Faapaleniina o Talafaasolopito o le Ekalesia
O le faamaoniga lofituina o talafaasolopito o le Ekalesia e lelei ma faatupu faatuatua. I lona talaaga atoa, e matuai musuia lava.
Ou te fiafia e faitau i faamaumauga o talafaasolopito e uiga i uluai tagata o le Ekalesia o e sa tuua o latou aiga ma, faatasi ai ma le osigataulaga tele, na faapotopoto faatasi ai ma le Au Paia. Mo au o a latou tala e ese le faalaeiau, ma ou te maua mai le malosi sili mai le aoaoina o mea sa latou oo i ai e ola ai ma faaali ai lo latou faatuatua e ala i le mulimuli i perofeta ma le faia o mea faigata. A e faitau i mea sa latou faia, i se isi itu o lau vaega i le olaga e foliga mai e le faigata tele.
Ata na saunia e Cody Bell
Ou te fiafia i le talafaasolopito o le Ekalesia. O loo ou faitauina le tele o na mea i le taimi nei nai lo se isi lava taimi, ma ua ou iloa ai le matagofie ma le faatupu faatuatua. Mo se faataitaiga, e ese le ofoofogia o mea na ausia e uluai faifeautalai, i le leai o ni punaoa sa i ai e ese mai se faatuatua mumu ma se molimau lea na mafua ai ona latou faia mea maoae. O na faataitaiga e fesoasoani ou te malamalama ai e mafai ona ou faia mea faigata pe afai e faaauau pea ona ou fafagaina lo’u faatuatua ma la’u molimau. Ua faafia ma fia, ona faamalosia la’u molimau a o ou vaaia mea na tutupu i lenei galuega tele a o taavale atu i luma.
Vaaia o le Taimi ua Tuanai mai le Taimi Nei
O le talafaasolopito o se auala sili lea e musuia ai ina ia saunia oe lava faaleagaga. I lo tatou talafaasolopito e mafai ona tatou iloa ai i latou o e sa saunia i latou lava faaleagaga ma manumalo ai, ma i latou o e sa pauu ese ona sa latou le saunia faaleagaga mo le mea na oo mai. E mafai ona tatou aoao o le tuuto i le talalelei, tatalo, ma le molimau e mafai ona fesoasoani ia i tatou e fai mea maoae ma e tatau ona tatou faaaluina le taimi e atiina ae ai o tatou itu faaleagaga a le o lea o le a tatou mafatia i taunuuga.
O tagata o loo i lo tatou talafaasolopito o ni tagata masani lava e pei o i tatou, o le toatele o i latou sa faia ni mea e sili atu ona le masani ai. A o latou sailia uma le atoatoa, sa le’i atoatoa i latou. O na uluai tagata o le Ekalesia sa i ai o latou faafitauli ma sa tauivi ma mea e pei foi ona tatou i ai i aso nei. Ae ou te maua le malosi i le iloa o na luitau, o na taumafaiga mo le atoatoa, sa i ai mo se taimi umi lava.
E moni, ua suia le lalolagi i le augatupulaga e tasi pe lua ua mavae atu. O le Initoneti ua tuuina ituaiga uma o faamatalaga i tumutumu o o tatou tamatamailima—lelei, leaga, moni, le moni—e aofia ai faamatalaga i le talafaasolopito o le Ekalesia. E mafai ona e faitau i se vaega tele e uiga i lo tatou talafaasolopito, ae e taua le faitau i ai ma malamalama i ai i le talaaga. O le faigata o nisi faamatalaga i le initoneti o le, ua see ese ma le anotusi ma e te le iloa lelei ai le ata atoa.
O faamatalaga o loo taumafai e faamaasiasi le Ekalesia e masani ona mamafa pitotasi ma lē talafeagai. E tatau ona tatou sailia punavai e sili atu ona le faaituau e faamatalaina o tatou talitonuga ma lo tatou talafaasolopito. O nisi uepisaite e ese le agaga-faalealofa ma e mafai ona maoae i le ala latou te tuuina atu ai faamatalaga. Vaavaai mo punavai e i ai tusitalafaasolopito ua faamamaluina ma faaaloalogia, e tusa po o i latou o ni tagata o le Ekalesia pe leai.
