Disyembre 1832–Marso 1836

Pagtukod sa Kirtland Temple

Usa ka espesyal nga balay sa Ginoo

Ang Ginoo misulti ni Joseph Smith nga kini mao ang panahon alang sa mga Santos nga magtukod og espesyal nga balay sa Kirtland. Kini nga balay mahimong usa ka templo, usa ka dapit diin ang Ginoo mobisita sa Iyang katawhan ug mohimo og mga saad uban nila. Siya mohatag kanila og espesyal nga gasa diha sa Iyang templo. Iyang gitawag ang gasa nga usa ka pagtuga sa gahom.

Doktrina ug mga Pakigsaad 88:119; 95:8; Mga Santos, 1:235

Ang mga Santos wala dayon mosugod sa pagtukod sa templo. Pipila ka bulan ang milabay, gipahinumdoman sila sa Ginoo nga ang templo importante kaayo. Si Hyrum Smith midagan ngadto sa balay sa iyang mga ginikanan aron pundokon ang mga himan. Dihang gipangutana siya sa iyang mama kon asa siya paingon, miingon siya nga gusto niya nga mahimong unang motrabaho sa balay sa Ginoo.

Doktrina ug mga Pakigsaad 95:1–8

Ang mga Santos sa Kirtland misugod sa pagtukod sa templo. Kini nagkinahanglan og dakong kantidad sa kwarta ug dakong trabaho. Ang mga miyembro sa Simbahan sama ni Sidney Rigdon mihatag og dakong kantidad sa kwarta aron matukod ang templo. Mahinamon sila nga mosunod sa mga sugo sa Ginoo ug modawat sa Iyang mga panalangin diha sa Iyang balay.

Mga Santos, 1:238–241

Samtang ang mga Santos nagtrabaho sa templo, hinay-hinay nga nahurot ang ilang kwarta. Si Sidney ug ubang mga lider sa Simbahan nabalaka. Si Sidney nag-ampo sa Dios alang sa tabang.

Mga Santos, 1:240–41

Usa ka miyembro sa Simbahan nga ginganlan og Caroline Tippets ug iyang pamilya nakatigom og dakong kantidad sa kwarta. Gipahulam ni Caroline sa Simbahan ang ilang kwarta sa pagtabang nga matukod ang templo.

Mga Santos, 1:240–42

Daghang mga Santos sa Kirtland mitrabaho og maayo aron matukod ang templo. Ang uban nagmaneho og mga karwahe nga puno og mga bato padulong sa templo. Ang uban nagtahi og mga sinina ug nagluto og pagkaon alang sa mga trabahante. Ang mga bata nangolekta og mga piraso sa buak nga bildo aron dugmokon kini ug ibutang sa mga bongbong sa templo aron kini maggilak-gilak sa sanag sa adlaw.

Mga Santos, 1:239, 251, 252

Sa wala madugay ang templo nahuman na! Ang mga Santos naghinam-hinam nga makasulod sa balay sa Ginoo aron sa pagdawat sa mga panalangin nga Iyang gisaad kanila.

Mga Santos, 1:251