Mga Basahon ug mga Leksiyon
Kapitulo 35: Pagkamasulundon

Kapitulo 35

Pagkamasulundon

Imahe
An angel appearing to Adam and Eve as they prepare to offer a lamb as a burnt offering. The illustration depicts the angel explaining to Adam and Eve that the animal sacrifice was symbolic of the sacrifice to be made by Jesus Christ.

Kita Kinahanglan nga Mosunod sa Dios sa Andam nga Paagi

  • Unsa ang kalainan nga mahimo sa pagsunod sa andam nga paagi kay sa dili andam nga paagi?

Sa dihang si Jesus dinhi pa sa yuta, usa ka abogado nangutana Kaniya og usa ka pangutana :

“Magtutudlo unsa man ang dako nga sugo sa kasugoan?

“Si Jesus miingon ngadto kaniya, Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.

“Mao kana ang dako ug unang sugo.

“Ang ikaduha sulosama ra, nga mao kini, Higugmaa ang imong silingan sama sa imong kaugalingon.

“Niining duha ka mga sugo nagasukad ang tibuok kasugoan ug ang mga propeta (Mateo 22:36–40).

Gikan niini nga mga kasulatan kita nakakat-on kon unsa ka importante kini alang kanato sa paghigugma sa Ginoo ug sa atong mga silingan. Apan sa unsa nga paagi nga atong mapakita ang atong gugma alang sa Ginoo?

Si Jesus mitubag niini nga pangutana sa dihang Siya miingon, “Ang nagabaton sa akong mga sugo, ug nagatuman niini kini siya mao ang nahigugma kanako: ug ang nahigugma kanako pagahigugmaon sa akong Amahan” (Juan 14:21).

Ang matag usa kanato kinahanglan mangutana sa atong mga kaugalingon ngano nga kita mosunod sa mga kasugoan sa Dios. Kini tungod ba kay nahadlok kita og silot? Kini tungod ba kay nagtinguha kita og mga ganti alang sa pagpuyo og usa ka maayo nga kinabuhi? Kini tungod ba kay gihigugma nato ang Dios ug si Jesukristo ug buot moserbisyo Kanila?

Mas maayo nga mosunod sa mga kasugoan tungod kay nahadlok kita og silot kay sa dili gayud mosunod niini. Apan kita mas labaw nga malipayon kon kita mosunod sa Dios tungod kay kita nahigugma Kaniya ug buot mosunod Kaniya. Kon kita mosunod Kaniya sa kinabubut-on, Siya makapanalangin kanato sa walay pagpugong. Siya miingon, “Ako, ang Ginoo, … nahimuot sa pagpasidungog ngadto kinsa nag-alagad kanako sa pagkamatarung ug diha sa kamatuoran ngadto sa katapusan” (D&P 76:5). Ang pagkamasulundon nagtabang usab kanato sa pag-uswag ug paghimo nga mas mahisama sa atong Langitnong Amahan. Apan kadto nga walay gibuhat hangtud nga sila gimandoan ug dayon mituman sa mga kasugoan sa dili andam nga paagi mawagtangan sa ilang ganti (tan-awa sa D&P 58:26–29).

  • Sa unsa nga paagi kita makadugang sa atong tinguha sa pagsunod?

Kita Makasunod sa walay Pagsabut og Ngano

  • Ngano nga kita dili man kanunay kinahanglan nga makasabut sa mga katuyoan sa Ginoo aron mahimong masulundon?

Pinaagi sa pagtuman sa mga kasugoan sa Dios, nag-andam kita alang sa kinabuhi nga dayon og sa kahimayaan. Usahay kita wala makahibalo sa rason alang sa usa ka piho nga sugo. Bisan pa niana, gipakita nato ang atong hugot nga pagtuo ug pagsalig sa Dios kon kita mosunod Kaniya nga wala masayud kon ngano.

Si Adan ug si Eva gimandoan sa paghalad og mga sakripisyo ngadto sa Dios. Usa ka adlaw niana usa ka anghel mipakita ngadto kang Adan ug nangutana ngano nga siya mihalad og mga sakripisyo. Mitubag si Adan nga siya wala makahibalo sa rason. Mihimo siya niini tungod kay ang Ginoo misugo kaniya. (Tan-awa sa Moises 5:5–6 ug ang hulagway dinhi niini nga kapitulo.)

Dayon ang anghel mitudlo ni Adan sa ebanghelyo ug misulti kaniya kabahin sa Manunubos kinsa moabut. Ang Espiritu Santo mikunsad kang Adan, ug si Adan nanagna kalabut sa mga lumulupyo sa yuta ngadto sa katapusan nga henerasyon. (Tan-awa sa Moises 5:7–10; D&P 107:56.) Kini nga kahibalo ug dako nga mga panalangin miabut ngadto ni Adan tungod kay siya masulundon.

