Mga Basahon ug mga Leksiyon
Kapitulo 38: Mahangturon nga Kaminyoon

Kapitulo 38

Mahangturon nga Kaminyoon

Imahe
An African couple on the grounds of the Accra Ghana Temple. Taken in Ghana, West Africa.

Ang Kaminyoon Gi-orden sa Dios

Ang kaminyoon tali sa usa ka lalaki ug sa usa ka babaye usa ka importante kaayo nga bahin sa plano sa Dios. Ang Ginoo miingon, “Kinsa kadto nga nagdili sa pagminyo wala itugot sa Dios, kay ang kaminyoon gi-orden sa Dios ngadto sa tawo” (D&P 49:15). Sukad sa sinugdanan, ang kaminyoon nahimong usa ka balaod sa ebanghelyo. Ang mga kaminyoon gituyo nga molungtad sa kahangturan, dili lamang alang sa atong mortal nga mga kinabuhi.

Si Adan ug si Eva giminyo sa Dios sa wala pa ang bisan unsa nga kamatayon dinhi sa kalibutan. Sila dihay mahangturon nga kaminyoon. Mitudlo sila sa balaod sa mahangturon nga kaminyoon ngadto sa ilang mga anak ug sa mga anak sa ilang mga anak. Samtang ang mga katuigan nanglabay, ang pagkadautan misulod sa mga kasingkasing sa mga katawhan ug ang awtoridad sa pagpahigayon niini nga sagradong ordinansa gikuha gikan sa yuta. Pinaagi sa Pagpahiuli sa ebanghelyo, ang mahangturon nga kaminyoon gipahiuli dinhi sa yuta.

  • Ngano nga importante man kini nga masayran nga ang kaminyoon tali sa usa ka lalaki ug sa usa ka babaye gi-orden sa Dios?

Ang Mahangturon nga Kaminyoon Kinahanglanon alang sa Kahimayaan

  • Unsa ang doktrina sa Ginoo kabahin sa kaminyoon, ug sa unsa nga paagi nga kini lahi gikan sa mga pagtan-aw sa kalibutan?

Daghan sa mga tawo sa kalibutan naghunahuna sa kaminyoon nga usa lamang ka sosyal nga nabatasan, usa ka pinasubay sa balaod nga pakigsabut tali sa usa ka lalaki ug sa usa ka babaye nga mag-ipon og puyo. Apan ngadto sa mga Santos sa Ulahing mga Adlaw, ang kaminyoon mas labaw pa. Ang atong kahimayaan nag-agad diha sa kaminyoon, kuyog sa ubang mga baruganan ug mga ordinansa, sama sa hugot nga pagtuo, paghinulsol, pagbunyag, ug sa pagdawat sa gasa sa Espiritu Santo. Kita nagtuo nga ang kaminyoon mao ang labing sagrado nga pakigrelasyon nga mahimong anaa tali sa usa ka lalaki ug sa usa ka babaye. Kini nga sagradong pakigrelasyon makaapekto sa atong kalipay karon ug sa mga kahangturan.

Ang Langitnong Amahan naghatag kanato sa balaod sa mahangturon nga kaminyoon aron kita mamahimong sama Kaniya. Ang Ginoo nag-ingon:

“Sa celestial nga himaya adunay tulo ka mga langit o mga ang-ang;

Ug aron makabaton sa labing taas, ang tawo kinahanglan mosulod ngadto niini nga kapunongan sa pagkapari [ang gipasabut mao ang bag-o ug walay katapusan nga pakigsaad sa kaminyoon];

“Ug kon dili siya mosulod, siya dili makabaton niini” (D&P 131:1–3).

Ang Mahangturon nga Kaminyoon Kinahanglan Gayud nga Ipahigayon sa Tukma nga Awtoridad didto sa Templo

  • Ngano nga ang kaminyoon kinahanglan man gayud nga ipahigayon sa tukma nga awtoridad didto sa templo aron mahimo nga mahangturon?

Ang mahangturon nga kaminyoon kinahanglan gayud nga ipahigayon pinaagi sa usa ka tawo kinsa naghupot sa gahum sa pagbugkos. Ang Ginoo misaad, “Kon ang tawo mangasawa pinaagi sa … bag-o ug walay katapusan nga pakigsaad … pinaagi kaniya kinsa nadihogan, … ug kon [sila] mosunod sa pakigsaad sa [Ginoo], … kini … may kapuslanan pa kon wala na sila sa kalibutan” (D&P 132:19).

