Mga Basahon ug mga Leksiyon
Kapitulo 23: Ang Sakrament

Kapitulo 23

Ang Sakrament

Imahe
Jesus Christ depicted preparing the sacrament for the Last Supper.

Si Kristo Mipasiugda sa Sakrament

  • Unsa ang gitudlo sa mga simbolo sa sakrament mahitungod sa Pag-ula ni Jesukristo?

Ang atong Manluluwas buot nga kita mahinumdom sa Iyang mahinungdanon nga sakripisyo sa pag-ula ug mosunod sa Iyang mga sugo. Aron pagtabang kanato sa paghimo niini, Siya misugo kanato sa pagtigum kanunay ug sa pag-ambit sa sakrament.

Ang sakrament usa ka balaan nga ordinansa sa priesthood nga nagtabang kanato sa paghinumdom kalabut sa Pag-ula sa Manluluwas. Sa panahon sa sakrament, kita moambit sa pan ug sa tubig. Kita naghimo niini agi og handumanan sa Iyang lawas ug sa Iyang dugo, nga Iyang gihatag isip usa ka sakripisyo alang kanato. Samtang kita moambit sa sakrament, kita nagbag-o og sagrado nga mga pakigsaad uban sa atong Langitnong Amahan.

Sa hapit na ang Iyang Paglansang sa krus, si Jesukristo mipundok sa Iyang mga Apostoles libut Kaniya sa usa ka lawak sa taas. Nasayud Siya nga sa dili madugay siya mamatay diha sa krus. Kini mao ang katapusan nga higayon nga Siya makigkita niining pinalangga nga mga lalaki sa dili pa ang Iyang kamatayon. Buot Siya nga sila sa kanunay mahinumdom Kaniya aron sila mahimong lig-on ug matinud-anon.

Aron sa pagtabang kanila sa paghinumdom, mipasiugda Siya sa sakrament. Gipikas-pikas Niya ang pan ug gipanalanginan kini. Dayon Siya miingon, “Kuha, kaon; kini agi og handumanan sa akong lawas diin akong gihatag nga usa ka lukat alang kaninyo” (Hubad ni Joseph Smith, Mateo 26:22). Sunod siya mikuha og usa ka kopa sa bino, mipanalangin niini, mihatag niini ngadto sa Iyang mga Apostoles aron imnon, ug miingon, “Kini mao ang handumanan sa akong dugo … , diin gipaagas kutob sa motuo sa akong ngalan, alang sa kapasayloan sa ilang mga sala” (Hubad ni Joseph Smith , Mateo 26:24; tan-awa usab sa Mateo 26:26–28; Marcos 14:22–24; Lucas 22:15–20).

Human sa Iyang Pagkabanhaw, ang Manluluwas miadto sa Amerika ug mitudlo sa mga Nephite sa sama nga ordinansa (tan-awa sa 3 Nephi 18:1–11; 20:1–9). Human ang Simbahan napahiuli sa ulahing mga adlaw, si Jesus sa makausa mimando usab sa Iyang mga katawhan sa pag-ambit sa sakrament agi og handumanan Kaniya, nag-ingon, “Kini angay nga ang simbahan magtigum kanunay aron sa pag-ambit sa pan ug bino agi og handumanan sa Ginoong Jesus” (D&P 20:75).

Sa unsa nga paagi ang Sakrament Ipahigayon

Ang mga kasulatan nagpasabut sa eksakto kon sa unsa nga paagi ang sakrament ipahigayon. Ang mga miyembro sa Simbahan magtigum matag adlaw nga Igpapahulay aron sa pagsimba ug sa pag-ambit sa sakrament (tan-awa sa D&P 20:75). Ang sakrament gipahigayon pinaagi niadtong kinsa naghupot sa gikinahanglan nga awtoridad sa priesthood. Ang usa ka priest o tighupot sa Melchizedek Priesthood mopikas-pikas sa pan, moluhod, ug mopanalangin niini (tan-awa sa D&P 20:76). Ang usa ka deacon o uban nga tighupot sa priesthood dayon ang mopaambit sa sakrament nga pan ngadto sa kongregasyon. Dayon ang priest o tighupot sa Melchizedek Priesthood mopanalangin sa tubig, ug kini usab ipaambit ngadto sa mga miyembro. Mihatag si Jesus og bino ngadto sa Iyang mga tinun-an sa dihang Siya mipasiugda sa sakrament. Hinoon, sa usa ka ulahing adlaw nga pagpadayag Siya miingon nga kini dili igsapayan unsa ang atong kan-on ug imnon sa panahon sa sakrament basta kita maghinumdom lang Kaniya (tan-awa sa D&P 27:2–3). Karon, ang mga Santos sa Ulahing mga adlaw nag-inom og tubig nga maoy puli sa bino.

