Fesili & Tali

“O lo’u tuagane e i ai lona faafitauli i ponokalafi. O loo la galulue i ai ma le matou epikopo, o lea ou te manao ai e lagolago atu ia te ia, ae ua aafia ai lo’u faatuatuaina o ia. E faapefea ona ou taulimaina lenei mea?”

E manaia tele lou manao e lagolago lou tuagane. O le a ia manaomia lau faamalosiauga. Talu ai ua uma ona faailoa atu ia te oe e lou tuagane lenei luitau i lona olaga, ma ua e iloa ua filiga o ia i le faailoaina atu, o lena ua ia faia se laasaga tele agai i luma i le toe mauaina o lou faatuatuaga. O le faatoilaloina o le faalilolilo ma le taufaasese e masani lava ona i ai faatasi ma lenei luitau o le faamaoniga lea o le tele o le agai i luma. O lenei mea e mafai ona fesoasoani e amata ai ona e tuuina atu le faatuatuaga tele ia te ia. O le a umi se taimi e manaomia ia matua atoatoa ai lena faatuatuaga. Ae e le faapea ai la, e le mafai ai ona e alofa pea ia te ia. E mafai ona e tatalo mo ia, fai ma faataitaiga lelei ia te ia, ma fai isi mea e fesoasoani ai ia te ia.

Taumafai e aua le faamasinoina o ia. Afai na te lagona le faamasinoina o ia, atonu o le a sili atu ona le lelei ona lagona e uiga i ona tauiviga, ma o lena mea o le a faigata atili ai ona sui o ia. E tofu tagata uma ma vaivaiga; o le tasi lena o mafuaaga na saunia ai le Faaola le Togiola. Faalagolago i le Alii ma i le mea moni e faapea, e ala atu i le salamo, e mafai ai e lou tuagane ona sui ma faamagaloina.

Talu ai ona ua e iloa o loo galulue lou tuagane faatasi ma lou epikopo i lenei faafitauli, e mafai ona e talanoa i lou epikopo e uiga i lenei tulaga. E mafai e ia ma ou matua ona fesoasoani ia te oe ia iloa le mea e fai. I le avea ai ma se aiga e mafai ona outou galulue faatasi e fesoasoani i lou tuagane. E mafai ona fai se anapogi a le tou aiga e fesoasoani ai ia te ia (tagai Mataio 17:21), lea o le a saunia ai se talipupuni e tetee atu ai i faaosoosoga.

Manatua: E toatele foi tamaitai talavou o loo tauivi ma vaisu o ponokalafi. O lea foi fautuaga o le a faaaoga i sootaga ma tuafafine.

Ia Faailoa Atu le Faanoanoa ae Le o le Teenaina

O ponokalafi e le o se mea laitiiti, ma e matuai tiga tele le iloaina o loo avea ma se faafitauli mo se tasi e te alofa i ai. Taumafai e faamagalo o ia, e tusa lava pe o le a le umi e alu ai. Ia manatua foi o le faamagalo atu ma le faatuatuaina e eseese. O ana amioga e mafai ai e lou tuagane ona toe maua lou faatuatuaina o ia. Faailoa atu le faanoanoa ae le o le teenaina. E manaomia ona ia lagonaina e le o tuua na o ia, ma e tatau ona tali atu o ia mo ana amioga. A e alofa ia te ia e ui lava i lona vaisu, o le a ia vaaia le faamoemoe ma maua le malosi e faatoilalo ai le faafitauli.

Bethany A., 18 tausaga, Arisona, ISA

Faamalosiau ia te Ia

Ou te iloa e faigata pe afai ua tuu uma lou faatuatuaga i se tasi ona ia faatautala lea i ai. O le mea muamua lava e ou te faia o le tatalo ma ole atu i le Tama Faalelagi mo le malosi e talanoa atu ai i lou tuagane. E mafai ona e talanoa ia te ia i vaiaso taitasi pe o a mai o ia ma sue ni mau mai au suesuega patino o tusitusiga paia o le a uunaia ai o ia e saili se fesoasoani. O le lagolagoina o ia e taua, e ui lava ua ia aveesea lou faatuatuaga. Tau atu ia te ia e alofa le Alii ia te ia ma o le a faamagaloina o ia. Faamanatu ia te ia le viiga e 104, “O le Alofa o le Tama, Auina mai ai le Alo.” Tau atu ia te ia na togiola Iesu Keriso mo a tatou agasala, ma afai tatou te salamo, e mafai ona tatou alualu i luma i se vaega itiiti i aso uma.

Naomi B., 16 tausaga, Minesota, ISA

Lagolago o Ia

Faaali atu ia te ia e te alofa ia te ia e tusa lava po o a ana filifiliga ua fai. Lagolago o ia i laasaga uma o le ala ma faailoa atu i ai lou fiafia ona o lona galue i ai. O le a le vave ona oo mai i le taimi e tasi le faatuatuaina, ae o loo taumafai o ia ia toe maua mai. Ua i ai o ia i le ala sa’o, ma a o ia aoao i le ala e mafai ona toe faalelei ai, e mafai ona e aoao e toe faatuatuaina o ia.

