Kapitulo 33
Misyonaryo nga Buhat
Ang Simbahan sa Ginoo Usa ka Misyonaryo nga Simbahan
-
Sa unsa nga paagi nga ang misyonaryo nga buhat kabahin sa plano sa Dios alang sa Iyang mga anak?
Ang Ginoo mipadayag sa plano sa ebanghelyo ngadto ni Adan: “Ug sa ingon ang Ebanghelyo gisugdan sa pagsangyaw, gikan sa sinugdanan” (Moises 5:58). Sa kaulahian, ang matarung nga mga kaliwat ni Adan gipadala aron sa pagsangyaw sa ebanghelyo: “Sila … mitawag ngadto sa tanan nga mga tawo, bisan diin, sa paghinulsol; ug ang hugot nga pagtuo gitudlo ngadto sa katawhan” (Moises 6:23).
Ang tanan nga mga propeta nahimong mga misyonaryo. Ang matag usa sa iyang panahon gisugo sa pagsangyaw sa mensahe sa ebanghelyo. Bisan kanus-a nga ang priesthood ania ibabaw sa yuta, ang Ginoo nanginahanglan og mga misyonaryo sa pagsangyaw sa mahangturong mga baruganan sa ebanghelyo ngadto sa Iyang mga anak.
Ang Simbahan sa Ginoo sa kanunay usa ka misyonaryo nga simbahan. Sa dihang ang Manluluwas mipuyo dinhi sa yuta, Siya mi-orden og mga Apostoles ug mga Seventy ug mihatag kanila sa awtoridad ug responsibilidad sa pagsangyaw sa ebanghelyo. Kasagaran sa ilang pagsangyaw mao ngadto sa ilang kaugalingon nga mga katawhan, ang mga Judeo (tan-awa sa Mateo 10:5–6). Human si Jesus mabanhaw, Siya mipadala og mga Apostoles sa pagsangyaw sa ebanghelyo ngadto sa mga Hentil. Gimandoan Niya ang mga Apostoles, “Panglakaw kamo sa tibuok kalibutan, ug iwali ninyo ang maayong balita ngadto sa tibuok nga kabuhatan” (Marcos 16:15).
Si Apostol Pablo usa ka gamhanang misyonaryo nga gipadala ngadto sa mga Hentil. Human siya makabig ngadto sa Simbahan, iyang gigahin ang nahibilin sa iyang kinabuhi sa pagsangyaw sa ebanghelyo ngadto kanila. Sa nagkalain-laing mga panahon atol sa iyang misyon siya gibunalan, gibato, ug gibilanggo. Apan siya nagpadayon sa pagsangyaw sa ebanghelyo (tan-awa sa Mga Buhat 23:10–12; 26).
Ang misyonaryo nga buhat nagsugod na usab sa dihang ang Simbahan sa Ginoo gipahiuli pinaagi ni Propeta Joseph Smith. Karon ang mga Apostoles ug ang mga Seventy gihatagan sa labing dako nga responsibilidad sa pagsangyaw sa ebanghelyo ug sa pagtan-aw nga kini gisangyaw sa tibuok kalibutan. Ang Ginoo misulti ni Joseph Smith: “Ipahibalo ang akong ebanghelyo gikan sa yuta ngadto sa yuta, ug gikan sa siyudad ngadto sa siyudad. … Pagpamatuod diha sa matag dapit, ngadto sa matag tawo” (D&P 66:5, 7). Pagka Hunyo 1830, si Samuel Harrison Smith, ang igsoong lalaki sa Propeta, misugod sa unang misyonaryong biyahe alang sa Simbahan.
Sukad niana nga panahon kapin sa usa ka libo ka mga misyonaryo ang gitawag ug gipadala aron sa pagsangyaw sa ebanghelyo. Ang mensahe nga ilang gidala ngadto sa kalibutan mao nga si Jesukristo mao ang Anak sa Dios ug atong Manluluwas. Sila nagpamatuod nga ang ebanghelyo gipahiuli sa yuta pinaagi sa usa ka propeta sa Dios. Ang mga misyonaryo gihatagan sa responsibilidad sa pagsangyaw sa ebanghelyo ngadto sa tanang katawhan, sa pagbunyag kanila ug sa pagtudlo kanila sa pagbuhat sa tanang mga butang nga gisugo sa Ginoo (tan-awa sa Mateo 28:19–20). Ang mga misyonaryo sa Ulahing mga Adlaw molakaw sa ilang kaugalingong gasto ngadto sa tanang bahin sa kalibutan aron sa pagsangyaw sa mensahe sa ebanghelyo.