Dili lamang kinahanglan gayud nga ang mahangturon nga kaminyoon ipahigayon pinaagi sa tukma nga awtoridad sa priesthood, apan kini kinahanglan gayud usab nga pagahimoon sa usa sa mga balaan nga templo sa atong Ginoo. Ang templo mao lamang ang dapit nga kining balaan nga ordinansa mahimo nga ipahigayon.

Sa templo, ang mga magtiayon nga Santos sa Ulahing mga Adlaw magluhod sa usa sa sagrado nga mga altar diha sa atubangan sa ilang pamilya ug mga higala kinsa nakadawat sa ilang endowment sa templo. Mohimo sila sa ilang mga pakigsaad sa kaminyoon sa atubangan sa Dios. Sila ipahayag nga bana ug asawa alang sa karon ug sa tanan nga kahangturan. Gihimo kini pinaagi sa usa ka tawo kinsa naghupot sa balaan nga priesthood sa Dios ug nahatagan sa awtoridad sa pagpahigayon niini nga sagrado nga ordinansa. Siya mohimo ubos sa giya sa Ginoo ug mosaad sa magtiayon sa mga panalangin sa kahimayaan. Siya motudlo kanila sa mga butang nga kinahanglan gayud nilang buhaton aron madawat kini nga mga panalangin. Mopahinumdom siya kanila nga ang tanan nga mga panalangin nag-agad sa pagkamasulundon ngadto sa mga balaod sa Dios.

Kon kita naminyo pinaagi sa bisan unsa nga awtoridad gawas pinaagi sa priesthood diha sa usa ka templo, ang kaminyoon alang lamang niini nga kinabuhi. Human sa kamatayon, ang magkapares sa kaminyoon dili makaangkon sa usag usa o sa ilang mga anak. Ang mahangturon nga kaminyoon naghatag kanato og oportunidad sa pagpadayon isip mga pamilya human niini nga kinabuhi.

Mga Kaayohan sa usa ka Mahangturon nga Kaminyoon

  • Unsa ang mga panalangin sa usa ka mahangturon nga kaminyoon dinhi niini nga kinabuhi ug sa kahangturan?

Isip mga Santos sa Ulahing mga Adlaw, kita nagpuyo uban sa usa ka mahangturon nga panglantaw, dili lamang alang sa tipik sa panahon. Bisan pa niana, makadawat kita og mga panalangin dinhi niini nga kinabuhi agi og resulta sa pagminyo alang sa kahangturan. Pipila sa mga panalangin mao ang mosunod:

  1. Makahibalo kita nga ang atong kaminyoon mohangtud sa kahangturan. Makabulag kanato ang kamatayon gikan sa usag usa sa makadiyut lamang. Walay makabulag kanato sa kahangturan gawas sa atong kaugalingon nga pagkamasinupakon. Kini nga kahibalo nagtabang kanato sa pagpaningkamot og maayo aron makabaton og malipayon, malampuson nga kaminyoon.

  2. Nasayud kita nga ang atong mga pakigrelasyon sa pamilya makapadayon ngadto sa tanang kahangturan. Kini nga kahibalo nagtabang kanato nga magmatngon sa pagtudlo ug pagbansay sa atong mga bata. Kini usab nagtabang kanato sa pagpakita kanila og labaw ka dako nga pailub ug gugma. Isip resulta, kita makabaton gayud og mas malipayon nga panimalay.

  3. Tungod kay kita naminyo sa gi-orden nga paagi sa Ginoo, kita adunay katungod sa pagbu-bu sa Espiritu sa atong kaminyoon samtang magpabilin kita nga takus.

Ang pipila sa mga panalangin nga atong matagamtaman sa kahangturan mao ang mosunod:

  1. Makapuyo kita sa labing taas nga ang-ang sa celestial nga gingharian sa Dios.

  2. Kita mahimaya ingon nga ang Dios nahimaya ug makadawat og kahingpitan sa hingpit nga kalipay.

  • Sa unsa nga paagi nga ang mahangturong panglantaw mo-impluwensya sa paagi sa atong pagbati mahitungod sa kaminyoon ug sa mga pamilya?

Kita Kinahanglan Gayud nga Mangandam alang sa Mahangturon nga Kaminyoon

  • Unsa ang atong mabuhat sa pagtabang sa mga kabatan-onan sa pagpangandam alang sa mahangturon nga kaminyoon?

