Uunaiga Malolosi a le Agaga
Mai se lauga na tuuina atu i le autalavou i Salta, Atenitina, ia Novema 2011.
O se molimau e mafai ona oo mai i soo se tagata masani po o fea lava e i ai o ia, aua o lo tatou Tama Faalelagi ma le Agaga Paia la te silafia lelei lava i tatou uma taitoatasi.
Sailia o se Tali i le Vao Paia
I le avea ai o se tagata talavou, sa ou maua ai le avanoa ou te i ai i Palamaira, Niu Ioka, i se tasi o afiafi o le taumafanafana. Sa faapea ona ou i ai na o a’u i le Vao Paia. Sa ou tootuli e tatalo, e ole atu i le Tama Faalelagi e tuuina mai ia te au se faaaliga po o se faailoaga e uiga i le mea ua uma ona ou iloaina moni sa tupu i lena nofoaga paia. Sa ou tatalo ma le faamaoni tele, mo se taimi umi, i se agaga o le migao. Ae ou te le’i maua se tali po o se uunaiga mai le Agaga Paia. E leai se mea na oo mai. Mulimuli ane, sa ou faavaivai ma aluese mai ma le le fiafia, ma tuufesili, “O le a se mea sa le sa’o ona ou faia? Aisea? O le a se isi mea na manaomia?” Sa foliga mai ia te a’u faatasi ai ma le siosiomaga, o le a leai se isi nofoaga e sili atu e maua ai se tali i se tatalo faapena.
Sa ou aoaoina mai lena aafiaga e le mafai ona tatou poloaiina mea mai le Atua. E le mafai ona tatou fai atu, “E tatau ona e tali mai ia te a’u i le ala lenei, i le taimi lava lenei.” O Ia lava e pule i le auala ma le taimi ma po o le a foi o le a Ia ta’u mai ia i tatou. O lo tatou tiutetauave o le tatau lea ona i ai i taimi uma i le tulaga sa’o e maua ai uunaiga po o musumusuga, faaaliga, o musumusuga a le Agaga. Ae o Ia e faia le faaiuga i le auala ma le taimi.
Ata na tusia e Dan Burr
Mauaina o se Tali i le Fale
O le mea sa ou sailia i lena taimi—lea sa le’i oo mai i le taimi lena—sa oo moni mai ia te a’u i le lima po o le ono vaiaso mulimuli ane. Sa ou faitauina le Tusi a Mamona i le fale. Ma e aunoa ma lo’u talosagaina, sa oo mai ia te au se uunaiga malosi, se lagona, ma se fesootaiga e ala mai i le Agaga Paia lea sa faamautuina mai ai lo’u talitonuga ma la’u molimau.
Sa avea o se fesootaiga malosi lea sa ou tagi ai. Sa avea foi o se fesootaiga mama lea sa le manaomia ai ni upu. O le Agaga e le manaomia ona faatapulaaina i upu; E mafai ona fesootai le Agaga i le agaga i se gagana le mafaaseseina aua e leai ni upu. O se fesootaiga o le malamalama ma le atamai mama mai le Agaga, ma ua ou iloaina e moni lava o le auala sili lea e maua ai le malamalama. E malosi atu ma umi atu nai lo le pai atu po o le vaai i ai; e mafai ona tatou masalomia ni lagona faaletino, ae e le mafai ona tatou masalomia le taimi e talanoa mai ai le Agaga Paia ia i tatou. O le molimau mautinoa lava lea. Ona o lenei mea, o le agasala e le mafaamagaloina o le faafitia lea o le Agaga Paia po o le molimau a le Agaga Paia.
Lagonaina o le Alofa ma le Malamalama o le Atua
Ua ou lagonaina moni se lagona lelei ona sa le’i tuuina mai e le Alii ia te au se tali i le Vao Paia ona atonu ou te ono mafaufau ai e tatau i se tagata ona faia se malaga i Palamaira ina ia mafai ona maua se molimau e uiga i le Perofeta o Iosefa Samita. O lenei ua ou iloa e mafai ona ou sau i soo se nofoaga. E te le tau alu i Ierusalema ina ia mafai ona e maua ai se molimau i le Alii o Iesu Keriso. O lena molimau e mafai ona oo mai i soo se tagata masani, po o fea lava e i ai o ia, aua o lo tatou Tama Faalelagi ma le Agaga Paia e iloaina lelei lava i tatou taitoatasi. La te silafia le mea o tatou i ai ma le auala e maua ai i tatou. Ma La te le manaomia ni visa. O le mea moni, e silafia lelei e i Laua le lalolagi atoa! Ua uma ona La silafia.
Ou te folafola atu ia te outou, tagata talavou e, afai o le a faaauau pea ona outou faamaoni, ma ole atu, o le a tuuina atu e le Alii ia te oe le tali lava e tasi, le molimau lava e tasi, le faamautinoaga lava e tasi lea sa Ia tuuina mai ia te a’u, aua ua ou iloa e alofa o Ia ia te outou uma e pei foi ona Ia alofa ia te a’u po o Peresitene Thomas S. Monson po o soo se tasi lava o Lana fanau.
O le alofa o le Atua e mo tagata uma, ma e le muta. E silafia e Ia le ala e fesootai atu ai i tagata taitoatasi. Na te silafia le mea o loo e i ai ma le auala e aapa atu ai i lou loto ma le agaga e ala i le Agaga Paia. Aua ne’i tuu le tatalo. Aua nei tuu le ole atu. Aua nei tuu le usitai i poloaiga. O le a oo mai le taimi, pe afai e le’i oo atu, o le a e maua ai lenei molimau malosi. Ma o le a lē na o le faatasi. Ae peitai, e ala mai i le alofa mutimutivale o le Alii, o le a oo mai ai i lea taimi ma lea taimi i lou olaga atoa.
Faaauau Pea ia Maua se Molimau
Sa faapena foi le mea na tupu ia te a’u. A o o’u auauna atu i se misiona i Tucumán, Atenitina, sa ou aoaoina se aiga ma tuuina atu se molimau e uiga i le Uluai Faaaliga a le Perofeta o Iosefa Samita. Sa le’i talitonu i ai le aiga. Ae peitai, i le taimi na tuu atu ai la’u molimau, sa ou maua ai se isi faamaoniga o la’u molimau. Sa fai mai le Agaga, “O upu o lau molimau ua moni.” Sa molimau mai o Ia ia te a’u e uiga i la’u molimau.
I lou olaga atoa o le a e maua ai pea lava pea faamaoniga o loo i ai iina se Atua, o Ia o lo tatou Tama Faalelagi, ma o loo soifua o Ia, ma sa Ia valaauina le Perofeta o Iosefa Samita e avea ma Perofeta o le Toefuataiga, ma o loo soifua Lona Alo, ma o Lona alofa tunoa ua lava lea e faaola ai i tatou, faamama ai i tatou, ma faamagalo ai i tatou uma. O lena molimau e oo mai i lea taimi ma lea taimi i o tatou olaga atoa.
Ua ou iloa nei mea. O a’u o se molimau faapitoa o nei mea. Ua ou iloa o loo soifua lo tatou Alii, o Ia moni lava o se tagata toetu, ma o loo Ia taitaia ma o le faaao o lenei Ekalesia o loo tauaveina Lona suafa, e a Ia lea, ma o outou o Ana mamoe.