Ang Ebanghelyo Isangyaw ngadto sa Tibuok Kalibutan
-
Unsa ang pipila ka lain-laing mga paagi nga giandam sa Ginoo alang kanato sa pagpakigbahin sa ebanghelyo?
Gisultihan kita sa ulahing mga adlaw nga pagpadayag nga kinahanglan gayud nga atong dad-on ang gipahiuli nga ebanghelyo ngadto sa matag nasud ug mga katawhan (tan-awa sa D&P 133:37). Ang Ginoo dili gayud mohatag kanato og usa ka sugo nga dili mag-andam og paagi alang kanato nga mabuhat kini (tan-awa sa 1 Nephi 3:7). Ang Ginoo nag-andam og mga paagi alang kanato sa pagtudlo sa ebanghelyo sa mga nasud nga sa makausa sirado diri kanato. Samtang kita magpadayon sa pag-ampo ug sa paggamit sa hugot nga pagtuo, ang Ginoo moabli sa ubang mga nasud ngadto sa misyonaryong buhat.
Ang Ginoo usab “nagdasig sa mga hunahuna sa batid nga mga tawo sa pagmugna og mga imbento nga magpadayon sa buhat sa Ginoo sa mga paagi nga kining kalibutan sukad wala makahibalo” (Russell M. Nelson, “Computerized Scriptures Now Available,” (Ensign, Abr. 1988, 73). Ang mga pamantalaan, mga magasin, telebisyon, radyo, mga satellite, mga computer, ang Internet, ug susama nga teknolohiya nagtabang sa paghatag sa mensahe sa ebanghelyo ngadto sa mga milyon ka mga katawhan. Kita kinsa adunay kahingpitan sa ebanghelyo kinahanglan nga mogamit niini nga mga imbento aron sa pagtuman sa sugo sa Ginoo: “Kay, sa pagkatinuod, ang tingog kinahanglan mogawas gikan niini nga dapit ngadto sa tibuok kalibutan, ug ngadto sa labing hilit nga mga bahin sa kalibutan—ang ebanghelyo kinahanglan gayud nga isangyaw ngadto sa matag [tawo]” (D&P 58:64).
-
Sa unsa nga mga paagi nga ikaw nakakita sa teknolohiya nga gigamit sa epektibong paagi sa pagpakigbahin sa ebanghelyo?
Ang Misyonaryo nga Buhat Importante
-
Ngano nga importante man alang sa matag tawo nga makadungog ug makasabut sa ebanghelyo?
“Kini mao ang atong unang tinguha isip usa ka Simbahan—ang pagluwas ug paghimaya sa mga kalag sa katawhan” (Ezra Taft Benson, sa Conference Report, Abr. 1974, 151; o Ensign, Mayo 1974, 104). Ang misyonaryo nga buhat gikinahanglan aron sa paghatag sa mga tawo sa kalibutan og oportunidad sa pagpaminaw ug sa pagdawat sa ebanghelyo. Nagkinahanglan sila nga makakat-on sa kamatuoran, moduol sa Dios, ug modawat og kapasayloan gikan sa ilang mga sala.
Daghan sa atong mga kaigsoonang lalaki ug mga babaye dinhi sa yuta nga nabutaan sa bakak nga mga pagtulun-an ug “natago sa kamatuoran tungod kay sila wala masayud asa kini pangitaa” (D&P 123:12). Pinaagi sa misyonaryo nga buhat kita makadala kanila sa kamatuoran.
Ang Ginoo misugo, “Paghago kamo sa akong ubasan sa katapusan nga higayon—kay sa katapusan nga higayon nagtawag diha sa mga lumulupyo sa yuta” (D&P 43:28). Samtang kita magtudlo sa ebanghelyo ngadto sa atong kaigsoonang mga lalaki ug mga babaye, kita nag-andam sa dalan alang sa Ikaduhang Pag-anhi sa Manluluwas (tan-awa sa D&P 34:6).
