1838

Elijah Able

Usa ka misyon sa hugot nga pagtuo ug kaisog

Ang Ginoo mitawag og usa ka tawo nga ginganlan og Elijah Able nga mahimong usa ka misyonaryo. Gitudloan ni Elijah si Eunice ug Charles Franklin mahitungod sa ebanghelyo ni Jesukristo. Siya misulti kanila mahitungod sa Basahon ni Mormon ug ni Propeta Joseph Smith. Si Eunice ug Charles mituo sa iyang gitudlo ug gustong mopasakop sa Simbahan. Gibunyagan sila ni Elijah.

Mga Santos, 1:358

Si Elijah mibiya aron mopakigbahin sa ebanghelyo sa laing lungsod. Usa ka gabii, paglabay sa pipila ka bulan, nagdamgo siya bahin sa iyang higala nga si Eunice. Sa damgo, si Eunice dili na segurado nga ang Basahon ni Mormon tinuod o nga si Joseph Smith usa ka propeta. Sa pagmata ni Elijah, mibalik dayon siya aron susihon si Eunice.

Doktrina ug mga Pakigsaad 75:27; Mga Santos, 1:357–58

Si Eunice nasorprisa nga makita si Elijah sa iyang pultahan! Ang damgo ni Elijah sakto: Si Eunice wala na motuo sa Basahon ni Mormon o ni Joseph Smith.

Mga Santos, 1:359

Gihangyo ni Elijah si Eunice nga moadto aron maminaw niya nga nagsangyaw sa usa ka eskwelahan. Samtang nadungog niya ang mga pulong ni Elijah, iyang gibati pag-usab ang Espiritu Santo. Nasayod siya nga ebanghelyo tinuod!

Mga Santos, 1:359

Si Elijah misaad ni Eunice nga siya mobalik sulod sa duha ka semana aron magsangyaw pag-usab. Apan ang ubang mga tawo sa lungsod dili gusto nga siya mobalik. Human mibiya si Elijah, misugod sila sa pagsulti sa tanan nga si Elijah mipatay og mga tawo. Mitanyag sila og ganti ni bisan kinsa nga makakita kaniya.

Mga Santos, 1:360

Si Eunice nasayod nga namakak ang mga tawo bahin ni Elijah. Wala siyay gipatay bisan kinsa. Buotan siya nga tawo ug usa ka sulugoon sa Dios. Nasayod siya nga ang ilang mga bakak dili makapugong kang Elijah sa pag-adto sa ilang lungsod aron sa pagsangyaw. Gisultihan ni Eunice ang mga tawo nga si Elijah mobalik. “Ang Dios mopanalipod kaniya,” miingon siya.

Mga Santos, 1:360

Si Elijah mibalik. Miadto siya sa samang eskwelahan diin siya nagsangyaw kaniadto. Naghuot kini sa mga tawo nga gustong modakop kaniya. Mibarog si Elijah sa kadaghanan. Siya miingon nga kon gusto silang modakop kaniya, kinahanglan nila kining buhaton karon, sa dili pa siya magsugod sa pagtudlo. Kon dili, kinahanglan nga tugotan nila siya sa pagtudlo.

Mga Santos, 1:360

Walay bisan usa nga milihok. Naghulat si Elijah, apan ang katawhan walay imik nga naglingkod. Si Elijah mikanta og usa ka himno, militok sa pag-ampo, ug nagtudlo sa ebanghelyo ni Jesukristo. Ang gahom sa Dios anaa kaniya. Human sa iyang pagtudlo, nakig-istorya siya sa iyang mga higala nga sila Eunice ug Charles ug mipadayon sa iyang misyon diha sa kalinaw.

Mga Santos, 1:360