Mga Kasamok sa Missouri

Pagpalig-on sa pagtuo sa makuyaw nga mga panahon

Ang pipila ka tawo sa Independence nasuko sa pag-abot sa mga Santos.

Daghang Santos ang miabot aron mopuyo sa Independence, Missouri. Gusto sa Ginoo nga ilang tukoron ang siyudad sa Zion didto. Apan ang mga Santos ug ang mga tawo nga nagpuyo na sa Independence wala magkauyon. Wala sila magkauyon bahin sa daghang mga butang. Ang ubang mga tawo sa lungsod nasuko ug gustong papahawaon ang mga Santos.

Doktrina ug mga Pakigsaad 57:1–3; Mga Santos, 1:195–200

Ang mga lider sa Independence nakigkita kang Edward Partridge.

Si Edward Partridge mao ang bishop sa Independence. Miadto siya aron makigkita sa mga lider sa lungsod. Sila miingon nga ang mga Santos kinahanglang mobiya sa Independence. Si Bishop Partridge nasayod nga gusto sa Dios nga ang mga Santos motukod og Zion sa Independence. Miingon siya nga ang mga Santos dili mobiya.

Mga Santos, 1:201

Ang masuk-anong mga lalaki miguba sa mga panimalay ug mga bilding.

Ang masuk-anong mga lalaki misugod sa pagguba sa mga panimalay ug mga bilding nga gitukod sa mga Santos.

Mga Santos, 1:202–203, 206

Gikuptan sa mga lalaki si Edward Partridge ug Charles Allen.

Ang mga lalaki midakop ni Bishop Partridge ug laing lalaki nga ginganlan og Charles Allen gikan sa ilang mga panimalay. Giguyod nila ang duha ka lalaki paingon sa tunga sa lungsod.

Mga Santos, 1:204

Si Edward ug Charles napuno sa alkitran ug mga balahibo.

Si Bishop Partridge miingon, “Kon gikinahanglang mag-antus ko alang sa akong relihiyon, dili kana makalabaw sa nabuhat sa uban nga nag-una kanako.” Giduot sa mga lalaki si Bishop Partridge ug Charles sa yuta. Gibutangan nila og init nga alkitran ug mga balahibo ang ilang tibuok lawas.

Mga Santos, 1:205–206

Si William McLellin mitago sa kakahoyan.

Si William McLellin, usa ka miyembro sa Simbahan sa Independence, nakadungog kabahin sa unsay gibuhat sa masuk-anon nga mga tawo. Nahadlok siya ug midagan ngadto sa kakahoyan aron motago.

Mga Santos, 1:207

Si William naghunahuna kon unsay iyang buhaton kon madakpan siya.

Naghunahuna si William kon unsay mahitabo kon makit-an siya sa masuk-anong mga lalaki. Moingon pa ba gihapon siya nga ang Basahon ni Mormon tinuod, bisan kon patyon siya tungod niini?

Mga Santos, 1:207–208

Si Oliver Cowdery ug David Whitmer nangita ni William.

Ang mga higala ni William nga sila si Oliver Cowdery ug David Whitmer nakakita niya sa kakahoyan. Nasayod si William nga si Oliver ug David mituo sa Basahon ni Mormon. Ang anghel mipakita kanila sa bulawang mga palid. “Sultihi ko,” nangutana si William kanila, “tinuod ba kanang Basahon ni Mormon?”

Mga Santos, 1:208

Si Oliver ug David mipakigbahin sa ilang pagpamatuod ngadto ni William.

Gisultihan ni Oliver ug David si William nga ang Basahon ni Mormon tinuod. Miingon sila nga bisan kon ang masuk-anong mga lalaki mosulay sa pagpatay kanila, dili gayod sila mohunong sa pagpakigbahin sa ilang pagpamatuod sa mga tawo. “Motuo ko ninyo,” miingon si William.

Doktrina ug mga Pakigsaad 17:3–6; Mga Santos, 1:209