Kitang Tanan Kinahanglan Mahimong mga Misyonaryo
-
Sa unsa nga mga paagi nga kita mahimong aktibo sa pagpangita og mga oportunidad sa pagpakigbahin sa ebanghelyo ngadto sa uban? Sa unsa nga mga paagi nga kita makaandam sa atong mga kaugalingon alang sa ingon nga mga oportunidad?
Matag miyembro sa Simbahan usa ka misyonaryo. Kita kinahanglan nga mahimong misyonaryo bisan kon kita wala gitawag ug gi-set apart sa pormal nga paagi. Kita responsable sa pagtudlo sa ebanghelyo pinaagi sa pulong ug sa buhat ngadto sa tanang mga anak sa atong Langitnong Amahan. Ang Ginoo nagsulti kanato, “Kini angay sa matag tawo kinsa napasidan-an magpasidaan sa iyang silingan” (D&P 88:81). Kita gisultihan pinaagi sa usa ka propeta nga kita kinahanglan nga mopakita sa atong mga silingan nga nahigugma kita kanila sa dili pa kita mopasidaan kanila (tan-awa sa Mga Pagtulun-an sa mga Presidente sa Simbahan: Spencer W. Kimball [2006], 326). Nagkinahanglan sila nga makasinati sa atong pakighigala ug pakigdait.
Ang mga anak nga lalaki ni Mosiah sa andam nga paagi midawat sa responsibilidad sa pagtudlo sa ebanghelyo. Sa dihang sila nakabig ngadto sa Simbahan, ang ilang mga kasingkasing napuno sa kalooy alang sa uban. Buot sila nga mosangyaw sa ebanghelyo ngadto sa ilang mga kaaway nga mga Lamanite, “kay sila dili makatugot nga bisan usa ka kalag sa tawo nga malaglag, oo, gani sa hunahuna nga bisan usa ka kalag mag-antus sa walay katapusan nga kahasol makahimo kanila sa pag-uyog ug pagkurog” (Mosiah 28:3). Samtang ang ebanghelyo nagpuno sa atong mga kinabuhi uban sa kalipay, kita mobati niini nga matang sa gugma ug kalooy alang sa atong mga igsoon nga mga lalaki ug mga babaye. Kita buot nga makigbahin sa mensahe sa ebanghelyo ngadto sa tanan kinsa nagtinguha sa pagpaminaw.
Adunay daghang mga paagi nga kita makahimo sa pagpakigbahin sa ebanghelyo. Ang mosunod mao ang pipila sa mga sugyot:
-
Kita makapakita sa mga higala ug sa uban sa kalipay nga atong nasinati gikan sa pagpuyo sa mga kamatuoran sa ebanghelyo. Niini nga paagi kita mahimong usa ka kahayag ngadto sa kalibutan (tan-awa sa Mateo 5:16).
-
Kita makabuntog sa atong natural nga pagkamaulawon pinaagi sa pagkamahigalaon ngadto sa uban ug sa pagbuhat og mabination nga mga butang alang kanila. Kita makatabang kanila nga makita nga kita kinasingkasing nga nagtinguha kanila ug wala mangita og personal nga kaayohan.
-
Kita makapasabut sa ebanghelyo ngadto sa dili miyembro nga mga higala ug sa uban.
-
Kita makadapit og mga higala kinsa nagtinguha sa pagkat-on og dugang pa mahitungod sa ebanghelyo ngadto sa atong mga panimalay aron pagatudloan sa mga misyonaryo. Kon ang atong dili miyembro nga mga higala nagpuyo og layo kaayo, kita makahangyo nga ang mga misyonaryo diha sa ilang dapit mobisita kanila.
-
Kita makatudlo sa atong mga anak sa importansya sa pagpakigbahin sa ebanghelyo, ug kita makaandam kanila sa espirituhanon ug pinansyal nga paagi sa pag-adto og mga misyon. Makaandam usab kita sa atong mga kaugalingon sa pagserbisyo og full time nga mga misyon sa atong katigulangon.
