O Se Tatalo ma le Onosai
Sa ou ola ae i Mekisiko faatasi ma nai ou tei, lo’u tina, ma lo’u tinamatua. O aso uma lava pe a uma ona fai a’u meaaoga ma a’u feau, ona ou alu loa lea e taalo lakapi. Sa ou fiafia i le lakapi! Sa ou faafoliga o lo’u vae taumatau o le tasi au lea, ae o lo’u vae agavale o le isi au lea.
O se tasi aso a o o’u taalo lakapi, sa faafuasei ona tau le mafai ona ou manava. Sa ou malolo mo ni nai minute, ae sa faafaigata lava ona ou manava. Sa matuai o’u mai lava o lea sa tatau ai ona ou alu i le falemai.
O le potu o le falemai sa toatele nisi tamaiti sa i ai, ae sa ou misia lo’u aiga ma lagona ai le matuai tuua toatasi. E ui ina sa le o a’u o se tagata o le Ekalesia i le taimi lena, ae sa ou talitonu i le Atua. O aso uma sa ou tatalo ai ina ia ou malolo, ae nai lo lena sa atili ai le leaga. Sa manatu fomai o le a ou le ola.
Sa iu ina faate’a au e fomai ou te alu i le fale, ae sa tatau ona ou faaaluina le tausaga na sosoo ai i le moega. E tele ni fualaau sa ou inuina ma o aso uma e fai ai o’u tui e lua. Ae sa i ai lava se tatalo i lo’u mafaufau ma lo’u loto. Sa ou ta’u atu i le Tama Faalelagi afai ou te toe malosi, o le a ou auauna atu ia te Ia i aso o totoe o lo’u olaga.
O se tasi la aso a o faitau sa’u tusi i le moega, sa faafuasei ona pau la’u tusi i luga o le fola. Ina ua ou punou ifo e aumai i luga, sa ou iloa ai sa ou manava lava e pei ona sa masani ai. Sa ou toe faapauina le tusi. Ma sa ou toe aumaia foi i luga e aunoa ma se faafitauli!
Sa ou aluese mai le moega. O le taimi muamua sa ou niniva, ona ua leva ou te le’i toe savali na o a’u. Sa ou tilotilo atu i le faaata ma vaaia ai sa ou ataata. Sa ou iloa sa ou maua se tali mai le Tama Faalelagi.
O aso uma lava talu mai lena aso, ua ou taumafai ai e fai se mea e faailoa atu ai lo’u loto faafetai i le Tama Faalelagi. Ina ua ou matua, sa avea a’u ma se fomai e fesoasoani e tali ia tatalo a isi tamaiti. Ma o le taimi nei o loo o’u taumafai e auauna atu i le Tama Faalelagi i lo’u valaauga i le Ekalesia.
O tali i tatalo e le o taimi uma e faigofie ai ona oo mai, ma e le o taimi uma foi e oo vave mai ai. Ae ou te iloa e tali mai le Tama Faalelagi ia tatou tatalo. Na te silafia o tatou manaoga, ma Na te silafia le mea e sili ona lelei.
Ata na tusia e Dan Burr