ពាក្យចុងក្រោយ
ល្អឥតខ្ចោះនៅក្នុងព្រះគ្រីស្ទ
ដោយអែលឌើរ ជែរីត ដ័បុលយូ ហ្កង
ក្នុងកូរ៉ុមនៃពួកសាវកដប់ពីរនាក់
ដកស្រង់ចេញពីសុន្ទរកថានៅក្នុងសន្និសីទទូទៅខែ តុលា ឆ្នាំ ២០១៨ ។
ពន្លឺ និងជីវិតខាងវិញ្ញាណកើតឡើង នៅពេលការគោរពប្រតិបត្តិខាងសាសនាជាទៀងទាត់នាំយើងឲ្យខិតកាន់តែជិតនឹងព្រះវរបិតាសួគ៌ និងព្រះអង្គសង្គ្រោះរបស់យើងគឺព្រះយេស៊ូវគ្រីស្ទ ។ ជាមួយនឹងការគោរពប្រតិបត្តិជាប្រចាំ យើងរកឃើញចម្លើយ សេចក្តីជំនឿ និងកម្លាំងដែលដោះស្រាយនូវឧបសគ្គរៀងរាល់ថ្ងៃ និងទទួលយកឱកាសនានាដោយការអត់ធ្មត់ ទស្សនវិស័យ និងអំណរនៃដំណឹងល្អ ។
អំឡុងពេលដែលយើងស្វែងរកមធ្យោបាយថ្មី និងកាន់តែបរិសុទ្ធ ដើម្បីស្រឡាញ់ព្រះ ហើយជួយយើង និងមនុស្សដទៃរៀបចំខ្លួនទៅជួបទ្រង់ នោះយើងចងចាំភាពល្អឥតខ្ចោះនៅក្នុងព្រះគ្រីស្ទ គឺពុំមែននៅក្នុងខ្លួនយើង ឬនៅក្នុងភាពល្អឥតខ្ចោះនៃលោកិយឡើយ ។
ការអញ្ជើញរបស់ព្រះពោរពេញដោយសេចក្តីស្រឡាញ់ និងលទ្ធភាព ដោយសារព្រះយេស៊ូវគ្រីស្ទគឺ « ជាផ្លូវ ជាសេចក្តីពិត ហើយជាជីវិត » ( យ៉ូហាន ១៤:៦ ) ។ ចំពោះអស់អ្នកដែលមានអារម្មណ៍ថា មានបន្ទុក ទ្រង់អញ្ជើញថា « ចូរមកឯខ្ញុំ » ហើយអស់អ្នកដែលមកកាន់ទ្រង់ នោះទ្រង់សន្យាថា « ខ្ញុំនឹងឲ្យអ្នករាល់គ្នាឈប់សម្រាក » ( ម៉ាថាយ ១១:២៨ ) ។ « ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ … ស្រឡាញ់ព្រះឲ្យអស់ពីសមត្ថភាព អស់ពីគំនិត និងអស់ពីកម្លាំងរបស់អ្នក នោះព្រះគុណរបស់ទ្រង់ល្មមដល់អ្នកហើយ ដោយសារព្រះគុណនៃព្រះ នោះអ្នករាល់គ្នាអាចបានល្អឥតខ្ចោះនៅក្នុងព្រះគ្រីស្ទ » ។ ( មរ៉ូណៃ ១០:៣២ ) ។
នៅក្នុងការធានាអះអាងនេះ « ដោយសារព្រះគុណនៃព្រះ នោះអ្នករាល់គ្នាអាចបានល្អឥតខ្ចោះនៅក្នុងព្រះគ្រីស្ទ » វាក៏ជាការលួងលោម ភាពសុខសាន្ត និងការសន្យាថា យើងអាចបន្តឆ្ពោះទៅមុខដោយសេចក្តីជំនឿ និងទំនុកចិត្តលើព្រះអម្ចាស់ ទោះបីជាអ្វីៗពុំដំណើរការដូចក្តីសង្ឃឹម ការរឹពឹងទុក ឬប្រហែលជាយើងសមនឹងទទួលបាន ទោះមិនមែនជាកំហុសរបស់យើងផ្ទាល់ ឬទោះបីបន្ទាប់ពីយើងបានធ្វើអស់ពីសមត្ថភាពក្តី ។
ក្នុងគ្រា និងមធ្យោបាយផ្សេងៗ យើងទាំងអស់គ្នាមានអារម្មណ៍ថា ខ្វះសមត្ថភាព ពុំប្រាកដប្រជា ហើយប្រហែលជាមិនស័ក្ដិសមផង ។ ប៉ុន្តែនៅក្នុងកិច្ចខិតខំដ៏ស្មោះត្រង់របស់យើងដើម្បីស្រឡាញ់ព្រះ និងផ្តល់ការងារបម្រើដល់អ្នកជិតខាងរបស់យើង នោះយើងអាចទទួលអារម្មណ៍នៃក្តីស្រឡាញ់របស់ព្រះ និងការបំផុសគំនិតដែលចាំបាច់សម្រាប់ជីវិតពួកគេ និងជីវិតរបស់យើង ។
ជាមួយនឹងសេចក្តីអាណិតអាសូរ ព្រះអង្គសង្គ្រោះយើងលើកទឹកចិត្ត និងសន្យាថា យើងអាច « ឈានទៅមុខដោយខ្ជាប់ខ្ជួននៅក្នុងព្រះគ្រីស្ទ ដោយមានការភ្លឺថ្លានៃសេចក្ដីសង្ឃឹមដ៏ឥតខ្ចោះ ហើយដោយមានចិត្តស្រឡាញ់ព្រះ និងមនុស្សគ្រប់រូប » ។ ( នីហ្វៃទី ២ ៣១:២០ ) ។ គោលលទ្ធិនៃព្រះគ្រីស្ទ ដង្វាយធួនរបស់ព្រះអង្គសង្គ្រោះរបស់យើង និងការដើរតាមផ្លូវនៃសេចក្តីសញ្ញារបស់ទ្រង់ដោយព្រលឹងទាំងស្រុងរបស់យើង អាចជួយយើងឲ្យស្គាល់សេចក្តីពិតរបស់ទ្រង់ និងធ្វើឲ្យយើងមានសេរីភាព ។ ( សូមមើល យ៉ូហាន ៨:៣២ ) ។
ខ្ញុំសូមថ្លែងទីបន្ទាល់ថា ផ្លូវនៃសេចក្តីសញ្ញារបស់ទ្រង់ដឹកនាំទៅរកអំណោយទានដ៏មហិមាបំផុតដែលព្រះវរបិតាសួគ៌ជាទីស្រឡាញ់របស់យើងសន្យាថា ៖ « អ្នករាល់គ្នានឹងមានជីវិតដ៏នៅអស់កល្បជានិច្ច » ។ ( នីហ្វៃទី ២ ៣១:២០ ) ។ ◼