Gipadayag ni Jesus ang tukma nga mga pulong alang sa duha ka mga pag-ampo sa sakrament. Kita kinahanglan nga mamati og maayo ngadto niining maanindot nga mga pag-ampo ug maningkamot sa pagsabut unsa ang atong gipanaad ug unsa ang gisaad ngari kanato. Ania ang pag-ampo nga ihalad sa pagpanalangin sa pan:

“O Dios ang Amahan sa Kahangturan, kami mangayo kanimo pinaagi sa ngalan sa imong Anak, nga si Jesukristo, sa pagpanalangin ug pagbalaan niining pan ngadto sa mga kalag sa tanan niadto kinsa moambit niini, nga sila unta mokaon agi og handumanan sa lawas sa imong Anak, ug mosaksi nganha kanimo, O Dios, ang Amahan sa Kahangturan, nga sila andam sa pagdala nganha kanila sa ngalan sa imong Anak, ug sa kanunay mohinumdom kaniya ug maghupot sa iyang mga sugo diin siya mihatag kanila, nga sila unta makaangkon sa iyang Espiritu uban kanila. Amen” (D&P 20:77).

Ania ang pag-ampo nga ihalad aron sa pagpanalangin sa tubig:

“O Dios ang Amahan sa Kahangturan, kami mangayo kanimo pinaagi sa ngalan sa imong Anak, si Jesukristo, sa pagpanalangin ug pagbalaan niining bino [tubig] ngadto sa mga kalag sa tanan niadto kinsa moinom niini agi og handumanan sa dugo sa imong Anak, nga gipaagas alang kanila; nga sila unta mosaksi nganha kanimo, O Dios, ang Amahan sa Kahangturan, nga sila sa kanunay mahinumdom kaniya, nga sila unta makaangkon sa iyang Espiritu uban kanila. Amen” (D&P 20:79.

Ang ordinansa sa sakrament gipahigayon sa labing yano ug sa balaan nga pagtahud.

  • Sa mabinantayon nga paagi ribyuha ang mga pag-ampo sa sakrament. Paghunahuna mahitungod sa kahulugan sa matag hugpong sa mga pulong.

Ang mga Pakigsaad nga Atong Gibag-o sa panahon sa Sakrament

  • Unsa nga mga pakigsaad ang atong gibag-o sa panahon sa sakrament? Unsa nga mga panalangin ang gisaad sa Dios kanato samtang kita naghupot niadto nga mga pakigsaad?

Sa matag higayon nga kita nag-ambit sa sakrament, kita nagbag-o og mga pakigsaad uban sa Ginoo. Ang pakigsaad usa ka sagrado nga saad tali sa Ginoo ug sa Iyang mga anak. Ang mga pakigsaad nga atong gihimo tataw nga gisulti diha sa mga pag-ampo sa sakrament. Kini importante nga makahibalo unsa kadto nga mga pakigsaad ug unsa ang kahulugan niini.

Nakigsaad kita nga kita andam sa pagdala diha sa atong mga kaugalingon sa pangalan ni Jesukristo. Pinaagi niini kita nagpakita nga kita andam nga mailhan uban Kaniya ug sa Iyang Simbahan. Mipasalig kita sa pagserbisyo Kaniya ug sa atong isigkatawo. Misaad kita nga dili kita mohatag og pagpakaulaw o pagpasaway diha niana nga pangalan.

