E Pele Mamoe Ua Taase
O Peresitene James E. Faust na lagolagoina o se Fesoasoani Lua i le Au Peresitene Sili i le aso 12 Mati, 1995, ma na galue i lena tofiga seia oo i le taimi o lona maliu i le aso 10 Aokuso, 2007. O lenei saunoaga, na tuuina atu i le konafesi aoao ia Aperila 2003, ma o loo aofia ai lenei lomiga e avea ma se tasi o le anoanoai o tusiga e faatatau i le faamalolosia o le aiga.
I matua loto mafatia, o e amiotonu, maelega, ma loto tatalo i le aoaoina o a latou fanau lē usitai, matou te fai atu ia te outou, o loo leoleo i latou e le Leoleo Mamoe lelei.
Ou uso e ma tuafafine ma uo pele, o la’u savali i lenei taeao o se savali o le faamoemoe ma le faamafanafanaga i matua loto nutimomoia sa latou faia le mea sili e tausi ai a latou fanau i le amiotonu, faatasi ai ma le alofa ma le faamaoni, ae ua leai se faamoemoe ona ua faasagatau mai le tamaitiiti pe ua taitaiseseina foi ma mulimuli atu ai i le ala o le amioleaga ma le faatafunaga. Ina ua ou mafaufau i le ogaoga o lo outou mafatiaga, sa faamanatu mai ai ia te au upu a Ieremia: “Ua lagona le leo i Rama, … ua tagi Rasela ona o lana fanau, e le mafai foi ona faanaina.” O lea na aumai ai e le Alii lenei faamautinoaga mafanafana: “Soia e te tagi, … e fai le taui o lau galuega … ; e toe foi mai lava i latou ai le nuu o e ita mai.”1
E tatau ona ou amata i lo’u molimau atu lea o le afioga a le Alii i matua o lenei Ekalesia, o loo maua lea i le vaega e 68 o le Mataupu Faavae ma Feagaiga i le aoaoga ofoofogia lenei: “O lenei foi, o le tulaga e oo i ai le i ai o matua e fai fanau i Siona, po o i soo se tasi o ona siteki ua faatulagaina, ae latou te le aoaoina i latou ia malamalama i le mataupu faavae o le salamo, faatuatua ia Keriso le Alo o le Atua soifua, ma e uiga i le papatisoga ma le meaalofa o le Agaga Paia e ala i le faaee o lima, pe a valu tausaga le matutua, ia i ai le agasala i luga o ulu o matua.”2 Ua aoaoina matua ina ia “latou aoao foi a latou fanau ia tatalo, ma savavali tonu i luma o le Alii.”3 I le avea ai o au o se tama, tamamatua, ma se tama o le tamamatua, ou te taliaina lenei afioga a le Alii, ma o le avea ai ma se auauna a Iesu Keriso, ou te uunaia ai outou matua ina ia mulimuli i lenei apoapoaiga ma le matua faaeteete lava i le mea e gata mai ai.
O ai ea matua e lelei? O i latou ia na taumafai ma le alofa, ma le agaga tatalo e aoao a latou fanau e ala i a latou faataitaiga ma le aoaoga ia “tatalo, ma savavali tonu i luma o le Alii.”4 E moni lenei mea e ui lava o nisi o a latou fanau e le usitai ma e faalelalolagi. E o mai fanau i lenei lalolagi ma o latou lava agaga e tulaga ese faapea foi o latou uiga faaletagata. O nisi fanau “latou te luitauina matua i soo se tulaga. … Atonu foi e i ai nisi o le a faamanuiaina olaga, ma aumaia le olioli i nisi foi tama ma tina.”5 O matua faamanuiaina o i latou ia sa ositaulaga ma tauivi e fai le mea sili latou te mafaia i o latou lava tulaga faaleaiga.
E le mafai ona fuaina le loloto o le alofa o matua mo a latou fanau. E le pei o se isi lava sootaga. E sili atu nai lo le popole mo o latou lava ola. O le alofa o se matua mo se tamaitiiti, e faifai pea tusa lava pe i ai le loto nutimomoia ma le le fiafia. E faamoemoe ma tatalo matua uma ina ia faia e a latou fanau ni faaiuga popoto. O fanau e usiusitai ma taunapa i ai o latou matua, latou te aumaia le mitamitaga e le uma ma le lotomalie i o latou matua.
