Sidney ug Phebe Rigdon

Pag-usab sa ilang kinabuhi aron modawat sa ebanghelyo

Si Parley Pratt nga nagsugyot ngadto sa iyang kompanyon nga ilang bisitahon ang iyang higala nga si Sidney.

Si Parley Pratt ug ang uban moadto sa pagpakigbahin sa ebanghelyo ngadto sa Lumad nga mga Amerikano. Sa ilang pagpaingon, si Parley gustong mohunong ug mobisita sa iyang higala nga si Sidney Rigdon. Si Sidney usa ka tigsangyaw nga mitudlo ni Parley mahitungod ni Jesukristo pinaagi sa Biblia. Karon gusto ni Parley nga tudloan si Sidney mahitungod ni Jesus pinaagi sa Basahon ni Mormon.

Doktrina ug mga Pakigsaad 32; Mga Santos, 1:113

Si Parley nga nagpakigbahin sa Basahon ni Mormon ngadto ni Sidney Rigdon.

Gisultihan ni Parley si Sidney mahitungod sa Basahon ni Mormon ug midapit kaniya sa pagbasa niini. Wala makaseguro si Sidney, apan tungod kay si Parley usa ka higala, misaad siya nga iyang basahon.

Mga Santos, 1:114

Si Sidney nga nagbasa sa Basahon ni Mormon ug nagpakigbahin niini ngadto sa iyang asawa.

Sa dihang gibasa ni Sidney ang Basahon ni Mormon, nasayod siya nga gikan kini sa Dios. Iyang gipakigbahin ang iyang mga pagbati ngadto sa iyang asawa, nga si Phebe.

Mga Santos, 1:115

Nakig-istorya si Sidney sa iyang pamilya.

Apan wala makaseguro si Sidney unsay iyang sunod nga buhaton. Kon mabunyagan siya, mawad-an siya sa iyang trabaho isip usa ka pastor sa iyang simbahan. Unsaon niya sa pag-atiman ni Phebe ug sa ilang unom ka anak? Unsay bation sa mga tawo sa iyang simbahan? Nag-ampo siya sa Langitnong Amahan alang sa panabang, ug nakaangkon siya og malinawon nga pagbati.

Mga Santos, 1:115; Doktrina ug mga Pakigsaad 19:23

Si Phebe Rigdon nga nagsulti kang Sidney nga andam siyang moapil sa Simbahan.

Gipangutana ni Sidney si Phebe kon andam ba siya nga mobiya sa ilang komportable nga kinabuhi ug mopasakop niining bag-o nga simbahan uban kaniya. “Akong tinguha nga buhaton ang kabubut-on sa Dios” miingon siya, “mabuhi man ko o mamatay.” Ilang gipili ang magpabunyag.

Mga Santos, 1:115

Si Sidney nga nakigkita ni Joseph Smith.

Unya, nahimamat ni Sidney ang Propeta nga si Joseph Smith. Ang Ginoo mihatag og mensahe ni Sidney pinaagi ni Joseph. Miingon siya nga nakita Niya ang maayong mga butang nga nahimo si Sidney ug nakadungog sa iyang mga pag-ampo. Giingnan sa Ginoo si Sidney nga Siya adunay mahinungdanong buluhaton alang kaniya. Si Sidney mohimo og mahinungdanong mga butang.

Doktrina ug mga Pakigsaad 35:3–4