O nisi tagata talavou e tetei ma lē talitonu i tusi ma mea e tetee-i Mamona i luga o le Initioneti ona latou te le’i saunia i latou lava e tetee atu i ai. Atonu e le’i lava se taimi na latou faaaluina i le itu faaleagaga e sauni ai ma faamalolosia ai i latou lava mo soo se mea e ono oo mai. A oo mai aafiaga o le olaga e faafuasei ai ona oo mai faigata mo i latou, e taua lo latou faia o na mea faavae lea tatou te talanoa soo i ai: faaauau ona suesue i tusitusiga paia ma fai ni tatalo anoa ma lo tatou Tama Faalelagi. O na mea faavae e saunia ai tagata mo ituaiga uma o faigata, e aofia ai tusiga e tetee ai i Mamona o le a latou tau i ai i luga o le initoneti.
O Le Manaomia o le Paleni
E pei o soo se mea lava, e tatau ona e taulimaina talafaasolopito o le Ekalesia ma le paleni. Sa avea lava le Ekalesia moni ma se vaega toaitiiti, ma e foliga mai sa avea lava i tatou o se taulaiga o sauaga. O le a tatou feagai lava ma faigata, ae e sili ai lo tatou faamasani i ai. O le auala sili e taulima ai o le mautinoa lea o loo tatou agavaa i tatou lava ma ia malosi le tatou molimau. Afai o loo e faaaluina le taimi i luga o uepisaite o loo faitioina ai le Ekalesia ma lona talafaasolopito nai lo lou alu i tusitusiga paia, o le a faapea ona e le paleni, ma o na mea le lelei o le a i ai se aafiaga malosi tele ia te oe. Afai e talafeagai lelei lou paleni, o le a leai so latou aafiaga ia te oe.
I o’u lava tausaga o le talavou, sa ou le malamalama atoa ai i le taua o le atiina ae faaleagaga. Atonu sa sili atu ona ou fiafia i le avea ma se tagata taalo lakapi lelei nai lo le avea ma se tagata aoga lelei o le Tusi a Mamona. Faatoa ou maua i totonu o le misiona, e pei o le toatele o alii talavou, na ou maua ai lena liua ma malamalama ai i le uiga moni o le fiafia. O le olioli, le filemu lea e sau mai le auauna atu i le Alii, mai le suesue ma mai le tatalo, mai le alofa atu ma le fesoasoani atu i isi. Sa ou iloa ai afai ou te le ano i na vaega o lo’u olaga, o le a faapena foi ona le ogatasi ia mea e pei ona tatau ai. Afai ou te faia na mea, o mea uma lava e foliga mai o le a sili teisi atu ona paleni.
A o ou tausisia ia paleni lo’u olaga, e mafai ona ou vaai tonu atu i le talafaasolopito ma malamalama ai e faapea e ui o le toatele o o tatou augatama e tatau ona faamemelo i ai, ae o i latou foi o ni tagata ola ma sa latou faia foi ni mea sese. E i ai ni vaega faanoanoa pe fenumiai i le tatou talafaasolopito lea tatou te saili ia malamalama lelei i ai, ae o nisi o nei fesili atonu e le mafai ona taliina i lenei itu o le veli. Ma e le afaina lena mea.
Afai e sau sa’u uo ma se fesili faamaoni e uiga i se mataupu e le ioeina e tagata mai le talafaasolopito o le Ekalesia, ou te faia le mea sili ou te mafaia e tali ai. Ma afai ou te iloaina sa ia faaaluina se taimi tele i lena itu, o le fesili muamua ou te fia fesili atu ai ia te ia o le: “O e faitauina le Tusi a Mamona? O fai au tatalo? O e tausia lou olaga ia paleni ina ia mafai ona e puipuia oe lava mai afā o le olaga?”
