“Ang Perlas nga Labing Bililhon,” Mga Istorya sa Doktrina ug mga Pakigsaad (2024)
“Ang Perlas nga Labing Bililhon,” Mga Istorya sa Doktrina ug mga Pakigsaad
Hulyo 1835–Marso 1842
Ang Perlas nga Labing Bililhon
Dugang pa nga kasulatan gikan sa Ginoo
Usa ka adlaw, usa ka tawo miabot sa Kirtland nga dunay mga mummy gikan sa Ehipto. Kauban sa mga mummy mao ang pipila ka mga linukot, o karaan na kaayong linukot nga papel. Ang mga linukot dunay mga sinulat nga Ehiptohanon niini. Ang tawo mipakita niini ngadto ni Propeta Joseph Smith. Si Joseph nainteresado kaayo sa mga sinulat.
Mga Santos, 1:249–50
Ang pipila sa mga higala mitabang ni Joseph nga mapalit ang mga mummy ug ang mga linukot. Samtang gitun-an ni Joseph ang mga sinulat, ang Ginoo mipadayag ngadto kaniya sa karaang mga sinulat nga gikan ni Abraham, usa ka propeta sa Biblia. Uban sa tabang sa mga higala sama ni Oliver Cowdery, gisulat ni Joseph kon unsa ang gitudlo sa Ginoo kaniya mahitungod sa mga pagtulun-an ni Abraham.
Mga Santos, 1:250–51
Si Abraham nakakita og panan-awon sa atong kinabuhi uban sa Langitnong Amahan sa wala pa kita matawo. Iyang nakita nga si Jesus gipili nga mahimong atong Manluluwas. Nakakat-on usab si Abraham mahitungod sa paglalang sa kalibotan. Ang mga Santos naghinam-hinam nga makabaton niini nga mga pagtulun-an gikan ni Abraham. Nalipay sila nga gusto sa Ginoo nga tudloan pa sila.
Abraham 2:6–11; 3–5; Mga Santos, 1:251
Ang mga sinulat ni Abraham nahimong kabahin sa basahon sa kasulatan nga gitawag og Ang Perlas nga Labing Bililhon. Kini usab nga basahon adunay sinulat gikan ni Moises, laing propeta sa Biblia. Kini nagtudlo og mga kamatuoran nga wala sa Biblia. Gusto sa Ginoo nga ang mga tawo masayod niini nga mga kamatuoran, busa Iya kining gipakigbahin ngadto ni Joseph Smith.
Ang Perlas nga Labing Bililhon aduna usab sa pagpamatuod ni Joseph Smith ug sa 13 ka mga Artikulo sa Hugot nga Pagtuo. Si Joseph Smith misulat niini nga mga butang aron sultihan ang kalibotan kon unsa ang gituohan sa mga Santos sa Ulahing Adlaw. Ang Perlas nga Labing Bililhon usa ka gamay nga basahon, sama sa perlas nga gamay, apan bililhon kaayo kini.