Auaunaga i le Ekalesia
Auauna Atu ia i Latou e i ai Manaoga Faapitoa
Ina ua tofia Lynn Parsons e avea ma se tagata faapitoa mo manaoga faapitoa i le Siteki o Hurst Texas, sa manao o ia e faataunuu lona valaauga i se auala o le a faamanuiaina ai olaga o tagata o lana siteki, aemaise lava o tagata e i ai manaoga faapitoa ma o latou aiga.
O se tasi o mea muamua lava sa fai e Lynn o le toe iloilo o faamatalaga o lona valaauga i le LDS.org (lds.org/callings/disability-specialist), ma sa ia faaaogaina le Tusitaulima 2: Taitaiina o le Ekalesia ia malamalama ai i aiaiga faavae aloaia a le Ekalesia e faatatau ia i latou e i ai manaoga faapitoa. O le uepisaite o Punaoa mo Manaoga Faapitoa (lds.org/disability) na avea foi ma se punaoa. Sa fesoasoani ia te ia e malamalama ai i manaoga faapitoa eseese ma avea o se punaoa e faasoa atu i isi tagata o lana siteki.
O loo taua i le Tusitaulima 2, “E mafai e le au epikopo po o le au peresitene o le siteki ona valaau se tagata faapitoa o le uarota po o le siteki e fesoasoani i tagata taitoatasi ma aiga.”1 O le LDS.org o loo aumai ai nisi faamatalaga e uiga i lenei valaauga, o loo faamalamalama mai ai “o le matafaioi o le tagata faapitoa mo manaoga faapitoa o le fesoasoani lea e faafaigofie le faateleina o le auai ma le faaaofia o tagata o le Ekalesia e i ai manaoga faapitoa.”2
Faatasi ai ma lenei malamalamaaga, fai mai Lynn na manao o ia e “fesoasoani i taitai e faataunuu o latou valaauga e ala i le sueina o meafaigaluega latou te manaomia e auauna atu ai ia i latou e i ai manaoga faapitoa.”
Sa maua foi e Lynn ni faamatalaga e ala i punaoa i le alalafaga ma le atunuu, le Initoneti, ma tagata o le uarota ma le siteki o e e i ai se poto masani o le galulue faatasi ma tagata e i ai manaoga faapitoa. E le o taimi uma na te iloa ai le mea e liliu i ai mo faamatalaga po o se fesoasoani, “ae afai e te matuai sailia le tali e ala i le tatalo,” sa ia fai mai ai, “o le a musuia oe i le mea e te tagai i ai e maua ai lau tali.”
Malamalama i Manaoga
E galue foi Lynn ina ia malamalama i manaoga o taitai o lana eria e fesootai i manaoga faapitoa. Ina ia faia lenei mea, sa ia talosagaina ai taitai o lana siteki ia auina atu se tusi i epikopo e logo ai i latou e uiga i lona valaauga ma o loo avanoa o ia e fesoasoani atu. Sa latou feiloai foi ma le au peresitene o le Peraimeri a le siteki ia malamalama ai i luitau, ma sa ia faia ni fuafuaga e feiloai ai ma isi vaega o taitai. “Sa ou manao i tagata ia iloa le mea e mafai ona latou maua ai se fesoasoani.”
O le faailoaina atu i tagata o le siteki ua saunia o ia e auauna atu, sa le’i umi ae maua e Lynn ni avanoa e fesoasoani ai i taitai. I totonu o ni nai masina muamua talu ona valaauina o se tagata tomai faapitoa mo tagata e i ai manaoga faapitoa, sa valaaulia ai o ia e fono faatasi ma se aufono a se uarota e talanoa e faatatau i uiga o se manaoga faapitoa patino. Sa auauna atu o ia i isi auala, e pei o le fesoasoani atu i se faiaoga ia malamalama i le auala e aoao ai se tamaitiiti e faaletonu le mafaufau [autism] ma fautua atu e tatau ona valaauina se faiaoga fesoasoani o le Peraimeri ina ia mafai e se tamaitiiti e i ai manaoga faapitoa ona auai i le vasega.
O le agai ai i luma, ua fuafua ai Lynn e fesoasoani atu i taitai e faataunuu o latou valaauga. A o ia faia lenei mea, ua fesoasoani ai o ia i tagata o lana siteki e mulimuli i le faataitaiga a le Faaola o le alofa ma le aapa atu i isi, e aofia ai i latou e i ai manaoga faapitoa.
Ata na tusia e Beth M. Whittaker