1840–1842

Pagtukod sa Nauvoo

Ang mga plano sa Ginoo sa matahom nga siyudad

Gisultihan sa Ginoo ang mga Santos nga magpundok sa bag-ong dapit. Duol kadto sa dakong suba nga gitawag og Mississippi. Basa ang yuta ug lapokon. Para sa ubang tawo, murag dili kadto maayong dapit nga tukoran og siyudad. Apan nasayod ang Propeta Joseph Smith nga pinaagi sa tabang sa Ginoo, ila kining mahimo nga matahom.

Doktrina ug mga Pakigsaad 124:25; Mga Santos, 1:477

Ang mga Santos nagsugod sa pagtrabaho og maayo aron mahimo kini nga maayong dapit nga kapuy-an. Si Propeta Joseph mitawag sa lungsod nga Nauvoo, nga nagpasabot nga “matahom nga dapit.”

Mga Santos, 1:477

Gisultihan sa Ginoo ang mga Santos nga magtukod og balay sa Nauvoo diin ang mga tigbiyahe makaadto ug makapahulay. Gusto niya nga ang Nauvoo mahimong usa ka dapit diin ang tanan mobati nga gihangop.

Doktrina ug mga Pakigsaad 124:22–24, 60; Mga Santos, 1:486

Ang Ginoo misulti ni Propeta Joseph nga Siya adunay dakong mga plano alang sa Nauvoo. Gusto niya nga ang Iyang mga Santos magpundok dinhi aron makatukod sila og templo. Gusto niya nga motrabaho sila og maayo kutob sa mahimo aron itukod ang Iyang balay. Ang mga Santos nagsugod dayon sa pagtrabaho.

Doktrina ug mga Pakigsaad 124:25–28, 44, 55; Mga Santos, 1:479–80, 485–87

Gusto sa Ginoo nga ang mga Santos magtukod og templo kay Siya adunay dagkong mga panalangin nga ihatag kanila. Sa sulod sa templo, mohimo sila og mga pakigsaad, o espesyal nga mga saad, uban sa Ginoo. Makakat-on usab sila mahitungod sa plano sa Langitnong Amahan sa kalipay alang sa tanan Niyang mga anak.

Doktrina ug mga Pakigsaad 124:29–41; Mga Santos, 1:516–18

Ang mga Santos mitrabaho og maayo sa pagtukod og templo, sama sa gisugo sa Ginoo. Dugay kadto nga nahuman, apan mahinamon sila mahitungod sa panahon nga makakat-on mahitungod sa espesyal nga mga saad sa Ginoo alang kanila diha sa Iyang templo.

Mga Santos, 1:516–18