Enero–Hulyo 1837

Si Parley Nangayo og Pasaylo

Ang pagpamatuod sa usa ka higala nakapalig-on sa iyang hugot nga pagtuo

Sa dihang oras na ni Thankful ug Parley Pratt nga makabaton og ilang anak, mipauli sila gikan sa ilang misyon sa Canada. Nakabaton sila og himsog nga batang lalaki sama sa gisaad sa Ginoo kanila.

Mga Santos, 1:305

Makapasubo, namatay si Thankful pipila ka oras human gipakatawo ang masuso. Nasayod si Parley nga dili niya maatiman ang masuso nga wala siya. Mihangyo siya og usa ka babaye sa Kirtland nga maoy moatiman sa masuso samtang mibalik siya sa Canada aron humanon ang iyang misyon.

Mga Santos, 1:305

Sa Kirtland, si Joseph Smith misugod og usa ka bangko aron makapundo og kwarta alang sa buhat sa Dios. Mihangyo siya sa mga tawo nga gamiton sa bangko ang ilang kwarta aron makahulam niini ang uban. Apan, tungod sa mga rason, ang bangko walay igong kwarta ug kinahanglan na nga isarado. Ang ubang bangko sa Estados Unidos nagkalugi usab.

Mga Santos, 1:294–95, 299–300

Ang kinabuhi nahimong lisod alang sa mga Santos. Ang uban nawad-an sa ilang mga trabaho ug karon wala nay igong kwarta sa pagpalit og pagkaon o mga sapot. Ang ubang mga tawo nasuko kang Joseph, bisan gani ang pipila sa iyang suod nga mga higala. Nagtuo sila nga si Joseph dili tinuod nga propeta tungod kay ang bangko napakyas.

Mga Santos, 1:300–303, 307–308

Samtang nahitabo kini, si Parley mipauli gikan sa iyang misyon. Ang mga problema sa bangko nakapahimo usab nga lisod sa kinabuhi ni Parley. Wala siyay igong kwarta nga ikabayad sa iyang balay, ug wala siyay luna nga kapuy-an.

Mga Santos, 1:304–305

Karon si Parley nasuko usab kang Joseph. Mipadala siya og sulat kang Joseph. Iyang giingnan si Joseph nga mituo gihapon siya sa Basahon ni Mormon. Apan nakasulti usab siya og dili maayo nga butang bahin sa Propeta. Iyang giingnan si Joseph nga nasayop siya sa pagsugod sa bangko sa unang bahin.

Mga Santos, 1:315

Sa wala madugay, pipila sa mga higala ni Parley nga gikan sa Canada miabot sa Kirtland. Gitudloan sila ni Parley sa ebanghelyo, ug malipayon sila nga makita siya pag-usab.

Mga Santos, 1:279–80

Apan nasorprisa usab sila nga si Parley ug daghan pang uban nawad-an sa ilang pagtuo nga si Joseph Smith usa ka propeta.

Mga Santos, 1:314–15

Usa sa mga higala ni Parley nga gikan sa Canada mao si John Taylor. Dihang nakita siya ni Parley, iyang gisultian si John kon unsa siya kasuko kang Joseph Smith. Gisultihan niya si John nga dili na mosunod ni Joseph.

Mga Santos, 1:315

Gipahinumdoman ni John si Parley nga dihang didto pa sila sa Canada, si Parley mipakigbahin sa iyang pagpamatuod nga si Joseph Smith usa ka tinuod nga propeta. “Aduna na ako karon sa samang pagpamatuod,” miingon si John. “Kon ang buhat tinuod unom ka bulan ang milabay, kini tinuod karon. Kon si Joseph Smith kaniadto usa ka propeta, siya karon usa ka propeta.”

Mga Santos, 1:316

Nasayod si Parley nga ang iyang higala nga si John sakto. Naguol siya sa iyang masuk-anon nga sulat ngadto ni Joseph. Nasayod siya nga si Joseph mihimo sa iyang labing maayo aron mahimo ang buluhaton sa Ginoo. Ang mga problema sa bangko wala magpasabot nga si Joseph dili tinuod nga propeta ni Jesukristo.

Mga Santos, 1:319

Si Parley miadto sa panimalay ni Joseph. Gisultihan niya si Joseph nga nagbasol siya mahitungod sa dili maayong butang nga iyang gisulti. Gipasylo ni Joseph si Parley, nag-ampo alang niya, ug mipanalangin kaniya. Si Parley miserbisyo sa daghan pang misyon ug gisultihan ang mga tawo sa tibuok kalibotan nga si Joseph Smith mao ang propeta sa Ginoo.

Doktrina ug mga Pakigsaad 64:7–11; Mga Santos, 1:320