Ae faapefea fanau na aoaoina e matua alolofa ma faamaoni, ae ua faasagatau mai pe ua taitaiseseina foi? Pe o i ai ea se faamoemoe? O le faanoanoa o se matua i se tamaitiiti e faasagatau mai, e toetoe lava ina le mafai ona faamafanafanaina. O le atalii lona tolu o le Tupu o Tavita, o Apisaloma, sa na ia fasiotia se tasi o ona uso, ma sa ia taulamua foi i se au faasagatau i lona tama. Sa fasiotia Apisaloma e Iopa. Ina ua faalogo le Tupu o Tavita i le oti o Apisaloma, sa ia tagi tautala i lona faanoanoa ma faapea, “Lo’u atalii Apisaloma e, lo’u atalii e Apisaloma! ta fia oti e sui ai oe Apisaloma, lo’u atalii e, lo’u atalii e!”6
O loo faaalia lenei alofa faatama i le faataoto i le atalii faamaumau oa. Ina ua toe taliu mai lona atalii vaogata i le fale ina ua uma ona faamaimau lona tofi i se olaga soona fai, sa fasi e le tama se tamai povi peti ma faia ai se fiafia ona o le toe foi mai o lona atalii faamaumau oa, ma sa ia faapea atu i lona atalii usitai e pei ua ita, “Ua tatau foi ona tatou fiafia ma olioli, aua o lou uso lena na oti, a ua toe ola mai; na leiloa foi, a ua maua.”7
Ou te talitonu ma talia le saunoaga faamafanafana a Elder Orson F. Whitney [1855–1931]:
“Sa tautino mai e le Perofeta o Iosefa Samita—ma na te le i aoaoina mai se mataupu faavae e sili atu ona faamafanafana loto—o le faamauga e faavavau o matua faamaoni ma folafolaga paia ua tuuina atu ia i laua mo le galulue faamaoni i le Faamoemoega o le Talalelei, e le gata ina faasaoina ai i laua, ae faapena foi a laua fanau. E ui lava atonu o le a se ese nisi o mamoe, ae o loo silasila mai pea fofoga o le Leoleo Mamoe ia te i latou, ma o le a i ai se taimi, latou te lagona ai le aapa atu o aao alofa o le Atua ia te i latou ma aumaia i latou i le lafu. Po o le olaga nei po o le olaga a sau, o le a latou foi mai lava. O le a latou totogia la latou aitalafu i le faamasinoga tonu; o le a latou mafatia mo a latou agasala, ma atonu foi latou te ui atu i se ala matuitui; ae afai e taitaiina mulimuli ane ai i latou, e pei o le atalii faamaumau oa na salamo, i se tama alofa ma le loto faamagalo ma le aiga, ona aoga ai lea o mea tiga na oo i ai. Ia tatalo mo a outou fanau vaogata ma le le usiusitai; ia tausia pea i latou ma le faatuatua. Ia tumau i le faamoemoe ma le faatuatua, seia outou vaaia le faaolataga a le Atua.”8
“O se mataupu faavae o i lenei saunoaga e masani ona le amanaiaina e faapea e tatau ona latou salamo atoatoa ma ‘pagatia mo a latou lava agasala’ ma ‘totogi la latou aitalafu i le faamasinoga tonu.’ …Ou te iloa o le taimi lenei “e saunia ai e feiloai ma le Atua.”9 Afai e le tupu i lenei olaga le salamo o fanau vaogata, pe mafai pea lava la e maea tuaiti o le faamauga ona lava le malosi mo i latou ae o loo galulue ina ia salamo? O loo tau mai i le Mataupu Faavae ma Feagaiga:
“O e e salamo o e ua oti o le a togiolaina, e ala i le usiusitai i sauniga o le maota o le Atua,
“Ma a uma ona latou totogi o le sala o a latou solitulafono, ma mulumulu mama, o le a latou maua se taui e tusa ma a latou galuega, aua o i latou o ni suli o le olataga.”10
Tatou te manatua sa faamaumau e le atalii faamaumau oa lona tofi, ma ina ua uma, sa ia toe foi mai i le fale o lona tama. O iina sa talia ai ma le fiafia e lona aiga, ae ua uma ona faamaumau lona tofi.11 E le avea le alofa mutimutivale ma mea e taofia ai tulaga manaomia o le faamasinoga tonu, ma o le mana o le faamauga o matua faamaoni, e na o tuutuuga lava o le salamo o a latou fanau vaogata ma le Togiola a Keriso, e toe maua mai ai. O le a olioli fanau vaogata ua salamo, i le faaolataga ma faamanuiaga uma e aumai faatasi ai, peitai o le faaeaga e matua sili atu. E tatau ona galue ina ia maua lona atoatoaga. O le fesili la pe o ai e faaeaina, e ao lava ona taatia atu i le Alii i Lona alofa mutimutivale.
