O Auala e Lima e Mulimuli ai i Fautuaga a Taitai Perisitua

Sa fetalai atu le Alii i Ona soo ma aoaoina tagata i Ona vaitaimi. O loo Ia faaauau pea ona faia i lenei vaitaimi.

ata na tusia e Steve Bunderson, e le mafai ona kopiina

E ui e le o iinei le Faaola faatasi ma i tatou i le tino, ae ua Ia valaauina tagata o Lana Ekalesia e taitaia ma taiala i tatou, ma ua Ia fai mai ia i tatou e mulimuli i a latou fautuaga a o latou mauaina mai e ala i le Agaga Paia.

O ai e mafai ona maua faaaliga e faatatau ia te a’u?

E mafai ona oo mai faaaliga ia te oe lava ia e ala i le Agaga, ma e mafai foi ona oo mai e ala i taitai perisitua ua vaetofia mo valaauga faapitoa e fesoasoani latou te maua ai le taitaiga mo i latou ua tuuina atu i le latou tausiga.

O le perofeta e maua faaaliga mo le Ekalesia aoao; o le Au Peresitene o le tou Eria e maua faaaliga mo le tou eria; o le tou peresitene o le siteki mo le tou siteki; ma le tou epikopo mo le tou uarota. E oo mai faaaliga i nei tagata taitasi i o latou valaauga, ae e oo mai uma mai le puna lava e tasi: o le Tama Faalelagi.

O le a le uiga o le lagolago o o tatou taitai?

O le siiina o o tatou lima i le sikuea pe a tatou lagolagoina tagata i se faaaliga faaletino ua tatou tautino atu e faamamalu, faaaloalo, ma lagolago i latou a o latou saili e faalautetele o latou valaauga. O le mulimuli i fautuaga a o tatou taitai o se tasi lea o auala e mafai ona tatou lagolagoina ai i latou. Ua i ai i taitai le poto ma se vaaiga, ma o a latou aoaoga ua fuafuaina e fesoasoani tatou te ola ai i le talalelei. O le usiusitai i a latou fautuaga, o le a faateleina ai lo tatou faatuatua ma faamalolosia ai a tatou molimau.

O auala nei e lima e mafai ona e mulimuli ai i fautuaga a ou taitai perisitua:

1. Auai i konafesi aoao, faalesiteki, ma faaleuarota. Atonu e te manao e aumai se pepa ma se peni e tusi ai ni faamatalaga. A o e faalogo atu i ou taitai perisitua, tusi i lalo soo se musumusuga e te lagonaina, mea e tatau ona e faia, po o suiga e tatau ona e faia i lou olaga. Ia mautinoa e tusi ni faamatalaga pe a latou lauga atu ia te oe i isi fonotaga a le Ekalesia po o faatalanoaga foi.

2. Tatalo ia maua se molimau i fautuaga latou te tuuina atu. O le Agaga Paia e mafai ona molimau atu ia te oe o fautuaga ua tuuina atu o le finagalo lea o le Tama Faalelagi.

3. Fai ni fuafuaga patino i ni auala o le a e faaaogaina ai fautuaga i lou olaga. Mo se faataitaiga, ua fautuaina e perofeta tagata o le Ekalesia ia o e aooga. O a ni au fuafuaga? Pe o le a e alu i le kolisi po o se aoga mo matata eseese? O le a lau vaega o le a aoaoina? O fea o le a e alu ai? O a ni mea o loo e faia i le taimi nei e sauniuni ai ina ia taliaina oe i le polokalama ua e manao i ai?

4. Ia tausisia lou tulaga aoaoina. Aoao fautuaga o le taimi nei a taitai o le Ekalesia e ala i le faitauina o tusi a le Ekalesia. Mo le Malosi o le Autalavouo se punaoa lelei tele lea. O le Liahona o loo i ai saunoaga a perofeta ma aposetolo. Afai e i ai se tusi o talafou a le tou uarota po o le paranesi, faitau soo se savali o loo tuuina mai ai e ou taitai perisitua i le lotoifale. O le mea e sili ona taua, ia toe iloilo saunoaga a taitai i le konafesi aoao aupito lata mai.

5. Amata loa lava. O nisi taimi e faaosoosoina ai i tatou e tolopo le mulimuli i fautuaga a o tatou taitai. A uma ona e faia ni fuafuaga faapitoa e faaaofia ai lena fautuaga, ia fai vave loa.

E Mafai Ona E Lagolagoina Taitai i le Lotoifale e Ala i le:

• Taliaina o le valaau e auauna atu.

• Fesoasoani pe a talosagaina ai.

• Saunia mo lesona e ala i le faitauina a o le’i oo i le taimi [e fai ai].

• Tatalo mo ou taitai.

• Auai i le vasega.

Sa Ou Faia le Lui a le Au Epikopo

Ina ua lata i le faaiuga o le vasega lona fitu, sa amata ona ou lagonaina e pei sa i ai se mea sa misi ia te a’u. Sa ou tatalo i po taitasi ma sa auai i le lotu, ae sa le lava lea. Sa ou mafaufau e faitau le Tusi a Mamona e vaai ai pe moni lava le Ekalesia, ae sa ou fefe tele ou te aluese mai lo’u tulaga mafanafana ina ia ou mautinoa ai.

Sa luiina e lau au epikopo le matou autalavou ia faitauina e le aunoa e i matou lava ia tusitusiga paia. Sa tuu lava ou te faia, ae sa ou lagonaina sa le i ai so’u taimi.

Ona ou maua lea o se lagona malosi lava e faapea e manaomia ona ou faitauina le Tusi a Mamona e iloa ai pe moni. Sa ou lagonaina e pei e le mafai ona ou maua le toafilemu pe afai ou te le faitauina.

Sa amata ona ou faitauina ma e le’i taitai oo i le afa o le mataupu muamua ae ou lagonaina le malosi o le Agaga, lea ou te le’i lagonaina muamua faapea. Sa ese le toafilemu; sa ou manao ia tumau ai pea ia te a’u e faavavau.

Ou te faafetai ona sa musuia o’u taitai e luiina i matou e faitau le Tusi a Mamona. E saunia lava i latou i taimi uma e fesoasoani pe a i ai so’u faafitauli faaleagaga. Ua ou iloa e moni le talalelei, aua ua faamanuiaina tele ai a’u.

Camryn G., Iuta, ISA

Lesona i Aso Sa

Autu o le Masina Lenei: Perisitua ma Ki o le Perisitua

Auai i le Talanoaga

I le masina atoa o Iuni o le a outou aoao ai e uiga i le perisitua i tou vasega o Tamaitai Talavou ma le Aoga Sa ma korama o le perisitua. Mafaufau po o a ni au fesili o i ai e uiga i le perisitua, pe faapefea ona aafia ai lou olaga, ma o a foi ni auala e mafai ona e lagolagoina ai taitai perisitua. Faasoa atu au fesili i ou matua po o taitai o le autalavou ina ia mafai ona latou fesoasoani ia e malamalama lelei ai i aoaoga faavae o le perisitua i au lesona i lenei masina. Atonu foi e te manao e mafaufau i ni aafiaga sa e maua lea sa faamanuiaina ai e le perisitua lou olaga. Tusi i lalo ou lagona, ma fuafua e faasoa atu i isi i le fale, i le lotu, po o luga o faasalalauga o aga fesootai.

taumatau mamao: ata na tusia e Eldon Linschoten