Ang Dios Moandam og Paagi

Ang Basahon ni Mormon nagsulti kanato nga si Nephi ug ang iyang magulang nga mga lalaki nakadawat og malisud nga buluhaton gikan sa Ginoo (tan-awa sa 1 Nephi 3:1–6). Mibagulbol ang mga igsoong lalaki ni Nephi, nag-ingon nga ang Ginoo nagsugo og usa ka malisud nga butang kanila. Apan si Nephi miingon, “Ako moadto ug mobuhat sa mga butang nga ang Ginoo nagsugo kanako, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7). Kon kita naglisud sa pagsunod sa usa ka sugo sa Ginoo, kinahanglan atong hinumduman ang mga pulong ni Nephi.

  • Kanus-a nga ang Ginoo miandam og paagi alang kanimo sa pagsunod Kaniya?

Walay Sugo nga Gamay Kaayo o Dako Kaayo sa Pagsunod

Usahay maghunahuna kita nga usa ka sugo dili kaayo importante. Ang mga kasulatan nagsulti kabahin sa usa ka tawo nga ginganlan og Naaman kinsa naghunahuna niana nga paagi. Si Naaman dihay makalilisang nga sakit ug mibiyahe gikan sa Syria ngadto sa Israel aron sa paghangyo ni propeta Eliseo sa pag-ayo kaniya. Usa ka talahurong tawo si Naaman sa iyang kaugalingong nasud, busa siya naligutgot sa dihang si Eliseo wala moabi-abi kaniya sa iyang kaugalingon apan nagpadala hinoon og iyang sulugoon. Misamot ang pagkaligutgot ni Naaman sa dihang nadawat niya ang mensahe ni Eliseo: lakaw ug maghugas ka didto sa Jordan sa makapito. “Dili ba [ang] mga suba sa Damascus labing maayo pa kay sa tanang tubig sa Israel? dili ba ako makapanghugas niini ug mamahinlo?” siya misukna. Mipahawa siya nga naglagut. Apan ang iyang mga alagad nangutana kaniya: “Kon ang manalagna nagsugo kanimo sa pagbuhat sa dakong butang dili mo ba kini pagabuhaton? nan hain ang labing maayo, kon siya moingon kanimo, Panghimasa ug magmahinlo ka?” Maalamon si Naaman igo sa pagsabut nga mahinungdanon ang pagsunod sa propeta sa Dios, bisan kini ingon og usa ka gamay nga butang. Busa siya mihugas sa iyang kaugalingon didto sa Jordan ug naayo. (Tan-awa sa 2 Mga Hari 5:1–14.)

Usahay maghunahuna kita og sugo nga lisud kaayo alang kanato sa pagsunod. Sama sa igsoong mga lalaki ni Nephi, mahimong moingon kita, “Kini usa ka malisud nga butang nga gipabuhat sa Dios kanamo.” Apan, sama ni Nephi, kita makasiguro nga ang Dios dili mohatag kanato og sugo gawas kon Siya moandam og paagi alang kanato sa pagsunod Kaniya.

Kini usa ka “malisud nga butang” sa diha nga ang Dios mimando ni Abraham sa paghalad sa iyang pinalanggang anak nga lalaki nga si Isaac isip usa ka sakripisyo (tan-awa sa Genesis 22:1–13; tan-awa usab ang kapitulo 26 dinhi niini nga basahon). Naghulat si Abraham og daghan nga mga katuigan alang sa pagkahimugso ni Isaac, ang anak nga lalaki nga gisaad sa Dios ngadto kaniya. Unsaon man niya nga mawad-an sa iyang anak nga lalaki sa ingon niana nga paagi? Kini nga sugo hilabihan gayud tingali kalisud alang ni Abraham. Apan siya mipili sa pagsunod sa Dios.

Kita usab kinahanglan nga andam nga mobuhat sa bisan unsa nga gisugo sa Dios kanato. Si Propeta Joseph Smith miingon, “Ako kining gihimo nga lagda: Kon ang Ginoo mosugo, buhata kini” (Mga Pagtulun-an sa mga Presidente sa Simbahan: Joseph Smith [2007], 190). Kini mahimo usab nga atong balaod.

  • Kanus-a man nga ikaw nakadawat og mga panalangin agi og resulta sa imong pagkamasulundon ngadto sa mga kasugoan nga ingon og gamay ra?

Si Jesukristo Misunod sa Iyang Amahan

  • Unsa nga mga ehemplo ang moabut sa hunahuna kon ikaw maghunahuna ni Jesukristo nga nagsunod sa Iyang Amahan?

Si Jesukristo mao ang labing halangdon nga ehemplo sa pagkamasulundon ngadto sa atong Langitnong Amahan. Siya miingon, “Kay ako nanaug gikan sa langit, dili sa pagbuhat sa akong kaugalingong kabubut-on, kon dili sa kabubut-on sa nagpadala kanako” (Juan 6:38). Ang Iyang tibuok kinabuhi gihalad ngadto sa pagsunod sa Iyang Amahan; gani kini kanunay nga dili sayon alang kaniya. Gitintal siya sa tanan nga mga paagi sama sa uban nga mga mortal (tan-awa sa Mga Hebreohanon 4:15). Sa Tanaman sa Getsemani Siya nag-ampo, nag-ingon, “O Amahan ko, kon mahimo man, isaylo lang kanako kining kopa: gani, dili sumala sa akong pagbuot kon dili sa imo” (Mateo 26:39).

