បំភ្លឺពិភពលោកនៅប៉ារីស
ខ្ញុំបានរកឃើញថា ការបម្រើបាននាំមកនូវសេចក្តីអំណរដែលពុំអាចពិពណ៌នាបានហើយសកម្មភាពតូចតាច អាចស្ថាបនាបុគ្គលម្នាក់ៗ ក្នុងរបៀបដ៏អស្ចារ្យ ។
រចនារូបភាពដោយ អេលែន ម៉ារីឡូ
នៅប្រទេសបារាំង មានជនអនាថា និងជនភៀសខ្លួនដេកនៅតាមសួនច្បារ នៃទីក្រុងប៉ារីស ប្រទេសបារាំង ពួកគេត្រូវការជំនួយនៅចំពោះមុខយើងជារៀងរាល់ថ្ងៃ សូម្បីតែក្នុងអំឡុងរដូវបុណ្យគ្រីស្ទម៉ាស់ ។ ខ្ញុំ និងមិត្តរបស់ខ្ញុំពីរនាក់ បានសម្រេចបង្កើតក្រុមសហគមន៍ មួយហៅថា Solidarity to Act Together ( ធ្វើការរួមគ្នាដើម្បីអនុវត្តដោយសាមគ្គីភាព ) ដើម្បីជួយអ្វីដែលយើងអាច ។
ដោយមានការគាំទ្រពីអ្នកស្មគ្រ័ចិត្តទូទាំងសហគមន៍ រួមទាំងពួកបរិសុទ្ធថ្ងៃចុងក្រោយ មកពីស្តេកបីក្នងទីក្រុងប៉ារីសផងដែរ យើងបានរៀបចំសកម្មភាពបំភ្លឺពិភពលោកដើម្បីជួយបងប្អូនប្រុសស្រីដែលត្រូវការ ។
រយៈពេលបីឆ្នាំជាប់គ្នា យើងបានប្រារព្ធ ព្រឹត្តិការណ៍បំភ្លឺពិភពលោកនៅចុងឆ្នាំ ដែលមានសិល្បៈករ អ្នកស្មគ្រ័ចិត្ត និងភ្ញៀវកិត្តិយសមកពីព្រះវិហារ និងអង្គការផ្សេងៗ ក្នុងទីក្រុងប៉ារីស ដើម្បីចូលរួមសម្តែង និងបរិច្ចាគសម្ភារៈដល់អស់អ្នកដែលត្រូវការ ។ វាត្រូវការពេលវេលារាប់ខែដើម្បីរៀបចំ ប៉ុន្តែអ្នកស្ម័គ្រចិត្ត និងអ្នកសម្តែងទាំងនោះ បានទទួលបទពិសោធន៍នៃក្តីអំណរដ៏មហិមាពីការចូលរួមក្នុងព្រឹត្តិការណ៍នេះ ។ គ្មានពួកគេណាម្នាក់ចង់ខកខានព្រឹត្តិការណ៍នេះទេ ។ ចំពោះព្រឹត្តិការណ៍បំភ្លឺពិភពលោកលើកទីបីរបស់យើងអ្នកចូលរួម ៨២ រូបបានមកទោះបីជាមធ្យោបាយធ្វើដំណើរមានបញ្ហាក្តី !
មុនព្រឹត្តិការណ៍ យើងបានរៀបចំ និងប្រមូលផលិតផលអនាម័យដាក់ក្នុងការបូបស្ពាយ ដើម្បីបរិច្ចាគដល់ជនភៀសខ្លួន និងជនអនាថាក្នុងទីក្រុងប៉ារីស ។ យើងក៏បានប្រមូលភួយ កម្រាល ខ្នើយ សម្ភារៈកីឡា ស្បែកជើងពាក់ងូតទឹក និងសូម្បីតែកង់ ដែលត្រូវបានផ្តល់ជូនជនភៀសខ្លួន ។
កាលពីឆ្នាំមុនយើងក៏បានដាក់បញ្ចូលកម្មវិធីបង្ហាញម៉ូតនៅក្នងព្រឹត្តិការណ៍នោះដែរ ។ អ្នកបង្ហាញម៉ូតអាយុ ២២ឆ្នាំម្នាក់ដែលបានចូលរួមបាននិយាយថា ការគាំទ្រដែលគាត់បានទទួល បានផ្តល់ជាកម្លាំងដល់គាត់ឲ្យជឿជាក់លើសមត្ថភាពរបស់គាត់ ។ ពេលគាត់និយាយជាមួយខ្ញុំ បានរំឭកខ្ញុំថាមនុស្សគ្រប់រូបត្រូវមានអារម្មណ៍ថាមានគេត្រូវការខ្លួន ហើយថាយើងគ្រប់រូបអាចមានតម្រូវការក្នុងរបៀបណាមួយ ។
ខ្ញុំទន្ទឹងរង់ចាំឆ្នាំក្រោយមកដល់ ។ យើងរំពឹងថាមានអ្នកចូលរួម និងមានសកម្មភាពកាន់តែច្រើន ។ មនុស្សមួយចំនួនផ្តល់ទាំងឃ្លាំងស្តុក និងឡានទូត្រជាក់ ដើម្បីជួយយើង នៅពេលយើងធ្វើការជាមួយទីភ្នាក់ងារសហគមន៍ និងដៃគូក្រុមហ៊ុនផ្គត់ផ្គង់ចំណីអាហារអន្តរជាតិធំៗ ដើម្បីផ្តល់អាហារមានតុល្យភាពដល់អស់អ្នកដែលត្រូវការ ។ យើងក៏បានរៀបចំផ្តល់មធ្យោបាយបង្រៀនមេរៀនភាសាបារាំង ដោយមិនគិតថ្លៃ សម្រាប់អស់អ្នកដែលរៀនភាសាបារាំងជាភាសាទីពីរ ។
ខ្ញុំរកឃើញថាការបម្រើក្នុងបុព្វហេតុថ្លៃថ្នូរ នាំមកនូវក្តីអំណរដែលមិនអាចពិពណ៌នាបាន ។ សកម្មភាពតូចតាចអាចស្ថាបនាបុគ្គលម្នាក់ៗក្នុងរបៀបដ៏អស្ចារ្យ ។ ស្នាមញញឹម និងគារវភាពដែលយើងបានទទួលជំរុញឲ្យយើងកាន់តែចង់ធ្វើបន្ថែមទៀត ។ ◼