Mataupu Faavae E Iva mo se Faaipoipoga ma se Aiga Faamanuiaina
Sa taumafai Emi Atamu o Uosigitone, ISA, e filifili po o le fea o gaoioiga o le a sili ona lelei mo lana fanau laiti e toatolu, ae o se talanoaga ma lona tina sa suia ai lona mafaufau. “Ae a pe a e tuuina atu i lau fanau se mea e sili atu nai lo na o le aoaoina i taaloga po o siva?” O le fesili lea a le tina o Emi. “Ae a pe afai o le nonofo i le fale, e mafai ai ona latou aoao ia lagona atili le Agaga?” Ona faamanatu atu lea e lona tina ia te ia le mea na aoao mai e Peresitene Dieter F. Uchtdorf, Fesoasoani Lua i le Au Peresitene Sili, e uiga i le mana o le taula’i atu i sootaga autu o le olaga (tagai, mo se faataitaiga, “E Uiga i Mea e Sili ona Taua,” Liahona, Nov. 2010, 19–22).
Sa tatalo Emi ma lona toalua o Peleti, e uiga i ai ma mafaufau loloto i lenei fautuaga ma lagona ai o le a avea o se manatu lelei mo lo laua aiga le faaalu faatasi o se taimi tele i le fale. Mo le tasi le tausaga, sa latou filifili ai e faataatia ese siva ma taaloga; ae sa latou saunia ni taumafataga, aoaoina pese o le Peraimeri, asiasi i falemataaga, ma taaalo i fafo. “Sa mafai ona lagona e le ma fanau le Agaga … aua sa ma faaaluina le taimi e nonofo ai ma faalogo,” o le tala lea a Emi. Atonu o le la fanau e le o fetu maualuluga ia o taaloga ma siva, o lana tala lea, “ae ua i ai sa latou molimau i le Faaola.”
Sa tatalo Emi ma Peleti ia iloa le auala e tatau ona la mulimuli patino ai i fautuaga a perofeta o aso nei, ma o le faia faapea sa faatagaina ai i latou e maua musumusuga mo le latou aiga. Fai mai Emi o lenei musumusuga sa oo atu ai i lona “taimi na sili ona mitamita ai i le avea ma se tina.”
I le “O Le Aiga: O Se Folafolaga i le Lalolagi,” ua otooto mai ai e perofeta o aso nei ni mataupu faavae autu mo aiga malolosi, ma faatotonugalemu i le talalelei: “O faaipoipoga ma aiga manuia, e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.” (Liahona, Nov. 2010, 129). O aoaoga nei mai taitai o le Ekalesia, faataitaiga mai le soifuaga o Iesu Keriso, ma ata vaaia e aumai ai ia i tatou se vaaiga vavalalata i nei mataupu faavae e iva ma auala e mafai ona tatou faaaogaina ai.
Faatuatua
“O le faatuatua o le talitonu ma le faalagolago ia Iesu Keriso e taitaia ai se tagata e usiusitai ia te ia.”
Taiala i Tusitusiga Paia, “Faatuatua,” scriptures.lds.org.
Mai Taitai o le Ekalesia
“I le avea ai ma matua, ua poloaiina i tatou e aoao a tatou fanau ‘ia malamalama i le aoaoga faavae o le … faatuatua ia Keriso le Alo o le Atua soifua’ (MF&F 68:25). …
“E leai lava se isi mea e mafai ona tatou maua ai le faamautinoaga atoatoa. E leai lava se isi faavae i le olaga e mafai ona aumaia lea lava filemu e tasi, olioli, ma le faamoemoe. I taimi le mautonu ma faigata, o le faatuatua e moni lava o se meaalofa faaleagaga e tatau i ai a tatou taumafaiga aupito silisili. E mafai ona tatou tuu atu i a tatou fanau le aoaoga, lesona, afeleti, o faatufugaga, ma mea o le olaga nei, ae afai tatou te le tuuina atu ia i latou le faatuatua ia Keriso, ua nao sina mea itiiti lava ua tatou tuuina atu ia i latou.”
Elder Kevin W. Pearson o le Fitugafulu, “Faatuatua i le Alii o Iesu Keriso,” Liahona, Me 2009, 38.
Tatalo
“O le tatalo o le faatinoga lea e fesootai ai le finagalo o le Tama ma le loto o le tamaitiiti. O le faamoemoega o le tatalo e le o le suia o le finagalo o le Atua, ae ia faamautu ai mo i tatou lava ma mo isi ia faamanuiaga ua uma ona finagalo le Atua e foai mai, ae seiloga tatou te ole atu mo ia mea.
