kita pagatudloan og importante nga mga kamatuoran sa Espiritu Santo pinaagi sa pagpadayag. Si Presidente Boyd K. Packer mitudlo: “Ang atong pisikal nga lawas mao ang instrumento sa atong espiritu. Diha nianang kahibulongang pagpadayag sa Pulong sa Kaalam, kita gisultihan kon unsaon sa paghupot sa atong mga lawas nga luwas gikan sa mga kahugaw nga mahimong makapahinay, gani makadaot, niadtong malumong pisikal nga mga pagbati nga adunay kalabutan sa espirituhanon nga komunikasyon. Ang Pulong sa Kaalam mao ang yawe ngadto sa indibidwal nga pagpadayag” (sa Conference Report, Okt. 1989, 16; o Ensign, Nob. 1989, 14).

Ang Ginoo nagsaad usab nga ang tiglaglag nga anghel molabay kanato. Si Presidente Heber J. Grant miingon, “Kon ikaw ug ako nagtinguha sa mga panalangin sa kinabuhi sa kahimsug, kalagsik sa lawas ug hunahuna; kon kita nagtinguha nga ang tiglaglag nga anghel mosaylo kanato sama sa panahon sa mga anak sa Israel, kita kinahanglang motuman motuman sa Pulong sa Kaalam; dayon ang Dios mapugos ug ang mga panalangin moabut kanato” (Mga Pagtulun-an sa mga Presidente sa Simbahan: Heber J. Grant [2002], 230).

  • Sa unsa nga paagi kita makatabang sa mga kabataan ug kabatan-onan nga masabtan ang mahangturong kahulugan sa Pulong sa Kaalam?

  • Unsa ang atong mahimo sa pagtabang sa mga sakop sa pamilya o mga higala kinsa naglisud sa pagsunod sa Pulong sa Kaalam?

Dugang nga mga Kasulatan