Si Presidente Spencer W. Kimball mitudlo: “Ang kaminyoon malagmit mao ang pinakamahinungdanon sa tanan natong mga desisyon ug dunay dako kaayo nga mga epekto, kay dili lamang kini maghatag og daklit nga kalipay, kon dili ingon man usab sa walay katapusang kalipay. Makaapekto kini dili lamang sa duha ka tawo nga natungdan, kon dili ingon man usab sa ilang mga pamilya ug labi na sa ilang mga anak ug sa mga anak sa ilang mga anak hangtud na sa daghang mga henerasyon. Sa pagpili og kauban sa kinabuhi ug sa kahangturan, dayag na lang nga ang pinakamaayo nga pagplano ug paghunahuna ug pag-ampo ug pagpuasa kinahanglan buhaton aron pagsiguro nga sa tanang mga desisyon, kini ang dili gayud mahimong masayop” (Mga Pagtulun-an sa mga Presidente sa Simbahan: Spencer W. Kimball [2006], 242).

Ang mahangturon nga kaminyoon kinahanglan nga mao ang tumong sa matag Santos sa Ulahing mga Adlaw. Kini alang usab bisan niadto nga naminyo pinaagi sa sibil nga balaod. Sa pag-andam alang sa mahangturon nga kaminyoon nagkinahanglan og daghan nga paghunahuna ug pag-ampo. Ang mga sakop lamang sa Simbahan kinsa nagpuyo sa matarung nga paagi ang gitugutan sa pagsulod sa templo (tan-awa sa D&P 97:15–17). Kita dili kalit nga modesisyon usa ka adlaw nga kita buot nga maminyo sa templo, dayon mosulod sa templo nianang adlawa ug magminyo. Kinahanglan una gayud natong buhaton ang piho nga mga gikinahanglan.

Sa dili pa kita makaadto sa templo, kinahanglan gayud kita nga mahimong aktibo, takus nga mga miyembro sa Simbahan sulod sa labing minus usa ka tuig. Ang mga lalaki kinahanglan gayud nga maghupot sa Melchizedek Priesthood. Kinahanglan gayud nga kita na-interbyu pinaagi sa branch president o sa bishop. Kon kita nakita niya nga takus, mohatag siya kanato og usa ka rekomen sa templo. Kon kita dili takus, siya motambag kanato ug motabang kanato sa paghimo og mga tumong aron mamahimong takus sa pag-adto sa templo.

Human kita makadawat og rekomen gikan sa atong bishop o branch president, kinahanglan kita nga ma-interbyu pinaagi sa stake president o sa mission president. Pangutan-on kita og mga pangutana sama sa mosunod nga mga interbyu alang sa usa ka rekomen sa templo.

  1. Aduna ka bay hugot nga pagtuo ug usa ka pagpamatuod sa Dios, ang Amahan sa Kahangturan, sa Iyang Anak, nga si Jesukristo, ug sa Espiritu Santo? Aduna ka bay lig-on nga pagpamatuod sa gipahiuli nga ebanghelyo?

  2. Mopaluyo ka ba sa Presidente sa Ang Simbahan ni Jesukristo sa mga Santos sa Ulahing mga Adlaw isip propeta, manalagna, ug tigpadayag? Moila ka ba kaniya isip bugtong nga tawo sa yuta nga gihatagan og awtoridad sa paggamit sa tanan nga mga yawe sa priesthood?

  3. Ikaw ba nagtuman sa balaod sa kaputli?

  4. Ikaw ba hingpit nga tigbayad sa ikapulo?

  5. Ikaw ba nagtuman sa Pulong sa Kaalam?

  6. Ikaw ba matinuoron sa imong pakigsabut sa uban?

  7. Ikaw ba naninguha sa pagtuman sa mga pakigsaad nga imong gihimo, sa pagtambong sa imong mga miting sa sakrament ug sa priesthood, ug sa paghupot sa imong kinabuhi nga nahiuyon sa mga balaod ug mga kasugoan sa ebanghelyo?

Kon ikaw mangayo og rekomen sa templo, kinahanglan nga imong hinumduman nga ang pagsulod sa templo usa ka sagrado nga pribilehiyo. Kini usa ka ligdong nga buhat, dili usa ka butang nga dili hatagan og pagtagad.

Kinahanglan gayud nga kita maningkamot sa dakong kakugi sa pagsunod sa matag pakigsaad nga atong gihimo didto sa templo. Miingon ang Ginoo nga kon kita tinuod og matinud-anon, kita mosulod ngadto sa atong kahimayaan. Mahimo kitang sama sa atong Langitnong Amahan. (Tan-awa sa D&P 132:19–20 .) Ang kaminyoon sa templo takus sa bisan unsa nga sakripisyo. Kini usa ka paagi sa pagbaton og mahangturon nga mga panalangin nga dili masukod.

  • Unsa ang atong mabuhat sa pag-awhag sa mga batan-on sa paghimo og usa ka tumong sa pagminyo sa templo? Sa unsa nga paagi nga kita makatabang kanila sa pagpangandam alang niini?

Dugang nga mga Kasulatan