Bible Dictionary, “Prayer.”
Mai le Soifuaga o Iesu Keriso
Ina ua faamaea e le Faaola le aso muamua o Lana galuega ia sa Nifae, sa silasila atu o Ia i foliga o tagata ma vaaia ai sa “maligi o latou loimata, ma ua latou pulatoa mai ia te ia e peiseai ua latou mananao e ole mai ia te ia ina ia faatasi pea o ia ma i latou mo sina taimi umi teisi atu.” Sa faatumulia o ia i le agaalofa ma fetalai atu, “E i ai ea ni isi o ia te outou ua mama’i? … Aumai i latou iinei ma o le a ou faamaloloina i latou.”
Ona o atu lea i luma o le motu o tagata ma o latou tagata mama’i, ma sa faamaloloina uma i latou taitoatasi e Iesu. Ma o i latou uma—2,500 alii, tamaitai, ma tamaiti—sa tootutuli i lalo i vae o Iesu ma tapuai atu ia te Ia.
Ona poloai atu lea o le Faaola ia avatu tamaiti laiti ia te Ia ma poloaiina le motu o tagata e tootutuli i lalo. Sa tootuli o Ia i le lotolotoi o tamaiti ma amata ona tatalo. Sa lofituina le nuu i le olioli ina ua faalogo i Lana tatalo, ma sa latou molimau atu faapenei: “E le’i vaaia lava e le mata, pe na faalogoina foi muamua e le taliga, le tetele ma le ofoofogia naua o mea e pei ona matou vaai ma faalogo o fetalaia e Iesu i le Tama.” (Tagai 3 Nifae 17:1–17.)
Salamo
“O le salamo e faatatau i se tagata ua liliuese mai le leaga ma ua liliu atu lona loto i le Atua.”
Taiala i Tusitusiga Paia, “Salamo, Salamo” scriptures.lds.org.
Mai Taitai o le Ekalesia
“O le asō, o se aso lelei lea e salamo ai nai lo taeao. … “E tusa lava pe faamagaloina i tatou i se taimi mulimuli ane, e le mafai e le Alii ona toefuatai mai aafiaga lelei e ono i ai lo tatou salamo i le aso nei ia i latou tatou te alolofa i ai ma auauna atu i ai. E patino lava le ootia o lena mea mo matua o fanau laiti. I na uluai tausaga o le soifua e i ai avanoa mo le faafuaitinoina ma le siitiaina o agaga ia e le mafai ona toe foi mai. Ae e oo lava i le tamamatua atonu ua misia ni avanoa ma lana lava fanau atonu, e ala i le filifili e salamo nei, e mafai ona ia faia mo fanau a lana fanau le mea sa tatau ona ia faia mo lana fanau.”
Peresitene Henry B. Eyring, Fesoasoani Muamua i le Au Peresitene Sili, “Aua le Faatuai,” Liahona, Ian. 2000, 40.
Faamagaloga
“O le faamagalo atu o lona uiga lautele o se tasi o mea e lua: (1) Pe a faamagalo e le Atua tagata, na te faaleaogaina pe tuuese se faasalaga manaomia mo le agasala. … (2) A faamagalo atu e tagata le tasi ma le isi, ua latou taulimaina le tasi ma le isi i le alofa FaaKeriso.”
Taiala i Tusitusiga Paia, “Faamagalo,” scriptures.lds.org.
Mai Le Soifuaga o Iesu Keriso
Sa fai atu se Faresaio e igoa ia Simona i le Faaola e afio atu la te talisua. A o fai le la talisuaga, sa alu atu se fafine o lē sa lauiloa i le aai o se tagata agasala ia Iesu ma tu latalata atu ma tagi. Sa tootuli o ia i vae o le Faaola ma mulumulu i ona loimata, faamago i lona lauulu, ma uu ona vae i le suauu manogi. Sa matau atu e Simona le fafine ma mafaufau, “A se perofeta lenei, po ua iloa e ia lenei fafine ma lana amio, ua ia pai atu ia te ia.”
Ona faliu atu lea o le Faaola ia Simona ma aoao atu ia te ia se faataoto:
“O tagata e toalua sa la nono mai tupe i le tagata e toatasi: sa nono mai le tasi i tenari e lima selau, e a le tasi e limagafulu.
“Ua leai ni a la tupe e toe avatu, ona faamagalo fua lea o ia ia te i laua uma.”
