Mga Basahon ug mga Leksiyon
Kapitulo 46: Ang Katapusang Paghukom

Kapitulo 46

Ang Katapusang Paghukom

Imahe
Resurrected Christ with arms outstretched stands above a throng of people of all races and times, some prone, some standing. The people on the right side of Christ are in the attitude of worship. The people on the left side of Christ are in anguish. Scenes of ruin are in the foreground and background. The Washington D.C. temple is pictured in the upper left corner.

Mga paghukom sa Dios

  • Unsa ang pipila sa nagkalain-laing mga paghukom nga moabut sa dili pa ang Katapusang Paghukom? Sa unsa nga paagi nga kining tanan nga mga paghukom may kalabutan ngadto sa usag usa?

Kanunany kita nga gisultihan diha sa mga kasulatan nga ang adlaw moabut sa nga kita mobarug sa atubangan sa Dios aron pagahukman. Kinahanglan natong masabtan kon sa unsa nga paagi nga ang paghukom mahitabo aron kita mas makaandam og maayo alang niining importante nga panghitabo.

Ang mga kasulatan nagtudlo nga ang tanan kanato pagahukman sumala sa atong mga binuhatan: “Ug nakita ko ang mga patay, mga dagko ug mga gagmay, nga nanagtindog sa atubangan sa trono, ug dihay mga basahon nga gipamuklad, usab dihay basahon nga gibuklad, nga mao ang basahon sa kinabuhi: Ug ang mga patay gipanaghukman pinasikad sa nahisulat diha sa mga basahon, pinasikad sa ilang mga binuhatan” (Pinadayag 20:12; tan-awa usab sa D&P 76:111; 1 Nephi 15:32; Abraham 3:25–28). Kita pagahukman usab, “sumala sa mga tinguha sa [atong] mga kasingkasing” (D&P 137:9; tan-awa usab sa Alma 41:3).

Dinhi sa yuta kita sa kasagaran gihukman sumala sa atong katakus sa pagdawat sa mga oportunidad diha sulod sa gingharian sa Dios. Sa panahon nga kita gibunyagan gihukman kita nga takus sa pagdawat niini nga ordinansa. Sa panahon nga kita gitawag sa pagserbisyo diha sa Simbahan o gi-interbyu alang sa usa ka pag-uswag sa priesthood o sa usa ka rekomen sa templo, kita gihukman.

Si Alma mitudlo nga sa panahon nga kita mamatay ang atong mga espiritu ibutang ngadto sa usa ka kahimtang sa kalipay o sa kaalautan (tan-awa sa Alma 40:11–15). Kini usa ka paghukom.

Atong mga Pulong, mga Buhat, ug mga Hunahuna Gamiton Aron sa Paghukom Kanato

  • Hunahunaa nga hukman ka sa tanan nimong mga hunahuna, mga pulong, ug mga lihok.

Si propeta Alma mipamatuod, “Ang atong mga pulong mohukom kanato, oo, ang tanan nato nga mga binuhatan mohukom kanato; … ug ang atong mga hunahuna usab mohukom kanato” (Alma 12:14).

Ang Ginoo miingon: “Sa matag pulong nga walay pulos nga ilang ginalitok, sila magahatag unyag husay niana sa adlaw sa paghukom. Kay pinaagi sa imong mga pulong pagamatarungon ikaw, ug pinaagi sa imong pulong pagahukman ka sa silot” (Mateo 12:36–37).

Ang hugot nga pagtuo diha ni Jesukristo nagtabang kanato nga maandam alang sa Katapusang Paghukom. Pinaagi sa matinud-anon nga pagkadisipulo ngadto Kaniya ug paghinulsol sa atong tanan nga mga sala, mapasaylo kita sa atong mga sala ug mahimo nga putli ug balaan aron kita makapuyo diha sa presensya sa Dios. Samtang kita naghinulsol sa atong mga sala, misalikway sa matag dili putli nga hunahuna ug lihok, ang Espiritu Santo mousab sa atong mga kasingkasing busa kita wala nay bisan gani tinguha sa pagpakasala (tan-awa sa Mosiah 5:2). Dayon kon kita pagahukman, makaplagan kita nga andam sa pagsulod ngadto sa presensya sa Dios.

  • Paghunahuna mahitungod sa unsay imong mabuhat aron sa pagpausbaw sa imong mga hunahuna, mga pulong, ug mga lihok.

Kita Pagahukman pinaagi sa mga Rekord

  • Gikan sa unsa nga mga rekord kita pagahukman? Kinsa ang mohukom kanato?

Si Propeta Joseph Smith miingon nga ang mga patay pagahukman gikan sa mga rekord nga gihuptan sa ibabaw sa yuta. Pagahukman usab kita gikan sa “basahon sa kinabuhi” nga gihuptan didto sa langit (tan-awa sa D&P 128:6–8).

