Ang Pulong sa Kaalam

Ang balaod sa Ginoo kabahin sa kahimsog

Usa ka miting sa Eskwelahan sa mga Propeta.

Gidapit ni Joseph Smith ang pipila ka lalaki sa Simbahan aron magmiting uban niya diha sa ibabaw nga andana sa tindahan ni Newel ug Ann Whitney. Didto nagkat-on sila sa ebanghelyo ug ubang mga hilisgotan, ug nag-ampo sila isip usa ka grupo. Gitawag nila kini nga mga miting og ang Eskwelahan sa mga Propeta.

Doktrina ug mga Pakigsaad 88:117–137; Mga Santos, 1:189

Si Emma Smith nanglimpyo human sa miting.

Kadaghanan sa mga lalaki manabako ug mag-usap og tabako atol sa mga leksiyon. Ang aso nakahimo sa hangin nga gabonon, ug ang linuwa nga tabako nakahugaw sa salog. Human sa mga miting, mosaka si Emma Smith aron manglimpyo sa lawak. Hugaw kaayo kini!

Mga Santos, 1:190

Mangnusnos si Emma sa salog, apan ang mga lama sa tabako dili makuha. Nakig-istorya siya ni Joseph mahitungod sa kahugaw.

Mga Santos, 1:190

Gipaminaw ni Joseph si Emma. Ang pagkadungog niya nakapahunahuna niya kon unsa ang gibati sa Ginoo mahitungod sa tabako.

Mga Santos, 1:190

Busa nangutana si Joseph sa Ginoo mahitungod sa tabako. Ang Ginoo misulti ni Joseph nga iyang ihatag ang Pulong sa Kaalam alang sa mga Santos.

Doktrina ug mga Pakigsaad 89:1–9; Mga Santos, 1:191

Si Joseph ug Emma nag-istorya kabahin sa pagpadayag nga iyang nadawat.

Ang Ginoo miingon nga ang mga Santos kinahanglang dili manigarilyo, mogamit og tabako, o moinom og alkohol o “init nga mga ilimnon,” nga gipasabot ang kape ug tsaa.

Doktrina ug mga Pakigsaad 89:1–9; Mga Santos, 1:191

Si Joseph ug Emma mipakigbahin og pagkaon ngadto sa uban.

Gitudlo usab sa Ginoo sa mga Santos nga ang lugas ug mga prutas maayo nga kaonon. Miingon usab Siya nga mahimo silang mokaon og ginagmay lang sa karne.

Doktrina ug mga Pakigsaad 89:10–17; Mga Santos, 1:191

Si Joseph mipakigbahin sa Pulong sa Kaalam ngadto sa Eskwelahan sa mga Propeta.

Ang Ginoo misulti ni Joseph nga ang mga Santos kinsa mopili nga mosunod sa Iyang Pulong sa Kaalam maprotektahan. Ang Ginoo misaad nga panalanginan sila og kahimsog, kahibalo, ug kalig-on. Gisultihan ni Joseph ang mga lalaki sa Eskwelahan sa mga Propeta mahitungod sa Pulong sa Kaalam sa Ginoo.

Doktrina ug mga Pakigsaad 89:18–21; Mga Santos, 1:192

Giitsa sa mga lalaki ang ilang mga tabako ug mga hunsoy ngadto sa kalayo.

Ang mga lalaki sa lawak miitsa sa ilang mga tabako ug sa ilang mga hunsoy ngadto sa kalayo sa pagpakita nga gusto nilang mosunod sa Pulong sa Kaalam sa Ginoo.

Mga Santos, 1:192