Ona fesili lea o Iesu ia Simona, “Po o ai [le au nono tupe] e tele lona alofa i [le tagata sa nono mai ai le tupe]?” Na tali Simona ai lava o le tagata nono lea na faamagaloina le aitalafu telē atu. Ona faliu atu lea o Iesu i le fafine ma fetalai atu ia Simona, “Ua e iloa ea le fafine nei? …Ua faamagaloina ana agasala e tele aua ua alofa tele mai o ia: a o le ua faamagaloina i ai se mea itiiti, ua itiiti foi lona alofa.” Ona Ia folafola atu lea i le fafine, “Ua faamagaloina au agasala. … Ua e ola i lou faatuatua; ina alu ia oe ma le manuia.” (Tagai Luka 7:36–50.)
Mai Taitai o le Ekalesia
“Ia manatua, ua faatumulia le lagi ia i latou o loo i ai le tulaga tutusa lenei: Ua faamagaloina i latou. Ma latou te faamagalo atu.”
Peresitene Dieter F. Uchtdorf, Fesoasoani Lua i le Au Peresitene Sili, “O Le e Alofa Atu e Alofaina Mai,” Liahona, Me 2012, 77.
Faaaloalo
“Ia mafaufau e agavaa i se tulaga maualuga.”
Merriam-Webster’s Collegiate Dictionary, 11th ed. (2003), “respect.”
Mai Taitai o le Ekalesia
“A oo ina tele naua mea tatou te iloa i le lalolagi ma ua mamao lo tatou o ese atu ma vaaia ai le televave ma le maoae ua i ai le lalolagi i nisi o taimi, ona faatupulaia ai lea o lo tatou lotofaafetai mo le avanoa ua avea ai i tatou o se vaega o se mea e mafai ona tatou toomaga i ai—o le aiga ma le auaiga ma le faamaoni a’ia’i o e pele ia i tatou. Ua tatou iloa le uiga o le fusia faatasi i tiute, o le faaaloalo, ma le avea ma se vaega. Ua tatou aoaoina e leai lava se mea e mafai ona suitulaga atoatoa i le sootaga manuia o le olaga faaleaiga. …
“Uso e, ia tatou taulimaina ma le mamalu ma le faaaloalo o tatou taitoalua. O i latou o a tatou soa e faavavau. Tuafafine, faamamalu i a outou tane. Latou te manaomia le faalogo mai i se upu lelei. Latou te manaomia se ataata faaleuō. Latou te manaomia se faailoa atu tausaafia o le alofa moni.”
Peresitene Thomas S. Monson, “Alofa i le Aiga—Fautuaga mai lo Tatou Perofeta,” Liahona, Aok. 2011, 4.
Alofa
“O le tuuto ma le alofa loloto. … O le faataitaiga silisili o le alofa o le Atua i lana fanau o loo maua i le togiola lē gata a Iesu Keriso.”
Taiala i Tusitusiga Paia, “Alofa,” scriptures.lds.org.
Mai Le Soifuaga o Iesu Keriso
I le afiafi e sosoo ma Lona Faasatauroga ma ni itula a o lei oo i tiga i Ketesemane, sa faia ai e Iesu Keriso le Paseka mulimuli ma Ona Aposetolo. Ina ua maea le talisuaga, sa “silafia e Iesu ua oo mai ona po e tuua ai e ia lenei lalolagi, a e maliu atu i le Tama, ua na alofa i ona tagata o i le lalolagi, ua ia alofa ia i latou ua oo i le gataaga.” Ona tulai lea o le Faaola mai le talisuaga ma fusi o Ia i le ie soloi. Sa Ia faatumuina se apa i vai ma mulumulu ai vae o Ona soo. Ina ua ma’ea, sa Ia tuuina atu ia te i latou se poloaiga fou:
“Ia outou fealofani; faapei ona ou alofa atu ia te outou. …
“O le mea lea e iloa ai e tagata uma lava o o’u soo outou.” (Tagai Ioane 13:1–5, 34–35.)
Agaalofa
“O lona uiga moni lava, ‘o le mafatia faatasi.’ O le isi uiga o le faaali atu o le alofatīgā, alofaootia, ma le alofa mutimutivale mo se isi.”
Taiala i Tusitusiga Paia, “Tigaalofa,” scriptures.lds.org.
Mai Le Soifuaga o Iesu Keriso
O loo i ai i tusitusiga paia le tele o tala o loo faaalia ai e le Faaola le tigaalofa i isi. O le ootia ai i le tigaalofa, sa Ia faapupulaina ai ni alii tauaso se toalua (tagai Mataio 20:30–34), sa Ia faamamaina se lepela (tagai Mareko 1:40–41), ma sa Ia faamaloloina tagata mama’i uma i le motu o tagata sa Nifae (tagai 3 Nifae 17:6–9).
