E Tatau Ona Tatou Tatalo—Nei!
Jeffery R. McMahon, Alberta, Kanata
Sa fo’i mai lo matou aiga mai se malologa i le faaiuga o le vaiaso i le Peace River, Alberta, Kanata, pe a ma le lima itula i matu o le matou fale i Edmonton. Ua leva ona pogisa laufanua i matu, ma e ui ina feula malosi mai e le savili le kiona i le auala i o matou luma atu, ae sa foliga mai sa filemu ma to’a mea uma i totonu o le matou veni.
Na faafuasei ona mumu mai se moli lapatai faapopole tagata i le pito i luma o le taavale. Na o le faatasi ona ou vaai muamua i ai, i tausaga ua leva, ae o lenei ua ou popole i se mea o le a tupu. Sa vave ona ou tapeina le eletise i mea uma sa le manaomia, ae e le’i umi ae pe le afi o le taavale. Sa ou iloa na matou malaga mo ni nai kilomita talu ona matou pasia le taulaga mulimuli, ma o le a tele isi kilomita ona faatoa matou taunuu lea i le taulaga e sosoo ai. Sa ou le manatuaina foi le taimi mulimuli sa matou fetaui ai ma se taavale i se tasi o ia itu.
A o matou iloiloina ma le faatopetope a matou filifiliga, sa fai mai le ma atalii e 11 tausaga le matua, o Casson, “E tatau ona tatou tatalo—nei!” E le’i atoa lelei le tolu masina talu ai, na pagatia ai Casson i le maliu o lona uso laitiiti, o le sa maliu i le kanesa. E fia ni tatalo sa molimoli atu e Casson i le lagi a o ia tauivi ia malamalama i le pogai ua maliu ai lona uso e toatasi?
Sa ma le mautinoa ma lo’u toalua po o le a le tele o lona malamalama i a maua faamalamalamaga e faapea, e tatau ona ogatasi a matou tatalo ma le finagalo o le Tama Faalelagi, ae le faapea ia tusa ai ma o matou lava manaoga. Ae o lea, ua ia faaali mai ia i matou le mea na matou manaomia o le liliu atu i le Tama Faalelagi ma faaauau pea ona i ai le faatuatua ia te Ia.
E le’i leva ona uma le matou tatalo, ae amata ona sulugia le matou faaata e faasaga i tua i moli o se taavale o loo agai mai. E le’i umi ae tu i o matou luma atu se loli umi pusa mafola e alu agai i Edmonton.
A o ma feiloai ma le avetaavale, sa ia fesili mai i se gagana mamafa faaFarani Kanata, “E i ai ni tamaiti i totonu o le veni lena?” Ina ua ou fai atu ioe, sa fai mai o ia, sa ia pasia se isi taavale o loo tu i ni nai maila i tua atu, ae sa le’i tu ai ona o le leaga o le tau. Ae peitai, a o latalata mai o ia ia i matou, sa ia lagonaina se uunaiga uiga ese o loo i ai se ma fanau o loo manaomia lana fesoasoani. O le taunuuga, sa ia tu mai.
I ni nai minute sa faapea ona ia toso atu ai le matou taavale i luga o lana loli, ma matou agai atu loa i Edmonton. O se malaga maalilili le toe foi atu, ae sa faamafanafanaina i matou i le faamautinoaga matagofie e faafofogaina e le Tama Faalelagi ia tatalo. O nisi taimi e oo mai ai tali i ni auala tatou te le mafaufauina, ae o nisi taimi o tali e sili atu ona malolosi ma tuusao nai lo mea e mafai ona tatou mafaufauina. Pau lava le mea e manaomia o le i ai o lo tatou faatuatua ma le faalagolago i le Alii.