“Sila si Joseph ug si Oliver Nakadawat sa mga Yawe sa Pagkapari,” Mga Istorya sa Doktrina ug mga Pakigsaad (2024)
“Sila si Joseph ug si Oliver Nakadawat sa mga Yawe sa Pagkapari,” Mga Istorya sa Doktrina ug mga Pakigsaad
Abril 1836
Si Joseph ug si Oliver Nakadawat og mga Yawe sa Pagkapari
Si Jesukristo ug ang mga anghel mibisita sa Kirtland Temple
Usa ka semana human sa pagpahinungod sa Kirtland Temple, usa ka libo ka mga Santos miabot sa templo aron sa pagsimba sa Manluluwas. Pasko kadto sa Pagkabanhaw. Si Joseph Smith, si Oliver Cowdery, ug ang Napulog Duha ka Apostoles mihatag sa sakramento ngadto sa mga Santos.
Doktrina ug mga Pakigsaad 110, ulohan sa seksiyon; Mga Santos, 1:271
Human sa sakramento, si Joseph ug si Oliver nakakaplag og hilom nga dapit sa templo, likod sa kurtina, aron sa pag-ampo.
Doktrina ug mga Pakigsaad 110, ulohan sa seksiyon; Mga Santos, 1:271
Sa dihang nahuman sila sa pag-ampo, mihangad sila. Si Jesukristo mipakita sa ilang atubangan! Siya nasayod ang mga Santos nagtrabaho og maayo sa pagtukod sa templo. “Ako midawat niini nga balay,” Siya miingon. Si Jesus misulti ngadto nila ni Joseph ug Oliver nga ang mga panalangin sa templo modala og dakong kalipay ngadto sa daghang tawo.
Doktrina ug mga Pakigsaad 110:1–10
Human si Jesus mibiya, si Moises ang propeta sa Daang Tugon mipakita ngadto ni Joseph ug ni Oliver. Siya mihatag nila og mga yawe sa pagkapari sa pagpundok sa Israel. Nagpasabot kini nga mahimo silang manguna sa buluhaton sa pagpakigbahin sa ebanghelyo. Sila mahimong magpadala og mga misyonaryo sa tibuok kalibotan sa pagtudlo mahitungod Kaniya.
Doktrina ug mga Pakigsaad 110:11
Sunod, ang propeta nga si Elias mipakita. Siya mihatag ni Joseph ug Oliver sa mga yawe sa pagpahiuli sa pakigsaad kang Abraham. Nagpasabot kini nga ang mga Santos mahimong makadawat gikan sa Ginoo sa sama nga pakigsaad nga nadawat ni Abraham. Sila adunay gahom sa pagdala sa ebanghelyo ug sa mga panalangin sa Dios ngadto sa katawhan bisan asa alang sa mga tuig nga moabot.
Doktrina ug mga Pakigsaad 110:12
Sa kataposan, si propeta Elias mipakita. Siya mihatag ni Joseph ug Oliver sa mga yawe sa pagkapari sa pagselyo, o sa paghiusa, sa mga pamilya alang sa kahangtoran. Ang buhat nga gihimo sa mga diha sa mga templo dawaton ngadto sa langit. Karon ang Simbahan adunay gahom sa pagbuhat sa trabaho sa Ginoo ug sa pagpangandam alang sa Iyang pag-anhi pag-usab.