I se tala e patino le ootia, sa oo atu ai Iesu i le aai o Naina, lea sa Ia vaaia ai le fata mai o se maliu o se alii talavou—“o le tama e toatasi o ia a lona tina, o ia foi le fafine ua oti lana tane.” Ina ua silasila atu le Faaola i le toatele o tagata mai le aai lea sa faatasi ma le tamaitai ma le loloto o lona faavauvau, ona “mutimuti alofa lea o Ia ia te ia.” Sa pai atu o Ia i le fata na taoto ai le alii talavou ma fetalai atu, “Le taulealea e, ou te fai atu ia te oe, Ina tulai ia.” Sa vave ona nofo a’e i luga le alii ma amata ona tautala, ona tuuina atu lea o ia e le Faaola i lona tina mafatia. (Tagai Luka 7:11–15.)
Galuega
“O le faaaogaina o se tagata i le faaletino pe faalemafaufau ae maise i taumafaiga lagolagoina mo se faamoemoega.”
Merriam-Webster’s Collegiate Dictionary, 11th ed. (2003), “work.”
Mai Taitai o le Ekalesia
“O le aoaoina o fanau i le olioli o le galue faamaoni o se meaalofa sili o meaalofa uma e mafai ona e tuu atu ia i latou. Ua ou talitonu o le tasi o pogai o le tetea o ulugalii i ona po nei ona o le le mafai e matua ona aoaoina atalii i o latou tiute o le galue mo le tausia o o latou aiga ma olioli i le lui ua aumaia e lenei tiute. E toatele foi nisi ua faatalale i le totōina i totonu o loto o afafine le manao e aumaia le matagofie ma le tulaga lelei i o latou aiga e ala i le faafatuaiga. …
“[O lo’u tamā] sa faatumauina ia te a’u le olioli ma le talisapaia o le galue faamaoni ma saunia au mo lena taimi i lou olaga o le a ou maua ai le tiutetauave o le tausia o lou lava aiga. O mataupu faavae na aoaoina ai a’u e lo’u tamā poto e uiga i le galue faamaoni, e uiga i le le maimauina, e uiga i le lotopulea, ma e uiga i le vaai ua maea se galuega, o le faavae lea o lou manuia.”
Elder L. Tom Perry o le Korama a Aposetolo e Toasefululua, “O le Olioli o le Galue Faamaoni,” Liahona, Ian. 1987, 64.
Faafiafiaga
O gaoioiga maloloina, ma mama e faafou ai le malosi ma le agaga o tagata uma e aafia ai.
Mai Taitai o le Ekalesia
“E pei ona tuuina atu e le galue faamaoni i le malologa lona suamalie, o gaoioiga faafiafia lelei o le uo ma o le soa tumau lea o le galue. O musika, tusiga, faatufugaga, siva, talafaatino, afeleti—o ia mea uma e mafai ona saunia ai ni faafiafiaga e faatamaoaiga ai le olaga o se tagata ma atili faapaiaina ai. Ae o le taimi lava foi lea, e tau le manaomia lava ona tau atu faapea, o le tele o mea ua pasia e avea ma faafiafiaga i aso nei o mea masoa, faatufanua, vevesi, faape-mafaufau, ma faamaumau taimi. O le mea e ese ai, o nisi taimi e tele se galuega faigata e alu i le tau sueina o gaoioiga faafiafia lelei. A suia ia faafiafiaga mai le mama i le faatiapolo, e avea o se mea e faaumatiaina le olaga faapaiaina.”
Elder D. Todd Christofferson o le Korama a Aposetolo e Toasefululua, “Toe Manatunatuga i se Olaga Faapaiaina,” Liahona, Nov. 2010, 17.
Ata na tusia e Craig Dimond ma Cody Bell © IRI
Mai le agavale: ata na tusia e Craig Dimond, Cody Bell, Christina Smith © IRI; O Le Alii o Iesu Keriso saunia e Del Parson © IRI
Mai le Agavale: Ata na tusia e Craig Dimond, Cody Bell, ma David Stoker © IRI; O Le A Ou Talitonu, saunia e Liz Lemon Swindle, e le mafai ona kopiina
Mai le agavale: ata na tusia e Steve Bunderson, David Winters, ma Matthew Reier, e le mafai ona kopiina; Faamatalaga auiliili mai ia Iesu o loo Mulumuluina Vae o Aposetolo, na saunia e Del Parson © IRI