Tungod kay si Jesus misunod sa kabubut-on sa Amahan sa tanan nga mga butang, gihimo Niya ang kaluwasan nga posible alang kanatong tanan.

  • Sa unsa nga paagi nga ang paghinumdom sa ehemplo sa Manluluwas makatabang kanato nga magmasulundon?

Mga Resulta sa Pagkamasulundon ug Pagkamasinupakon

  • Unsa ang mga sangputanan sa pagsunod o sa pagsupak sa mga kasugoan sa Ginoo?

Ang gingharian sa langit gidumala pinaagi sa balaod, ug kon kita makadawat og bisan unsa nga panalangin, kini tungod sa pagsunod niana nga balaod diha diin kana nga panalangin gipasikad (tan-awa sa D&P 130:20–21; 132:5). Ang Dios nagsulti kanato nga pinaagi sa atong pagkamasulundon ug kakugi kita mahimo nga makaangkon og kahibalo ug salabutan (tan-awa sa D&P 130:18–19). Mahimo usab kita nga motubo sa espirituhanon nga paagi (tan-awa sa Jeremias 7:23–24). Sa lain nga bahin, ang pagkamasinupakon nagdala og mga kahigawad ug moresulta sa pagkawala sa mga panalangin. “Kinsa Ako, miingon ang Ginoo, nga nagsaad ug wala magtuman? Ako nagsugo ug ang mga tawo wala mosunod; Ako mobakwi ug sila dili makadawat sa panalangin. Unya moingon sila sa ilang mga kasingkasing: Kini dili buhat sa Ginoo, kay ang iyang mga saad wala matuman” (D&P 58:31–33).

Kon kita motuman sa mga kasugoan sa Dios, Siya motuman sa Iyang mga saad, ingon nga si Hari Benjamin misulti sa iyang mga katawhan: “Siya nagkinahanglan nga kamo kinahanglan mobuhat ingon nga siya nagsugo kaninyo; kay kon kamo mobuhat, siya diha-diha mopanalangin kaninyo” (Mosiah 2:24).

Ang Masulundon Makaangkon og Kinabuhi nga Dayon

Ang Ginoo nagtambag kanato, “Kon ikaw maghupot sa akong mga sugo ug molahutay ngadto sa katapusan ikaw makaangkon og kinabuhi nga dayon, diin nga gasa mao ang labing mahinungdanon sa tanan nga mga gasa sa Dios” (D&P 14:7).

Ang Ginoo naghulagway sa uban nga mga panalangin nga moabut ngadto niadtong kinsa nagsunod Kaniya sa pagkamatarung ug sa kamatuoran hangtud sa katapusan.

“Kay sa ingon miingon ang Ginoo—Ako, ang Ginoo, maloloy-on ug mabination ngadto niadto kinsa mahadlok kanako, ug mahimuot sa pagpasidungog niadto kinsa nag-alagad kanako sa pagkamatarung ug diha sa kamatuoran ngadto sa katapusan.

“Dako ang ilang ganti ug walay katapusan ang ilang himaya.

“Ug ngadto kanila ako magpadayag sa tanan nga mga misteryo, oo, tanan nga tinagoan nga mga misteryo sa akong gingharian gikan sa dugay nang panahon, ug alang sa panahon nga moabut, Ako mohimo nga masayran ngadto kanila ang maayo nga kahimuot sa akong kabubut-on mahitungod sa tanan nga mga butang kabahin sa akong gingharian.

“Oo, gani ang mga kahibulongan sa walay katapusan nga kalibutan sila masayud, ug sa mga butang nga moabut Ako mopakita kanila, bisan sa mga butang sa daghan nga mga kaliwatan.

“Ug ang ilang kaalam mahimo nga walay kinutuban, ug ang ilang panabut moabut sa langit.

“Kay pinaagi sa akong Espiritu ako mopasabut kanila, ug pinaagi sa akong gahum Ako mohimo nga sila masayud sa tinagoan sa akong kabubut-on—oo, bisan kadto nga mga butang diin ang mata wala makakita, ni dunggan nga makadungog, ni makasulod ngadto sa kasingkasing sa tawo” (D&P 76:5–10).

  • Unsa ang kahulugan sa hugpong sa mga pulong “lahutay hangtud sa katapusan” nganha kaninyo?

  • Unsa ang atong mabuhat sa pagpabilin nga tinuod ngadto sa mga baruganan sa ebanghelyo bisan kon kini dili uso sa pagbuhat sa ingon? Sa unsa nga paagi nga kita makatabang sa mga kabataan ug mga kabatan-onan sa pagpabilin nga tinuod ngadto sa mga baruganan sa ebanghelyo?

Dugang nga mga Kasulatan