“Matag usa kaninyo … kinahanglan gayud moatubang sa hukmanan sa Usa nga Balaan sa Israel … ug unya kinahanglan gayud … pagahukman sumala sa balaan nga paghukom sa Dios.’ (2 Nephi 9:15.) Ug sumala sa panan-awon ni Juan, ‘Ang mga basahon gipamuklad: ug dihay laing basahon nga gibuklad, nga mao ang basahon sa kinabuhi: ug ang mga patay gipanaghukman pinasikad sa nahisulat diha sa mga basahon, pinasikad sa ilang mga binuhatan.’ (Pin. 20:12.) Ang ‘mga basahon’ nga gipamulong nagpasabut sa mga rekord [ sa imong mga binuhatan] nga gihuptan sa ibabaw sa yuta. … Ang basahon sa kinabuhi mao ang rekord nga gihuptan sa langit’ (Doktrina ug mga Pakigsaad 128:7.)” (Mga Pagtulun-an sa mga Presidente sa Simbahan: Harold B. Lee [2000], 226–27).

Adunay lain nga rekord nga pagagamiton sa paghukom kanato. Si Apostol Pablo mitudlo nga kita mismo mao ang mga rekord sa atong kaugalingon nga kinabuhi (tan-awa sa Mga Taga-Roma 2:15). Gitipigan diha sa atong lawas ug hunahuna mao ang usa ka kompleto nga kasaysayan sa tanan natong nabuhat. Si Presidente John Taylor mitudlo niini nga kamatuoran: “[Ang tawo] nagsaysay sa istorya sa iyang kaugalingon, ug nagpamatuod batok sa iyang kaugalingon. … Kana nga rekord nga gisulat sa tawo mismo diha sa mga lapida sa iyang kaugalingon nga hunahuna, kana nga rekord nga dili makapamakak mobutyag niana nga adlaw sa atubangan sa Dios ug sa mga anghel, ug niadtong kinsa molingkod isip mga maghuhukom” (Deseret News, Mar. 8, 1865, 179).

Si Apostol Juan mitudlo nga “ang Amahan dili magahukom kang bisan kinsa , hinonoa ang tanang paghukom gitugyan ngadto sa Anak” (Juan 5:22). Ang Anak, usab, motawag ngadto sa uban sa pagtabang sa Paghukom. Ang Napulog Duha kinsa kauban Kaniya sa Iyang pagpangalagad mohukom sa napulog duha ka mga tribo sa Israel (tan-awa sa Mateo 19:28; Lucas 22:30). Ang napulog duha ka Nephite nga mga disipulo mohukom sa mga Nephite ug Lamanite nga mga katawhan (tan-awa sa 1 Nephi 12:9–10; Mormon 3:18–19).

Pagpanunod og usa ka Dapit sa Gingharian sa Himaya

  • Sa unsa nga paagi nga ang atong pagkamatinud-anon sa panahon sa atong kinabuhi sa yuta mo-impluwensya sa atong kinabuhi sa mga kahangturan?

Sa Katapusang Paghukom makapanunod kita og usa ka dapit sa gingharian diin kita naandam. Ang mga kasulatan nagtudlo kalabut sa tulo ka mga gingharian sa himaya—ang celestial nga gingharian, ang terrestrial nga gingharian ug ang telestial nga gingharian (tan-awa sa D&P 88:20–32).

Sa Doktrina ug mga Pakigsaad 76, gihulagway sa Ginoo ang mga paagi nga mahimo natong pilion nga puy-an sa atong mortal nga mga kinabuhi. Mipasabut Siya nga ang atong mga pagpili mohukom hain nga gingharian kita naandam. Nakat-unan nato gikan niini nga pagpadayag nga bisan ang mga miyembro sa Simbahan makapanunod og lain-laing mga gingharian tungod kay dili sila mahimong managsama sa kamatinud-anon ug kamabinantayon sa ilang pagkamasulundon ni Kristo.

Ang mosunod mao ang mga matang sa kinabuhi nga mahimo natong pilion nga puy-an ug ang mga gingharian nga maangkon sa atong mga pagpili alang kanato.