E toaitiiti lava i latou e matua tele naua a latou amioga faatiapolo ma le fouvale “ua aveesea ai le mana e salamo ai.”12 E tatau lava foi ona taatia atu lena faamasinoga i le Alii. Sa ia fetalai mai, “O a’u, le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma.”13
Atonu e le mafai ona tatou malamalama atoatoa i lenei olaga, i le malosi o le maea tuaiti o le faamauga o matua amiotonu i a latou fanau. Atonu o loo i ai nisi sosia fesoasoani o loo galulue nai lo le mea ua tatou iloa.14 Ou te talitonu o loo i ai se mana malosi faaleaiga a o faifai pea le faatosinaga a tuaa faapelepele mo i tatou mai le isi itu o le veli.
Sa matauina e Peresitene Howard W. Hunter [1907–95] e faapea “o le salamo o le ma’i manatu lea o le agaga, ma o le tausiga le motusia a le matua o le ituaiga aupito manino lea o le faamagaloga le masuia a le Atua.” Pe le o le aiga ea le faatusa aupito lata mai lea na sailia i le misiona a le Faaola ina ia faatuina?15
Tatou te aoaoina mai le tulaga faamatua mai o tatou lava matua. Sa matua faalolotoina lo’u alofa i lo’u tama pe a ia agalelei, alofa, ma malamalama. Ina ua leaga ia te au le taavale a le matou aiga, sa agamalu lava o ia ma loto faamagalo. Peitai e iloa lava e ona atalii o le a i ai se aoaiga malosi mai ia te ia, pe afai e i ai se faanenefu o le mea moni, pe faifai pea foi le solia o tulafono, aemaise lava pe a faaalia se le faaaloalo i lo matou tina. Ua toeitiiti atoa le senituri talu ona maliu lo’u tama, ae ou te matua misia lava lo’u alu atu ia te ia mo se fautuaga poto ma le alofa. Ou te ta’u atu sa i ai taimi ou te fesiligia ai ana fautuaga, ae sa le mafai ona ou fesiligia lona alofa mo au. Ou te le i manao lava e faaita ia te ia.
O se elemene taua o le faia o le mea sili tatou te mafaia o ni matua, o le tuuina atu lea o aoaiga mausali ma le alofa. Afai tatou te le aoaia a tatou fanau, atonu o le a faia e nuu po o faalapotopotoga i se auala tatou te le mananao ai pe mananao ai foi a tatou fanau. O se vaega o le aoai o fanau, o le aoao lea o i latou ia galulue. Na saunoa mai Peresitene Gordon B. Hinckley [1910–2008]: “O se tasi o uiga faatauaina aupito sili … o le uiga faaleatua lea o le galue faamaoni. O le malamalama e aunoa ma se galuega, e leai se mea e maua ai. O le malamalama e i ai ma le galue o le matua atamai lena.”16
Ua matua faateleina lava mailei ua salalau solo a Satani, ma ua atili ai foi ona faigata le tausiga o le fanau ona o lea tulaga. O le mea lea, ua tatau ai i matua ona faia le mea e aupito sili latou te mafaia, ma faaaoga fesoasoani e mafai ona maua mai i auaunaga ma gaoioiga faale-Ekalesia. Afai foi e le amiolelei matua ma see ese foi i latou i nisi taimi, o le a manatu foi nisi o a latou fanau e le afaina pe a latou faataitai i mea la e fai e o latou matua.
E i ai la le isi itu o le mafutaga lea a matua ma fanau e ao ona tautalagia. Ou te aioi atu mo fanau ua tuueseese mai o latou matua ina ia aapa atu ia te i latou, tusa lava pe e le i lelei matua e pei ona tatau ona i ai. O fanau e sailiili masei i o latou matua, e tatau ona latou manatuaina le apoapoaiga poto a Moronae ina ua ia saunoa mai, “aua tou te tauleagaina au ona o ou le atoatoa, po o lou tama, ona o ona le atoatoa, po o i latou o e na tusitusi muamua atu ia te ia; ae nai lo lena, ia outou avatu le faafetai i le Atua ina ua ia faaalia atu ia te outou o matou le atoatoa, ina ia outou aoao ia sili atu ona outou popoto nai lo i matou.”17
Ina ua asiasi atu Moronae i le Perofeta talavou o Iosefa Samita i le 1823, sa ia sii atu i ai le fuaiupu lea e faatatau i le misiona a Elia: “Ma o le a ia totoina foi i loto o fanau folafolaga na faia i tama, ma o le a liliu foi loto o fanau i o latou tama.”18 Ou te faamoemoe o le a iu ina liliu atu loto o fanau uma i o latou tama faapea foi o latou tina.
