Disyembre 1830–Agosto 1831

Ang mga Knight ug Uban pa Magpundok ngadto sa Zion

Pagsunod sa tawag sa Ginoo

Si Polly ug Joseph Knight nagpuyo uban ang ilang pamilya sa New York. Nakaila kaayo sila ni Propeta Joseph. Human makat-on sa ebanghelyo, mipili sila nga mopasakop sa Simbahan. Dihang ang Ginoo mihangyo sa mga Santos nga mobalhin ngadto sa Ohio, ang mga Knight misunod.

Doktrina ug mga Pakigsaad 37; Mga Santos, 1:35, 106, 123–124

Ang mga Knight malipayon dihang nakaabot sila sa Ohio. Si Leman Copley, usa ka miyembro sa Simbahan, miingon nga ang ubang mga Santos mahimong mopuyo sa iyang yuta. Adunay igong luna didto nga katamnan og mga lagutmon ug katukoran og mga balay. Si Joseph Knight ug iyang mga anak nga lalaki nagtrabaho og maayo aron maandam ang umahan alang sa pagpananom.

Mga Santos, 1:144–45

Apan usa ka adlaw, nausab ang hunahuna ni Leman mahitungod sa iyang yuta. Dili na siya gusto nga ang mga Santos mopuyo didto. Gisultihan niya ang mga Knight ug ang tanan nga mobiya.

Mga Santos, 1:145

Ang mga Santos nabalaka pag-ayo. Karon sila wala nay kapuy-an. Nangutana sila ni Propeta Joseph kon unsa ang ilang buhaton.

Doktrina ug mga Pakigsaad 54; Mga Santos, 1:145

Ang Ginoo miingon nga kini nga mga Santos kinahanglang moadto sa Missouri ug magtukod og Zion. Ang Zion mahimong usa ka siyudad diin ang katawhan sa Ginoo magpundok. Sa Zion, magtukod sila og templo diin mohimo sila og mga pakigsaad, o mga saad uban sa Dios. Siya mopanalangin kanila kon sila motuman niini nga mga pakigsaad. Ang mga Knight mahinamon nga moadto.

Doktrina ug mga Pakigsaad 29:1–8; 42:30–36; 45:59–66; 54:6–9; 57:1–2; Mga Santos, 1:146

Samtang nagbiyahe ang mga Knight ngadto sa Missouri, si Polly nasakit pag-ayo. Ang iyang bana, si Joseph, ug iyang mga anak nga lalaki nabalaka nga siya dili na mabuhi og dugay. Apan gisultihan ni Polly ang iyang pamilya nga gusto niyang makaabot sa Zion sa dili pa siya mamatay. Gusto niya kini kaysa bisan unsang butang!

Mga Santos, 1:146

Human sa taas nga biyahe, ang mga Knight nakaabot sa Missouri. Mapasalamaton kaayo si Polly sa Ginoo nga buhi pa siya aron makita kini. Ang mga Knight naghunahuna nga ang yuta matahom. Aduna silay pagtuo nga sila makatuman sa sugo sa Ginoo sa pagtukod og Zion didto.

Mga Santos, 1:150

Ang mga Santos nag-ampo og usa ka espesyal nga pag-ampo ug mitawag sa yuta nga Zion, diin ang katawhan sa Ginoo mag-abot. Si Propeta Joseph mibutang og bato nga timaan kon asa unya ang kanto sa templo. Pipila ka adlaw ang milabay, namatay si Polly. Ang Ginoo misaad nga ang mga Santos nga moadto sa Zion ug mamatay makapahulay sa langit.

Doktrina ug mga Pakigsaad 59:1–2; Mga Santos, 1:150–51