Kirstin M., 17 tausaga, North Carolina, ISA

Ia Loto Faamagalo

O le mana o le Togiola, afai e te faaaogaina, o le a fesoasoani i lou tuagane ia maua le malosi e salamo ai. O le Togiola e saunia ai le faamalologa mo i latou o e ua faamanualia, faapea ma i latou o e ua faia ni filifiliga tiga. Ia loto faamagalo i taimi uma ma vaai ia alofa nai lo le liliu atu i le ita.

Seth B., 18 tausaga, Misuri, ISA

Tatalo mo le Taitaiga

Tootuli ma ole atu mo le taitaiga mai lo tatou Tama Faalelagi ma talanoa ma lou tuagane ma tatalo faatasi ma ia. A o tatou faamaualalo i tatou lava i luma o lo tatou Tama Faalelagi, Na te “le tuuina atu outou i le tofotofoga e sili i se mea ua outou lavatia, a e saunia foi faatasi ma le tofotofoga se mea e sao ai, ina ia outou lava oono” (1 Korinito 10:13). O le a fesoasoani o Ia i lou tuagane ina ia malosi e tetee atu i faaosoosoga ma ia filifili le mea tonu i taimi uma.

Alejandra B., 22 tausaga, Kalefonia, ISA

Aua Nei Vaivai le Faamoemoe

Aua nei vaivai le faamoemoe i lou tuagane, aua o le taimi lenei ua sili atu ona ia manaomia ai lona aiga. O le faatoilaloina o se faafitauli o ponokalafi ua lava le faigata ia te ia e aunoa ma le popole i le aveesea o le talitonuga a lona aiga ia te ia. Sa ou oo foi i le faafitauli lena, ma o loo ou galue ia salamo ia agavaa ai e alu atu i le malumalu ina ia faamauina i lo’u aiga. Sa ou fefe i taimi uma po o le a se tala o le a fai mai e o’u matua pe faapefea foi ona latou taulimaina a’u. Sa ou te’i ina ua ou iloaina lo latou lagolagoina o au ma lo latou naunau e ofo mai ia te au ni fofo e fesoasoani ai ia ou toe lelei. Afai o loo fefautuaai lou tuagane ma lona epikopo ma faia se taumafaiga faamaoni, o loo ia agai i luma.

Alii talavou mai Alaska, ISA

Faalagolago i le Alii

O le Togiola e le mo na o a tatou agasala, ae e mo o tatou faigata ma tauiviga foi. Ua silafia lelei e Iesu Keriso ou lagona—sa Ia lagonaina muamua. Aapa atu ia te Ia, ma o le a e maua ai Lona aao o loo faatalitali mai e sii ae oe i luga. Tatalo mo Lana fesoasoani ma le mana faamalolo o le Togiola. Tau atu i le Tama Falelagi ou atugaluga, popolega, ma faamoemoega uma mo le faafitauli. O le mea e sili ona taua, aua le na o le faatalitali mo se vavega e tupu—fai se mea. Suesue i tusitusiga paia, saili mo le poto o le a faapea ona fesoasoani ia te oe, ma ia tumau le faatuatua o le a lelei mea uma.

Megan A., 19 tausaga, Arisona, ISA

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Se Auala e Fai Ai Faasa’oga

Peresitene Dieter F. Uchtdorf

“Na silafia e lo tatou Tama Faalelagi ae tatou te lei o mai i lenei olaga faaletino o le a i ai malosiaga faafeagai o le a taumafai e faaosooso i tatou ina ia o ese mai lo tatou ala, ‘aua ua agasala tagata uma lava, ma ua le oo i le viiga mai le Atua.” (Roma 3:23). O le mafuaaga lena na Ia saunia ai se auala mo i tatou e faia ai faasaoga. E auala mai i le faagasologa o le alofa mutimutivale o le salamo faamaoni ma le Togiola a Iesu Keriso, e mafai ai ona faamagaloina a tatou agasala ma o le a tatou “le fano, ae maua le ola e faavavau.” (Ioane 3:16).”

Peresitene Dieter F. Uchtdorf, Fesoasoani Lua i le Au Peresitene Sili, “Na o Ni Nai Tikeri Lava,” Liahona, Me 2008, 60.

Fesili o le a Sosoo Mai

“O le a le mea e tatau ona ou mafaufau i ai i le taimi o le faamanatuga?”

Auina mai lau tali a o lei oo i le aso 15 o Iulai, i le liahona.lds.org, i le i-meli i le [e-mail], pe meli mai i le:

Liahona, Questions & Answers 7/13

50 E. North Temple St., Rm. 2420

Salt Lake City, UT 84150-0024, USA

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.