E i ai se ulugalii lelei tele sa ou iloaina a o ou talavou, e i ai se la tama tama sa fouvale ma ia faaesea o ia lava mai lona aiga. Peitai, i ni tausaga mulimuli ane, sa ia toe faalelei ma i laua ma sa avea o se tamaitiiti aupito alofa ma loto fesoasoani o le fanau atoa. A o agai ina tatou matutua, e faateleina foi le malosi o le mana mai o tatou matua ma matua matutua o i le isi itu o le veli. O se aafiaga matagofie tele pe a latou asiasi mai ia te i tatou i miti.
“E matua le fetaui lava ma le le alofa le faamasino o ni matua faamaoni ma le maelega ona e fouvale nisi o a latou fanau pe se ese foi mai aoaoga ma le alofa a o latou matua. Amuia ulugalii e i ai fanau ma fanau a a latou fanau latou te aumaia le filemu ma le loto malie. E tatau ona tatou manatunatu i na matua lelei ma amiotonu o loo tauivi ma mafatia i fanau faalogogata.“E masani ona faapea mai se tasi o a’u uo, ‘Afai e le i i ai lava ni au faafitauli ma a outou fanau, ia faatalitali laitiiti la mo sina taimi.’ E leai se tasi e mafai ona tau mai ma le mautinoa ni mea o le a faia e a latou fanau i ni tulaga patino. Pe a vaai atu le tina o lo’u toalua atamai i isi fanau ua ulavavale, e masani ona ia faapea mai, ‘Ou te le fai atu lava o le a le faia e la’u fanau lea tulaga, aua atonu ua latou faia i le taimi nei a o lea ou te tautala atu. Pe a faanoanoa matua mo fanau le usiusitai ma se ese, e ao ona ia i tatou le agaalofa, ‘e taofia ai le togi o le maa muamua’ Harold B. Lee, Faaiuga mo le Ola Manuia (1973), 58” (i le Conference Report, Ape. 2003, 69–70; po o le Liahona, Me 2003, 67).19
E i ai se tagata o le Ekalesia e lei faailoa maia le igoa, sa tusia e uiga i le lototiga o ona matua sa matua’ia pea lava pea e lona tuagane. Sa faaaoga e lea alii ia fualaau faasaina. Sa ia teena taumafaiga uma e faatonutonu ai ma aoai. Sa pepelo ma faalogogata. E eseese ma le atalii faamaumau oa, aua o lenei atalii e lei foi mai i le fale i lona lava loto malie. Sa pueina o ia e leoleo ma faamalosia ai ona fetaiai ma taunuuga o ana amio. E lua tausaga o lagolago e matua o Pili lana polokalama e togafitia ai o ia, ma sa iu ina toe manuia mai fualaau faasaina. I se aotelega, sa taua ai e le tuafafine o Pili: “Ou te manatua e matua tulaga ese lava ou matua. E le i solomuli lava lo laua alolofa ia Pili, e ui lava ina sa la inoino pe le i fiafia foi i le mea sa ia faia ia te ia lava ma lo latou aiga. Peitai na lava lo la naunau atu i lo latou aiga e lagolagoina Pili i soo se auala e mafai, ina ia fesoasoani e aveeseina mai o ia i taimi faigata ma avatu ai i se tulaga mautu. Sa ola i la’ua i le talalelei a Keriso e sili atu ona loloto, sili atu ona maaleale, ma le lautele e ala lea i lo la’ua alolofa i le ua se ese.”20
Aua tatou te faasausili ae ia faafetai ma le lotomaualalo pe afai e usiusitai a tatou fanau ma ava i a tatou aoaoga e uiga i auala o le Alii. I matua loto mafatia, o e amiotonu, maelega, ma loto tatalo i le aoaoina o a latou fanau lē usiusitai, matou te fai atu ia te outou, o loo leoleo i latou e le Leoleo Mamoe lelei. Ua silafia e le Atua ma malamalama foi o Ia i lo outou faanoanoaga loloto. O loo i ai le faamoemoe. Ia faamafanafana outou i upu a Ieremia: “E fai le taui o lau galuega” ma e “toe foi mai lau fanau mai le laueleele o le fili.”21 Ou te molimau atu ma tatalo ai i le suafa o Iesu Keriso, amene.
Faamatalaga mai le The Prodigal Son, saunia e Wilson Ong, Faaaloaloga a le Falemataaga o Talafaasolopito a le Ekalesia
The Prodigal Son, saunia e Wilson Ong, Faaaloaloga a le Falemataaga o Talafaasolopito a le Ekalesia; ata na tusia e Cody Bell
Prodigal Son, saunia e Clark Kelley Price © 1989 IRI; ata na tusia e Cody Bell
Ata na tusia e Paul Mann; Ata na tusia e Matthew Reier