Abril–Hunyo 1836

Misyon ni Parley sa Canada

Pagpakita og hugot nga pagtuo diha sa mga saad sa Ginoo

Wa madugay human sa pagpahinungod sa Kirtland Temple, daghang lider sa Simbahan miadto og mga misyon aron sa pagsangyaw sa ebanghelyo.

Doktrina ug mga Pakigsaad 88:81; 109:22–23; 112:28–29; Mga Santos, 1:279

Si Parley Pratt ganahan nga mopakigbahin sa ebanghelyo. Apan naghunahuna siya nga magpabilin sa balay tungod kay ang iyang asawa, ginganlan og Thankful, nasakit. Sila usab walay daghang kwarta.

Mga Santos, 1:279

Si Heber Kimball, higala ni Parley ug usa sa Apostoles, miabot sa pagbisita. Gipanalangin niya si Parley ug miingon nga kinahanglan niyang isangyaw ang ebanghelyo sa Canada. Sa panalangin, si Heber misaad nga si Thankful mamaayo. Siya misaad nga siya makabaton og anak nga lalaki ug ang Ginoo motabang ni Parley nga makapangita og kwarta nga iyang gikinahanglan.

Mga Santos, 1:279–80

Si Thankful ug Parley naminyo sulod sa 10 ka tuig. Wala silay mga anak. Apan duna silay hugot nga pagtuo sa mga saad sa Ginoo. Bisan lisod ang mahilayo kang Thankful sa Canada, mibiya si Parley aron mopakigbahin sa ebanghelyo.

Mga Santos, 1:280

Sa Canada, si Parley nangita og mga dapit diin siya makatudlo sa mga tawo. Nangutana siya kon pwede ba siyang makatudlo sa mga simbahan ug sa ubang mga bilding. Ang tanan miingon og dili.

Mga Santos, 1:284–85

Dayon gihimamat ni Parley si John ug Leonora Taylor. Gimahal nila si Jesukristo ug ang Biblia. Nangutana si John kang Parley kon katong iyang gitudlo lahi ba sa Biblia.

Mga Santos, 1:284–85

Miingon si Parley nga iyang gitudlo ang mahitungod ni Jesus, mga propeta, bunyag, ug ang Espiritu Santo. Kadtong tanan anaa sa Biblia. Nangutana si John, “Unsa man ang mahitungod ni Joseph Smith ug ang Basahon ni Mormon?” Gisultihan ni Parley si John nga nasayod siya nga ang Basahon ni Mormon tinuod, sama sa Biblia, ug si Joseph Smith usa ka propeta sa Dios.

Mga Santos, 1:285

Si John mituo sa unsay gisulti ni Parley. Iyang gibasa ang Basahon ni Mormon ug nasayod nga kini tinuod. Si John ug Leonora midapit sa ilang mga higala nga si Joseph, Mercy, ug Mary Fielding ug uban nga moadto aron maminaw sa gitudlo ni Parley. Daghang tawo ang nabunyagan ug mipasakop sa Simbahan.

Mga Santos, 1:286–87

Malipayon si Parley, apan gustong mopauli ngadto ni Thankful sa Kirtland. Nanamilit siya sa iyang bag-ong mga higala sa Canada. Samtang iyang gilamano ang ilang mga kamot, mihatag sila og kwarta aron matabangan siya sa pag-atiman sa iyang pamilya.

Mga Santos, 1:287–88

Sa dihang si Parley mipauli, iyang nakita nga si Thankful miarang-arang na ang pamati. Si Parley nakakuha og daghang kopya sa Basahon ni Mormon ug mibalik sa Canada aron magpadayon sa pagpakigbahin sa ebanghelyo. Niining higayona, miuban si Thankful niya.

Mga Santos, 1:288

Sa wala madugay si Thankful ug Parley nakahibalo nga sila makabaton og anak. Nahinumdom sila sa panalangin nga gihatag ni Heber ngadto ni Parley. Gibati nila nga ang tanan nga gisaad sa Ginoo niana nga panalangin natinuod.

Mga Santos, 1:288