O le faamaoniga lofituina o le talafaasolopito o le Ekalsia e lelei ma faatupu faatuatua. Afai e te filifili e faaalu le tele o lou taimi e suesue ai na o mataupu e le ioeina e tagata e uiga i lo tatou talafaasolopito, o le a e vaaia ai ni nai pitofilo, ae o le a e misia ai le ie soosoo atoa. Ma e manaomia lava ona e malamalama i le ata atoa o le tatou talafaasolopito. I lona talaaga atoa, e matuai musuia lava.
Mo se faataitaiga, o Iosea Samita o se tagata maoae. Pe sa atoatoa o ia? E leai. O tatou uma lava o tagata ola. Ae ina ia faitau le Tusi a Mamona ma faaaliga i le Mataupu Faavae ma Feagaiga ma ia iloa mea sa ia faia i le toefuataiina o le Ekalesia i sina vaitaimi puupuu o se molimau ofoofogia lea. E tofu uma perofeta ma luitau ma faigata, ma e le o se mea e tatau ona faateia ai i tatou e faapea sa vaai Iosefa Samita i faigata ma sa le fiafia ai nisi o tagata. Ae sa manino lava o ia o se perofeta a le Atua.
E Leai Se Taimi e Pei o le Taimi Nei
E le mafai ona ou vaaifaalemafaufau i se taimi sili atu i le avea ai ma se tagata o le Ekalesia. Ina ua ma faaipoipo ma lo’u toalua, e 13 malumalu sa i ai i le Ekalesia atoa, ma sa i ai se ma sini e asiasi atu i ia malumalu taitasi. O lenei ua tusa ma le 140 malumalu, ma o le a le mafai ona ma asiasi atu ia i latou uma. O nei fua uma o le Toefuataiga—o perofeta ma aposetolo, malumalu, perisitua, o le Tusi a Mamona, o faaaliga—o ni faamanuiaga maoae i o tatou olaga. Ma ua mafai ona oo mai ona o le Faaola, ona o Lana talalelei, ma ona o le fuafuaga a lo tatou Tama.
Atonu o a’u o se tagata faatauvaa i le tele o itu, ae ua lava lo’u poto e iloa ai e alofa lo’u Tama Faalelagi ia te a’u. E alofa o Ia ia i tatou uma. O i tatou moni lava o Ona atalii ma afafine. E finagalo moni o Ia tatou te toe foi atu ia te Ia. E le puleaina e Ia mea itiiti uma o auiliiliga o o tatou olaga. O se vaega lena o le faagasologa o lo tatou tuputupu ae. E finagalo o Ia ia tatou iloa ma faaaoga le faitalia ma taulimaina ia faigata. Ae, o le mea moni, ua mafai ona ou vaaia Lona aao i lo’u olaga ma i olaga o lo’u aiga. Ma ou te faafetai ona o le tatou mauaina o lenei aafiaga i le olaga nei, aua ou te fiafia i le olaga. E tele mea e sese, ae e sili atu foi le tele o mea maoae i le olaga, ma ou te faafetai i le avea ai o i tatou ma tagata faaleagaga, ua tatou maua ai le avanoa e o mai ai i le lalolagi ma maua se tino ma aoao i mea o le a fesoasoani ia i tatou i le faavavau.
E faamanuiaina o tatou olaga i le talafaasolopito aua tatou te maua ai se avanoa e toe tepa ai i tua. O nisi taimi e faigata ai le toe tepa i tua i o tatou lava olaga, ae e ala i le talafaasolopito e mafai ai ona tatou toe tepa i tua i olaga o isi ma aoao mai i mea ua faamanuiaina ai i latou. Ma e mafai ona tatou fesoasoani ia i tatou lava e aloese mai measese i le faia o mea na faamanuiaina ai o tatou augatama.