Xtikib'ankil
    Footnotes

    Xtikib'ankil

    Ex kok'al:

    A'in jun xhuhil li b'ich choq' eere laa'ex. Yalaq jo'q'e ut yalaq b'ar naru nekeb'icha. Wan naru teeb'icha re b'antioxink chiru lee Choxahil Yuwa', ut wan naru teeb'icha yal xb'aan xsahil li b'ichank.

    Naq nekexb'ichan, wan naq maare sa teereek'a sa' lee ch'ool. Li Santil Musiq'ej naxk'e xq'ixnal lee reek'ahom re teetaw ru naq yaaleb' li aatin ut li esil li wankeb' sa'eb' li b'ich. Chi jo'kan naru textzoloq chirix li evangelio, ut taanimanq xnawom eech'ool naq yookex chi tzolok. Mas wi'chik naq taajultiko'q eere li k'a'ru xetzol wi nekexb'ichan chirix. Lix ja'ajil jun li b'ich texxtenq'a re taajultiko'q eere li raatinul, ut tixk'e chereek'a sa' lee ch'ool li naxye li b'ich. Eb' li jalam-uuch texxtenq'a ajwi' chirilb'al k'a'ru li na'leb' k'utb'il sa'eb' li b'ich. Chirix naq ak nekenaweb' li b'ich, junelik te'ruuq chi wank eerik'in (jo' li chaab'il ochb'een) re eetenq'ankil chixsik'b'al ru li us ut chi saho'k sa' eech'ool.

    Li b'ichank, a'an jun li aatinob'aal li yalaq b'ar tawb'il ru. Eb' li kok'al sa' chixjunil li ruchich'och' neke'xb'ichaheb' ajwi' li b'ich a'in. Li b'ichank naru ajwi' chixjunajinkil li ak xnume' rik'in li toj chalel. Sa' junaq kutan maare teeb'ichaheb' li b'ich a'in rik'ineb' lee kok'al laa'ex.

    Wankeb' li b'ich sa' li hu a'in chirix li jar paay chi na'leb' sa' li evangelio. Eb' li b'ich neke'xch'olob' k'a'ru naqapaab' chirix li yu'am sa' choxa, chirix li tijok, li b'antioxink, ut li oxloq'ink; chirix lix k'anjel li Kolonel; chirixeb' li jar raqalil chi na'leb' re li evangelio, chirix xnimal xwankil li ochochnal, li junkab'al, ut li na'leb' kanab'anb'il qe; chirix xchaq'al ru li ruchich'och' ut li jar q'ehil; ut chirix lix aajelil ru li b'atz'unk ut reek'asinkil eerib'. Naru xwajb'ankil li b'ich a'in naq maji' natikla jun li ch'utam malaj naq ak xraqe', malaj sa' ajwi' lee rochoch, re taa'eek'amanq li oxloq'ink.

    Sa' junaq kutan, laa'ex texwanq choq' aj k'amol b'e sa' li Iglees jo' ajwi' sa' li ruchich'och'. Li na'leb' neketzol rik'ineb' li b'ich a'in texxtenq'a re naq tiikaqex chi paab'ank, ut re texk'anjelaq rik'in tiikilal. Li chaab'ilal nekereek'a sa' lee ch'ool rik'ineb' li b'ich a'in tixk'e xsahil ut xkawilal eech'ool, ut texxtenq'a re taajultiko'q eere naq laa'ex ralal xk'ajol li Dios.