Nakigsaad kita nga sa kanunay mohinumdom ni Jesukristo. Ang tanan nato nga mga hunahuna, pagbati ug mga lihok maimpluwensya pinaagi Kaniya ug sa Iyang misyon.

Misaad kita nga mosunod sa Iyang mga kasugoan.

Gidala nato kini nga mga obligasyon diha sa atong mga kaugalingon sa diha nga kita gibunyagan (tan-awa sa D&P 20:37; Mosiah 18:6–10). Busa, kon kita moambit sa sakrament, kita nagbag-o sa mga pakigsaad nga atong gihimo sa dihang kita gibunyagan. Naghatag kanato si Jesus og sumbanan alang sa pag-ambit sa sakrament (tan-awa sa 3 Nephi 18:1–12) ug miingon nga kon kita mosunod niini nga sumbanan, maghinulsol sa atong mga sala ug magtuo sa Iyang pangalan, makabaton kita og kapasayloan sa atong mga sala (tan-awa sa Hubad ni Joseph Smith, Mateo 26:24).

Nagsaad ang Ginoo nga kon kita motuman sa atong mga pakigsaad, kita sa kanunay makabaton sa Iyang Espiritu uban kanato. Ang usa ka tawo nga giniyahan sa Espiritu makabaton sa kahibalo, hugot nga pagtuo, gahum, ug pagkamatarung nga maangkon”.

  • Unsa ang atong buhaton aron mahinumdom niini nga mga saad sulod sa semana?

Atong Kinaiya Kon Moambit sa Sakrament

  • Sa unsa nga paagi nga kita makaandam sa atong mga kaugalingon sa pag-ambit sa sakrament? Unsa ang atong mahimong hunahunaon sa panahon sa sakrament aron pagtabang kanato sa paghinumdom sa Pag-ula sa Manluluwas?

Sa dili pa moambit sa sakrament, kita kinahanglan nga mag-andam sa atong mga kaugalingon sa espirituhanong paagi. Ang Ginoo mipasabut og maayo nga kinahanglan walay usa nga moambit sa sakrament nga dili takus. Kana nagpasabut nga kita kinahanglan gayud nga maghinulsol sa atong mga sala sa dili pa moambit sa sakrament. Ang mga kasulatan nag-ingon, “Kon bisan kinsa nga nakalapas, ayaw siya tuguti nga makaambit hangtud siya mohimo og pakig-uli” (D&P 46:4). Ang Ginoo mipahimangno sa Iyang napulog duha ka tinun-ang mga Nephite, “Kamo dili motugot kang bisan kinsa sa pag-ambit sa akong lawas ug dugo nga dili takus, kon kamo mangalagad niini; kay kinsa kadto nga mokaon ug moinom sa akong lawas ug dugo nga dili takus makakaon ug makainom og tunglo sa iyang kalag” (3 Nephi 18:28–29).

Sa panahon sa serbisyo sa sakrament kinahanglan nga atong papahawaon gikan sa atong mga hunahuna ang tanang kalibutanon nga mga hunahuna. Kinahanglan kita nga mobati og pagkamainampuon ug pagkamay balaang pagtahud. Kinahanglan kita nga maghunahuna kalabut sa Pag-ula sa atong Manluluwas ug magmapasalamaton alang niini. Kinahanglan nga atong susihon ang atong mga kinabuhi ug mangita og mga paagi sa pagpauswag niini. Kinahanglan usab kita nga mobag-o sa atong determinasyon sa pagsunod sa mga kasugoan.

Kita dili kinahanglan nga mahingpit sa dili pa moambit sa sakrament, apan kinahanglan nga kita magbaton sa espiritu sa paghinulsol diha sa atong mga kasingkasing. Ang kinaiya diha diin kita moambit sa sakrament nag-impluwensya sa atong kasinatian uban niini. Kon kita moambit sa sakrament uban sa usa ka putli nga kasingkasing, madawat nato ang gisaad nga mga panalangin sa Ginoo.

  • Ngano sa inyong hunahuna nga ang takus nga pag-ambit sa sakrament nagdugang sa atong espirituhanong kalig-on?

Dugang nga mga Kasulatan