-
Makabayad kita sa atong ikapulo ug mohatag ngadto sa pundo sa misyonaryo. Kini nga mga donasyon gigamit alang sa pagpauswag sa misyonaryo nga buhat
-
Kita makahatag ngadto sa ward, branch, o sa kinatibuk-ang pundo sa misyonaryo aron sa paghatag og pinansyal nga suporta sa mga misyonaryo kansang mga pamilya dili makasuporta kanila.
-
Kita makahimo og pagsiksik sa family history ug buhat sa templo aron sa pagtabang sa atong mga katigulangan sa pagdawat sa hingpit nga mga panalangin sa ebanghelyo.
-
Kita makadapit og mga dili miyembro sa mga kalihokan sama sa mga family home evening ug mga sosyal, mga komperensya, ug mga miting sa Simbahan.
-
Makahatag kita og mga kopya sa mga magasin sa Simbahan. Kita makahimo usab sa pagpakigbahin sa mga mensahe sa ebanghelyo pinaagi sa paggamit og mga hulagway nga anaa sa opisyal nga mga Internet site sa Simbahan, LDS.org ug Mormon.org.
Ang atong Langitnong Amahan motabang kanato nga mahimong epektibo nga mga misyonaryo kon kita adunay tinguha sa pagpakigbahin sa ebanghelyo ug sa pag-ampo alang sa giya. Motabang siya kanato sa pagpangita og mga paagi sa pagpakigbahin sa ebanghelyo niadtong naglibut kanato.
-
Paghunahuna mahitungod sa mga tawo nga ikaw makahimo sa pagpakigbahin sa ebanghelyo. Paghukom unsaon nimo sa pagbuhat sa ingon. Hunahunaa ang paghimo og usa ka tumong sa pagpakigbahin sa ebanghelyo uban niini nga mga tawo sa usa ka piho nga petsa.
Ang Ginoo Nagsaad Kanato Og mga Panalangin tungod sa Pagbuhat og Misyonaryo nga Buhat
Ang Ginoo misulti ni Propeta Joseph Smith nga ang mga misyonaryo makadawat og dagko nga mga panalangin. Nagsulti ngadto sa mga elder kinsa mipauli gikan sa ilang mga misyon, ang Ginoo miingon, “Kamo mga bulahan, kay ang pagpamatuod nga inyong napamulong gitala diha sa langit alang sa pagtan-aw sa mga anghel; ug sila magmaya diha kaninyo” (D&P 62:3). Nagsulti usab Siya nga kadtong kinsa nagbuhat alang sa kaluwasan sa uban mapasaylo sa ilang mga sala ug magdala og kaluwasan ngadto sa ilang mga kalag (tan-awa sa D&P 4:4; 31:5; 84:61).
Ang Ginoo nagsulti kanato:
“Kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug nagdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!
“Ug karon, kon ang imong hingpit nga kalipay dako tungod sa usa ka kalag nga imong nadala ngari kanako diha sa gingharian sa akong Amahan, unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!” (D&P 18:15–16).
-
Kanus-a ka nakasinati og kalipay sa misyonaryo nga buhat?
Dugang nga mga Kasulatan
-
D&P 1:17–23 (si Joseph Smith gimandoan sa pagsangyaw)
-
D&P 24:12 (ang Ginoo naglig-on niadtong kinsa kanunay naninguha sa pagpahayag sa Iyang ebanghelyo)
-
D&P 38:41 (ipakigbahin ang ebanghelyo sa kaayo ug sa kalumo)
-
D&P 34:4–6; Mga Buhat 5:42 (ang ebanghelyo ipasangyaw)
-
D&P 60:1–2.(ang Ginoo nagpahimangno niadtong kinsa nahadlok nga mosangyaw sa ebanghelyo)
-
D&P 75:2–5 (kadtong kinsa nagpahayag sa ebanghelyo ug nagmatinud-anon pagapanalanginan og kinabuhi nga dayon)
-
D&P 88:81–82 (ang tanan niadtong kinsa napasidan-an kinahanglan nga mopasidaan sa iyang mga silingan)
-
Mateo 24:14 (ang ebanghelyo ipasangyaw sa dili pa moabut ang katapusan)
-
Abraham 2:9–11 (ang ebanghelyo ug priesthood ihatag ngadto sa tanan nga mga kanasuran)