Celestial

“Sila mao sila kinsa nakadawat sa pagpamatuod ni Jesus, ug mituo sa iyang ngalan ug gibunyagan subay sa paagi sa iyang pagbunyag. … nga pinaagi sa paghupot sa mga sugo sila unta mahugasan ug malimpyohan gikan sa tanan nila nga mga sala, ug makadawat sa Espiritu Santo.” Kini mao sila kinsa nakabuntog sa kalibutan pinaagi sa hugot nga pagtuo. Sila makiangayon ug matarung aron nga ang Espiritu Santo makabugkos sa ilang mga panalangin diha kanila. (Tan-awa sa D&P 76:51–53.) Kadto kinsa napanunod ang labing taas nga ang-ang sa celestial nga gingharian, kinsa nahimo nga mga dios, kinahanglan gayud usab nga naminyo alang sa karon ug sa kahangturan didto sa templo (tan-awa sa D&P 131:1–4). Ang tanan kinsa napanunod ang celestial nga gingharian mopuyo uban sa Langitnong Amahan ug ni Jesukristo hangtud sa kahangturan (tan-awa sa D&P 76:62).

Pinaagi sa buhat nga atong gihimo sa mga templo, ang tanan nga katawhan kinsa nabuhi sa yuta makabaton og managsama nga oportunidad sa pagdawat sa kahingpitan sa ebanghelyo ug sa mga ordinansa sa kaluwasan aron sila makapanunod og usa ka dapit diha sa labing taas nga ang-ang sa celestial nga himaya.

Terrestrial

Kini mao sila kinsa midumili sa ebanghelyo dinhi sa yuta apan pagkahuman midawat niini sa kalibutan sa espiritu. Kini mao ang mga dungganan nga mga tawo dinhi sa yuta kinsa nabutaan ngadto sa ebanghelyo ni Jesukristo pinaagi sa pagkamalimbungon sa mga tawo. Kini mao usab sila kinsa midawat sa ebanghelyo ug sa pagpamatuod ni Jesus apan dili mabinantayon. Sila pagaduawon ni Jesukristo apan dili sa atong Langitnong Amahan. (Tan-awa sa D&P 76:73–79.)

Telestial

Kini nga mga katawhan wala modawat sa ebanghelyo o sa pagpamatuod ni Jesus ni dinhi sa yuta o sa kalibutan sa espiritu. Mag-antus sila tungod sa ilang kaugalingon nga mga sala sa impyerno hangtud human sa Melinyum, sa panahon nga sila banhawon. “Kini mao sila kinsa mga bakakon, ug mga barangan, ug mga mananapaw, ug mga nagbaligya sa dungog, ug kinsa naghigugma ug naghimo og bakak.” Kini nga mga katawhan ingon nga dili maihap sama sa mga bitoon sa langit ug sa balas diha sa kabaybayunan sa dagat. Pagaduawon sila sa Espiritu Santo apan dili sa Amahan ug sa Anak. (Tan-awa sa D&P 76:81–88, 103–6, 109.)

Kawanangan sa Kangitngit

Kini mao sila kinsa adunay pagpamatuod ni Jesus pinaagi sa Espiritu Santo ug nakahibalo sa gahum sa Ginoo apan mitugot ni Satanas sa pagbuntog kanila. Milimud sila sa kamatuoran ug misupak sa gahum sa Ginoo. Walay kapasayloan alang kanila, kay gilimud nila ang Espiritu Santo human makadawat niini. Dili sila makabaton og usa ka gingharian sa himaya. Mopuyo sila sa mahangturon nga kangitngit, kasakit, ug kaalaut uban ni Satanas ug sa iyang mga anghel diha sa kahangturan. (Tan-awa sa D&P 76:28–35, 44–48.)

Kinahanglan Kita Mangandam Karon alang sa Paghukom

  • Unsa ang kinahanglan gayud natong buhaton aron maandam alang sa Katapusan nga Paghukom?

Sa tinuod, matag adlaw usa ka adlaw sa paghukom. Kita nagsulti, naghunahuna, ug naglihok sumala sa celestial, terrestrial, o telestial nga balaod. Ang atong hugot nga pagtuo ni Jesukristo, ingon nga gipakita pinaagi sa atong inadlaw nga mga lihok, naghukom hain nga gingharian ang atong mapanunod.

Aduna kita sa gipahiuli nga ebanghelyo ni Jesukristo diha sa kahingpitan niini. Ang ebanghelyo mao ang balaod sa celestial nga gingharian. Ang tanan nga mga ordinansa sa priesthood nga gikinahanglan sa atong pag-uswag gipadayag na. Nakasulod na kita sa katubigan sa bunyag ug nakahimo og usa ka pakigsaad nga magpuyo og Kristohanon nga mga kinabuhi. Kon kita mga matinud-anon ug nagtuman sa mga pakigsaad nga atong nahimo, ang Ginoo nagsulti kanato unsa ang atong mahimong hukom. Siya moingon ngari kanato, “Umari kamo, o mga dinayeg sa akong Amahan, panunda ninyo ang gingharian nga gitagana alang kaninyo sukad pa sa pagtukod sa kalibutan” (Mateo 25:34).

Dugang nga mga Kasulatan