Sa Ou Tatalo mo Oe
Ami Hranac Johnson, Idaho, ISA
Talu ai nei sa ou tuai laitiiti atu ai i le lotu ma faananati atu ai i totonu o le falesa a o usu le pese amata. Ina ua ou savali atu i totonu o le falesa, sa ou vaaia na fai si tumu nai lo le mea e masani ai. A o ou tilotilo solo i le toatele o tagata asiasi, e lua ni mea sa ou iloaina: o le polokalama a le Peraimeri a le matou uarota, ma ua nofoia lo’u nofoaga masani.
Sa faavave ona ou saofai i le laina nofoa muamua i nofoa o le vaega faaopoopo o le falelotu, ae fetaui lava ma lo’u vaaia o le taunuu mai o se tina talavou ma lana tama tama e lua tausaga na tau tatai mai, ae o loo sii mai lana tama teine e ono masina le matua. Sa ou matauina e le’i mulimuli mai ai i totonu lona toalua. Ina ua ou vaavaai solo i le falesa, sa ou vaaia ai sa tuu mai o ia i luga o le tulaga, na saofai i le piano—o ia sa taina pese mo le Peraimeri.
Talu ai ou te nofofua, e masani ai lava ona ma saofafai ma se uo faapitoa. Ae o le aso lena sa le’i i ai la’u uo i le matou nuu. Sa ou mafaufau atonu e manaia le saofafai faatasi ma le tina talavou lenei ma lana fanau, o lea sa ou fesili atu i ai pe mafai ona ou nofo faatasi ma i latou. Sa malie i ai le tina. I le sauniga atoa, sa ou fiafia ai e fesoasoani i le tama laitiiti ma faalogologo i tamaiti o le Peraimeri.
I le faaiuga o le sauniga faamanatuga, sa faalagolago mai le tina ma fai mai, sa tatalo o ia mo a’u i lena taeao. Sa ou faatalitali e faalautele mai lana faamatalaga. Fai mai o ia, sa tatalo ina ia ou sau i le lotu, ma ia ma nonofo faatasi ma fesoasoani atu ia te ia. Sa mafaufau o ia atonu o le a le mafai ona ia gafatia le i ai i le sauniga atoa pe a na o ia. Sa ou lagona le lofituina ona sa ou tali i lana tatalo faatauvaa, na faia i lena lava taeao.
Ou te iloa e sili atu le loloto o le alofa o le Alii ia i tatou, nai lo le mea moni tatou te iloaina. O le molimauina o se tali i se talosaga faatauvaa na aoao mai ai ia te au se lesona mamana, ma ou te mautinoa na aoaoina foi e le aafiaga lenei tina. Ina ua ou fesili atu pe mafai ona ma saofafai faatasi ma lenei uso, ou te le’i mafaufau i le avea ma se tali i se tatalo—sa ou faia lava le mea o le a ou manao foi e fai mai e se tasi mo a’u pe ana ou i ai i lona tulaga.
E moni lava e faafofoga ma tali mai le Tama Faalelagi i a tatou tatalo, e oo lava i tatalo ia e foliga mai e faatauvaa.